كلامك غريب ولا عرفنا يجيك منين = انا افهم رفيقي حين ما اسمع هناديبه
ولكن سقها واجرد السيف ابو حدين = وماجا ببالك ياطويل الشنب جيبه

يامرزوق لاتنكر ونطلبك حلف ايمين=ترى السالفه ماهيب طرق(ن) تغنيبه
تحاول تبا سرق العرب والعرب صاحين=لو الضيف مايطمع بحلة معازيبه

انا مااجحد الواقع واحب الكلام الزين = ورجلي طريق ٍ يرفع الراس تمشي به
ولاهوب طبعي سرقة العالم الممسين = ولكن علامك تخطي العلم وتصيبه

تحب الكلام الزين لكن بين وبين=تبسم وانا خابرك بسنون تركيبه
ترى اللي يقص الدرب يعرف طريقه وين=ومن لايقص الدرب يقبل ويقفيبه

وانا خابرك رجال تلعب على الحبلين = وصاحبك لاقفا قمت تشذب عراقيبه
تخيل البروق اللي تكاشف لها اسبوعين = ولالك حلال ٍ حروة السيل تنويبه

تحاول تشوه سمعتي ياغراب البين=وانا ما اعرف النمه وانا ما اعرف الغيبه
ترى ماخلق مخلوق في داخله قلبين=تعوّذ من الشيطان لا اجيك بمصيبه

حقيقه ماقول انك بكل المزايا شين = ولكن قلبك فيه شيّ ٍ معشي به
تركد على هونك وخل الحكي بهوين = انا مثلكم لو ضيّع الدرب ماسطيبه

وانا خابرك ما انته بغاوي من الغاوين=تلوى وكن العلم ما انته بداريبه
عسى الله يردك للهدى مير قول آمين=طريق الشقا ماانته بمجبور تمشيبه