البارحه جتني اهجوسي مراسيل = وشبيت ناري من زناد وفتيله
قم يا فهد قرب علي المعاميل = واسمع كلامي والمعاني جزيله
هات الدلال وعطني البن والهيل = والنجر دنه لين نوحي عويله
ابا احكر الدله وهات الفناجيل = للكيف حزه والنشاما تجيله
والباب خله فاتح ٍ للرياجيل = ما صك باب امزبنين الدخيله
اما يجي ضيف يبا حايل الحيل = في حلة ٍ تكرم ولا هي بخيله
بعيد دار ويستحق التكاميل = وانكمله كل العلوم الجزيله
والا من الجيران يبغى التعاليل = في بيت من يفعل فعول ٍ جزيله
الجار له حشمه وتقدير بالحيل = حسن الجوار من الخصال الفضيله
محمد المرسول وصاه جبريل = حتى من الميراث كاد يعطيله
واللي بعدها شاهد الجدي وسهيل = وافهم كلامي وانت ضلعك يشيله
بين النجوم البارزه في سماء الليل = دليلة ٍ يا وضحهم من دليله
ترى المراجل ما تجي بالتساهيل = ما كل رجال يعدي الطويله
واحرص على خوة ازحول المشاكيل = الرجل يعرف من ملامح زميله
ولا تسند الخوه على بارد الحيل = عزمه ضعيف وحيلته ما تحيله
واحذر من خدوش العيال المهابيل = حتى ولو كانوا من ادنى القبيله
اهل النفاق مروجين الاقاويل = رجالهم ترثع على الهرج خيله
في وقت حاجتهم يجونك مقابيل = واليا ادبروا ما عاد فيهم عقيله
اضعاف الانفس خايبين المحاصيل = ما يكسبون الا الردى والفشيله
يشنون راع الطيب راع المفاعيل = ينسون معروفه بيومه وليله
ما يعرفون الحق والعدل والميل = ولا يتبعون الا مضيع دليله
لو حللو من دمهم بالتحاليل = لقوا فصيلتهم من اردى فصيله
هذي وصايا قلتها بالتماثيل = الكل منها فا لاصايل اصيله
شرحتها لك يا فهد بالتفاصيل = واحفظ وصاتي والوصايا ثقيله
والمعذره لن كان قصرت فا لقيل = الهرج يكفي منه زبدة قليله
واختامها مني صلاه وتهاليل = على النبي ما لاح برق المخيله

وسلامتكم...