اطول اجبالها اجبال السراه وعسير = الله اللي بسطها ووجد اجبالها
خلها تنطلق والماد ماهو قصير = كل عقده ترى صاحبك حلالها

كل ماقلت كبف اوضاعكم؟ ..قلت غير=واثر الاوضاع يامرزوق يرثى لها
كل يومين وانت مضوّي الك بعير=مير سنع جمالك وانت جمّالها

البساط احمدي قدم الغني والفقير = من بسط سفرته للناس حيّالها
وانت يومك مرشّح بالسفاره سفير = ماكربت الحزام وقلت حنّالها

انت ياصاحبي مرزوق وضعك خطير=تبسط السفره وبعدين تشتالها
ماتذّرى بقومً ماتخيل الصفير=دام عندي بيوت العز وظلالها

تدعي وانت ماتعلم خفايا الضمير = البضاعه خبرها عند دلالها
كان هذا مردّك جعل خيرك وفير = ماغبطناك فالدلّه وفنجالها

ليلة العيد قالوا بيّنه من عصير=مير ماتنتؤكّد غير بهلالها
وفيه إجابه بسيطه للسؤال الكبير=الكحيله تعرف عيون خيّالها