الفارس ابن الفارس الليله نوى رقيَّ الجبال=ماهو يردّه واحد ٍ مقرود .. واكتب يا قلم
معنا دراهم ما تقارن بالجنية وبالريال=يوم ان قلبك (حاسد محسود) واكتب يا قلم

صحيح فارس لكن الليله مربط فـالحبال=دايم كذا لا صرت انا موجود واكتب يا قلم
جنيه فوق اريال جامعها حرام(ن) مع حلال=طبيعة(ن) لاهل القلوب السود واكتب يا قلم

الفارس اللي معه يا ابن الناس حيلة واحتيال=ما يربطه حامد والا محمود .. واكتب يا قلم
ان كان تاكل فالحرام وتملي البطن بخبال=لا تحذف اللي يعبد المعبود .. واكتب يا قلم

.
..

ترى الحمول الكايده ما شالها غير الجمال=وش حيلتك يالحاشي المفرود واكتب يا قلم
وراس حربه ياكل بيمناه يا راع الشمال=والله ثم برقا وروق شهود واكتب يا قلم

الناس تنظر للجنوب ونظرتك يم الشمال !!=من عقلك المقفول والمعقود .. واكتب يا قلم
خذيت لقمة فمك من فم العجوزة والعيال=لكني بخبر فوقك ابن سعود .. واكتب يا قلم

وراس حربه وين ما لقّا على درب العدال=والحبل في راسك معي مقيود واكتب يا قلم
ما فوقي الا ربي الرزاق يا راع الهزال=وزادي زاد بالجزلات زود واكتب يا قلم