وضح كلامك زين يامناحي عشير الغانمين=أكثر عباد الله من الضيقه على أصحابه غشي
أحيان جاهل يامناحي وأغلب أيامك رزين=وأحيان أقول الشاعر مناحي بفكر محششي

اقصد حبايبنا الذي كانوا من اول طيبين=واليوم عاقلهم وجاهلم يجيك محنفشي
ياكبره ياذياب لا قلت اخوياك محششين=وتصير مثل الرادي اللي فالتبيس يوشوشي

أذياب مايرضا الكلام الشين من ماض السنين=حتى ولوجابه (كبير القوم) لجل يفرفشي
يالي حذفت أعمامتك تبشر لك بتيسن سمين=لو كان مابين الرفاقه حق ذبح وحق شِي

واوجد حالي يالرمك واهل القنا والمارتين=يوم البدو تسري ظلام الليل والا تغبشي
وفي مذهب عتيبه ماتلقى التيس ولد ام القرين=هاذي دخيلك لا تسمّعها مطيري وقرشي!!

ياوجد حالي يالرجال اللي لهم مذهب ودين=حتى (الصلب) قامت تلزق بالعرب ماتختشي
حنا ترانا نعطي الرجال قدره زين زين = يامناحي المذكور قدرك لا تضيق وتنتشي

خل (الصلب) والله ما احنا من لحاهم مستحين=وحنا ماغنانا على دقة فريد الاطرشي
ياربعي العتبان مافيكم بخيل الا ثنين=اذياب.. والثاني لياجوه الضيوف يخشّشي