أنا شاعر مع أهل العرف ما أجيب الطوال أقصار= وأعرف قبورها وجبالها وأعرف نصايبها
وألا يا صاحب ٍ توزن لنا الحبه مية قنطار = تجيب علوم يا مرزوق مدري كيف جايبها

ياماجد مانشك بقدرتك ياضايع الاشوار = بنيت الدار لكن تالي الرحله تخربها
انا ماقلتها مازح ولا ارميها بلا معيار = يابو نيّه سماويه على كيفك تقلبها

أنا بنذرك يا مرزوق عن ما قلت أخذ إنذار= وبعض علوم تطلبني لوني جيت ما أطلبها
مدام إن الزغل ممنوع لا تزعل ولا تحتار = ولو تنشب تعرف اللي يفك حبال منشبها

كبر راسك على عمك غريبه ويش هاللي صار؟ = نسيت الناقه اللي كنت ادررها إلك واحلبها
ياماجد ماضمنت الك السلامه والفلك دوار = مشيت بسكّة ٍ فاقت حياياها عقاربها

ليا كنت أنته التاجر تراي مورد التجار = وجيه الناس لوتغضب نوينا ذبح مغضبها
لعلك يا وسيع العرف منت الثعلب المكار = ولن قاومت أنا لذيابها خافت ثعالبها

ترى والله لو منت برفيق ٍ لي وقبله جار = علاقتي معك يا مخلف النيات لشطبها
مصيبه مامعك قدره والى شان الزمن تحتار = كبر جسمك ضعف عقلك ولاتحسب عواقبها

تدور إبك الرحى وعلومك الليله علوم كبار= ولن جبت المصايب مت قبل تصير جالبها
تبا تأخذ بثارك منت عارف كيف تأخذ ثار = أثرك أعمى بصيره والحضاره ما تواكبها

ترى بدري عليك انك تعلم لعبة الشطار = تحدى لك رياجيل ٍ عطيبات ٍ مضاربها
وانا وان قاله الله لحشرك سوات حشر الفار = من اجل انك تتوب من اللقافه ماتقربها