نموت مانطلب كرامه من ورى كف الشحوح = وجروحنا تبطي ويبطي فالبشر تاثيرها
الله ولي الناس رب الكون مغرق قوم نوح = أم الظروف اللي تدس السم يلعن صيرها

لا والله الا رحت مرواح القطا خل المدوح = ياللي توردها ولاانت بعارف ٍ تصديرها!!
انت عليك ملاحظة والناس ما كل ٍ سموح = بعض الرجال ايغشها ياصاحبي تفكيرها.!!

الخير في عرض السما والبرق فالمزنه يلوح = وأنته مسيرتنا الكريمه لا تغير سيرها
المدعي مجنون وشهوده طلع فيهم قدوح = والبدو تزعل لو ربطنا كلبها مع عيرها

البرق يبرق فالسماء وانته على الدنيا شفوح = لكن عن طول العلوم ايسدنا تقصيرها!!
حنا مع القدرة على الطاله مبنين الصروح = والناس تدري عن كبار اهل البلد وصغيرها؟؟