المشاركة الأصلية كتبت بواسطة فهد علي العازمي (المشاركة 1049897) تراكم ما عليكم زود وايضا مالحق نقصان=وهذي كلمتن ياطيبها ياطيب مبداها والا يا اهل الشمال انتم بعد طقيتوا البيبان=لزوم إن الدلال تفوح والضيف يتقهواها

حكايت ليله وليله بعدها كان يا ماكان = سمعنا عنها واليوم يا الطيب قريناها
نعز الضيف ونزبن الدخيل ونقعم العدوان = واضنك تعرف علوم العرب واللي بعد جاها

حكاية ليلية وليلة تسولفها مع الورعان=أنا ما أعرف سوالفها ولا ادري وشهو اقصاها
أنا ماقلت فيك قصور والوزنة على الميزان=ولا كل آدمي لا شمّر ذراعة تهقواها

ثقافه مثل ما نسمع ونعرف خاتم سليمان=ولا هو عيب والدنيا على الفطره حضرناها
انا ما قلت غير الحق والدعوى لها برهان = على حسب العوايد والسلوم اللي عرفناها

ثقافتنا على صم الرمك ومقابل الفرسان=علوم المرجلة والعز فالماقف ورثناها
صلاح انته تدل الدرب والا لاحقك نسيان= سوات اللي يبي يكْحَل عيونه لينه اعماها

اعرف يا طويل العمر لا رابح ولا خسران = تحد النفس لا كنك معودها على اقصاها
تركد لا تطير وجعبتك ما دونها جنحان = على هونك مدام ان الحقايق ما كشفناها