والله انك ماتنام الليله الا وانت ضايق =مير ذوق الضرب من حد المصاقيل الشطيره
المواتر عشر ماجا فوقهنه غير سايق=شايفٍ بصمة يدينه من على سلك الضفيره

وين اعدك في شيوخ القــــــوم والا فالعلايق=اعتقادي واعتقاد الناس قسمك فالاخيره
المطر يسقي ويحيي ما يساهم فالحرايق=والرجل هذاه اظنه شاربً له كاس بيره

لاتعد اللي ليا منه نظر فيك يتهايق =في عيونه ماتساوي يارعد حبة شعيره
روح جمّع فالهروج وروح جمّع فاللفايق=طبعك اللي مشتهربه بين اهل شبه الجزيره

عمر مدح الروح ما يرفع سماسرة البطايق=السنتهم طولها مترين وايديهم قصيره
قبل تغزي قوم ولم للغزو باس وطرايق=لا تقف معزول ما عندك سلاح ولا ذخيره

لايق المشلح علي ولا لبست الجوخ لايق=يوم غيري يحزم اللثمه ليا من شاف غيره
لاتشيل الحمل دامك للحمل منته بطايق =غيرك اللي للحرايب والغزو شباب نيره

اللحا مقدارها محفــوظ وعلوم الرقايق=نعذرك فيها ولا تنلام من قوً الحشيره
عد واغلط فالطعون وفالجروح وفالفلايق=ثم روح اضحك وقول انام وعيوني قريره

ياضعوف الطيب وهبه مايجيكم بالسرايق =ماوجد للطيب راعي عند عميان البصيره
مادريت انك تهذري لنت نيم ولنت فايق =لين حطيت الصغيره في موازين الكبيره