ياسابقي صكوا عليـك القبايـل = الحضر والبدوان راحوا نحيـة
قومٍ من العارض الى سوق حايل = لاقرب جد ولا بهـم مرحميـة
ياقومنـا لاتكثـرون العـذايـل = أشوف لي شـقٍ توسـع رفيـه
ياعنك جتنا من عزيز القبايـل = حكام نجـد القطّـع الصيرميـة
لو أنها من نازحيـن الحمايـل = ماسلت لو شره تلاحق ضويـه
العمر بيد الله منشـي المخايـل = حقٍ على الراعي صلاح الرعية
نرد الخطر والعمر لابد زايـل = عقب الخطر نشرب ركايا عذية
ان كان مانرخي رقاب الأصايل = والا منازلنـا غـدت جاهليـة
بدهم الفرنج مطوعة كل عايـل = كسبٍٍ لنـا ماقـط جتنـا حذيـة
ومصقلات تودع الـراس مايـل = من صنع مفراسٍ وساعٍ هويـة
ان كان ماتـرث يدينـا فعايـل = يحرم علينـا شربـة الشاذليـة
والزعفران وحب سمر الجدايل = وحط الشحم وسط البيوت الذرية
الحر لاصكت عليـه الحبايـل = يشهر وتاتي له من الله فضيـة
عاداتنا نروي حـدود السلايـل = بايماننا من محتضر كـل هيـه
حريبنا يسهـر ونومـه ملايـل = واللي نسى يـومٍ نجـدد كويـه
وصلاة ربي عد مـازال زايـل = على نبي الديـن سيـد البريـة