أوراق شــاعــــر

[هلال العتيبي]

واقدارنا اللي مع بعضنا رمنا
والهاجس اللي من غلاتك تشكل
م احب اكون الا كما ما اتمنى
يعني على ماقالوا الكل فالكل
طرقت باب الود منــا ومنـــا
الين متني من كثر مااطرقه كل
يابوصلة نبضي وشمعة زمنا
مافيه مخلوق بغرامــه ينكل
امااهدني ورد الهوى دون منا
والا تذاكر رحلتــي واتوكــل

[هلال العتيبي]

في إحدى جلسات الانتظار المملة كتبت
على جوالي هذه الخربشة
ارجو ان تنال ولو اليسير من رضاكم

مشوار ودروبك عنا
واحساسك قطوف وجنا
اقراك حرف من وميض
واكتبك حرف من سنا
واقول من قلبي اقول
طيب وانا؟؟

ياما على دربك مشيت
وياما سهرتك مااشتكيت
احفظ بيوتك بيت بيت
واقراك حرف من وميض
واكتبك حرف من سنا
واسخر احساسي ثنا
واقول واللهفة تقول
طيب وانا؟؟

اخالف ظنوني واجيك
وابيع نفسي واشتريك
واحط نبضي في يديك
واقراك حرف من وميض
واكتبك حرف من سنا
واجمع لك اوقات الهنا
واقول واحساسي يقول
طيب وانا؟؟ا

طيب وانا؟؟
ايوه انا
اكيد انا
انا انا
ابيك تاخذني اكيد
هناك للنجم البعيد
تكتب لي احساسك قصيد
وتعيش لي وتعيش بي الفين عيد
وتغادر اوكار الانا
لجلي انا لجلي انا
لجلي انااااااااا

[هلال العتيبي]

شيدت لك فالقلب قصر لحالك
ماحوله اﻻبيت مهجور وخيام
خذ راحتك ماعندك اﻻ حلالــك
وانت تخبر مالك معادين واخصام
كم حول وانا مااشرب اﻻ زﻻلك؟
وان ماشربته تمسي هجوسي حيام
وﻻاتقهوى اﻻ مــن ابهى دﻻلـــك
عن غيرها حالف لو اضرم مية عام
وان شفتني في لحظة ارسم خيالك
ﻻتبتئس هـــذي خياﻻت رســام
احاول استنهض مكامن دﻻلــك
وتجي واجيك بلهفة تجمح هيام
واليا هما قطر الندى اظهر جمالك
الصبح يندا والغـــلا صبح اﻻيام

[هلال العتيبي]

البارح انصفت قلبي بالشعر والشور=واسقيتني كاس فضي من معين الغلا
روّضت خفقة يراودها الزهو والغرور=والنبض جدد مواثيق العهد والوﻻ
لبا حضورٍ يكفي عن جميع الحضور=رشفة من الشهدتغني عن جميع الحلا
متميّزٍ يالخزامى بين كل الزهور=كذا يكون الشكل واللون واﻻ فلا
العطر منك يتعطّر وانت عطر العطور=من عاش في دنيتك لو ساعةٍ ماسلا
اليا كتبتك قصايد يشعل الحرف نور= واليا وصفتك ملا مح غار ريم الفلا
منزلك قلب هواك وعوج اﻻضلاع سور= عيون تحمي عيونك من عيون الملا
مارْتبت من شرهة الحاسدوحقدالغيور =شرهة مهي فالسنع لقيتها للخلا

[هلال العتيبي]

تدري متى تسقط كرامتك فالارض؟
اليا لحقت انســان وهــو مقفّــي!

يتعبك ويسحّبك بالطول والعرض
وبالغلا اللي تضمــره يستخفّــي

على القلوب الحب ماينفرض فرض
الحــب ناتــج جمع شــفٍّ بشفــي

[هلال العتيبي]

يقول انا اوّل شخص يقرا جديدك
.................... لو تنشره في كوكب الزهرة اقراه!!
قلت البشـر يقْلون حلوٍ قصيدك
..................... وانا اتعجّب مثلهــم ويش حـــلاه!!
واثــر عيونــك شيــرة الله يزيـدك!
....................من الحلا والزين والحسن والجـاه!!
مــا كنّك الاّ ماخـــذ الزين بيْــدك!
......................معقــول مخلــوق يتنقّى مزايـاه!!
ياللــي مــع الايـام يكبر رصيدــك
....................حتى ضعيف الشـوف قام يتهجـاه!!
لاتندهــش لو يوم تفتــح بريدــك
.................... في علبة الوارد محاكيــك تلقــاه!!

[هلال العتيبي]

كل خمس مية سنة يمكن ملامحها تكــرر
مثل عبلـــة مثل لبنى مثل ليلى العامرية

عينهــا بحـــر يغــر اللـي نصـــاه ومــاتغــرر
تقدر تقول انها ادهى داهية واذكى ذكيـة

م انت باوّل قلب ياقلبي مــن احبابه تضـــرر
من يشوف جروحك يقول انك محارب سرية

شــي نمرره بمزاج وشــي لايمكــن يمــرر
كيف اعديهــــا وانا ادل الحروف الابجديـــة

لــو عبوديــــة غــلا ماكــان فكــرت اتحـــرر
مير انا يعجبنـي التحليــق فــوق الجاذبيــة

آه مــن جـور التغلـي والخطا اللـي مايبــرر
عكس معنى العاطفةعكس الغلاوالشاعرية

والجفــــا درسٍ جديــــدٍ مايدرّس فالمقـــرر
ماوجدتــه فابْجديــات الغـــرم السرمديـــة

[هلال العتيبي]

على صدر السما حام وسماسرب القصيد وجاك
يحلــــق في مدارات الشفــــق ويبعثـــر الوانــه

قصيــــد مـــن الولـــه قدام ﻻتقراه جـــا يقــراك
مظرّف بالحنيــــن وبالغلا و الشمـــس عنوانــه

جمعت اروع ملامحك وبقايـا صوتــك وذكــــراك
وزينــت بشعاعـــك واجهـــة شعـــري وديوانه

عشان اليــا بغيتــك حلــم علم وعلم حلم القــاك
هــواك شـــراع حلمـــي وانت بحـره وانت ربانــه

[هلال العتيبي]

الغالي اللي غايبٍ من شهر آب

لو غاب (500) سنة مانسيته

ماينّسى لو يمتلي صدري عتاب

اوله على حرفه وقافه وبيته

كنهّ مسوي بين اﻻضلاع مهذاب

ومعمّرٍ في مهجة الروح بيته

له في ميادين الوله خيل واركاب

لو يختفي في عج وقته لقيته

طاريه مسك وكادي وباقة اطياب

كل العطور تفوح ﻻمن طريته

مفصّلٍ من خام اﻻحساس جلباب

ومطرّزه بالجاذبيه فديته

مثل النسيم اللي مع الصبح هباّب

لوﻻ صفاته كاملة ماهويته

مايشبه اﻻ نهر في قفر ينساب

وان جف تظماه الحروف وظميته

وﻻيشبه اﻻ غصن في راس مرقاب

مياس ف احضان السحايب مبيته

يابلسم المجروح ياطب اﻻطباب

غروٍ حواني بالغلا واحتويته

انكان ودك تجعل الصمت محراب

صمت المشاعر جرح لجلك رضيته

تعال قاف الود والشوق ماشاب

اليا اشرقت شمس الهجوس ابتديته

واللي سكن مابين جفنك واﻻهداب

ياكبر ذنبك كان منها نفيته

في كل يوم يطيرلك شوقه اسراب

ي اجمل غرام ب دم قلبي سقيته

حرفك على ثغر المزن بسمة اعجاب

واتلى اﻻسم من روعتك نال صيته

[هلال العتيبي]

مكــان مــاودك توجّـــه توجّــــه
دوك الفصا ياطير والرب يرعاك
ﻻتقول هجـّـة عنك ماهيب هجـــّـة
لو في يدي عشت العمر كله اهواك
الياشربت الكيف وشلــون ابجـّـه
وانت الذي حافت لي الكيف يمناك
مير البـــلا فالجــو عتمة وعجــة
شهرين وانا م اعرف اكتبك واقراك
ان جيت اب ابحر صوبك اليم لجة
واتوه قبل اوصل لشطك ومرساك
والريـح عصف وقصف لجّة ورجّه
وانته تلد هنــاك وهنــاك وهنـاك
هذا كـــلام العقــل جاك وتهجــه
واﻻ كلام القلب م اظن يخفـــاك
ماعــاد باقــي للمشاريــه حجــة
اليـــا انفتح للعــذر باب وشبــاك

[هلال العتيبي]

في كل يوم امتطي صهـوة جنونـي واجيـك
يـاذا البريــق الـذي مبطـي وعينـي تراه
اليا متى اهيم في صحـرا الظمـا وارتجيـك؟
لعلّ م انتب سراب افنيـت عمـري وراه؟!

[هلال العتيبي]

الله وكيلك طار بي سرب الحنين
ل نجد وانا منزلي فاعْلى السراة

ماحـاد عن دربـك شمــال ولايميـن
ولا نــزل دون المكــان ولا وراه

[هلال العتيبي]

في منحنى الشوق ف اقصى شارع اللهفة
علــى رصيـف الحنيـن امسيــت وحدانــي

ينتـــاب قلبـي شعـور مـن العبـث وصفــه
يقلون اعاني من ايش؟مــن ايش ماعاني؟!

[هلال العتيبي]

تبختــري واستبــدي مثـــل مـــــاودّك
وابني على انقاض قلبي برجك العاجي

ماشي على درب يفصــل صــدّك وودّك
عسـاه عـن ما تعـاف النفـس ينعاجـــي

[هلال العتيبي]

الوله والشوق تمشي لك حثاثة
يا صباح النبض يسعدلي صباحك
والسماحة واللطافة والدماثة
كلها ماتصبح اﻻ في مراحك
انت اخذت الزين كله بالوراثة
واﻻ هو من دون دستور استباحك
الفجر حاول ينافسك بثﻻثة
رقة احساسك ونورك وانشراحك
والربيع اهداك وجهه واكتراثه
من يلوم التيه لو م اطلق سراحك

[هلال العتيبي]

لو اقبلت لك واضحكت طبعها شيـن
تقطــر حلــى مير البــلا في حلاهـا

تعطــي بيـــد لكــنّ تاخــذ بثنتيــن
هذي هـي الدنيــا كفــى الله بلاهــا

[هلال العتيبي]

ياقلبي اللي كل نود تهبه
اسواة حصن مشيد ب راس مشراف
مااهدى غﻻه اﻻ لجرحه وطبه
على كثر ماشاف فالناس ماشاف
اﻻ الذي يهديه من دون سبة
من العذاب انواع واشكال واصناف
جرحه خوي تأبى المشاعر تكبه
يجرح وﻻكنه مسوي بي خﻻف
ان جيت اب ابعد يصبح الدرب غبه
وانخاه يعطيني من الشوق مجداف
واصنع من الحبة ثماتين قبة
لعلي القى يم شاطيه منكاف
بعض العرب يستوطن النبض حبه
والعين يسكنها من اطيافه اطياف
م اقــول غيــر الله ربي وربه
اللي يشوف الظلم والقسوة إتصاف

[هلال العتيبي]

ياقلبي اللي على جمر الحبايب وطا
استعذب الجمرواستهوى جروح الخليل
واحبابه استعذبوا صداتهم والبطا
لين ابتعدنا مسافات الجدي عن سهيل
ارسلت وارسلت حتى مل سرب القطا
رغم اني اميز الممكن من المستحيل
ياهيه يااللي على معلوق صدري سطا
واستعمره واستباحه في نهار وليل
اللي تسويه فيني صح واﻻ خطا
عطني على صحة اقوالك وفعلك دليل
والله لو اعطيتني ﻻعطيك ضعف العطا
وانا عتيبي وﻻاخبر في عتيبة بخيل

[هلال العتيبي]

حي الله اللي زارني ليلة اﻻمس
لقيت عطره في حروفي وبوحي
مبطي يماطل فالوصل مبعد الرمس
يجفل وهو ماهو قطوع شحوحي
حساس يخشى حامسين الحكي حمس
وناثرينه فوق خضر الجروحي
من حقي اباهي به البدر والشمس
ويشوش حرفي ويتعدى السفوحي
اليا حكى سوالفه همس في همس
واليا ضحك عطر الخزامى يفوحي
مثل السحاب يتوق عن هاقي اللمس
ماغيره استوطن مرابع طموحي
افرح اليا شفته ولو خاطري عمس
وشلون م افرح به وهو روح روحي

[هلال العتيبي]

لـولا انــك مــن الحســن والـــذوق آيـــة
واحروفك ارضٍ بكر واحساسك زهور

مـاكــان اشوفــك كوكــبٍ فـي سمايــه
يملى عيونــي والمــدى بهجــة ونـور

يــاغايتــي يــارغبتــي يــامنـايـــه
ياللي غيابك سقم وحضورك حضــور

نهبتنـــي مـــن عـالمــي فــالبدايـــة
واسقيتنـي واثملتنـي شعـر وشعــور

ميـر البلـى ف آخـــر فصــول الروايــة
اشبعتني تهمـيش واشبعتـــك غـرور

[هلال العتيبي]

لازال قلبي في رحابــك يخفـــق@@وسفيـن ودي فـي بحــارك تغـــرق
يادانـةً مــــلأ الفضــاء بريقــها @@الشمس تشرق حيث وجهـك يشـرق
مـــا انتـــي الا زهــــــرةً فواحــــةً@@العطـــر مــن ارجائهـــا يتدفــــــق
تزهـــو ويلثمهـــا النسيــم بطلــهٍ@@فــي كـلٍّ غاديـــةٍ عليهــا يغــــدق
مــــا انـــتِ الا بسمــةٍ أخــــــآآذةً@@ فـــي ثغــرطفـلٍ باســمٍ تتألـــــق
مــــا انــتِ الاّ طفلــــةً عربيـــــةً@@ثــوب الحريـــر بحسنهــــايتــــأنـــق
ان لم تكوني البدر في غسق الدجى@@ويكون وصلك قبل وعدك يسبق
فمــن المؤمّــل والجميــل مليكتــي @@ان تعتقــــي قلبــا بحبك يخفـق

[هلال العتيبي]

ياسيد ساداتي ويا ضيّ كوني
يااللي عليك من الحلا والبها تاج

اليا فقدّتـك يوم فــزة ظنونــي
كما يفز الجــم من عـــد هــداج

الاّ انت ياكل الغــلا ماتهونــي
ي اغلامن الالماس واثمن من العاج

عليك سجات الفكر ياخذوني
وتخاوي الهوجاس في كل منهاج

سوالفك هملول غر المزوني
اليا انهمر من صادق النو ثجاج

ضحكك وهرجك من سبايب فتوني
تلبّس هروجــــك حريرٍ وديبــاج

وانا اتحاشى هرج عالٍ ودونــي
واجنّبك واجنب النفس الاحـراج

عنك اصرف النظرات لا يلمحونــي
ناس فكرهــم حـاد بالحيل وانعاج

طبعي م ابوح لزمـرةٍ مايبونــي
خيفــة ملامة لايم وهرج هـــراج

وش لي بناس ماتبى الاّ طعوني
وش امحق من الي فمه فيه كرباج

مير انت اب اشرح لك ملامح جنوني
واعطيك سرٍّ خلف قفل ومزلاج

تصـــدّق اليا تعبّتنــي عيونـــي
لاادوّر مداوي ولا ادوّر عــلاج

استدعي اطيافك بسرعة يجوني
من ساع تلفيني وعيني مايحتاج

[هلال العتيبي]

ويا والله الاّ روّح النــوم يانـــواف
عسى الحظ لعيوني وانا عمّك يردّه
وجعل السهر ماعاد له يمّها منكاف
ولاعــاد يغزيهــا ب هجمـات مرتدّه
يطير الكرى منّي وانا ماعلي اخلاف
ولااشكي وجع من فضل ربّي ولاشدّة
لكن الزمن ماينصف الصادق الشفّاف
ويلقى المراوغ حاجته محْـدن يضــدّه
وانا اشوف مدح النفس ذم اكثره ينعاف
اليـا مامدحــك الاّ انت باب الحكي سدّه
ولن ماصنعت لنفسك الفخر شاب القاف
حلاة الرجل يبني حصن مجـده بيــدّه
يروم الفتى العليا ويرقى لها المشراف
بفعلـه ماهْو بفعــال خيلانــه وجـدّه
وانا م اعتبر فعل الجمايل ردود اسلاف
ليا اعطيت والاّ اسديت لاتكثر اللدة
رزين العقل مايعترض حذفة الحذاف
وسيف الحماقة مايحــوّل تحت حدّه
ولاتسمع اللي يشتل الراي خلف خلاف
لوتطاوعه وهّقك تغْرف بحر جـــدة
تردّد على اهل الديــن والعلـــم والعُرّاف
ومن ودّ ابوك وجدّك احرص على ودّه
بيوت الندى تندى وبيت الكريم يضاف
تجيك الهبوب من آخــر الحارة بنـده
وخلّك مع المولى يحقق لك الاهداف
يكفّر من اذنوبــك ويجــزل لك لمدّة
وضاعف لراع الحاجةالجهد10اضعاف
فقيـر اويتيمٍ (ن)دمعته جرّحت خدّه
وعامل جميع الخلق بااللين والانصاف
ولاتبني المعروف وتعـــوّد تهـــدّه
ولا تزهد ب(جنّتك) دام انها تنشاف
رضى والدينك قبل كل البشر بدّه
ترى المرجله ماهيب طرّاحةٍ والحاف
ولاهي دراهم في مخابيــك منعــدّه
ولاهي غروروزود نفس وكبرواجحاف
ولاتنجمع بالجــاه والمــال والكــدّة
توافيق واحسان وعقول وقلوب نظاف
ومدة كريم وافي(ن) ما بخس مدّه
نزاحم عليها بالمناكــب وبالاكتــاف
عن الاولــة والطايلــة مالنـــا صدة

[بن ابنين]

بيض الله وجهك وصح لساااااانك

[هلال العتيبي]

بيض الله وجهك وصح لساااااانك

ووجهك ابيض ابن بنين
وصح قلبك ياطويل العمر

[هلال العتيبي]

من معين الغلا اللي ما تعكر مزاجه
ومن هجوس تطاوعني على كل طرقا
ومن مشاريف حلم شفي ارقى دراجه
كل شي يحفزني وانا ليش م ارقى
جيت اسلم وليل الشوق مشعل سراحه
م اعرف الياس فرقا منك يالياس فرقا
خطوة وخطوة ويقرب طريق المواجه
يصبح الشرق غرب ويمسي الغرب شرقا
هيه بامن سكن معلوق صدري وداجه
عان لك بصمة وتذكار في كل عرقا
هاك روض محد قبلك سلك في فجاجه
وانت عطني مناخ بدون ً رعد وبرقا
وش لي بناوي رعده يزيد ارتجاجه
عاشق الشمس مايبغى السما غير زرقا
تدري ان الغلا شفاف مثل الزجاجة
وان جرحك عن جروح المحبين فرقا
تجرح وتجحد وتحرم جريحك علاجه
وان نخيتك تداوي تلحق الكي حرقا
ماوهبتك غلا من شان ابي منك حاجة
ومااشتكيتك لو عيوني من الدمع غرقا
ماني اللي يضيع صيدته في عجاجه
ويش عذري ًمن العتبان روق(ن) وبرقا
م اشرب الا قراح العد ما ارد هماجه
ولا التفت كلما ناحت على الغصن ورقا
يزعل الوقت يوم ويوم يضحك حجاجه
والليالي سراع وتسرق العمر سرقا

[قيس العازمي]

صح لسانك ياهلال

ويازينك وزين اوراقك هههههه

مبدع لاعدمتك