هنا مجموعة من قصايد الشاعر عيضه الثبيتي

[ابن هليل]

ناصيك ياراع الوفاء والمواجيب=في لازم ٍ ماينجزه غير شرواك

بالواسطه ماهو بضرب المشاعيب=بعد رجاء الله يال؟؟؟؟نترجاك

كثرة ظروفي فالسنين الشلاهيب=والوقت يحذف بي من هناك لهناك

جيتك وأنا همومي حمولً مصاليب=تعبت رجولي بين ذولا وذولاك

وأنا خلافي شايبٍ جابه الشيب=لولا الكبر جبته من الديره وجاك

أنا عصاته في جميع المطاليب=وأنا يمينه.. طوّل الله يمناك

أفزع معي ياكاسب المجد والطيب=هذي مواقيف العرب لاعدمناك

والذيب ماهو عيب لا استفزع اذيب=العيب لا استفزعت ذيب وتعداك

[ابن هليل]

اللي بعضهم بنت في ثوب رجال!!

ياهاجسي ود القصيده بلا--وين=لابن سعود معرّب الجد والخال

تلقى الرفيق اللّي يفلّ الحجاجين=وتلقى علومٍ وافيه تشرح البال

قلّه ترى الوقت الردي شيّب العين=وقتٍ تكاثر به ردييّن الافعال

ضاعت سلوم معرّبين القوانين=وشفنا وعفنا فالزمن بعض الاحوال

من يوم مانفكّوا علينا الوراعين=اللّي بعضهم بنت في ثوب رجال!!

أقراء على الأيام طاها وياسين=وأقراء على الدنيا تبارك والأنفال

لاعاد تحسب مايلات الموازين= ماظن به ميزان فالوقت ما مال

وقتٍ به الصاحين صاروا..مجانين=واللّي بدون عقول..صاحين عقال

وياليتنا عشنا بوقت القديمين=يكفيك من جلسة هل الطيب فنجال

تلقى الحكم من روس قومٍ حكيمين=ماهم بشلة هرجة القيل والقال

[ابن هليل]

مناديل الغلا

عطني مناديل الغلابامسح بها دموع الرحيل=مايمسح دموع الرحيل الاّمناديل الغلا

انظر وطالع حالة الولهان ودموعه تسيل=مير أنت لايعجبك حاله ثم تاخذها حلا

حاول تذكر من ليالي حبنا لو ربع ليل=وأن جيت راجع ياهلا وأن رحت برضه ياهلا

لاتحرق القلب المولّع!!جنّب النار الفتيل=كان الحلا ضد البلا ترى الحلا جاب البلا

أنته بعيني مثل كنز الماس فعيون البخيل=والله لو ترحل بعيد!!أنك معي ماترحلا

ومدام صملّت الرحيل ورحلة الدرب الطويل=ارحل فمان الله ترى قلبي من الحب امتلا

حاولت احل المستحيل وصار حله مستحيل=ياما تمنيننا (نعم)وتقول لي (لا و1000لا)

وتبغاني اعطيك آخر الموضوع يالطرف الكحيل=عندي نتيجه قاسيه تفرق عن علوم اوّلا

أمّا تلاقينا بخير وصار لي عقلً ثقيل=والاّ على ماقيل يالغالي تلقينا الخلا

[ابن هليل]

ضرس العقل

اه من ضرس العقل فيه شر وفيه سوس=شق راسي وامتحنّي وصملت اخلعه

ماهتنى بالنوم راسي ولو عيني تهوس=والسبب ضرس العقل..ياعسى الله يقلعه

رحت مستشفى(......)وقالوا فيه موس=وفيه زراديةً كل خافي تطلعه

قلت اخافوا ربكم يامعذّبة النفوس=يالطبيب ايش الكلام الذي منك اسمعه؟!!

قال:روح للسستر ورحت للبنت العروس=ويوم شفت المترفه طاب ضرسي ووجعه

ماحلاها هانم(ن)شغلها قلع الضروس=اقلعة ضرس العقل واقلعة عقلي معه!!!

[ابن هليل]

يابنت حنا لاعشقنا عشقنا ماهو رشاش=لاصار ماهو وابلٍ ثجاج حرّمنا اللقاء

لن كان مانروى عشق والله مايغرينا النقاش=نرحل وحنا ماتزعزعنا مراويح الشقاء

حنا بدو نعشق على وضح النقاء والاّ بلاش= ترى البدو مايعشقون الا على وضح النقاء

يابنت واحدنا ليا حاش المراجل حاش..حاش=يابنت واحدنا ليا منّه رقاء يعني رقاء

أن مات مات بعز وأليا عاش فوق العز عاش=راس بدويٍ عن مقابلة الشدايد ما اتقاء

يابنت وجدي وجد رجالٍ توجد فوق ماش=واليا هقاء بالوجد يهقي مير كنّه ما هقاء

يابنت ياللحم الطري اللي على العظم النشاش=شوفي ملافيح السموم اللي بوجهي تحرقاء

يابنت ماشفتي النعومه وش تسوّي بالفراش؟=حتى على انور الكهارب مات والموت امحقاء

يابنت قلبي من غرامك من زمان العام طاش= قلب بدوي ٍ مايغيّره الزمان ا لأبرقاء

قلبي وأنا ادري به ليا منّه عشق يعشقك كاش=وأن ما ستقاء من غيث حبك مات ظامي ما استقاء

يابنت قولي (مرحبا)قلبي معاليقه عطاش=ولأني بـ عيضه كان ماقلك (يدوم الك البقاء)

[ابن هليل]

لاتسْـل عنى حالتي..حالتي مثل العراق=القلق والهمّ والغمّ..والرابع أنا

الهوى..يجتاحني والليالي ماتطاق=وأجتمعنا الأربعه وأختلفنا كلّنا

مشكلتنا ماتغلّق ولا فيهاغلاق=يعني ان المشكله رايحه تبطي بنا

والضحيه قلبي اللّي محطمّه الفراق=ليت للعشاق قاضي عدْل يحكم لنا

يمكن يموت الجفاء يمكن يعيش العـناق=والمحبّه والمودّه يخالطها الهنا

والوفاء يستل سيفه على رقبة النفاق=والشياطين الثلاثه توفـّى في منا

كل مافي القلب رغبه ومنوه وأشتياق=وأنت ياسيد المنا ليه تحرمنا المنا؟

المحبّه جوف قلبي بحر واله اصطفاق=وايه يابحر العنا ما وراك الاّ العنا

ايه يا موج البحر وأنت مالح ما تذاق=مُوج مابين الحنايا هنا ولاّ هنا

أشهد أن الحب بلوى((وعليّه بالطلاق))=والأدلّـه كلها تجتمع فيني أنا

[ابن هليل]

يامل قلبٍ كل ماقول ابتعد يرجع عليك=ابغاه يبعد عن شقاء حبك وعيّا يبتعد

ماهو ماعاد ابيك لاتفهم غلط!!بالحيل ابيك=لكن من دونك شقاء الايام ياوجه السعد

قلبي تولع فيك يالمجمول !!يعني مات فيك!!=واخفيت حبك في شرايينه بعد--بعد

تنبض شرايينه بحبك هيك نبض الحب هيك=تخيّل أنه في مكانه يرتجف مثل الرعد

الله واكبر لا فقدك ---الله واكبر لا لقيك=وقت الفرح كله فرح-- وقت النكد كله نكد

اشتقت لك مليون مره بالعدد وازريت اجيك=والمعذره من شان وزن البيت نقصة العدد

عطني يديك احس روحي معك في راحة يديك=واعطيك من قلبي عهد يذبح مضيّعة العهد

غيري ولو قال الك احبك لن لقاء غيرك نسيك=لكن أنا ما انساك لو غيرك ذكرني للأبد





المرجع: شبكة المرقاب الادبيه

[بن بادي]

الله يبيض وجهك يا ابن هليل

صح لسانك وصح لسان الثبيتي .. قصائد رائعه ومتميزة الله يبيض وجهه ويرحم والديه

تسلم يمناك على النقل يالغالي .. لا هنت يا ابن هليل

تحياتي العاطره لك .. بن بادي الثبيتي

[Hawazni]

بيض الله وجهك يابن هليل وجه الشاعر عيضه الثبيتي وماقصرت

[الفراهيدي]

ابن هليل





لاهنت





وصح السانك والسان الشاعر:عيضه الثبيتي





تحياتي..................( الفراهيدي )..................تحياتي

[الــغــازي]

الله يبيض وجهك يا ابن هليل





صح لسانك وصح لسان عيضه الثبيتي





تسلم يمناك على النقل يالغالي .. لا هنت يا ابن هليل

[الطاحوس]

لاهنت يابن هليل


وصح لسان عيضه الثبيتي

[ب الصفياني]

يعطيك العافيه والى الأمـــــــــام
ونتمنى لك التوفيق
انت وجميع أعضاء الهيـــــــــــــــــــلا*** منتدى قبيلة عتيبة