الشاعر علي العتيبي

[ابجاد]

بسم الله الرحمن الرحيم


الا يا هجوس الشعر روح بدون قيود = على شان ما تطغى عليك الحساسيه
سلامي على ربعٍ لهم فوق عام حدود = يشدون بالديره عن الشمس بالفيه

[مرداس]

الشاعر ابجاد صح لسانك






بدايه موفقه وجزله







بنتظار علي ؟ ترى علي اكثر من واحد حدد




متابع

[ابجاد]

مرداس صح بدنك ولاهنت
الشاعر المقصود علي خيران العتيبي
ومتابعتك شرف طال عمرك

[علي خيران العتيبي]

يا سلااااااام
السموحه على التاخير :)

الا يا هجوس الشعر جيب الدرر و الزود = و جيب الجزال و لا تِـقَـرِب من السيه
عدد ما تلوح بروق او هبت هبوب النود = هلا مرحبا و نقول يا ربنا حيه

[ابجاد]

الله الله وانا اللي اسف على التاخير :)



كريم السبال يجود والجود بالماجود = لو انه تواضع بيناتٍ مواريّه
يدوم البقا يالذيب مدري وش المقصود = وش اللي فرق ما بين هذي وهاذيه؟

[علي خيران العتيبي]

الله الله


كريم السبال يجود و لا هو ابد مقرود = و تواضعه حشمه للرجال الهواويه
ترا الفرق واضح بين حامد مع محمود = قصدنا نكثر بالتراحيب و زد ميه

[ابجاد]

انا خابرك يالذيب ماتاكل العجرود = يوم ان الخبل ناويه ومبيت النيه
تراحيبكم واجد وميقافكم مشهود = من اول ولا ذالحين ماهوب بشويه

الشاعر المميز والجزل علي خيران العتيبي
صح لسانك وبيض الله وجهك
تشرفت واستفدت منك وهذي حقيقه ولا هي مجامله
لاهنت والى اللقا :)

[علي خيران العتيبي]

الله الله


و انا خابرك بالشعر شاعر كما السدود = و دايم من يحاربك كثرت بلاويه
و ميقافكم مشهود بالسيف و ام عبرود = في عصر المعارك لين هالحين الالفيه

استاذي / ابجاد
صح بدنك و صح لسانك
و انا الي تشرفت و استفدت منك
و هذي ماهي لعبه بيننا هذي دروس خصوصيه لي
و اهني منتدى الهيلا بتسجيلك فيه و نتمنى انك تتحفنا دايما

[ابجاد]

انت اللي استاذي يابو خيران
لاهنت وبيض الله وجهك (ولاهي غريبه عليك)
وانا اللي تشرفت بالتسجيل وباللعب معك وهذا حقيقه

سلام عليكم