مصافحه اولى ( رثاء في أمي)

[منصور تراحيب الشيباني]

يايم ماعاد الي للعرج معراجي= ولا للقدم لازمن تكثر مساييره
من عاد عقبك يجيه القلب منعاجي= مالزمه الصدر وضلوعه وزاريره
لو كان دونك بحور طوال الأمواجي= وانتي بديره وراع القلب في ديره
ولو امتلى الكون دونك جند وافواجي= وثلوج وامطار والبر ومعاصيره
ياصلك من بعد مثل الطير نهاجي=مارده البعد لو طالت مشاويره
أمي لقلبي طعام وظل وعلاجي=وأمي مخازن لماتخفيه اساريره
وأمي لقلبي شرابن عذب هداجي=وأمي عن الهم والضيقه تباشيره
مضت معي وقت كله عز وابهاجي=لكن ياسرع ماقفت مظاهيره
من سرعة الوقت كنه برق لعاجي=ياوقت مافيك لو لحظات تأخيره
وقفت وخلت بوسط القلب دولاجي=دولاج شبت على قلبي مساعيره
اقفت وعيني تشوف وترفع احجاجي=قفاي من فات لو كثرو مداويره
ودعتها من يبدل ضيقها افراجي=في جيرة الخالق الي يحسن الجيره
ياالله يامغتني والعبد محتاجي=ياخالق الكون يامحسن تدابيره
اني بها في ذراك ورحمتك لاجي= اشرح لها صدرها واقبل معاذيره
ياما من أجلك تصوم الست وتناجي= والبيض يوم القمر تسطع نواويره
وان راح ثلثين ليل مابه سراجي=قامت تهجد بتسبيحه وتكبيره
واليوم يامن يجيك الخلق حجاجي= عند المشاعر تلبيلك طوابيره
جنب لحمها لهيب يحرق الصاجي=واغفر لها ذنبها واحسن لها السيره

[ابو محمد الدعجاني]

الله يرحمها ويرحم اموات المسلمين صح السانك يامنصور والله يغفرلها انشالله

[محمد العتيبي]

الله يرحمها ويرحم اموات المسلمين صح السانك يامنصور والله يغفرلها ان شاءلله

[ابن مشيب]

عظم الله اجرك يامنصور , ورحم الله والدتك , وصح السانك على هذه المرثية المعبرة.


تحياتي

[المسـ عبدالله ـعودي]

صح لساااانكـــ

الله يغفرلها ان شاءلله