مشرفنا وشاعرنا *سعود العصيمي*ضيف كرسي الاعتراف

[@ـايل]

بسم الله الرحمن الرحيم
السلام عليكم ورحمة الله وبركاته

×××
××
×

http://www.alamuae.com/gallery/data/media/123/0587.gif

بأزاهير الورد وبرائحة العبير الفواح

http://www.al-wed.com/pic-vb/1080.gif


نجدد اللقاء مع ضيف من ظمن قائمة شعراء المنتدى الذي تميز بالعطاء وتألق بإبداعه الذي ملأ كل زاويه من زوايا منتدى الهيلا

فأهلاً وسهلاً بمشرف منتدى المحاوره الاخ العزيز ( سعود العصيمي )معنا و نتشرف بوجودك

http://mo3afa.com/vb/images/smilies/wlc4mm.gif


لدينا على كرسي الإعتراف


ونقول لك الله يعطيك العافية

ونتمنى لك حظ طيبا ووقت ممتع مع الاسئله والله يعينك يابو طايل :)


ْX
XX
XXX

[محمد بن غازي]

مرحبا بشاعرنا القدير الأخ/ سعود العصيمي

ونتمنى له طيب الإقامه على كرسي الأعتراف

والشكر للأخ/ هايل العتيبي على جهده في ترتيب هذه الأستضافه

[أبو مرحبا]

يامرحبا بك يابوطايل

وابرك الساعات استضافتك وجلوسك على كرسي الاعتراف

وكما لاننسى ان نشكر الاخ هايل العتيبي لمجهوده في اللقاء



عندي بعض الاسئلة اتمنى ان تجاوب عليها :



س1 - متى بدات كتابت القصيد وبمن تقتدي في شعرك

وهل شعر المدح والفكاهي لاينشر بنضرك؟



س2 - ماذا يعني لك منتدى الهيلا وكيف وصلت اليه؟


س3 - هل شاعرنا له وجود على الساحه الاعلاميه ام فقط على الشبكه الالكترونية؟


س4 - هل لك طقوس معينه تقوم بها قبل كتابت القصيده؟ ام هي وليدة وقتها؟






اتمنى لك التوفيق

[فهيد الايدا المورقي]

ياهلا والله ومرحبا بالشاعر/ سعود العصيمي (ابو طايل) على كرسي الاعتراف

وهذه الساعه المباركه

ونشكر الاخ هايل العتيبي على هذه الاستضافه الطيبه



س1: البطاقه الشخصيه للشاعر/ سعود العصيمي؟

س2: منهم من شعراء منتدي الهيلا الحاليين تتوقع لهم الضهور في الساحه امام الجمهور في الوقت القريب؟

س3: منهم افضل شعراء الساحه في الوقت الحاضر؟

س4: افضل محاورك لك في المنتدي ومع من ؟ هل تذكر بعضها؟


تحيتي

[@ـايل]

الصقر

أبو مرحبا

بناخي الايداء

..........

اشكر تواجدكم واتمنى لكم المتعه مع ضيفنا سعود العصيمي ..

......

[سعود العصيمي]

السلام عليكم ورحمة الله وبركاته
وبعد التحية والتقدير
لايسعني الا وان اشكر اخي العزيز

هايل العتيبي
على هذه الاستضافه الحميمه.كما اشكر جميع الاخوان
الصقر،،ابو مرحبا،،بناخي الايداء،،الذين احفوني بالترحيب.
واتمنى لهم وللجميع دوام التوفيق والصحة.كمالايسعني
الا وان اشكر جميع من مر على هذه الصفحة،،دون تخصيص.

[سعود العصيمي]

اخي العزيز ابو مرحبا

تبقا ياطويل وابشر

س1 - متى بدات كتابت القصيد وبمن تقتدي في شعرك

وهل شعر المدح والفكاهي لاينشر بنضرك؟



ج 1- انا لااكتب القصيد الا نادرآ . والسبب ميولي
الي شعر المحاورة ومتابعته، بشكل كبير.
ولكن لو بغيت اكتب كتبت لامشكلة لدي.

وبالنسبه لشعر المدح ونشره ارى انه مطلوب و معروف لدى الجميع.
منذ القدم.
اما الفكاهي فهو شعر لافائدة منه سوى التسلية. حتى ولو نشر.


س2 - ماذا يعني لك منتدى الهيلا وكيف وصلت اليه؟

ج2- منتدى الهيلا يعني الشي الكثير والكثير في جميع الامور
فهو منتدى متكامل ومبني على قوائم سليمة وصحيحه وراقية.
باقسامه المتعدده. والتي تجد فيها مايبهج الصدر
ويرفع الراس
بوجود الرجال الغانمين شرواك . الذين يتحلون بالصدق والاخلاق العالية.
والشهامه واعطاء كل ذي حقٍ حقه..
وله عندي مقام كبير ومحبه قويه جدآ.


س3 - هل شاعرنا له وجود على الساحه الاعلاميه ام فقط على الشبكه الالكترونية؟


ج3- لا ليس لي وجود على الساحه . ولو اني شاركت مع شعراء صغار في بعض الحفلات.
الاحفلة واحدة عندي عصمه كان فيها كلآ من الشعراء التالية اسمائهم:
1- حزام العصيمي
2- حمود السمي البقمي
3- مرزوق المقاطي
ولعبت طاورق مع الشاعر / حمود السمي بداية الحفلة
لااذكر من المحاورة سوى البد ايه مني ورد حمود عليها
حيث بدأت بالبيتين التاليه:
عند رجلآ في زمانه مثل عنتر في زمانه ** مرحبا ترحيبة تضفي على جمعآ حضرها.
ليلنا ياحمود دوبه مبتدي والدرب عانه** ليلةٍ جابتك الي ياحمود ماغيّب قمرها.
فرد علي وقال:

البقاء باسمي واسم ربعي لهم قدر ومكانه ** كل قوم الها ديار وكل قوم الها قخرها.
يالله اتساعد سعود ويالله تساعد خوانه ** الله الله يوم درجنا السفينه في بحرها.

قلت له:
مايوقف فالمواقف غير رجالٍ تكانه** وابشرني من شيوخ القوم ماني من جبرها.
فالزمان اللي مضى يوم الرجل يسرج حصانه** ماخبرنا من غزا العتبان ياحمود وكسرها,
هذا اللي اذكره من المحاوره.
اما وجود الحقيقي فهو على الشبكة العنكبوتية . ولي محاورات كثيره وطيبه.


س4 - هل لك طقوس معينه تقوم بها قبل كتابت القصيده؟ ام هي وليدة وقتها؟

ج 4- هي وليدة وقتها.

[سعود العصيمي]

بناخي الايداء

عسى فيك البقاء وبارك الله فيك.


س1: البطاقه الشخصيه للشاعر/ سعود العصيمي؟

ج 1- سعود عمرالعصيمي العتيبي.



س2: منهم من شعراء منتدي الهيلا الحاليين تتوقع لهم الضهور في الساحه امام الجمهور في الوقت القريب؟


ج 2- والله شعراء المنتدى المتمكنين من العتبان مجموعه كثيره
ومن اراد الظهور على الساحه فهو كفوآ له وليس بغريب عليه.
استثني منهم الشاعر / كبتن عتيبه فهو معروف على الساحه.
استطيع ان اذكر لك منهم
1- الشاعر المبدع وصغير السن ايضآ/ سلطان الجذع.
2- الشاعر المبدع/ ناصر الجلاه العصيمي.
3- الشاعرالعفريت/ علي العضياني.
هناك شعراء متمكنين ولكن ماتوقع لهم ظهور على الساحه بسبب سنهم او ارتباطهم بالعمل منهم:
1- الشاعر / علي الثبيتي. ( النشمي)
2- الشاعر/ مرزوق العتيبي.
3- الشاعر/ مشاري الكرشمي.
4- الشاعر/ عيد العازمي.
5- الشاعر/ بندرالمرشدي.
6- الشاعر/ ناصرالمرشدي.
7- الشاعر/ مقعد الدغيلبي.
8- الشاعرمعجب العتيبي.
9- غازي غالب الدعجاني
10- هناك شاعرين لااعرف عنهم شي سوى انهما شاعرين مبدعين حسب وجهة نظري واطلاعي على محاوراتهما
وهم الشاعر/ محمد ابن رشيد الزراقي.
الشاعر/ سلطان الرويس.

س3: منهم افضل شعراء الساحه في الوقت الحاضر؟

ج3- افضلهم في وجهة نظري الشاعرالكبير/ حبيب العازمي.
بغض النظر عن الشاعرين الكبيرين:
مستورالعصيمي
رشيد الزلامي



س4: افضل محاورك لك في المنتدي ومع من ؟ هل تذكر بعضها؟


ج4- محاوراتي بالمتدى كثيرة واغلبها مع الشاعر/ سلطان الجذع

ولكن هناك محاورات تعتبر مميزة في الفتل والنقض وقوة المعنى اذكرلك منها المحارات الآتيه: والسمحوحه على التقصير.

المحاورة الاولي:

سعود العصيمي


تقدم يالجـذع والكلمـة اسمعهـا بسمعينـك=تسمعها بسمعـك ليـن توكدهـا وتسمعهـا
وقبل اسمي هذا وش كانوا جدودك مسمينـك=انا اشوف السباع تحوف راسك وانت مشبعها



سلطان الجذع


تهرج يالعصيمي والعرب بالسمع موحينـك=سمعنا كلمتك والظاهـر ان الشـر تابعهـا
مسميني بإسم (((سلطان))) لاتنسى سلاطينك=انا اللي كل ماجيت الذيابـه صفـت أربعهـا



سعود العصيمي


يازين الاسم وانت يالجذع سلطان يازينك=ولالك شر فيه علوم عندي وانت سنعها
عليك الحمل ياسلطان مايل من بعارينـك=ليا بركتها لحمولهـا مـا عـاد ترفعهـا




سلطان الجذع

دقايق بس من فضلك ..وأركد لك شياطينك=بعد ياصلك مردود العلوم اللـي تجمعهـا
اظنك ناسيٍ وش هو حصيل ومكسب يدينك=نعرف طيورك اللي فالهدد تطرح براقعهـا




سعود العصيمي


تبا تنيا وتتعب وانت ماخلصت من دينك =وانا لاجيت جيت بحجتي واسنادها معها
خذيت الاوله واللي بعدها كاحل عينـك=وحنا ماقطعنا الساقه اللي جيت قاطعهـا




سلطان الجذع


اشوفه يالعصيمي زايدٍ فالشعر تمكينك= أخبرك مثل هذي من ضميرك ماتطلعها
زمانٍ فات يوم الحرب قايم بيني وبينك=اثلث فوق قلتك الكوايا... ثم اربعهـا



سعود العصيمي


قناطير الذهب والعرف ماطبت مخازينك=لياجيناك ضاعت ماتحصلها بموقعهـا
على مافات جعل الله يعافينـا مربينـك=وليلك يالجذع هذا زلاقيمـك نقطعهـا

سلطان الجـذع

على الكفه موازيني ثقيله عن موازينك =تطفي نارها ياصاحبي والا تولعها
تكلم /قول /سولف /والعرب ماهم بغاوينك =ترى ماانته مقدم روس قوم ولامرجعها


سعود العصيمي

سرا ليلك سرا وانته تهددني بسكينك = تحسبني مثل ناس تطمعها وتطمعها
هرجنا بالحقيقه مار ماشفنا مضامينك = لكن العاصية مني عصا وحده تطوعها





المحاورة الثانيه:

سلطان الجذع



سرا ليلك سرى والله يساعدك معك ويعينك =عيون الحزن بعض الهرج ماجفف مدامعها
تجوز الناس ياابو بكر عن صوتك وتلحينك =ضرايب حظك العاثر ثلاث سنين تدفعها



سلطان الجذع=


سرى ليل وبقى ليل وهواجيس القصيد حضور=سلام الله على جمعٍ حضر من قلب ولسانـي
على شاطئ بحر جدة يابن عم البحر مستور=لو أنه زاد حـرّك فـي غيابـي لاتحرانـي




سعود العصيمي =

سرا ليل وبقى ليل ولنا ولكم فعول ودور=هلا يامرحبا ترحيب تقديـرٍ وصفطانـي
على شاطئ بحر جده يبا يغرق بك البابور=ولو تكتب وتمحى مانته ابقـادر تحدانـي




سلطان الجذع=

تبا تشرب من العيّلم ... وترعى الخايع الممطور=ولقاانا جرتك عـاديٍ علاهـا الذيـب سرحانـي
على ظنك وأخاف انك .. تعوشر في شهر عاشور=متى تبرى بك الذمه واقول أنتـه مـن أخوانـي



سعود العصيمي =

نبا نشرب من الجم الزلالي والعدو معثور=رضا والا غصيبة عنك ياهدهد سليمانـي
بغيتك لي عوين وكل ماجن الورود صدور=تصدرهن ورحت زيام لي قدام عدوانـي




سلطان الجذع=


تقوله بعد ضيّعت المطيـة والعصـا والكـور=وماحاش أسمك الاول ... مصيبة لاسمك الثاني
لو أنك صافي النية ... تحرك بأمري الطابـور=من أطراف المحامه مكتمل بسنـان وعنانـي




سعود العصيمي =


انا من خلقتي مالد عيني فالعيـون العـور=طبيعة عز وارثها عن اعمامـي وجدانـي
بوجهك تتقي يوم المشوك والرصاص يثور=تذرا في ذرا عمتك واتحومـر بالاعيانـي



سلطان الجذع=


علومك يالعصيمي ماتجبر عظمك المكسور=وانا أجزم في عتيبة مااحدٍ مشتال لك عاني
مدامك لامشيت الدرب ماانته فأول المظهور=يجوز انك ليـا دورتنـي ماعـاد تلقانـي





سعود العصيمي =



علومي وافيه وانته علومك كلبوهـا زور=وانا ربعي عتيبه وانت طرقيٍ وعجلانـي
قلطنا واغتنمنا وانت ماحصلت غير السور=ولامني ماحصلتك ترا مانـي بخسرانـي



سلطان الجذع=

رحمك الله ياشيخ القوافي بندر بـن سـرور=وأطال الله عمرك ياوسيع العـرف سلطانـي
بعد بكرة أليا جولك على الضلع المنيف سبور=تبا ترسل عليّه معجـب وعلـي العضيانـي




سعود العصيمي =

عسى ذبنه وذنبي يوم عاقبت الجذع مغفور= نهار الحشر يوم اعمالنا توزن بميزاني
تلبس فالثياب وتصطغي قدم العرب ودور= وحنا نعرفك مانجهلك مكسي وعرياني





المحاورة الثالثه:


كبتن عتيبه=

ياسعود اقرب واخذ لك قاف والمعنى مثالي=الفهيم يصير سده والغشيم يطيـح دونـه!!
الخيال اجها سحابه من عصر والسيل سالي=ولأهل واد عصيل فالوادي ذهيب يدورونه!!



سعودالعصيمي=


هات علمك والعلوم الطيبه فالك وفالي=والمعلم مايعلـم والغشيـم يعلمونـه
السيول تسيل والبراق يبرق فالخيالي=والذهيب اليا غدى لابد ناسٍ يذكرونه

كبتن عتيبه=

سابح البحر الغزير وشـارب العـد الزلالـي=وأعشق اللي تعشقونه ..وأكره اللي تكرهونه!!
لك ثـلاث أيـام تومـي بالعمامـه والعقالـي=والذهيـب تدورونـه فالخـلا ماتاجـدونـه!!

سعودالعصيمي=

تسبح البحر الغزير ونسبحه ياهملالي=والقلوب شهود واللي نكره لاتعشقونه
ماغدالي شي لله الثناء من راس مالي=مار مادورني الكبتن ولاابغاله معونـه


كبتن عتيبه=


أنت رجالً معك طمعه تبـى تأكـل حلالـي=وأنت زادك يالعصيمي خابرينه في صحونه!!
ياكثر ماحلت دونك يـوم صكـات الليالـي=تذكرون الفعل يأهل طحـي ولا تجحدونـه!!


سعودالعصيمي=


لاتسميها طمع شرهه على عمي وخالـي=كيف ينسون الجمل والحمل شايلته متونه
مانذمك فالقصـار ولانحملـك الثقالـي=والعصيمي يقدر ايحل الحبل لو تعقدونه



كبتن عتيبه=

شرهتك هذي مافيها حق..فيهـا مايقالـي=والجمل يشتال حمله والرجـال يعلّفونـه!!
قسمنا لحم الغزال,, وقسمك قرون الغزالي=والله أنه يرزقك بالمسك يقطر من قرونه!!



سعودالعصيمي=

حيلتك من دون حالك والي حيله دون حالي=والمدير اللي ماينفـع ربعتـه مايمدحونـه
قسمكم معروف مشهاب من غصون السيالي=والعصيمي ياوسيع المعرفه خلـه بشونـه


كبتن عتيبه=

أنت شاعر مير مأنته مثل ابـو زيـد الهلالـي=شعر ابو زيد الهلالي كـل الأمـه يحفظونـه!!
كيف تشعل نار وأنته من يمينـي فـي شمالـي=مير ابا اعفي عنك مابغى لك خلاف ولا مهونه!!



سعودالعصــيمي=



استرح فالماقف الغصاب وسدك لحالـي=والكلام الثبت ثابت والعرب ماينكرونـه
الهبائب مايزعزع صفقها صم الجبالـي=وانت ماتقدر تهد طويق واتزعزع ركونه


كبتــن عتيبـــــه=


ياسعود الليث مال الضحك فسنونـه مجالـي=ولاتحسب الليث يضحك يوم تبدي لك سنونه!!
والدركتر يجعل جبال الهـده جُـرفً هيالـي=ولـو تجمعتـوا ثلاثمئـة ولـد ماتقلبونـه!!

سعودالعصيمي=


المعالي ماوصلها غير رجـال المعالـي=من فشل فيها موجهة العـلا ماينقلونـه
كل داء والها دواء والموت مافيه احتيالي=لاحضر للي يريده من هم اللي ينقذونـه



المحاورة الرابعه:



مقعد الدغيلبي=

مرحبا بالشاعر اللي غايـبٍ مـده طويلـه=لك سنه وين انت غايب يالعصيمي عن وطنا
هات علمك واسر ليلك والجمل حمله يشيلـه=والجمل شرواك لاشـال الحمولـه مايحنـا


سعود العصيمي=

البقاء بك يالمرحب عـد همـال المخيلـه=مثل سرحان اتلهب فالوطـن منـا ومنـا
العلوم اشوف بعض الناس حالتها عليلـه=وانت ويش تشوف ياراع الخبر منهم ومنا



مقعد الدغيلبي=



الوفود اللي توافد كل يوم وكـل ليلـه=تبشر بشلفا ذياب وتبشر برمح المطنا
والله اني دونها ياسعود بسيوفٍ صقيله=كل مادارت راحنا ياولد عاصم طحنـا

سعود العصيمي=


ماعليك قصور دايم فالخفيفـه والثقيلـه=وعذابك يالمعادي فالمواقـف لازعلنـا
وان لفونا في غيابك زادهم من حنضليله=مايضيع الكم كثيـر ولا قليـل ولاتعنـا


مقعد الدغيلبي=

الكديش اللي تحاول تعتنق درب الاصيله=ماشحنا علمها والله لتبطي ماشحنا
المثل قد قال مابه هاملٍ فيها عقيله=واعذاب اللي توسوس نفسه ابطمعة صحنا

سعود العصيمي=


لاتحاول ياعميل الخير تصنع مستحيله=ثلبنا من قوته صلبه عظامه ماتثنـى
كل حملٍ يالعتيبي فالمواقـف نرتكيلـه=ماتزعزعنا البروق ورعدها لوكان حنا


مقعد الدغيلبي=



كل علمٍ له دليلـه كـل دمٍ لـه فصيلـه=والعرب ماهيب تجهل فالزمن غزوة مهنا
تبرق ابروق الحيا والسيل ماشفنا مسيله=وان حضرنا سيفنا من خصمنا دايم محنا



سعود العصيمي=


صح علمك وان قرب خشم الزناد من الفتيله=لاتعنـا يالمعنـا فالقسـا مغـيـر حـنـا
عام الاول سايقينك من ورا بيضـا نثيلـه=والسنه هاذي تحـاول فـي وطنـا يالمعنـا


مقعد الدغيلبي=


عام الاول شلتها مابين ثوبك والفنيله=فيك ذل وعايشٍ مابين شك وبين ضنا
لاتعاتبني وانا سويت كـل المستحيلـه=وانت وينك يوم شبت نارها والنجر دنّا



سعود العصيمي=

عام الاول في حداوي الكبد تونس لك مليله=والسبب منزالك اللي عنه ازحناك ونزلنـا
عن كرا ترجع ورا كله زرا يابن الحسيله=لا تقول انك خصيمي رد هذا العلـم عنـا




مقعد الدغيلبي=


المدينه جالها وارد ماندري وش مديله=والحقيقه واضحه لانمتحنك وتمتحنـا
الثلاث اللي تروّج مالها ثبت ودليلـه=اعتقد حبحر وثوم ويكمل الثالث بصلنا



سعود العصيمي=

المدينه مـن نواهـا بالقشـر وعزتيلـه=دونها السيف الرهيف ودونها زبن المجنا
حيلة الحصني تراها بينه من هـز ذيلـه=جبتها بالضبط يامقعد عسى ربـي يامنـا



مقعد الدغيلبي=


يانمى خابرك من وقتٍ مضى من تنتميله=سابق الاسلاف اهلنا علمونا فيك أهلنـا
ايه هذا العلم كله وصله مومـي شليلـه=العرب فيها وفيهـا طالبـك يالله تامنـا



سعود العصيمي=



ماعتقد فالناس من يجهلك ياشوق الجليله=من فعل سيفك ورمحك مابقى ضرسآ وسنا
الحقايق واضحه ياصاحبي راع الكحيلـه=واضحه وموضحه من حيث ماكنتم وكنـا




المحاورة الخامسة:


العازمي

مسك الختام مع العصيمي قبل شهر المغفره = اسعود اجازة شهر من واحد ليا يوم الفطر

وانا ادري ان اجازته ماهي على حسب ءنظره = أوامر السلطان مفروضه على زيد وعمر


سعود العصيمي

الله يابارك فالعصيمي وابن عمه وشهره = وانته ثلاث اشهور اجازة ماهي بواحد شهر

انا على حسب انظري ماشي و علمي تخبره = وانته ياعيد العازمي هات الخبر واخذ الخبر


العازمي

لو العصيمي في شهر 9 مسك كل أقشره = يرجع لسابق عهده المجرم ليا صلى الفجر

ياسعود خاف الله وفكّر في عذاب المقبره = شرك سبق خيرك يابو طايل على كل البشر


سعود العصيمي

انا على سلمي وسلم العازمي ماغيّره = يصوم فالقمراء ويفطر فالدجا ماينتظر


كلآ يبا يلقا حسابه كاملٍ حسب اظفره = وانته ياعيد العازمي اقوى عذابك فالقبر


العازمي

ياصايمين سعود في شهر الصيام المعذره = مثل الشياطين الرجيمه كل ماحجّز طمر

أذنبت في نص العرب والعالم المتحضّره =والعازمي ماشال ذنب انسان لله الشكر


سعود العصيمي

ياصائمين العازمي منجن من جن ابقره = الله لايبلانا اظنه صايبه جن البقر

ايناظر العالم بطبعه لين حتى تحشره = وانا نويت احشره قبل الله يحشره فالحشر


العازمي

اللي مجنّنّي سعود اليا مشى طار اغبره = لكن لاتعدي صحيبك والخطر مامن خطر

بالله قلّي يالعصيمي ويش باقي تذخره = كلٍ شكى همك ياكود العازمي مالك فخر


سعود العصيمي

سعود لامنه وقف خصمه ماربي ينصره = وانته تحلم بالنصر لكن مالك من نصر

اولهم انته ياعميل الخير يابو خنفره = ياجندي وسط الخفاره مانته ابضابط خفر


العازمي

اليا وقفنا يالعصيمي للورود امصّدره = كم ليلةٍ تشرق بريقك والشهود اللي حضر

تلعب وتاكل يالعصيمي من غصونٍ مثمره = واليا مدحتك شلت نفسك للكواكب والقمر



سعود العصيمي

انته كفو لكن مامستور مثل المنقره = مستورشاعر معتبر والمنقره شاعر عور

كم ليلة ياعيد تسري والبلوف مصنفره = والليله الليله تبا تسريبها واحد صفر


العازمي

يامقيّم الشعار عيبك لو تحاول تستره = مالك نصيب مع الثنينه يارجل فيما ذكر


لا واعذاب المبخره زال الجمر فالمبخره = يفوح ريح العود الازرق والسبب نار الجمر


سعود العصيمي

العيب فاللي لالقى علم الحقيقه ينكره=اتقول والا ماتقول انا عميل المتجر

اليابغيت الصدق مانحسب حساب ابن المره = وانكان ماطاوعتني تبا تجيك ادها وامر




المحاورة السادسة:



سعود العصيمي=


كان ياسلطان مانت بقادرآ تدي الامانه=خلها وارتاح ويسدك عتيبي من عتيبه
فرحوا الهيلا بك وقلنا الولد حاتم زمانه=مار خالفت التوقع فيك ياكبر المصيبـه


سلطان الجذع=



طيع شوري يالعصيمي واترك الروقي وشانه=لاخصيمٍ له على ميـراث ابـوه ولاطليبـه
ابو طايل لايضيق ان جاه حقه فـي مكانـه=ماني صحيبٍ تخلى فاللوازم عـن صحيبـه




سعود العصيمي=


انتهى الصبر وتعدى وانت اثر مانت بتكانه=ماابا اردك على حدك رضى والا غصيبـه
والله انا مادرينـا هـي غبـا والا لعانـه=مار بكره عند قاض المحكمه وش تدعيبـه




سلطان الجذع=


لن بغيت الحرب عانه , لن بغيت السلم عانه=اخذ درب من الدروب ومس فحبـال النجيبـه
نعرف اللي في ضمير الرجل من منطق لسانه=تشتكي شح النخل والتمر عندك وسط عيبـه





سعود العصيمي=


كيف تجحد فزعةعان وسعود وخوانه=بعد ماغذوك وانته مامعـك ماتشتريبـه
البخيل يعد شأن اهل الكرامه مثل شأنـه=مايفلّط في ريال ولا يعاين فـي قريبـه




سلطان الجذع =


موقفك بيّن من اللي ممتطي صهوة حصانه=والله انك ماتباله فالزمـن غيـر الغليبـه
اخذ لك ياطير شلوى درس من حادث ديانه=لاتسل السيف الاملح كل ليـل وتعتزيبـه


سعود العصيمي=


موقفي من موقفك موقف شجيعٍ له مكانه = كل واحد من ولي العرش مكتوب ٍ تصيبه

لاتلواى في طريقي ثم اجيب الخيزرانه = كل ذيبٍ فالزمن لابد مايلقاه ذيبه


سلطان الجذع =


لاتخاصمني وانا عندي على علمي ضمانه=لاتذكرني بضلع النير . أذكـرك بشعيبـه
خابرٍ في خاطرك جزعه وفي قلبك ذهانه=مار حاسب لاتحرث القبر مركوز النصيبة


سعود العصيمي=

انت ذيبٍ ماتعدي غير في ضلع القنانـه=مانت مثلي لوبغيت تصير وانته عودشيبه
لاتلحن لي على العود وتدق الاسطوانـه=ماكتب للعبد وسط اللوح لابـده يصيبـه





سلطان الجذع=


الغشيم اللي ردى فعله مع اهل الفعل خانه=مانلومه في ضميرة جرح مايلقـى طبيبـه
قبل نحجز لك مكان الصبح في دار الحضانه=لاتعرض للعرب ياصاحبـي كـلٍ وطيبـه


سعودالعصيمي=

اكبر الضلعان ياسلطان زعزعنا كيانه = والردي معروف كسبه مع طوال العمر خيبه
والله اني من علومك يالجذع عندي حصانه =لاتعرضني وانا لي راية خضراء وهيبه




المحاورة السابعة:

سعود العصيمي

سلام مني عد مبدأ النور = بالورد والريحان مقروني.
يامحمد الروقي وصلك الدور =ابا اهجدك وامشي على هوني


محمد الروقي

يامرحبا من خاطرً مسرور = ترحيبةً للي يعرفوني

انته تحسبنك مثل مستور = تراك منت بشي في عيوني



سعود العصيمي

دام البقاء والواردات صدور = ياللي تمرون وتصدوني.

انا ابن عمه شاعر ودكتور = وانته من الشعار مديوني


محمد الروقي

لاتعتذر منته ترى معذور = لقيتكم لو مالقيتوني

ياسعود لاتشهد شهادة زور = علمك بلا مذهب وقانوني


سعود العصيمي

لقيتنا في بيتنا المعمور = وقصرت بالتسليم من دوني

خل العمي ياصاحبي والعور = لكان صاحي مانت مجنوني


محمد الروقي

انا لقيتك منهي ومامور = غنيت مع ناسً يغنووني

متى نشوفك شاعرً مشهور =ونشوف جمهورك يصيحوني



سعود العصيمي


نامر وننهى والعلـم منشـور=والسيف للعـدوان مسنونـي
لياسعيت بسعينـا المشكـور=مشكور وامن اعداك مضموني



محمد الروقي


حنا نعرفك مالحقك قصور=ولاباح مكنونك ومكنونـي
هرشً ولو ينطحك مية ثور=ماضرّتك وابليس ملعونـي



المحاورة الثامنة:


علي العضيااني=

يالعصيمي لا تزوّد رقم بارقام البطاقـه=ثمّ يدري سيّدي نايف وزيـر الداخليـه
لو درى ما عاد لا بيني و لا بينك علاقه=فالبلاد تصير متخلّف و مجهول الهويّـه




سعوود العصيمي =



يالعضياني علي لاتفتح من الشـرق طاقـة=والله يحفظ الوزير ويحفظ رجال الحميـة.
من متى بيني وبينك يابيض الشارب صداقة=انت وسط الشمس وانا مستريحٍ وسط فيه.




علي العضيااني=

يا العصيمي فالمشاكل ما لنا حاشي و ناقـه=وانت يوم تصيح لجل أعطيك مالي من يديّه
لا تجيب الزاد ردّ الزاد مالـي فيـه فاقـه=ما بلدّ العين فيـك و لا تلـدّ العيـن فيّـه




سعوود العصيمي =


المشاكل ياعلي شايفك عاشقهـا عشاقـه=متعبٍ نفسك ولاانت ابمصلحٍ شئون البريه.
ياهل الواد الخضر جبنا لكم موس الحلاقـه=ماطلبناكـم كثيـر ولاطلبنـاكـم بلـيـه.






علي العضيااني=

يا شعيل اللي بركت لحمل مالك فيه طاقـه=لانت عظامك منه لو كانت عزومك قويّـه
ليش ما يطلب فراقي يوم انا طالب فراقـه=انت رجلٍ عنصري و انا ما احب العنصريّه




سعوود العصيمي =



لو يصير الحمل مثني ماحصلي منه عاقه=وانت خابر يوم انوخ له واشيله ماعليه.
انت رجالٍ نخبرك فيك صفقة واصطفاقه=وان ضويت بحسنةٍ وحدة تدبلها بسئية.




علي العضيااني=


خابرٍ انك يوم شلت الحمل من زود الحماقه=العرب فالديـن ماهـي زمـان الجاهليـه
و الله اني يالعصيمي ماني بقطّـاع ساقـه=ما نريد الله يبارك فيك نرفع بـك قضيّـه



سعوود العصيمي =


مايشيل الحمل الاحمق وانت روقنا رواقه=وانت لو تقدر توقف ماقفي وقفت زيه.
للحواجز ياعلي خابرك ماعنـدك لياقـه=استـرح قـدام لاذوقـك حـد النافعيـة




علي العضيااني=

الحمول أنواع يا وجيه الجماعه و الرفاقه=و انت رجال أجودي واشتلتها من حسن نيّه
الكويتي في كويته و العراقي في عراقه=و العصيمي فالديار من الرياض ليا الحويّه





سعوود العصيمي =



لو تغير نيتك ياراعي الدعوى الدقاقـه=ما تفيدك كلمةٍ بدلتها من غيـر نيـه.
واحدٍ سواق والاخر غشيـمٍ فالسواقـه=وانت صابك طلقةٍ من بندقي والنارحيه.




وغيرها محاورات كثيره لكن نكتفي بهذه.

[ابو فارس 511]

سرا ليل وبقى ليل ولنا ولكم فعول ودور
هلا يامرحبا ترحيب تقديـرٍ وصفطانـي
على شاطئ بحر جده يبا يغرق بك البابور
ولو تكتب وتمحى مانته ابقـادر تحدانـي
يعطيك العافيه ياسعود

[محمد العتيبي]

نحيه طيبه وعطرها المسك والريحان

لضيف هذا الاسبوع من حلقة كرسي الأعتراف

الشاعر والمشرف القدير / سعود العصيمي ..


مرحبا ومسهلا ياسعود شرفتنا بقبول دعوة الأخ هايل العتيبي ..

فشكرا لك وشكرا لهايل ..


والأسئلة لاحقا
...

[المتحد]

نحيه طيبه وعطرها المسك والريحان للجميع من اداريين ومشرفين وشعراء واعضاءوزوار هذا المنتدى الشامخ

ولضيف هذا الاسبوع من حلقة كرسي الأعتراف

الشاعر والمشرف القدير / سعود العصيمي ..


هلا وغلا ياسعود شرفتنا بقبول دعوة الأخ هايل العتيبي ..

فشكراً لك وشكراً للمشرف هايل العتيبي ..


والأسئلة كتالي
س1 /افضل شاعر معنى في المنتدى من القبيله وافضل شاعر من القبائل الاخر
س2/افضل ثلاثه شعراء في الفتل والنقض وسرعة البديهه
س3/هناك شعراء يختارون عنوان لمحاوراتهم هل عنوان المحاوره يخدم الشاعر
س4/ اخطر شعراء الهيلا في تمرير المقالب الشعريه
ههههههههه من شان ناخذ الحذر
ودي وحترامي للجميع

[@ـايل]

ابو فارس 511

محمد العتيبي

المتحد

...............

شاكر حظوركم وتشريفكم لصفحتكم متمنيا للجميع الاستمتاع بطرح الاسئله وقراءة الاجوبه مع ضيف كرسي الاعتراف ..

...........

[سعود العصيمي]

تبقا يامشرفنا و شاعرنا / محمد العتيبي
بارك فيك وفي مشرفنا الغالي هايل العتيبي.

[سعود العصيمي]

اخوي المتحد حياك الله وابقاك.

س1 /افضل شاعر معنى في المنتدى
من القبيله وافضل شاعر من القبائل الاخر؟

ج1- لااستطيع تحديد اسم شاعر
معين من القبيلة لان هناك اكثر من شاعرمن نفس
القبيلة لايقل مستواهم عن الاخر.
فمعذرة اخي المتحد عن الاجابه في هذا السؤال.
اما من ناحية القبايل الاخرى:
فالمنتدى لايوجد به شعراء محاورة الا القليل.
مثل 1- فواز السعيدي
2- وابو لمار
3- عبدالله الحربي والتي لم نراه من فتره طويلة
4- فايز الميموني المطيري واعتقد انه ترك المنتدى
من زمان.وجميعهم شعار متمكنين.
لكن ارى ان ، فايز الميموني افضلهم.
س2/افضل ثلاثه شعراء في الفتل والنقض
وسرعة البديهه؟
ج2 هنالك اكثر من 15شاعرآ
فالمنتدى جميعهم يجيد الفتل والنقض بغض النظر
عن السرعه،وهذا من خلال مجاراتي لهم.
واعذرني عن ذكر الاسماء.
س3/هناك شعراء يختارون عنوان
لمحاوراتهم هل عنوان المحاوره يخدم الشاعر؟

ج3- لا ارى ذلك ، ومن يختار عنوان لمحاورته
فهو ربما يقصد به التمويه ولفت النظر.فقط.

س4/ اخطر شعراء الهيلا في تمرير المقالب الشعريه.؟
ج4- اما سؤالك هذا فاقول انه،
الشاعر/ علي الثبيتي (النشمي).
هذا الشاعر اذا لعب معك انتبه منه نهائيآ. فهو مجرم،، هههه.

[خلف العتيبي]

يامرحباً بالضيف الذي أكن له كل إحترام وتقدير مشرفنا وشاعرنا سعود العصيمي..

نشكر الضيف على قبول الدعوه.. ونشكر المستضيف على جهوده..



مشاركتي فقط للسلام على الضيف..

متابعين لكم وبالتوفيق للجميع..

[فيصل المسعودي]

أهلاً وسهلاً

بالأخ سعود العصيمي في كرسي الإعتراف

من حسنات هذا الكرسي الإسبوعي

هو تعريفنا بشكل أكبر على إخواننا رواد هذا الصرح الكريم

وبما أنه ضيف هذا الإسبوع مشرفنا وشاعرنا القدير

سعود العصيمي

الذي نكن له كل الإحترام والتقدير

سوف نكون متابعين لأحداث هذا الكرسي خلال هذا الإسبوع

لنتعرف على شخصية شاعرنا القدير من جوانبها المتعددة

والشكر موصول للاخ هايل على جهوده الطيبة

تحياتي

[سعود العصيمي]

خلف العتيبي
تبقا يامرحب وتحيا وتدوم .ياطويل العمر
لاعدمتك.وهذا واجب وحق من حقوقكم علي.
وشرف كبير لي.

[سعود العصيمي]

فيصل المسعودي
بقيت ودمت يابن العم
وممايشرفني ويسعدني ومتابعتكم.
ومشاركتكم . لاخلا ولاعدم.

[سعود العصيمي]

كما اني اعتذر كل الاعتذار عن سقوط اسمين سهوآ.
للشاعرين نجمين من شعراء المحاورة.
وعزيزين علي بكل ماتعنيه هذه الكلمه هما :
الشاعرالنجم : حاكم الغنامي والشاعر والنجم
ابن سرحان الثبيتي.
فمعذرة ياابناء العم . كما اعتذر كل الاعتذار عمن
لم اذكر اسمه يعلم الله اني اكن لكل رجل منكم المودة
والاحترام والتقدير. سواء شاعر ام غير شاعر.

[روقي الجمش]

السلام عليكم ورحمة الله وبركاته

مرحباً بك مشرفنا الغالي في صرح المحبة والتواصل والشموخ ، والذي يجمع الأحبة في هذا البيت العامر باءذن الله . وإن دل على شيء فهي المحبة التي تجمع الأعضاء والزوار ليتبادلوا الأراء والأفكار ، ليتحاوروا فيما بينهم ،
وسعادتنا بوجود من يحسنون الأختيار لا حدود لها ، فكرسي الإعتراف يكشف لنا من المميزين والمبدعين الشيء الكثير ، إذاً هنا نقول لمشرفنا / هايل العتيبي شكراً لك على حسن إختيار ضيف كرسي الأعتراف وهو يستحق ذلك ويليق به ، لنتجاذب معه أطراف الحديث وطرح عليه ما يجول في خواطرنا من الأسئلة .


الأسئلة :
ـــــــــــــ

السؤال الأول / الشعر موهبة يتميز بها الشاعر ، هل ممكن لشخص ماء وليس بشاعر دراسة الشعر واحترافه ؟


السؤال الثاني :
ــــــــــــــــــــــ

بعض الشعراء يسخدمون الشعر في المدح وقد يبالغ الشاعر في ذلك ، بمعنى يمدح شخص يحبه الشاعر ويسرف في المدح . رأي شارعنا في ذلك ، وموقفه منه ؟


السؤال الثالث :
ـــــــــــــــــــــ


الشعر أنواع ، ماهو أفضل نوع قريب لنفس شاعرنا الكريم ؟


السؤال الرابع :
ــــــــــــــــــــ


أفضل قناة وأقصد هنا القنوات الشعبية من وجهة شارعنا الكريم ، يرى أنها خدمة الشعر بتمكن وروجت له بكل أمانة ؟


تقبل تحياتي / روقي الجمش .

[@ـايل]

خلف العتيبي

فيصل المسعودي

روقي الجمش

................

شاكر مروركم وحظوركم شرف لصفحتكم ..والله يعافيكم متمنين لكم مشاهده ممتعه مع الاسئله والاجوبه ..

.........

[سعود العصيمي]

روقي الجمش
وعليكم السلام ورحمة الله وبركاته
والله يبقيك ويطويل بعمرك.


السؤال الأول / الشعر موهبة يتميز بها الشاعر ، هل ممكن لشخص ماء وليس بشاعر دراسة الشعر واحترافه ؟
من الممكن ولكن قد تكون صعبة.
مثل ماقال المسعودي الموهبه غير والعلم شي ثاني.

السؤال الثاني :
ــــــــــــــــــــــ
بعض الشعراء يسخدمون الشعر في المدح وقد يبالغ الشاعر في ذلك ، بمعنى يمدح شخص يحبه الشاعر ويسرف في المدح . رأي شارعنا في ذلك ، وموقفه منه ؟

المدح فوق مالايستحق الشخص لايجوز ، اما انه يمدح شاعر يقدره ويحبه لصفات حميدة تتوفر به فهذا طيب.
وانا لا اؤيد المبالغه.

السؤال الثالث :
ـــــــــــــــــــــ
الشعر أنواع ، ماهو أفضل نوع قريب لنفس شاعرنا الكريم ؟
شعر المحاورة.
السؤال الرابع :
ــــــــــــــــــــ
أفضل قناة وأقصد هنا القنوات الشعبية من وجهة شارعنا الكريم ، يرى أنها خدمة الشعر بتمكن وروجت له بكل أمانة ؟
الصحراء والمرقاب في سباق على القمة مع افضلية اعلا لقناة الصحراء نظرآ لانها سبقت بعمرها الزمني.

[عيد العازمي]

نحيه طيبه وعطرها المسك والريحان

لضيف هذا الاسبوع من حلقة كرسي الأعتراف

الشاعر والمشرف القدير / سعود العصيمي ..


الذي يعتبر قدوه لمعظم شعراء المحاوره بهذا الصرح


وإليك يابو طايل:


هل قلل الاشراف من تواجد سعود كشاعر؟


سعود العصيمي عاصر جيل المنتدى القديم من يفتقد منهم سعود ويتمنى عودته؟

ماذا تفضل ؟ اللعب مع شاعر تحت اسم مستعار ام شاعر ظاهر باسمه؟


السوال المعتاد

اقوى بيت قلته واقوى بيت قيل لك؟


ومرحبا الف بالمبدع ابوطايل

[بندر المرشدي]

ابو طايل



السلام عليكم ورحمة الله وبركاته




الله يحييك على هالكرسي وفي منتداك الي ترحب فيه



الاخوان ما قصروا بالأسئلة



لكن لدي سؤال بسيط:


لماذا يكون ظهورك حصريا على الانترنت.. والى متى؟ إلا تعتقد

انه روتين ممل؟ وبس





وشكرا للأخ هايل على التنسيق والإستضافة

[معجب العتيبي]

هااااااااااااااااااايل

بيض الله وجهك على حسن اختيار ضيوفك



مشرفنا القدير وشاعرنا سعود العصيمي

متميز في حضوره دائما

وهذا لايمنع من كثرة الاسأله بالعكس يجب طرح كل الاسأله لنجني الفائده.

االاساله:

شعراء يلفت انتباهك وجودهم ولكن تفتقدهم غالبا؟


شعراء تتوقع ان يكون الاسم المستعار ضر بهم او نفعهم؟

ماهي صفت الشاعر اللتي لاتحبها في الساحه عامه وفي المنتدى خاصه؟

[@ـايل]

العازمي

بندر المرشدي

معجب العتيبي

.............

حظوركم شرف لصفحتكم ..ومشاركتكم فخر لنا ..اتمنى للجميع المتعه في هذه الصفحه مع الشاعر / سعود العصيمي ..

.........

[فايز بن سرحان الثبيتي]

سعود العصيمي



حييت يابو طايل


تسجيل حظور واطلاع على تفاصيل شخصية محببة لدى الجميع



سؤالي \هل ترى ياسعود ان المعنى في شعر المنتديات حاضر بشكل مناسب رغم الظروف التي تصاحب المحاورة عبر النت من غياب الاحتكاك الحقيقي والمواقف اللحظية وصفوف اللعب وخدعةالوقت المفتوح للرد التي اضعفت البديهه و كذالك الغموظ الذي يغلب على شخصيات النت عموما ً ؟


تحيتي لكـ

[سعود العصيمي]

هلا وغلا حييت يابوطلال:

هل قلل الاشراف من تواجد سعود كشاعر؟

نوعآ ما. لاني غالبآ اتواجد واتابع وانسق طواريق للشعراء
هذا هو ماتقدر تقول انه سبب التقليل من لعبي فقط لاغير.

سعود العصيمي عاصر جيل المنتدى القديم
من يفتقد منهم سعود ويتمنى عودته؟

الشاعر/ اللطام.
الشاعر/ مقعد الدغيلبي.
الشاعر/ غازي الدعجاني
الشاعر/ البواردي رغم اني
مالعبت معه فقط كنت اتابع
محاوراته وقد أعجبني لعبه،
فهو شاعر متمكن..

ماذا تفضل ؟ اللعب مع شاعر تحت اسم مستعار
ام شاعر ظاهر باسمه؟
والله صاحب الاسم المستعار لاارغب اللعب معه.
ولا اطلبه الااذا كان معروف لدي ، وعندما ارد على
شاعر باسم مستعار فاني ارد عليه من باب الاحتراام
فقط.وافضل صاحب الاسم الحقيقي في كل الاحوااال.



السوال المعتاد
اقوى بيت قلته واقوى بيت قيل لك؟

والله البيوت القوية كثيرة سواء اللي قلتها أو
قيلت لي. ولكن فيه بيوت مازلت اتذكرها،، منها :

بيت قاله لي مرزوق العتيبي


مايذل اللي علـى رب المخاليـق اعتمـاده
مار ياسعود اغطس الغبات مثل اللي غطسها

رديت عليه:
شيل ضلع طويق لامنك قدرته مـن بـلاده
كان لاقي لك فرايـس فالليالـي تفترسهـا



علي الثبيتي((النشمي))

يقول:
طيعني ريح ضميرك واطلب الله فالستيره
صاحبك جني مع الجني وللصاحين صاحي


رديت عليه:
مستريح ولاحسبت حسـاب لليمنـى القصيـره
وانعرف منهم أهل السيف الحدب واهل المساحي



بيت لك انت ياعيد :
إذا مالك مع اهل العرف لافزعه ولا لك راي
تذرّيك الحصاه اللي وراك وسرحة الـوادي!!

ودري عليك:
ليا منك طلبت الوافية مني ومن شـرواي
تبا تلقى طلبك مع العرب ماعنك نشـادي


بيتين للشاعر الدويش:

انا الدويش اللي جميع القوم يجرشهم جريش
والقوم اولع فوقهم بالنارواصلاهـم صلـي
هذا الكلام المختصر واللي يقابـل للدويـش
والله لااذر اعيونه الثنتيـن واملاهـا ملـي

رديت عليه:

والله ماتسري يالدويش الا من عتابه خريش
حنا كعام امطيـر وانجونـا قليناهـم قلـي
مطير لاشافوا عتيبـه فالليالـي ماتعيـش
انطعتني ترجع وراك شوي مانـت ابقدلـي

هذه من ضمن البيوت
اللي مازلت اتذكرها.

[سعود العصيمي]

بندر المرشدي
وعليكم السلام ورحمة الله وبركاته
والله يبقيك ويعافيك وهذا لاشك فيه

لكن لدي سؤال بسيط:
لماذا يكون ظهورك حصريا على الانترنت.. والى متى؟
إلا تعتقد انه روتين ممل؟

ظهوري على الانترنت هو من باااااب التسلية. والاطلاع فقط.
وحتى فقد الرغبه ووجود مايحل محلها بأفضل منها.
بالرغم رغبتي اصبحت تتلاشى نوعآ ما. وهو بالفعل روتين
مملي في شيْ ولكن مفيد في اشياء
.

[سعود العصيمي]

معجب العتيبي
هلا وغلا اسعدني حضورك ووجهك ابيض لاعدمتك.


شعراء يلفت انتباهك وجودهم ولكن تفتقدهم غالبا؟
هناك شعراء مبدعين ولكن تواجدهم قليل: مثل

الشاعر/ خوي السعد.
الشاعر/ العمدة.
الشاعر / الصاطي.

شعراء تتوقع ان يكون الاسم المستعار ضر بهم او نفعهم؟

الاسم المستعار ان ماضر مانفع. وارى
ان الاسم الحقيقي يحفظ للشخص حقوقه افضل بنسبة كبيرة
من صاحب الاسم المستعار.

ماهي صفت الشاعر اللتي
لاتحبها في الساحه عامه وفي المنتدى خاصه؟


صفة الشاعر التي لاتناسبني
في شاعر الساحه واكرها: غالبآ

هي عندما تكون معانية مكشووفه
في اغلب محاوراته للجمهوور،،
ويتطرق لذم القبايل ، بمالايليق بها.

أما فالنت
فالصفة التي اكرها فالشاعر
هي عندما تلعب مع شاعر وترمز
لمعنى برمز يدركه الشاعر الواعي وتعيده له مرتين
ثلاث ولايفهمك .الا في حالة ان المعنى شخصي
واقصد حدث بين شخصين وهو لاعلم له
بهذا الحدث، فهنا يكوون على حق.
بالايضافة البطء فالرد لاكثر من ربع ساعه.

[سعود العصيمي]

ابن سرحان
هلا والف غلا
الله يبقيك وبيض وجهك على
المشاركه والحضور المشرف لنا.

سؤالي \هل ترى ياسعود ان المعنى في شعر المنتديات حاضر بشكل مناسب رغم الظروف التي تصاحب المحاورة عبر النت من غياب الاحتكاك الحقيقي والمواقف اللحظية وصفوف اللعب وخدعةالوقت المفتوح للرد التي اضعفت البديهه و كذالك الغموظ الذي يغلب على شخصيات النت عموما ً ؟

المعنى هو العنصرالاساسي لشعر
المحاورة ولا روح للمحاورة بدون معنى.
ولكن حسن الصياغة والتركيب تختلف من شاعر لاخر.
فعندما تتحاور مع شاعر يجيد صياغة المعنى وتركيبه
بالشكل السليم، وانت شاعر مدرك فانه من الممكن
ومن السهل اكتشافك لمعناه. ومجارانه .سواء شاعر
ساحة او شاعر نت. وقد يكون المعنى حاضر بين شعراء
معينين من شعراء النت .وقد يكونون افضل من شعراء
موجودين على الساحه حاليآ،

[ناصر العصيمي]

ضيف من عيار ثقيل

شاعر له مكانة في قلوب اعضاء المنتدى

دائما ما نستمتع بقصائده ومحاورته


اتيت للترحيب بالشاعر ابوطايل

وسعدنا بمعرفة خفايه وجوانب من حياته


كل الشكر للمستضيف ...

[الصاطي,,]

هلا وغلا بشاعر والمشرف المتميز دايماً




سعود العصيمي اسم ارتبط بالابدااع والجزالة



سؤالي,, انت من قبيلة الشعراء كما يطلق عليهم هذا القب,,الا وهم قبيلة العصمه


من يعجبك من شعراء العصمه في النظم والمحاوره,,؟؟ ومن يعجبك من شعراء فبيلة عتيبه عاامه,,





تحياتي

[@ـايل]

ابن سرحان الثبيتي

ناصر العصيمي

الصاطي

..........

اشكر حظوركم وتشريفكم لصفحتكم ..متمنيا لكم وللجميع الاستمتاع مع ضيفنا سعود العصيمي ...

.........

[سعود العصيمي]

ناصر العصيمي

هلا والله وغلا ياناصر

والل ه يبقيك ويحييك.

[سعود العصيمي]

الصاطي

تبقا يامرحب سلمت ودمت .

شعراء عتيبة كلهم على العين والراس . حيهم وميتهم
لكن من الحيين يعجبني كلآمن:

من شعراء العصمه خاصة فالمحاورة:
الشاعرالكبير / مستور العصيمي.
الشاعرالنجم / حمدان العصيمي.


وفالنظم الشاعر الكبير شاعر الدفاع عن القبيلة / كديميس ابن صالح العصيمي.
والشاعرالكبير/ نجر ابن فيصل العصيمي.
الشاعر الكبير/ فهد ابن حنس العصيمي.

ومن شعراء عتيبه عامه فالنظم :
الشاعر الكبير/عبد الله بن نايف بن عون.
الشاعر الكبير/ غازي بن عون.
الشاعرالكبير/ رشييد الزلامي
الشاعر الكبير/ شقير الجذع
الشاعر المميز / عايض المقاطي.



امافالمحاورة :

الشاعر الكبير/ رشيد الزلامي
الشاعر الكبير / حبيب العازمي والذي اقدره واحترمه الى ابعد الحدود فهو حاليآ شاعر المحاورة الاول على الساحه الشعبيه كلها

الشاعر المميز/سفرالدغيلبي

[ناصر الجلاه]

..

سعود العصيمي

..

هلا والله ومسهلا يابوطايل

شاعر كبير ولك مكانتكـ في هذا الصرح الشامخ .

عندي سؤالين فقط .

س1 : انت شاعر جزل وتجيد صياغة وتركيب المعاني الملفته والجزله في ميدان المحاوره وتغيب عن ساحة النظم . فلماذا .؟

س2 : إذا كان لديك مسجاله شعرية مع أحد الشعراء الاعضاء أو خارج النت نرجوا أن تكرمنا بها في هذا الموضوع كرمآ وليس آمرآ ؟

أرجوا أن لاأكون تماديت كثيرآ :)

دمت

..

[عز العرب]

هلا وغلا بالشاعر والمشرف المتميز دايما
سعود العصيمي
ونشكر الاخ هايل العتيبي على جهوده المميزه


السوال الاول واريد الاجابه بدون مجامله
كثير من الشعار اشادو بشعر ملفي المورقي وانه شاعر معنى
ولا يقل عن مستور العصيمي ورشيد الزلامي
وانت ذكرت ان حبيب العازمي هو الشاعر الاول على الساحه

ومتابعين شعر القلطه قالو ان حبيب ليسى شاعر معنى

وانا اريد الاجاابه وبصراحه وكل امانه ياسعود منهو الافضل

في المعنى والفتل والنقض
حبيب والا ملفي
السوال الثاني
هناك من يقول ان شعراء النت شعراء نسخ وتلزيق
ماهو جواب سعود العصيمي
وسلامتك

[@ـايل]

ناصر الجلاه

عز العرب

.........

حظوركم شرف لصفحتكم ..ومشاركتكم فخر لنا ..اتمنى للجميع المتعه في هذه الصفحه مع الشاعر / سعود العصيمي ..

.........

[سعود العصيمي]

ناصر الجلاه

بقيت ياطويل العمر. ولاعليك زود.

س1 : انت شاعر جزل وتجيد صياغة وتركيب المعاني الملفته والجزله في ميدان المحاوره وتغيب عن ساحة النظم . فلماذا .؟


والله هوايتي فالمحاورة فقط، اما النظم فلم اهواه فقط إن بغيت اكتب قصيدة لها مناسبه خاصة كتبت. بالرغم اني لااجيد شعر النظم بدرجة كبيرة.

س2 : إذا كان لديك مسجاله شعرية مع أحد الشعراء الاعضاء أو خارج النت نرجوا أن تكرمنا بها في هذا الموضوع كرمآ وليس آمرآ ؟


لايوجد لدي مساجلات.

[سعود العصيمي]

عز العرب

تبقى ياعز العرب وحياك الله واخذ جوابي الذي يخص وجهة نظري فقط.
السوال الاول واريد الاجابه بدون مجامله
كثير من الشعار اشادو بشعر ملفي المورقي وانه شاعر معنى
ولا يقل عن مستور العصيمي ورشيد الزلامي
وانت ذكرت ان حبيب العازمي هو الشاعر الاول على الساحه
ومتابعين شعر القلطه قالو ان حبيب ليسى شاعر معنى
وانا اريد الاجاابه وبصراحه وكل امانه ياسعود منهو الافضل

ملفي شاعر كبير وشاعر معنى وشاعر قوي فالفتل والنقض
من وجهة نظري,ويمكن يكون اقوى من حبيب.
لكن ملفي يميل الى المجاملات في كيثر من محاوراته.
والمجاملة لاتصلح.

اما من يقول ان حبيب ليسى شاعر معنى.
فاقوله اسمح لي ان ماعندك سالفه.
حبيب شاعركبير وشاعر ذكي بقوة وشاعر معنى
وشاعر ابدااع متجدد وشاعر صاحب اخلاق عاليه
ولايجامل خصمه.،ومحبوب لدى الجمهور ولدى
زملائه الشعراء من جميع القبائل. فهو استأذ في جميع الاحوااال.
وبرز بروزآ قويآ في بداياته. ليس مثل بداية ملفي فملفي
الى وقت قريب وهو شاعر عادي.
اما في الوقت الحالي فملفي
مثل ماذكرت لك عنه في بداية اجابتي.
ويبقى حبيب الشاعر الكبير والمتميز والمحبوب والاول على الساحه ومثل
ماقال مستورعندما سئل من ترشح من بعدك من شعراء عتيبه
ليكون شاعر عتيبه فالمحاورة بعدك. قال: حبيب العازمي
ومن ترشح شاعر قبيلة العصمه قال حمدان بالنسبه للعصمه



السوال الثاني
هناك من يقول ان شعراء النت شعراء نسخ وتلزيق ؟
ماهو جواب سعود العصيمي
وسلامتك

من يقول هذا الكلام فكلامه يخصه لايخص غيره
وقد يوجد من شعراء النت شعراء ينطبق عليهم
مثل من قال ان شعراء النت شعراء نسخ ولزق.
ولكن النت فيه شعراء مبدعين ومتمكنين ويجيدون
الفتل والنقض وتركيب المعنى منهم شعار
عرفتهم عن طريق النت ثم تعرفت على شخصياتهم
فهم اساتذه شعر. فتلآ ونقضآ ومعنى. وافضل
بكثير من شعراء موجودين حاليآ على الساحه،
ولو حصل لهم مواجهات مع بعض شعار الساحه
لتفوقوا عليهم بكثير.

[حمود بن برجس]

السلام عليكم ورحمة الله وبركاته ...

تحيه طيبه .. واسعد الله اوقاتكم بكل خير

استمتعت بالحوار واللقاء الجميل مع شاعرنا المبدع

واشكر الاداره على هذه المساحه الجميله مع احد الشعراء البارزين

في هذا الموقع الغالي وهو الشاعر الكبير سعود العصيمي


وبعيدا عن المجامله هذي شهادة حق ليست مني بل من الكثيرين

ان ابو طايل شاعر من الطراز الاول

وانا شخصيا اطرب على طواريقه ولعبه مع اي شاعر


عندي سؤال لابو طايل


مساك الله بالخير


1- هل ترى ان السرعه في الرد قد تكون على حساب القوة في البيت
بمعنى اوضح ماتشوف ان الشاعر اذا اهتم بسرعة الرد سيكون هذا على حساب قوة بيته .. ؟

انت كونت ثنائي مع الشاعر المبدع سلطان الجذع فتره طويله وقبله مع مقعد الدغيلبي والان مع عيد العازمي

2- هل ترى ان الثنائيات تخدم الشاعر ام تضره ؟


3- ما رأيك في الموال في المنتديات ؟ وما رأيك في الشقر ؟ وايهما تفضل


4 -الهرش - المحيط الاطلسي -


لقبين لك ايهم الاقرب الى سعود العصيمي


هذا مالدي الان وقد تكون لي عوده :)


تقديري ايها الشاعر الفذ ..