خـلـيـف بـن دواس .. ..؟!! ولقاء قناة الساحة ..

[وافي الخماش]

السلام عليكم ..

شاهدت أحدى اللقائات مع الشاعر / خليف بن دواس .. في احد القنوات ..

تطرق لشعر المحاورة .. وشعاره ..
من بعض ما قال خليف ..

مطلق الثبيتي الله يرحمه قالوا له وراء ما تلعب مع خليف قال .. انا درست الشعر وحققت جمهور في وقت طويل .. لو العب مع خليف راح كل شي .. بمعناه (( ان مطلق ما لعب مع خليف لانه .. خايف انه يدمر شعريته وجماهيره ..

..

وفي رايه ورأي الشاعر احمد الناصر .. ان خليف بن دواس لم يجد الشاعر .. الذي يلعب معه .. اي ان خليف .. لا يراء احداً غيره شاعر ..


بعيداً عن العنصرية ..

ما رائكم بالشاعر .. خليف بن دواس ..

وهل هو فعلاً يستحق .. ان مطلق لا يريد ان ان يلعب خوفاً من شاعريته ..

ومن لديه اي شي عن خليف او محاورات ينزلها هنا ..

[نواف العصيمي]

:)

مطلق العتيبي شاعر كبير ... شهد له التاريخ قبل أن يتكلم أقزامه ,,



..

[محمد المنصوري]

مطلق الثبيتي أتفق الشعراء والنقاد أنه لم يمر على الساحه من هو
أفضل منه لاقبله ولابعده ..
ومستحيــــــــل انه يقول الكلام هذا ... اما بالنسبة لخليف بن دواس
كل الشعراء ترفعوا عنه حتى شعراء قبيلته ... لانه ينزل بالمحاورة
والنزول بالمحاورة والسب المباشر أضعف مستويات الشعر

[محمد العتيبي]

الله يعينه على نفسه :)


لااااااا تعليييييق

خليف أصبح كمن كذب كذبه وصدقها ..

تحيتي:)

[زياد المزرمي]

وافي الخماش

مساك الله بالخيررر


اول شي مطلق الثبيتي ما هو محتاج لشهادة احد الله يرحمه

ولاهو محتاج لاحد يدافع عنه لانه اثبت نفسه بل سيطر على ساحة

المحاورة بشعره لا مكاتب ولا جماهير ولا غيره


اما بالنسبه لخليف بن دواس فهو شاعر فحل ومن كبار الشعر

فهو يتميز بالقوه في الفتل والنقض وللجميع ان يستمع ويحكم

ومن ناحية ممانعة الشعراء عن اللعب معه ليس انتقاص في شعره

بل لاسلوبه الذي قد يجبر الشاعر الذي امامه بالهبوط بما لا يريد

ولك انت تسأل كبار شعراء المحاوره عن رأيهم بشعر خليف بن دواس

وليس بشخصه او اسلوبه فأسمع ما يقولونه اتجاههم


خليف بن دواس قارع كبار الشعراء الاحياء والاموات ولهو محاورات جميله

ونادره قد لا توجد في وقتنا الحالي


ولك مني جزيل الشكر

[الصاطي,,]

خليف شاعر مافيه شك

لكن سبب ان الشعار مايلعبون معه المحاوره نزوله بالمحاوره
خليف يحبك بيتين قبل المحاوره ويتعب عليها تكون تشمل السخريه والتهزئه والمعنى ثم ليا قابل الشاعر صفقه على الله وبالله

ولا يقدر اي شاعر يمشي القاف مع خليف يالطريقه المطلوبه ايدا
لان خليف ماعنده رمزيه ولا تلميح ولا فنيات بس اخذني جيتك,,,

واذا قال انه ماحصل شاعر صادق لان الشعار يترفعون عن صواقط الكلام

وخاااااااصه الجيل لاول,,



تحياتي

[أبونواف]

الشاعر مطلق الثبيتي رحمه الله شاعر كبير شهدله جميع الشعار الذي قارعهم في وقته ولاأعتقد أنه خاف من خليف بن دواس لكن خليف بن دواس يحب الانزلاقات في الكلام والنزول بالمحاوره نسأل الله له الشـــــــــــــــــــــفاء .
ولك خالص تحياتي

[طارق النفيعي]

أسمع به ولا عمري شفته له محاوراته إلا نادرا ً ..

[رعد الروقي]

الذم ما يهفي للأجواد ميزان *** والمدح ما يرفع يدينن قصيره




يا اخوي لو يهرج لك واحد ما تعرفه الى بكرة ويقول

انا من كبار الشعراء تصدقه ؟؟


اجاوب عنك لا لا


الميدان يحكم

هذا شاب راسه ما احد عرفه


وهات شاعر توه ماله سنة تلقاه معروف وعندكم امثلة واجد


لماذا لانه قدم مفردة جميلة وجزلة واحترم نفسه واحترم من حوله

فسار بخطى ثابته ووصل

اما من نبذه المجتمع لا ستخدامه الفاظ غير لايقة وعدم سيره على النهج القويم فلن يصل


اذن الموهبة ما يبي لها هرج ومرج تطلع تطلع

مطلق حبيب رشيد مستور حبيب الهاجري مصلح

ما احد طبل لهم ولا زمر وحتى هم ما مدحوا انفسهم

شعرهم يتكلم

ميدان فقط خلوه يطلع بشعره كان صادق باقي له سنيات يحاول


خلصنا من الشعر

ـــــــــــــــــــ


طيب شوف اللقاء بالله هذا كلام يقوله واحد عاقل

يحاول ينقص من قيمة الشعراء

ويمدح نفسه بشكل فاضح


هذا يدل على ماذا ومن سواها قبله


يمكن فريد من نوعه

[فهااد]

بسم الله الرحمن الرحيم

السلام عليكم ورحمة الله وبركاته


اما قول بن دواس ان مطلق قال :

لو العب مع خليف راح كل شي


لعلها من باب السخريه هذا إن صح ان مطلق قالها


وهل هو فعلاً يستحق .. ان مطلق لا يريد ان ان يلعب خوفاً من شاعريته ..


يستحق اذا كانت شاعرية خليف بن دواس اقوى من شاعرية

عبدالله المسعودي ومحمد بن تويم رحمهم الله وشاعر مطير

الشاعر الكبير شليويح بن شلاح المطيري والجبرتي ومستور العصيمي

[رعد الروقي]

لو العب مع خليف راح كل شي



الكلمة واضحة يعني لو العب معه لوثت تاريخي

على بلاطة كان ما فهمت



وبعدين اللي حافظ هالكلمة من هو


يبروزها في بيته تراها شهادة كبيرة << هههه

[عارف الشلاحي]

لااحد ينكر شاعرية خليف حتى اكبر الشعار

ومعروف عنه ان القاف لايشيب معه .

ولكن عدم رغبة الشعار اللعب معه لها اسباب :

1- طواريقه طويله متعبه للشعار وللصفوف

2- يتطرق للخزى بشكل كبير مبالغ فيه ( الجميع عنده سواء )

3- يأتي للحفله بأشكال غريبه ( قد تراه عاصب راسه وحاط صبخه )

4- صوته غير واضح للصفوف وللجمهور

5- كثير المقالب لاتجد له بيت خالي من مقلب

[ولد ميسان]

اخواني على الكل احترام وجهة نظر الاخر وانا اتوقع الكلام اللي قاله خليف قريب من الصحه

[ابو فايح]

هههههههه
تصدق كنت اتفرج اللقاء واضحك

يقول مالقيت شاعر يشوف نفسه الشاعر الذي لايقهر!!!

مطلق يوم قال هالكلام عارف خليف ولسانه ومايبغا يضيع وقاره الذي بناه على مر هالعصور وينزل مع خليف الى ما يريد .

هذه كل الحكايه

وخليف شاعر لكن ضيع نفسه شفنا كم من شاعر طلع بعده ووصل الى اعلى المراتب سواء بمعرفة الامراء او الشيوخ او ماليا او حتى جماهيريا ولكن خليف سيموت ولا يعرفه الا القليل والقليل جدا.

[وافي الخماش]

الله لا يهينكم جميع نك نك ..


علم علم ..

[بجّاد الثبيتي]

لا وين يقلل من مكانة مطلق ..!
يعني رغم انه مات رحمه الله
لكن يومياً ستجد محاورة له تنزل النت
او تجدها تعرض بالتلفاز

لكن لعل الأمر من الدعابة قالها
وأنا لا اهتم بشعر المحاورة بهالكثر حتى اقيمه
لكن كل شاعر يفرض نفسه من خلال متابعة الجمهور !
وكل مانتشر صيته دل على قوته وجزالته ..

[ولد ميسان]

اخوي المنصوري كلامك ان مافيه مثل مطلق على الساحه الله يرحمه من ناحية القوة فهذا غلط بحد ذاته رأينا الشعراء التاليين ممن عاصروا مطلق وهم اقوى منه وهم/
المسعودي
الجبرتي
مريسي الحارثي
الزلامي
صياف الحربي
بن تويم
شليويح المطيري
وغيرهم لاتحضرني اسماؤهم
اما من ناحية نقل المحاوره من العصبيه القبليه الى الانفتاح فانا معك لم يسبق لأحد غير مطلق تطرق لهذا الموضوع فهو له الفضل الله يرحمه بعد الله في نقل المحاوره وعليك تقبل وجهة نظري بصدر رحب

[الجزل]

آلله اكبر

آخر زمان خليف ياخذون معاه مقابله

لا و يقوول في مطلق كذا !؟

ما قول غير صدق آبو جميل يوم قال

>>الله يقطع أم خليف ما ربت ولدها ..


و الله لو أنه يعرف معنى الشعر آستحى من اللي يقوله

تقبلووووووووو مروري

[بجّاد الثبيتي]

ولد ميسان

الله يرحم من مات فيه ويحفظ من بقي فيهم ..

مطلق يعتبر الأول في شعر المحاورة
من سنين طويلة مات ..
ومازالت نصوصه ومحاوراته باقيه !
هالشيء يثبت بما لا يدع الشك فيها

لزعامة مطلق ..
وهناك أمثال صياف انقطع المحاورة من غياب مطلق

وهناك شعراء احياء ومازالوا يحاورون
لكن لايوجد لهم ذكر بالمجالس ..

أنت فرّق بينهم وأحكم وفصّل
كيف تقاس الزعامة ..

[ولد ميسان]

سـلام يالـي لابغيتـه مالقيتـه وأن ما بغيته واجده فأطرف مكان

هذا بيت حكمه لمريسي الحارثي وعندما سمعه هلال السيالي الله يرحمه من الوالد قال هذا بيت حكمه ولابد اني احفظه قبل حفظ قصائدي
((كيف تقول يأخوي ان بعضهم مالهم ذكر في الوقت الحالي))يعني الزلامي الهاجري وبن عياد مالهم ذكر وغيرهم كثيييييير

ولاننسى ان مطلق اذا انتهى من المحاوره مع مريسي الحارثي قام وسلم على راسه
يأخوي تكلم بالمنطق

[بجّاد الثبيتي]

الحارثي ترانا جيرة وحلف .. :)
ولهالشيء بقدّر كلامك
لكن أعلم انني لم أقلل من أحد
ياخي انا لم أقلل من أحد ..

لكن أن تأتي بعشر أسماء
وتقول هؤلاء أقوى من مطلق !
هذا عيب وطعن في شخص ميت يرحمه الله

لك الحق في أن تمدح شاعرك
يعني مايصلح المدح الا يوم تقول ذا افضل من ذا !

مطلق الأفضل ..
ولو تنط وتدحدحر وتمشي وتطلع
يوم كان حي الأفضل
وهو ميت مازال الأفضل !

[ولد ميسان]

طيب ليش معصب هذه وجهة نظري احترمتها هذا يدل على اخلاقك الطيبه ماحترمتها وش اسوي بك؟؟؟؟؟؟
بعدين شكلك متعصب لمطلق الله يرحمه لأنه من قبيلتك
انا اعترفلك ان بن عياد شاعر لكن الزلامي والهاجري اقوى منه وهو من قبيلتي

.................................................. ....................................
.................................................. ...........
انصفووووووووا الشعر ياخوااااااااااااني


نرجوا ان تحترم زملائك الاعضاء , وقد حذفت لك بعض الردود من بعض المواضيع والتي تضع حولك علامات استفهام , ونتمنى في ردودكم القادمة ان تحترم نفسك واخوانك الاعضاء

الإدارة

[سلطان الجـذع]

بجاااد الثبيتي .. كلامك عين الصواب ...
مطلق لم ولن يأتي أفضل منه في شعر المحاورة
ألى أن يرث الله الارض ومن عليها

[بجّاد الثبيتي]

صحيح اني ثبيت اخوي لكني من روق !
من ربع من ربيعان ..
وعندما كلمتك كلمتك بجيرتك لأحد فروع عتيبة
وماهو عند العرب يعتبر جيره لكل القبيلة !

شوف هالأمور مافيها قبلية
لو قبلية كان ألغيت كل الشعراء الآخرين ..
ولا أفرض رأيي الا عندما رأيت تعديك !

وأنت للمره الثانيه تقحم أسم مطلق وتقلل منه
ياخي حدد الأفضل عندك !
ليه تجعل مطلق قياس لتحدد من أفضل منه !

للمره الأخيرة فضّّل من تفضل من الشعراء
لكن المفاضله والمقارنه بين أحياء وميت !
يعتبر من أسوء الأمور المذمومه ..

ويعتبر مطلق الأفضل وبشهادتك أنت
عندما جعلته تقييم !
لكن لاتريد الاعتراف بذلك لتجعل مريسي أفضل منه
وهو شاعر جزل وذو قدرة ..

لكن أنا أفضّل مطلق وأراه الأفضل
وأنت تفضّل مريسي وتراه كذلك ..
لكن لكن بدون رفع أناس فوق أناس !

[ولد ميسان]

أخوي بجاد انا لم اقتنع بوجهة نظرك وانت لم تقتنع بوجة نظري اذا على الجميع منا الاحتفاظ بوجهة نظره ومثلما تقول مطلق ميت ترى مريسي الحارثي ميت الله يرحمهم جميع

وبعدين يأخي انا حر اشوف مطلق الله يرحمه الأفضل ولا غيره وأنت كذالك حر في رأيك

أرجو ان الموضوع لايسبب عدوى بيني وبينك


وشكرآآآ

[بجّاد الثبيتي]

الله يعطيك العافيه
كذا فهمتني صح .. :)

[عزوتي عتيبه والابل تروي]

خليف ماعنده سالفه يحب يهايط وبس

ولاهو واصل ماوصل له المرحوم باذن الله مطلق

وانا اشك في عقل المدعو خليف بن دواس :)

[مرزوق الجعيد]

منهو (خليف دواس)؟؟؟

لم اسمع بهذا الاسم في حياتي مع اني متابع جيد لشعراء المحاوره

وركز على كلمة(شعراء)

[سطام الحارثي]

السلام عليكم ورحمة الله وبركاته

اخواني انا اعرف الشاعر الكبير/خليف بن دواس المطيري

اعرف نه يحب السخريه على الشعراء والتهكم لكنه شاعر كبير

وبيوته اقوى بيوت ولاتجد اقوى منها لذلك الشعراء قاطعوا

هذا الشاعر الفذ/خليف بن دواس

لانه شاعر يحوس الشاعر اللي قدامه ويلعب به كما يلعب بالمسبحه

لكن الشاعرالكبير/خليف بن دواس

واجه الشاعر الكبير/رشيد الزلامي

يوم يقول:اقبلت بالزلامي مع العازمي اقبلت بالزلامي مع العازمي

مرخيه راسها رافعها ذيلها مرخيه راسها رافعها ذيلها

فقال رشيد:كلمةٍ مالها كرت تحت قدمي كلمةٍ مالها كرت تحت قدمي

علم مطير تمسك مهابيلها علم مطير تمسك مهابيلها

طيب هذا رد قوووووووووووي

والشعراء فيهم من تجده قوي في يوم ويوم آخر تجده ضعيف

ماكل واحد صيدته كل يوم ظبي

صياف اقوى من مطلق الثبيتي والمسعودي اقوى

صيباف يقول لمطلق:

ضحكنا لعلوشه وجابت لنا علوش=ولاادري بقت لثبيت ولا للاشرافي

والجبرتي اقوى ومريسي اقوى بقول صياف للوالد

ان مريسي لم يأتي مثله بالحجاز

وبقول الشاعرالكبير/رشيد الزلامي لي انا

ان مريسي لم يأتي مثله بالحجاز

وانا قد تلاقيت مع الشاعر الكبير/خليف بن دواس

قبل سته شهور حولها

وانا صغير بالسن لم اتجاوز السابعه عشر من عمري

فقلت ميد خليف:

الليل لايسري ترا الليل مجنون الليل لايسري

ياخليف بن دواس هات العلومي ياخليف بن دواس

ياعود يامهذري بغير سنون ياعود يامهذري

----------------------------------------

هل خليف حينما بدعت عليه

اعتذر ان يلعب معي هو خوف مني؟

الاجابه لا

لكن الشاعر ورغبته مع من يلعب

اما ياخي الثبيتي لاتاخذ مقلب في نفسك

اذا كان خليف مهوب شاعر وهو فعلاً شاعر

اجل جارالله السواط شاعر معاني جارالله السواط

شاعر فكاهي

وقل ماتجد ان تكون في بيوته معاني

والعموم لو تكلمنا وقلنا لم ياتي مثل

مطلق-ابن تويم-هلال السيالي-مريسي-عطيه-محمد بن جرشان-المعنى البقمي-رشيد-صياف-الجبرتي-المسعودي-شليويح-ابو مشعاب-مبروك ابو ناب-مفرح الظمني

لم ياتي مثلهم فالجزيره العربيه شعراء قط

انا شاعر ومتابع جيد للشعراء القداما

واحفظ لهم الشيء الكثير

اما بالنسبه لشعراء عتيبه فاقوى شاعر في عتيبه لم ياتي مثله احد

الشاعر الكبير/رشيد الزلامي هذا لم تنجب الساحه مثله شاعر ابداً

اخوكم/سطام الجياشي الحارثي

[ولد ميسان]

يعطيك العافيه أخوي سطام كلامك عين الصواب ومثل ماقال شاعر النظم الكبير/عيضه عطيه الحارثي أن مريسي ليس مدرسه شعريه بل جامعه شعريه من يحتك بها يستفيد الكثير منها

[ضاامي وفااا]

رشيد الزلامي وخليف دواس وطاروق غريب البدايه عند خليف دواس اتركم مع المحاوره


خليف المطيري

أقـبـلت بـالزلامي مـع الـعازمي ....... مرخــيه راســها رافـعه ذيـلها



الزلامي


كـلـمت(ن) مـالها كـرت تـحت أقدمي....... عـلم مـطير تـمسك مهـابلها



خليف المطيري


جـرعت الـمر مـن مـلعقة حضرمي....... ذوقـها يـالزلامي عـلى كـيلها




رشيد الزلامي

لـو دريت ان بالأرض بـكم وعـمي ...... الـعمي لا تـجيـني ولا جـيلها



خليف المطيري



جر صوتــك مـع الـوتر يـاسمسمي.....لان روحـــك ..... تـروي لها




رشيد الزلامي

يـاخـليف انت نـقطه بـراس اقـلمي ...... مـــير صــادق عـتيبه وصـلي لها




خليف المطيري


بـانـت الـبينه ونـعمى الـمنعمي..... انــطح الـقوم وأشـرب فـناجيلها



رشيد الزلامي


كـم شـربنا فـناجـيلكم يـأذمي ..... كــلمتن يـتعب الـفكر تـحليلها[/QUOTE
تحميل
http://file12.9q9q.net/Download/91184522/-------------.3gp.html

[خالد الجش]

السلام عليكم ورحمة الله


اول شي موضوع شيق ويستحق المتابعه لو ان بعض الاعضااء وشيك على بعض وليس الكل :)

ينقصون من وزن خليف بن دواس فأ انا اقول لو خليف مايستحق


الكلام اللي ينقال عنه


خليف بن دواس شهد له جمهوره واكتساحه لشعار المحاوره

وهنا ننظر بقوة الشاعر عندما ينسحب خصمه خوفنا على نفسه او بالتوضيح خوفا من شعره لا يستطيع ان يجاري بيوت خليف بن دواس
من معنا وقوه وهاذي الشي نشوفه بالسااحه

والثبيتي شاعر

وكل من ذكر في هاذا الموضوع شاعر و موانا اللي اشهدله يشهدله تاريخه

وكل عضو يقول ان خليف بن دواس مو شاعر اقول ياليتك كنت مكانه على ساحه ونعرفك

والدلييل اخليف معروف بقوة الترحيب عند الشعراء والقلييل اللي يقدر

يجاري البيوت اللي يقولها مثلا

عندما لعب خليف و ملفي المورقي


خليف بن دواس



عند ربعي بني عون اهلا ياهلا - اهل السيف ومغازلين الرماح
عزوتن روس الابطال فبطونها - عزوتن روس الابطال فبطونها

اتمنا كل من قال خليف بن دواس مايعرفه او ينقص في وزنه ان يسمع هاذهي المحاوره وقوة بيوته والجزاله
والفرق واضح بين الشاعرين

الشي الثاني
خليف بن دواس شاعر معروف بتغطيت المعنا وشاعر مثقف وغموض البيوت اللي يقولها مو كل من غنا طاروق طاروقين فهم بيوت خليف بن دواس وقال هذى شاعر خزي يمكن تمر عليه البيوت واهو ماعرف قافيتها

الشي الثالث

خليف شهدله رشيد الزلامي و مومعنا ان شهدله رشيد يعني رشيد شاعر المحاوره الاول بس عندما قلت شهدله ارشيد
وانا من ناحيتي رشيد الزلامي شاعر عتيبه الاول وهاذي مو كلامي كلام الشعراء

لعب خليف بن دواس ورشيد الزلامي

طاروق من ابدع الطواريق

لعبو الخصمين بساحة المحاوره وبدا التحدي حتى ماكمل رشيد الزلامي
اعترف لخيف امام الجمهور وقال ماحضرني الا شطر الاعتراف اللي يقول
ياخليف بيوتك تتعبني تفاسيرها

والمحاوره موجوده ونشالله انزلها كامله بالمنتدى

وخليف شاعر لا يعرف المجامله
والدليل ان محد يحب يقابله من الشعراء وحتى من شعراء مطير خوفا على انفسهم

وهاذى الشي نشوفه بالمحاورات

ولو بتكلم عن خليف بن دواس وتاريخه الشعري ماوفيت ربع من تاريخه


كلمت مطلق الثبيتي عندما قال لو العب مع خليف بن دواس راح كل شي

هم مالعبو مع بعض ولو نقول لعبو مع بعض لعرفنا التلميذ من الاستاذ

ويمكن تكون العكس رحمة الله على مطلق الثبيتي

وفي شخص يقول ان مطلق الثبيتي مايبي يضيع وقاره هذى شعر

والشاعر المبدع يثبت نفسه من خزا ومعنا ومافي شاعر ماتطرق للمواضيع هاذي وانا اتحدى اي شخص يخالف كلامي


حبيب العازمي والعير رحمة الله عليه

حبيب يقول مابي اقابل العير والسبب معروف اللي يقول خله يغير اسمه واللي يقول انسان بذيء ......الخ

لقاء مجلة المختلف مع حبيب سالوه سبب تهرب حبيب العازمي من عبدالله العير قال انا لم اتهرب واتحدى اي شاعر

لقاء مجلة المختلف مع العير سالوه عن تحدي حبيب العازمي وقال اتحدى حبيب العازمي لو على سطح المريخ

وفي 1997 محاورة الطايف

التقا البحرين مع بعض واول من بدا الخزي حبيب العازمي
وشفنا من المحاوره هاذي اقوى واعنف المحاورات

ولو العير معزوم في ذيك الحفله لتغيب بعض الشعار

والشاعر عندما يتي في ساحة المحاوره لا ينظر الي الوقار ولا الشيخه ولا الماره بل لسانه مايعطي الاماره والدليل فيصل الرياحي رحمة الله عليه
من بيت الاماره لعب مع جميع الشعار واثبت نفسه بخزا او غيره الشاعر اللذي يعتذر من خصمه بحجة اللسان او الشخصيه فانا اقول بحد علمي
حجة الشخص الضعيف

وفي احد محاورات العمالقين خليف بن دواس وفيصل الراحي
قال خليف

دخلت فالمسرح وحصلت فيروز - تطرب هل المسرح وتبغي لها جوز
تبغا لها من تالي الليل بزبوووز - احدن يبعبصها ويلمس نهدها

وكان الموال مفتوح مع الشعراء كلهم في تلك المحاوره ولم يقم احد من الشعراء الكبار الا فيصل الرياحي

ولم يقل فيصل الرياحي انا فلان بن فلان وابي وقاري مايضيع مع خليف بن دواس بل زاده شرف ولم ينظر اللي الكبر والزوم

خليف و مطلق الثبيتي رحمة الله عليه في كلمته راح يضيع كل شي انتم فسروتها بغير محلها وياليت اللي مايعرف او ماسمع لخيف ان يسمعله


الشاعر اللذي ينظر انه علم يلعب مع جميع الشعراء .

والشخص عندما يريد ان يهزم خصمه ينظر اللي نقطة ضعفه ويذهب اليها
وانا لا ارا في خليف نقطة ضعف لا شي واحد اللي هو الموال وكثيييييييير من الشعرااء لا يستمتعون بالموال مثل رشيد الزلامي احمد الناصر وكثير وكثير من الشعراء

وخليف لمن قال مافي شاعر كفو يقابلني واهو صادق وهذى الميدان ياحميدان
اثبت وجودك واثبت وجودي

ودمتم سالمين

ياليت مروري مكان ثقيل عليكم :)

طيـــــــــــــــــــب طيــــــــــــــــب

[عاشق قصيد]

بسم الله الرحمن الرحيم
هاذي المحاورة جرت بين مطلق الثبيتي وخليف بن دواس
في عنيزة عام 1407 هـ بحضور شليويح ومستور
بدأ خليف
يالثبيتي قوم عان الملعبة معمورة *** ثم قف بالخط لا تاقف على الأطرافي
عاش ابن شداد خلا الحفل يسطع نوره *** لو طفى نور المدينه كان نوره كافي
ثم غير مطلق لأن خليف لم يرحب بحكم الملعبة عند مطير
مطلق
يا سلام الله على الضيفان واهل الديرة *** من هجوساً للعوارف مثل عسلاً صافي
واحداً يعرف من الحضار حق الجيرة ***لا يزاحم جاره اللي كان عنده غالي
خليف
ياهلا يامرحبا ترحيبة تسعيرة *** من نصيح البال ما هي من غثيث البالي
البلا اللي لو يفسر ما عرف تفسيره *** والحبال أن عقدت يحلها حلا لالي
مطلق
القمر ما بان نورة والنجوم مغيرة *** فوق راسي ما مشت قدمي و لا تبرالي
جعلها دايم لبعض الناس خير وخيرة *** في عنيزة مار كني في محلاً خالي
خليف
ما يعرف ينظم التهليل والتكبيرة *** كل ما طبيت سوق لن سوقه غالي
في عنيزة لا زم أنك تاخذ التدويرة *** لا يزل أبك القدم ترى القدم زللالي
مطلق
يا عسى القضاع يبرك للحمول بعيره *** البعير اللي يباري في الطريق جمالي
من زعل منا نغنيله وندهن سيره***نشتري له دهن لو أنه بنصف ريالي
خليف
المصور يوم صور ما ضبط تصويره *** أوف يالديان بالميزان والمكيالي
كل مزيوراً نطقه لين نكسر زيره *** كل ما حل الحبال يجيلها فتالي
مطلق
والله أنك شيخ ربعك مار فيكم عيرة *** لو أروح بجيش من ربعك رجعت لحالي
لو أشب النار ساعة طارت الكفكيرة *** ثم ما سويت من كيف العرب فنجالي

أريد أن أعبر عن وجة نظري في هذه المحاورة التي جرت بين مطلق وخليف
في الطاروق الثاني سلم مطلق وطرح موضوع للمناقشه كعادته شاعر قيادي لكن خليف لم يستطيع تفسير هذا المعنى
وقال الحبال يحلها (جابها مرة أخرى في المحاورة وهذا يعكس ثقافة خليف الواسعة !!)
بيت مطلق
من زعل منا نغنيله وندهن سيرة *** نشتريله دهن لو أنه بنصف ريالي

لا حظوا أستهتار مطلق به وكانه يقول مستعد أخسر نصف ريال لو أنه فيك خسارة
أقروا رد خليف ( عود على الحبال ثقافة واسعة )
مطلق
والله أنك شيخ ربعك ما ر فيكم عيرة *** لو أروح بجيش من ربعك رجعت لحالي

وكان مطلق يقول له بما أنك ردي ولا تسوى نصف ريال فأنك شيخ ربعك

واطيبهم (أي أن ربعك أرد منك كلهم وفيهم عيره وفيران وتيوس ..)
خليف لا يستطيع أن يرد بهذه الطريقة
( دس السم في العسل ) ولا رد ببيت مكشوف أستنكروا الناس وشرهوا عليه ولأن شليويح يدرك ذلك غير
بعد ما قال مطلق آخر بيت لأنه يدرك تماماً مقدرة خليف بن دواس ويعرف مطلق غاية المعرفه
ولقد وصف شليويح الشعراء عندما يلعبون مع مطلق بقوله (مثل الاعمى عندما يسير بعصاه يتحسس الطريق ) .
وجرى بينه وبين مستور طاروق ناري و فيها عتاب على مطلق
شليويح
انا ويا العصيمي كيف ضعنا داخل الطوشة *** وابو غليون ركب جمرته في راس غليونه
ترى بعض الاوادم يحسب ان الملعبة هوشة *** شوات الموتر اللي سايقة يلعب دركسونه .
والسلام عليكم ورحمة الله وبركاته

[خالد الجش]

عاشق قصيد


مشكور على المحاوره المنقوله


لاكن عندي فقط شي واحد اذا على تفسيرك اللي تقوله

(أي أن ربعك أرد منك كلهم وفيهم عيره وفيران وتيوس ..)
خليف لا يستطيع أن يرد بهذه الطريقة


اصبح خليف بن دواس شريف ونقي وراع الخزى والعفن والردي والسب مطلق هاذى على تفسيرك ولاكن تفسيرك تفسير معجم هندي

[ضاامي وفااا]

مشكور على المحاوره المنقوله

وبيض الله وجهك وتقبل مروري

[عاشق قصيد]

لا شكر على واجب يا ضامي وفاء
ومرحبا ومسهلا يالجش و المحاورة نقلتها من شريط الحفله ولم أنقلها
من منتديات النت و اذا أردت أن أجيبها صوتيه جبتها والرجاء تقبل هذه
النقاط بصدر رحب
أولاً :أنا لم أفسر المحاورة (عبارة عن وجة نظر فقط تحتمل الخطاء والصواب)
ثانياً: خليف ما ينفع معه الا كذا سبق وأن لعب مع الجبرتي وقال له الجبرتي
يا سمير الوادي اللي طيبات لحونه *** لو ماهي طيبات لحونه كان مقلنا سمير الوادي
يا عنتر يا بن شدادي اللي طايلات قرونه *** لو ما هي طايلات قرونه كان ما قلنا ولد شدادي
فخرج يشمت حظه لأنه لم يستطيع نقض هاذين البيتين لأنها تحمل في داخلها معنا و قال
شليويح وش تبا بالجبرتي تلعب معه .(وجدت هذه البيتين في شريط لشليويح بن شلاح ويروي هذه القصه بصوته )
ثالثاً : (أي أن ربعك أرد منك كلهم وفيهم عيره وفيران وتيوس ..)
هاذي ما فيها خزى لأن هاذي أسماء لقبائل من فروع مطير و مطلق
حط خليف شيخ هاذي القبائل .( أعتقد أنك لا تعارض هذا التنصيب )
رابعاً : شليويح لم يشره على خليف وانما شره على مطلق لماذا؟؟
أذا اردت أن تعرف الاجابة ارجع لمحاورات صياف وخليف بحضور شليويح
حيث كان خليف دائماً يخطي ويفتح على قبيلته الكثير من المشاكل
والتي كان يستغلها صياف بالضغط على شليويح و كانت تسبب الحرج
لكثير من أمراء وشيوخ وعقلاء مطير .
خامساً : أعتقد أنك عرفت يا بدر لماذا يمتنع كبار الشعراء عن اللعب مع
خليف فالقضية ليست خوف وأنما القضية لا تخرج عن مضمون الآية الكريمة
( وأذا خاطبكم الجاهلون فقولوا سلاما)
سادساً : طلع خليف على التلفزيون ومدح نفسه لأنه ما لاقى أحد يمدحه من عقلاء قبيلته والمثل قال (ما دح نفسه كذاب )
سابعاً : المعروف عند قبيلة مطير العزيزية أن شليويح هو الشاعر العلم
على مستوى القبيلة والشاعر الكبير والمحترم والموقر على مستوى
القبائل الأخرى وعندما سئل عن الشعراء في وقته قال سته
وعد ( مطلق و الزلامي وصياف ومستور و خلف و قال أنا )
ولم يعد خليف لماذا ؟؟!! وهو أبن عمه وشاعر كببببببببييييييرر!!!!!
ثامناً :أحيي فيك يابدر حبك لقبيلتك والدفاع عن أي شي يخص هذه
القبيلة العزيزة وثق أننا نعز مطير ولا يمكن أن نبخس حقهم كيف وهم
جيراننا و اخواننا .

[خالد الجش]

مشكور على تعقيبك على الكلام


ولاكن ماورد في تحليلك فيران وتيوس

ياليت تراجع ملفات خليف بن دواس وتتمعن في كلامه



انا ماقول كراهيه بين عتيبه ومطير ......الخ

لاكن لاحضت في قسم المحاوراة التجريح في شعراء مطير من كلام الاعضاء في اكثر من موضوع وياليت انت بنفسك وتشوف

انا انحذف اكثر من تعليق السبب ؟؟؟؟؟؟؟؟؟؟؟؟؟؟؟ هل هو تحيز للاعضاء


ادخل موضوع تركي الفين وحبيب العازمي و


دش واضحك على العضو اللي حاط الموضوع

[العفريت]

عاشق قصيد

الله لايهينك وبيض الله وجهك


شديتني للموضوع


ارسلت لك على الخاص

اتمنى نتواصل للاهميه


ما اقدر احط الايميل تزعل الاداره


عذر للاداره

[ولد ميسان]

........................ كلام خارج الموضوع ....
.... اتمنى ان لايخرج الحوار عن حدود الادب مع الاخرين .. انذار .
المشرف .

[مهندس الحكمه]

رحم الله مطلق وامد خليف بالعافيه مطلق حفظناه وحفظنا شعره
وخليف لم نره ولم نسمع شعره فمن الصعب الحكم ولكن في النهايه

العلم يبقا علم اعتقد هذا الصحيح