المحلل ابو فايح

[مشاري الشيباني]

بسم الله الرحمن الرحيم

الاخ ابو فايح

السلام عليكم ورحمة الله وبركاتة اما بعد

لما عرف عنك عن تحليل محاورات كبار الشعراء وفك رموزها المعقدة

وأعجابي شخصيا واقتناعي بتحليلك أود بأن اطرح هنا محاورة بين شاعرين أختلف عليها الكثير في تحليل معناها وفك رموزها
من هذا المنطلق أود منك بعد أذنك وفضلا ليس امرا بان تتكرم وتحلل المحاورة وتبين معناها اذا كان هناك معنى وتفك رموزها وطلاسمها

وعلى قولة الشاعر / مال الحمول الا جملها



الشاعر الاول


من باب سلم وباب سنة رسول الله على الدين
سلام تسليمة وفـاء طيّبـه والليـل طابـي
ماعاد به بعدين ياصاحبي يازبـن ذالحيـن
عطني جوابك واستلم يابيض الشارب جوابي



الشاعر الثاني


من باب شـرع الله ورد التحيـة للمحييـن
يامرحبا ترحيب يرفعك في روس الهضابي
حاضر بحاضر كاش يادوسري مانقبل الدين
ياللي تشيل الحمل شيل الحمولـه لاتهابـي



الشاعر الاول


قلّطت للضيفان فوق الصحن يازبن كبشيـن
واصبحت اشوف الذر فوق الدسم جاله تدابي
اشره على اللي فالمواجيب يارجال وافيـن
والا الردي من دون بابه يبى يقصر عتابي



الشاعر الثاني


راس الطلي يفداك تستاهله يابن الكريميـن
اقلط واكل ياناصر الدوسري على حسابـي
من كثر هرجك يمكن انك تبا تحرر فلسطين
كريم يابـراق مالـه رعـود ولاسحابـي



الشاعر الاول


كبشين انا ذبّحتها وانت قالط فوق راسين
شوي ويبين لك شيٍ على ماقيل غابـي
هرجي لياجات المواقيف مثبت بالبراهين
والبرق سيّل ديرتك وارتوت منه الشعابي



الشاعر الثاني


يكفيك رمح ذياب ولا تبا سيف ابو حدين
لاتكشف المستور والسيف شده بالنصابي
تزول دنيا الادمي ماتغير شكـل ثنتيـن
ماكبرت الذره ولاشاب ريشك يالغرابي



الشاعر الاول


مادام يا ام قرين ظهّرتي بحرثتس سكين
حلّت ذكاتس ما حسبنا لقرنينس حسابي
صدقت في كلمتك وانته دليلٍ بين قوسين
هذا انت فالساحه ما عيّنت لك خطٍ كتابي



وفي الختام تقبل تحياتي وسجل اعجابي

ملاحظة /يرجى تقييم الشاعرين وتسجيل درجة التقييم من 10 درجات

[ابو فايح]

الاخ شبل الهيلا لا تعطيني اكبر من حجمي وانا ممكن اعرف معنى محاوره وميه ما اعرفها .


ساطرح ما عندي وربما اكون حول المعنى او انا في ديره والمعنى في ديره لاتاخذ على ان اللي اطرحه اكيد ميه فالميه .

المحاوره ذي بين زبن القاضي واخر دوسري

المعنى في بدايته الدوسري يعتب على زبن في امر ما .

بعد زبن رد واعتقد ان حاول تمرير بيت على الدوسري (راس الطلي) ولكن لم يمر البيت على الدوسري (قالط فوق راسين)

واستمرت بيتين او ثلاثه على هالطريقه

اعجبني نقض اخر بيت للدوسري حين قال زبن
تزول دنيا الادمي ماتغير شكـل ثنتيـن***ماكبرت الذره ولاشاب ريشك يالغرابي

فرد الدوسري
صدقت في كلمتك وانته دليلٍ بين قوسين***هذا انت فالساحه ما عيّنت لك خطٍ كتابي

اما التقييم فارجو ان تعفيني منه

[مشاري الشيباني]

الاخ شبل الهيلا لا تعطيني اكبر من حجمي وانا ممكن اعرف معنى محاوره وميه ما اعرفها












الاخ ابو فايح انت حجمك وقدرك كبير وانا ماخذت رأيك في المحاورة الا عن اقتناع تام بتحليلاتك لأبيات الشعراء وتستاهل يابو فايح

أما عن ماذكرت عن المحاورة المطروحة فأنا اشكرك كل الشكر على هذا التفسير الرائع والله يعطيك العافية

وفيت وكفيت

تقبل تحياتي

[ولد ميسان]

يعطيك العافيه وصراحه ابو فايح نقدر نقول انك محلل في هذا المنتدى للمحاورات الشعريه

[مشاري]

الله يعطيك العافيه

وابو فايح محللنا الرائع


تحيتي