موضوع جدا مهم !!!

[ابن حديّد التميمي]

السلام عليكم ورحمة الله وبركاته .

كيف الحال اخواني اعضاء ومشرفين وادارة هذا المنتدى .. انشالله بخير ..

اخووكم / ان حديّد التميمي >> اول مشاركه لي في هذا المنتدى وانا عنيت منتداكم المزدهر لاقول كلمتين ..

الا وهي (( كلنا ابناء الوطن )) وانا شايف يا اخوان سواء عتبان او مطران ان الوضع جدا جدا مزري

يعني اشوف في منتدى الهيلا الكل يشتم ويسب الشاعر تركي 2000 ونفس الكلام في منتدى تركي 2000

الكل يدور موالات الشاعر الي فيها سب في قبيلة عتيبه , يعني وبعدين!! الى متى ؟؟!!

الوضع ما يسر في ديرتنا يعني كذا ولا كذا انتو عيال ديره وحده ,, ومنكم من هو من دول الخليج يعني كلنا

عيال خليج واحد ,, والنعم في مطير وعتيبه وكل القبايل ما عليها قصور وكل القبايل لها فعولها وتاريخها

يا ليت القى تفاعل في هذا الموضوع والي اتمناه انه يكوون هناك حب وود بين منتديات مطير وعتيبه

وانا تميمي .. ماني عتيبي ولاني مطيري والي اتمناه اني اشووف العتبان والمطران اخوان قلوبهم على بعض

سواء في الشعر او غيره

تقبلوا خالص تحياتي اخوكم : ابن حديّد التميمي ... :)

[مرزوق حمدان العتيبي]

..
.

الله يحييك يابن حديّد يالتميمي بين اخوانك
ونشكرك على مشاعرك ومبادرتك الطيّبه ...

... ولكن...
ثق ان مابين عتيبه ومطير على ارض الواقع مختلف كليّاً عن ماتراه في المنتديات
ومايكتبه السفهاء من خلف الشاشات . اي انه
لايوجد بين هاتين القبلتين سوى التقدير والاحترام والعلم الطيّب كماهو الاحترام المتبادل
بين الاخوان من بقية القبائل ... فأخوة الدين والاسلام هي اقوى العرى واوثقها .
ومايكتب فالنت من مهاترات لاتمثل الااصحابها ... ومستواهم العقلي والفكري ...
كما انه لا احد يتجرأ بالسب العلني على تركي او غيره في منتدى عتيبه الهيلا ...
واعضاءنا اكبر من هذا المستوى ... والجميع يعي هذا الشي ومتقيد ..به ..

اما ان تنزل محاوره وتنتقد فأعتقد ان هذا حق مشروع للكاتب مالم يتعدى على ضوابط
المنتدى وحدوده ...
ومن هذا النقد البناء لايزعل الا احمق ...
هذا مايخص هذا المنتدى .... والقسم الادبي على وجه الخصوص ...
امايكتب من الغير في المنتديات الاخرى فلانعيره اي اهتمام ... ولسنا مكلفين بمتابعته ..
وكل محاسب على مايقوله لسانه ومسجل في صحائف اعماله ..
...
تقبل تحيتي وتقديري
..

[ابن حديّد التميمي]

بيض الله وجهك يا مرزوق العتيبي وما عليك زود وانا في منتدى الهيلا كني في منتدى بني تميم والله يدوم المحبه

بين كل القبايل ونشوف الود والحب بينهم انشالله , شاكر لك تفاعلك في الموضوع اخووي مرزوق وتواجدك شرف لي

لا عدمتك ...

وشكراً ,,,

[عبدالمجيد النفيعي]

يامرحبا والله بـ التميمي بين إخوانه

بس إسمحلي أقولك إن الموضوع لا هام ولا شي

إلي يسب عن طريق النت ماغير كرّه الناس بعمره ماهو بـ مكرّه الناس بالناس وماأحدٍ خاسر كلمة ونعم

وذا إختلط مع القبيله الي سبها غيّر رأيه

وعلى ماقال أخونا الكبير مرزوق العتيبي

في أرض الواقع مابيننا الا الإحترام والتقدير

وياكثر المجالس إلي جمعت العتبان والمطران ع العز وطاعة الله سبحانه

[أبو مصلح 511]

شكرا ياخوي التميمي

والله حنا عتيبة ليست من عاداتنا السب ولكن يوم يأتي واحد من شعارهم فالمحاورات ويسب قبيلتنا ويأتون مطير في منتدياتهم ويتفاخرون بهذا السب فمن الطبيعي أنا برد عليهم



ولكن فيه من قبيلة مطير رجال أنا أعرفهم جيدا ولكن الخير يخص والشر يعم







والله يعطيك العافية وماقصرت

[ابن حديّد التميمي]

( عبد المجيد النفيعي ) , ( برقاوي والرأس عالي ) لا عدمناكم ولا هنتوا على هالمرور العطر .. وبمجرد تواجدكم

في احد مواضيعي اكبر شرف لي ,, واهنيكم على روح المحبه والود والله يدوم المحبه بين عتيبه ومطير كلهم

على راسي وكل القبايل ما عليها قصور ..

اخووكم / ابن حديّد التميمي ,, ( :

[ابو ضيف الله]

جزاك الله كل خير اخوي ابن حدّيد التميمي وبارك
والمحظوظ في هذه الحياة من كان مفتاحاً للخير مغلاق للشر

ولو تلاحظ اخوي ابن حدّيد انه هناك اعضاء نشيطين في منتدى الهيلا من مطير
وهؤلاء الرجال لم يستمروا في منتدى الهيلا لو لم يعرفوا انه معاملتهم هنا هي
مثل معاملتهم في منتديات قبيلتهم وهي الاحترام والتقدير والاخوة

[ابو سعد الدلبحي]

إبن حديد حياك الله
والله يوفقك لحبك الخير للجميع
اللى يسبون ناقصين عقل ولا يحسبون على القبيلة

[ابن حديّد التميمي]

جزاك الله كل خير اخوي ابن حدّيد التميمي وبارك
والمحظوظ في هذه الحياة من كان مفتاحاً للخير مغلاق للشر

ولو تلاحظ اخوي ابن حدّيد انه هناك اعضاء نشيطين في منتدى الهيلا من مطير
وهؤلاء الرجال لم يستمروا في منتدى الهيلا لو لم يعرفوا انه معاملتهم هنا هي
مثل معاملتهم في منتديات قبيلتهم وهي الاحترام والتقدير والاخوة

لا هنت اخوي ابو ضيف الله على هالمرور , وحقاً كلامك في مكانه ايضاً هناك اعضاء نشيطين من قبيلة عتيبه

في منتدى الشاعر تركي الميزاني ومن هؤلاء الاعضاء وانا والله من الاسباب الي دفعتني للمشاركه في منتداكم

المزدهر هو اني اريد اشكر هذا العضو المشترك في منتدى الشاعر تركي الميزاني الا وهو العضو ( ولد عتيبه )

واتمنى ان يرى موضوعي ويرى شكري له ,, فأنا اشكره على اخلاقه العاليه وهذا شي مو غريب على العتبان

تقبل تحياتي اخوك : ابن حديّد ..

[ابن حديّد التميمي]

إبن حديد حياك الله
والله يوفقك لحبك الخير للجميع
اللى يسبون ناقصين عقل ولا يحسبون على القبيلة

الله يحييك ويبقيك اخووي ابو سعد , وانا اكرر واقول اني في منتدى الهيلا اشعر بأني في منتدى قبيلتي

بني تميم ,, واتمنى ان تشرفونا جميعا في منتدى بني تميم ,,

اخوكم : ابن حديّد التميمي ...

[الاصمعي]

جزاك الله خير يالتميمي


وثق تماما أن أبناء عتيبه لا يرضون الغلط على غيرهم من القبائل الأخرى

أيّا كانت من قبائل العرب .

فكيف ياأخي لو أن الغلط أتى لقبيلتهم من كلام زيف وغير صحيح لدرجة أنهم تعرضوا لاعراض المسلمين ومن دون ادله
فمن كتب هذا الكلام سيجد عقابه عند الله تعالى عسير ، من مبدأ العين بالعين والسن بالسن والبادي أظلم ، سنكتب تاريخ من يسيء لنا كامل وبالادله من دون تزييف إن تطلب الامر وتمادوا اصحاب الشأن بالغلط على عتيبه ولم ينتهوا فسنفصل لهم تاريخهم تفصيل يرضيهم ويقنعهم ليعلموا ان من طق باب الناس طقوا بابه ومن يضحك على الثرمان يضحك بلا سن .


هذا موجز مختصر لموضوعك .

[ابن حديّد التميمي]

جزااك الله الف خير يالاصمعي وبيض الله وجهك على هذا الموجز ,, واظن انه رد كافي لمن تمادى على تواريخ القبائل

وخرّف فيها ...

لا هنت اخووي الاصمعي على هذه الحكم والدرر ,, يعطيك العافيه على هالمرور الي عطّر الصفحه ..

اخوك / ابن حديّد ...

[الطيار..]

السلام عليكم ورحمة الله وبركاته .

كيف الحال اخواني اعضاء ومشرفين وادارة هذا المنتدى .. انشالله بخير ..

اخووكم / ان حديّد التميمي >> اول مشاركه لي في هذا المنتدى وانا عنيت منتداكم المزدهر لاقول كلمتين ..

الا وهي (( كلنا ابناء الوطن )) وانا شايف يا اخوان سواء عتبان او مطران ان الوضع جدا جدا مزري

يعني اشوف في منتدى الهيلا الكل يشتم ويسب الشاعر تركي 2000 ونفس الكلام في منتدى تركي 2000

الكل يدور موالات الشاعر الي فيها سب في قبيلة عتيبه , يعني وبعدين!! الى متى ؟؟!!

الوضع ما يسر في ديرتنا يعني كذا ولا كذا انتو عيال ديره وحده ,, ومنكم من هو من دول الخليج يعني كلنا

عيال خليج واحد ,, والنعم في مطير وعتيبه وكل القبايل ما عليها قصور وكل القبايل لها فعولها وتاريخها

يا ليت القى تفاعل في هذا الموضوع والي اتمناه انه يكوون هناك حب وود بين منتديات مطير وعتيبه

وانا تميمي .. ماني عتيبي ولاني مطيري والي اتمناه اني اشووف العتبان والمطران اخوان قلوبهم على بعض

سواء في الشعر او غيره

تقبلوا خالص تحياتي اخوكم : ابن حديّد التميمي ... :)






اولا مرحبا بك يابن حديٍد التميمي ونعم بنو تميم



ثانيا: ابشرك ابناء عتيبه محرومين حتى من الرد وهو بمثابة الدفاع النفس وفي منتديات تحمل اسم قبيلتهم



وابشرك بشرى ثانيه ان قبيلتنا ابتلت بالطابور الخامس من العملاء من امثال علاوي العراق


فهنيئا لقبيلة مطير تفعل ماتشاء وعزائنا لابناء قبيلتنا



ولاحول ولاقوة الا باللله

[ابن حديّد التميمي]

اولا : البقا اخي الطيار وما عليك زود ..

ثانيا : كل القبائل ماخذه حقوقها سواء في النت او خارج نطاق النت , فأنتم يا عتيبه كفيتوا ووفيتوا يعني مع احترامي

لكم خليتوا الشاعر تركي 2000 كاليهودي ودووما تتوجهون الى نقد ابياته يعني ولا موضوع قرأته في منتدى الهيلا

يمدح في شاعرية تركي2000 او ابياته .. ونفس الكلام في منتدى تركي 2000 ارى الجميع يبحث عن ابيات تركي 2000

التي يوجد بها سب وشتم لقبيلة عتيبه ... ولا انسى ان هناك عتبان متواجدون في منتديات تركي 2000 ومنتديات مطير

ويعتبرون من الاعضاء المهمين في المنتدى والنشيطين وكذلك يتواجد هنا في هذا المنتدى اعضاء من قبيلة مطير

وهم نشيطين في منتدى الهيلا ومن الاعضاءالمهمين ايضا ,,

يعني يا ليت ما نلتفت الى من فيهم نقص في عقولهم اولا وفي شخصياتهم ثانيا .. وهم من يحاولون يزيدون النار حطب !!

لتكن نظرتنا الى من يحبون الخير ويبتعدون عن هذه المهاترات الشعريه فقبيلة مطير وعتيبه لها تاريخها العريق

والكل يشهد .. وكل القبايل فيها فعولها ولا عليها قصور يعني لا يمكن ان نحكم على قبيله بسبب كلام الجهله في النت

..

تقبلني كأخ .. : اخوك ابن حديّد التميمي ...

[الفـــايز]

فأنتم يا عتيبه كفيتوا ووفيتوا يعني مع احترامي

لكم خليتوا الشاعر تركي 2000 كاليهودي ودووما تتوجهون الى نقد ابياته يعني ولا موضوع قرأته في منتدى الهيلا

يمدح في شاعرية تركي2000 او ابياته ..
.................................................. ..........................................

ان كانك تميمي صادق عطني رابط معرفك هذا في منتدى بني تميم
اواي معرف لك عندهم وانا سوف اقوم بمراسلة العضو هناك واعطيه هالرابط وأتاكد منه شخصيا
على شان نكون على بينه
ونعرف نتفاهم معك .

[الطيار..]

كلامك كلام عاقل


ولكن


سفهاء مطير يجدون التشجيع والتطبيل من اصحاب منتدايهم ومشرفيهم


لن تجد موضوع لسب قبيله من قبلهم تم حذفه ولكن عندما تذهب اليهم وترد يحذفون ردودك ويغلقون الموضوع

ومن ثم يفتحون موضوع جديد وهكذا

انا اتحدى ان تجد قبيله سلمت من سبهم


سبو قبيله عنزه وسبو قبيله الرشايده وسبو قبيلة بنو تميم وكلها باقذر وارذل الكلمات


هؤلاء ياعزيزي السكوت عنهم يعتبرونه نصرا وخوفا فيتامدون في غيهم

ولكن عندما يجدون الرد وتبدأ تعريتهم امام الخلق عندها يخنعون كعادتهم


نحن والله يشهد لانريد السب ولا الشتم واعطني موضوع لعتيبي واحد سب قبيله من قبائل العرب



ومع هذا لانسمح للتطاول على قبيلتنا ورموزها



وسنكتب وسنعريهم ولو ان الجميع يعرفهم ولكن لدينا من اخبارهم ماتشيب لها الروؤس



فان جنحو للسلم سلمو وان اصرو على غيهم فنحن لها



وقد قال الله عز وجل

(ان الله لايحب الجهر بالسؤ الا من ظلم)



والله ولي التوفيق

[الطيار..]

علما بانني البارحه نزلت موضوع هنا وكان موضوع عادي اذكر فيه سبهم لقبيلتنا ورجالها


وتم اغلاق الموضوع فورا وحذفه


من قبل احد المشرفين



للاحاطه

[ابن حديّد التميمي]

حرام بالله اني تميمي ومسجل في منتديات بني تميم بأسم ... ابن حديّد التميمي ... وفي مجالس بني تميم بأسم

الصقر التميمي ... وفي منتديات تركي 2000 ومنتديات القلطه والقصيد بأسم ابن حديّد

والله ما هقيت اني اجد هذا الاستقبال من عتيبه ... ولا ابي اقول اني غلطت يوم توجهت واخترت منتدى قبيلتكم

لاكون كأخ لكم ..

واكرر مره اخرى قسم بالله العلي العظيم اني تميمي ومن الوهبه .. ..

[@الاسعدي@]

الله يحييك اخوي ابن حديد ونتشرف بك فالمنتدي
بس تركي والله قل ادبه معنا هذا كل اللي عندي ومشكور على الموضوع

[الطيار..]

الاخ ابوحديد


وجودك بيننا وجود اخ عزيز



ويعلم لانريد ان تعزل والحرص وانا اخوك واجب



ولافيها شي يزعل



وكثيرا من المعرفات تدخل باسم قبائل اخرى لغرض ما


المهم انت مصدق


وعلى الرحب والسعه

[زياد المزرمي]

ابن حديّد التميمي


بيض الله وجهك يا بعدي

على هالبادره الطيبه والله يكتب لك الاجر على كل حرف كتبته


وهاذه بادره طيبه مان دل دل على طيب اصلك يالقرم

وحنا وعتيبه ما بيننا غير كل علمٍ غانم جيران وعواني وخوال وبنيخي

واللي تشوفه من خزا وكلام ناقص هذا من المراهقين وضعيفين العقول وعلومه ماتعدا الكيبورد


وانا اشهد شهادة حق لله بما اني عضو فضي في هذا المنتدى ولي فيه فتره ما لقيت

الا العلوم الغانمه ولو لقيت شي فيه تعدي على الاعراض او ماشابه ذالك الاداره

وعلى رأسهم مرزوق حمدان و ابو ضيف الله يحذفونها والله يكتب اجرهم على ما يبذلون من جهد

وتعرفت لي على ناس في هذا المنتدا وصارت بيني وبينهم عزايم وربما يقر}ن الكلام ويأكدون

على ذالك

على العموم الله يبيض وجهك يالتميمي

[ابن حديّد التميمي]

الله يحييك اخوي ابن حديد ونتشرف بك فالمنتدي
بس تركي والله قل ادبه معنا هذا كل اللي عندي ومشكور على الموضوع

الله يبقيك اخووي الاسعدي ووجودي في احد منتديات قبيلة عتيبه العريقه اكبر شرف لي ,, وبالنسبه للشاعر تركي

2000 يحق له سب جميع القبايل كما يحق لكل شاعر السب ,,وهذا شعر والي ما يتحمل شعر القلطه لا يتابعها

وتركي كما سب عتيبه سب القبايل الاخرى .. ولا احد زعل منهم .. يعني يا ليت يكوون فيه روح رياضيه شووي

وشكرا ..

[ابن حديّد التميمي]

الاخ ابوحديد


وجودك بيننا وجود اخ عزيز



ويعلم لانريد ان تعزل والحرص وانا اخوك واجب



ولافيها شي يزعل



وكثيرا من المعرفات تدخل باسم قبائل اخرى لغرض ما


المهم انت مصدق


وعلى الرحب والسعه

ارجع واقول وجودي في منتدى الهيلا شرف لي وشهاده اعتز بها , وصدقت ما فيها شي يزعل ويحق لك التاكد من

مصداقيتي ..

[ابن حديّد التميمي]

ابن حديّد التميمي


بيض الله وجهك يا بعدي

على هالبادره الطيبه والله يكتب لك الاجر على كل حرف كتبته


وهاذه بادره طيبه مان دل دل على طيب اصلك يالقرم

وحنا وعتيبه ما بيننا غير كل علمٍ غانم جيران وعواني وخوال وبنيخي

واللي تشوفه من خزا وكلام ناقص هذا من المراهقين وضعيفين العقول وعلومه ماتعدا الكيبورد


وانا اشهد شهادة حق لله بما اني عضو فضي في هذا المنتدى ولي فيه فتره ما لقيت

الا العلوم الغانمه ولو لقيت شي فيه تعدي على الاعراض او ماشابه ذالك الاداره

وعلى رأسهم مرزوق حمدان و ابو ضيف الله يحذفونها والله يكتب اجرهم على ما يبذلون من جهد

وتعرفت لي على ناس في هذا المنتدا وصارت بيني وبينهم عزايم وربما يقر}ن الكلام ويأكدون

على ذالك

على العموم الله يبيض وجهك يالتميمي

وجهك ابيض يالشطيطي والنعم في عتيبه ومطير وزي ما قلت هالعالم المرجوجه الي تسب في النت هذي ماوراها علوم

وعلومها ما تتعدى الكيبورد والله يدوم امحبه بين عتيبه ومطير ولا يغير عليهم ..

[الفـــايز]

وراك منفعل يابن حديّد
حنا مجرد طلبنا منك تزويدنا برابط لمشاركاتك في منتدى بني تميم
وياليت تزودنا ولو على الخاص

ثم انت اللي اوقعت نفسك بالشبهه لنك صرت لنا خصم منت بمصلح.

والله يسامحكم يالاداره على التحرير وتمونون ياعتيبه .

[ابن حديّد التميمي]

انا اقسمت بالله اني تميمي مع ان الموضوع ما يستاهل الحلف بالله عز وجل وانا عطيتك اسمي في منتديات بني تميم

اسمي ( ابن حديّد التميمي ) وفي مجالس بني تميم ( الصقر التميمي ) وتقدر تكلمني من هناك وترسلي رساله ..

وانا اد عليك باني انا الي قاعد اكلمك في منتدى الهيلا ..