قصيدة لـ الشاعر لافي الغيداني وجاراتها من الشاعر غازي بن عون

[/عبد العزيز الجذع/]

السلام عليكم ورحمة الله وبركاته...


قريت قصيدة لافي الغيداني اللي جايبها الاخ فيصل المسعودي وطرت علي هالقصيدة ونقلتها...




قصيدة الشاعر الكبير//لافــي بـن حـمـود الــغــيــدانــي ...






ياراكب اللي مافي فخامتـه هرجـه=وعلى جبينه رموز لدولـة انتاجـه
جيبٍ ركونه قدم.. واخلاف مدرجـه=يطوي سراميد جرد البيـد منهاجـه
ودك تغني ليامنـه عطـا الفرجـه=(يامل قلبٍ يسـج وفيـه دولاجـه)
الوقـت دوّار والايــام منـدرجـه=كم طيبٍ حوّله من عالـي ابراجـه
لياقام وقتك يقلـط عوره..وعرجـه=وازريت تصبر على عوجاه..وزعاجه
أمتس حبل اللزوم وقلـة الخرجـه=ودورّ رفيق الرخا حجـه لمخراجـه
نصه حزام الظهر بالساعه الحرجـه=اللي للأصحاب دايم يضحك حجاجـه
على يديه اعتبـر كربتـك منفرجـه=مثل الدوا اللي (يدس) لحزة الحاجـه
تجيه مشدوده اعصابـك ومنحرجـه=وتروح من عنده اعصابـك بثلاجـه
وان قيل بالله من ؟ قل مابها هرجه=مسلط..ليامـن كـلٍ عـد ماواجـه









وهذه مجاراة الشاعر الكبــــير //غازي بن عون لقصيدة لافي ..




الشعر باربوع دخنه نـورّت سرجـه=وطرى على ابـن لعبونه..ومجماجـه
لافي من المعدن الصافي سبك جرجه=واجاد بالشعـر مدخالـه ومخراجـه
علـى المثاليـه المعروفـه الزرجـه=أبدع بسبـكٍ وحبـك وزيـن ديباجـه
هاواه ومع اوسع ابوابه دخـل برجـه=وبصف سرج البلاغه نـورّ سراجـه
ماهوب شعرٍ حديـثٍ مايـلٍ سرجـه=قشرٍٍ دروبه عـن الاسنـاع منعاجـه
أهل الحداثه بعضهم نافـضٍ خرجـه=وباب الشعر مايعرف رموز مزلاجـه
والشعر إله مكمـنٍ ماينفتـح درجـه=الا مع اللي يعـرف يـزاوج ازواجـه
وجمهورهم مدفعٍ يكبس بـلا درجـه=فيهم مرض شبهةٍ مايعرف اعلاجـه
حط الذكيه سو ى بالحكم..والحرجـه=ويقارن الجعد ابن درهم بابـن ماجـه
ولافي من اللي تروي الرمح ابو زرجه=تنطح محيط الخطر لاهاجـت امواجـه
ربعٍ لياصار عنـد اقطيهـن حرجـه=في طيب الافعـال للضيقـات فراجـه

[وافي الخماش]

سلمت يمناك يالجذع والحربي شاعر ماهو بسيط ..

[/عبد العزيز الجذع/]

مشكوووور يالغالي على المرور الجميل...

[ابو قطيم]

من هو المقصود بمسلط في قصيدة لافي هل هو مسلط بن ربيعان

[/عبد العزيز الجذع/]

علمي علمكـ..

ومشكور على المرور..

[هلال الدوادمي]

الله يعطيك العافيه

...

لافي الغيداني .. مبدع بمعنى الكلمه


..شاعر..اذا وصف ..وصف


تدرون من أولى لبعض في شبابه=برقا وروق وذوي سالم ومصروح


وافي .. يالغيداني


وصح لسانه ...ولسان علّامة الشعر . غازي الرويس

[/عبد العزيز الجذع/]

مشكووور يالغالي على المرور الجميل..

[السبيــــعي]

ودك تغني ليامنه عطا الفرجه^^^(يامل قلبٍ يسج وفيه دولاجه)



بيض الله وجهك ياعبدالعزيز على هالقصيدة

وصح السان شاعرها ..

يامال العافية

[/عبد العزيز الجذع/]

مشكوووور يالغالي على المرور الجمــــــــــــــــــيل.

[الحنتوشي ساجر]

تسلم يا الجذع على هـ القصيده


صح لسان الشاعر الكبير لافي الغيداني


و مسلط المقصود ماهو ابن ربعان

هو حربي اسمه مسلط المعباس الشعبي .


وبيض الله وجه لافي على القصيده .وبيض الله وجهك على نقلها لنا

[/عبد العزيز الجذع/]

الف شكر يالحنتوشي على المرور والتوضيح..