يــاشــاعر الـمـعـنـى ( وشكر لكم يالهيلا)

[حزام العصيمي]

بسم الله الرحمن الرحيم


أعضاء منتديات الهيلا الإعزّاء أتقدّم لكم بخالص شكري وتقديري على

وقفتكم معي أثناء مشاركتي في برنامج شاعر المعنى

وقفتكم يا أبناء العمومه وقفة نشامى وأتمنى أن أكون قدّمت مايجمّلني

أمامكم وأقل شي أقوله لكم (بـــيـــّض الله وجــيــهــكــم )


واتمنّى التوفيق لصديقي العزيز مرزوق المقاطي وصديقي العزيز سلطان المنصوري


ورايد السواط فاله التوفيق إنشالله



وهذه أبيات أحببت أن أشارك بها هنا




سلام ياذخر الملوك أبنا الملـوك أبنـا الملـوك=فيصل ولد خالـد ولـد عبدالعزيـز الفيصلـي
ياللي كسبت المجد كسب وجاك من جدك وابوك=والعز كسبـاً لـك وميـراث الجـدود الأولـي
يافارس الشعر الحقيقي سيّـدي لا فـضّ فـوك=الشعر يفخر بك ومـن عـزّك يعـزّ ويعتلـي
العرف ميزان العوارف وأنت بالعرف عرفـوك=سقم العدا بحـر النـدا راع اليميـن الاخطلـي
أحييت موروث العرب من دون ريب ولا شكوك=وتحلّ صعبات الدعاوي يـوم ميحـات الدلـي
تعيش يارافع مقام الشعر منصـا مـن نصـوك=الله يابـو خالـد يمدلـك الحـيـاه ويمهـلـي
من بعدها ياهاجس الشعر واجـه مـن دعـوك=اطعن بشلفا ذياب والاّ سيف ابو طالـب علـي
منتـه مـدوّر جايـزه والاّرصيـداً فالبنـوك=اهم شي انك مـع اصحـاب الجميـل مجمّلـي
الحكم عادل والنقـا مبـروح والعلـم محبـوك=علـى مسـار المذهبيـن الشافعـي والحنبلـي
ياشاعر المعنى حمـاك الله وقضاتـك حمـوك=حتى لمع نجمك على القمّـه ونـارك تصتلـي
وتعيش ياذخر الملوك ابنا الملوك ابنـا الملـوك=فيصل ولد خالـد ولـد عبدالعزيـز الفيصلـي




وسلامتكم

[المرشـ ساطي ـدي]

حزام العصيمي

حياك الله

وحنا اللي نشكك على تشريفك لقبيلتك بمشاركتك المشرفه في برنامج شاعر المعنى

ونحن لم نقدم الا اقل القليل ونرجوا ان تعذرنا عن القصور

وصح الله لسانك على على هذا الابداع

الغير مستغرب من الشاعر حزام العصيمي


وتقبل تحياتي



المرشـ ساطي ـدي

[عبدالله الجـــذع]

حزام

عز الله انك بيضت الوجه يالغالي
ماقصرت والله والله يعطيك العافيه
وحيآك الله بين ربعك واخوانك يالذيب

وصح لسآنك وسلم بنانك

محبك
.,

[مرزوق حمدان العتيبي]

..
.
شاعر شاعر المعنى الذي لم ينصف ... حزام العصيمي
انشهد انك ابدعت وقدمت مايبيض وجهك ووجه لابتك..
صح لسانك على هالقصيده الجزله .. وانت عنوان الجزاله ...
نعيد لك الترحيب في منتداك ... والحمدلله على سلامتك .
.

[محمد العتيبي]

الاخ القدير حزام عتيبه الهيلا : حزام بن سعود العصيمي ..

كفيت واوفيت قبل المسابقه و اثناء المسابقه ولا لك الا بياض الوجه ..

وتبقى حزام العصيمي الذي نعرفه ونعرف مدى قوته ..

ولم نلتفت لهذه البرامج التجاريه التي لاتخدم الموروث بل تستغله

وتستغل عقولنا ..


نقطه اخيره ..

نتمنى ان نراك في جميع المحافل
لانك مقصر من الحضور ..


تحيتي وتقديري ..

[فيصل المسعودي]

أبيض وجه ياحزام

بيض الله وجهك يالغالي

شرفت ربعك وقبيلتك بمشاركتك الطيبة وحضورك المميز في البرنامج

وهذا ليس بغريب عليك فأنت عنوان للجزاله والشعر الأصيل

حياك الله يالغالي مره اخرى بين ربعك وفي محلك

وفي إنتظار جديدك المميز دائماً

تحياتي

[أبو حسان]

صح لسانك

و بيض الله وجهك يابن العم

[الـسـواط]

بيض الله وجهك يا حزام

اسم على مسمى حزام المجد والعز

والى الأمام .. كلنا معك وقلوبنا تدعي لك بالتوفيق

[عيضه الثبيتي]

حزام العصيمي

صح لسااانك ملايين


ومشاركتك في شاعر المعنى مشاركة مشرَّفه

وسيبقى بيتك الرائع الذي تقول فيه/

البعير اللي ورى الشطين في ممشاه خلّه
///////قرّبوا منه المسامه وابعدوا عنه الشدادي


افضل بيت في المسابقه حتى الآن....


تحياتي لك

[القلم الحر]

صح لسانك ياحزام وبيض الله وجهك


(1)


فالك السيــف

[نواف العصيمي]

ووجهك أبيض .. ياغالي


الشاعر حزام العصيمي .. نرحب بكر مراراً وتكراراً في منتداك .. ومنتدى الهيلا ومنتدى الشعر ..

وصح لسانك مليون .. إبداع × إبداع .. عنوانه حزام العصيمي ...


ولك التقدير والإحترام

[بعيـد المرامع]

لعل ظهورك في برنامج شاعر المعني..

كان اضافه للبرنامج ..

وهالاضافه ..انستنا عتب الغياب ومشاريهه..

وخروجك من المسابقه...ماكان للشعر ااي دور فيه ..

..حتى ان الكمبيوتر..معيي ..:)..

وحيااك...في منتداك...

وصح لسانك...واعلى الله شانك....


ودمت ياحزام...لنا حزام..

وللعايل خزام :)

[خلف العتيبي]

الشاعر المبدع حزام العصيمي ..

بيض الله وجهك وصح لسانك..



حياك الله في منتداك..

[أبو مرحبا]

يامرحبا بك ياشاعرنا حزام العصيمي

رايتك بيضاء وعلمك غانم

وأبرك الــســـاعــات مشاركتك معنا في منتديات بني عمك عتيبه الهيلا

تمنياتنى لك بالتوفيق

أخـــــــــــــ أبــو مرحبا ـــوك

[/عبد العزيز الجذع/]

صح لسانك مليون يا حزام...



فعلا انت شاعر المعنى الذي لم ينصف....




البعير اللي ورى الشطين في ممشاه خلّه
///////قرّبوا منه المسامه وابعدوا عنه الشدادي


افضل بيت في المسابقه حتى الآن....



انا اشهد...




واتمنى ان نراك في محاورت اخرى...

[فهيد الايدا المورقي]

حزام العصيمي صح لسانك على القصيده


ويستاهل الامير/ فيصل بن خالد ال سعود المدح


وصراحه كنا نتمني استمرارك في المسابقه لاكن صار خير


وعتيبه الهيلا تفخر بجميع شعراءها الذين شاركو في شاعر المعني


وكلهم بيضو الوجيه وكلهم مبدعين وشعراء لهم مستقبل حافل ان شاء


الله


وانا من اشد المعجبين في بيتك العميق في المعني




البعير اللى وراء الشطين في ممشاه خله=قربو منه المسامه وابعدو عنه الشدادي

[بندر المرشدي]

بيض الله وجهك ياحزام

اشهد انك جملت القبيلة والشعر بوجه عـــــــــــــام

وانا يعلم الله انني كنت متابع لك من زمان وفعلا انت من شعرا المعنى


بشهادة الجميع ... لكن كان خروجك مفافئة لنا.


والله يحييك مرة اخرى في منتداك بين بني عمك

[عبد المحسن الحلحلي]

يا حزام ابن عاصم معرّب جد من خالك وأبوك=يا ذخر عاصم والعصيمي للكحيلة يعتلي

أنا أشهد إنك يا أقطم المحزم ولا فيها شكوك=شاعر فحل تارد على الجم القراح وتنهلي

جمّلت ربعك بالمواقف وأيضاً إنهم جملوك=ماقف ولد عاصم على الطالة ترا ماله حلي

وكسبت بالشعر الحسين قلوب ناسٍ احسدوك=حيثك على جزل المعاني مثل نار تصطلي

مشاعرٍ من شاعرٍ مابين ورد وبين شوك=جاب الجزيل وعزوته يا آلاد عاصم حلحلي



بيض الله وجهك يا ابن عاصم

أتمنى أن لانفتقدك في ساحات المحاورة

لأنك جزل والمحاورة تحتاج لأمثالك

تقبل احترامي


عبدالمحسن الحلحلي

[بدر الكريزي]

عز الله انك بيضت الوجه
ماقصرت

والله يعطيك العافيه

[الباااسل]

حـــــزااام الـــــهــيـــــلا



ياهلا يامرحبا مليوووووون



وابناء قبيلة عتيبه الهيلا يقفون مع شعراءهم سواءً أشتركوا بهذه البرامج أو لم يشتركوا


وأنت يابوسعود أشهد بالله إنك جملتنا وكفيت ووفيت



ولايزال بيتك الرائع


البعير اللي ورى الشطين في ممشاه خله = قرّبوا منه المسامه وابعدوا عنه الشدادي


هو البيت الذهبي في المسابقه حتى الأن




وأبيات محاوراتك كلها جميله منها


سيدي فيصل بنى للشعر دوله مستقله = دولتن قامت على شرع وقوانين ومبادي



بيض الله وجهك ياحزام الهيلا وفالك التوفيق دائماً




وصح لسانك على القصيده الرائعه


الحكم عادل والنقا مبروح والعلم محبوك = على مسار المذهبين الشافعي والحنبلي


أعتقد إن بيتك هذا فيه مطب يعني من غشكم ياشعراء المحاوره :)

[رمح برقاا]

والله ونعم يا حزام العصيمي

عزز الله انك ما قصررت وبيضت الوجه وهذا الحظ والله يبيض وجهك مليون مره

[ابن مشيب]

صح السانك ياحزام , وشاعريتك في ساحة الميدان يشهدلها البعيد والقريب , ونتمنى لك ولجميع كل التوفيق



تحياتي

[عتيبي راقي]

وأنت بعد ماقصرت يا ولد العم بيض الله وجهك ومنــها للأعـــلى ياحـــزام الهــيـــلا

[ناصر العصيمي]

اخي الكريم حزام العصيمي


بعد التحيه



كفيت ووفيت وبيض الله وجهك

[هبداني تيماء]

حزام الهيلا بيض الله وجهك وماقصرت
وشرفتنا وأديت الي عليك بس البرنامج
لم ينصفك والكل يعلم عن التلاعب الذي
حصل وبالعكس البرنامج هو الذي كسبك
حزام انت شاعر كبير وموهوب
اتمني لك التوفيق يابو سعود
تقبل تحيااااتي

[بارود عازمي]

والله ونعم يا حزام العصيمي

عزز الله انك ما قصررت وبيضت الوجه وهذا الحظ والله يبيض وجهك مليون مره




سيف الهيلا


كنت ولازلت اراهن على انك مستقبل الشعر المشرق


وكما قالو الاخوان نتمنى حضورك باستمرار فأنت مقل الحضور وشبه منقطع لماذا



وستبقى حزامنا الى الابد


بيض الله وجهك وشاعر المعنى اضفت له انت ولم يضيف لك شئ

[ابن عـــميــش]

الاخ حزام العصيمي مشكور على هذا الشعور الطيب ونسأل الله العلي القدير ان يوفقك انت واخوانك المشاركين من افراد القبيله والى الامام
دائما وابدا.. وتقبلوا تحياتي

[قرنــاس الصبيحي]

هلا ومرحبا بولد العم لاتشكرنا علا واجبنا اقل مايمكن تقديمة

وعتيبة تفتخر فيك وسندك في نهار لا ضدك عسير وكايد


بيض الله وجهك وصح لسانك

[أبو جهز الفليت]

صح لسانك يا حزام العصيمي على الاقصيده

ومرحبا مليون يا حزام بين عيال عمك






ابوجـــــــــــــهــــــــــــز الــــــــفـــــــــلـــــــيــــت

[Man من العتبان]

اخونه الغالي حزام العصيمي حياكـ الله

نحن نعرف ونجزم جميعا" لو فيه شوية عداله في البرامج الشعريه

لا نشوفك انت وشعراء عتيبه المشاركين اول طوابير والمنافسين في البرامج الشعريه .

لكن لا حياة لمن تنادي . .

دمت بخير . .

[روح جاي]

صح لسانك ياحزام

وبيض الله وجهك على القصيده والمشاركه في البرنامج

عسى الله يوفق شعرانا المشاركين في البرنامج

[الشــاهد]

مرزوق المقاطي وسلطان المنصوري --------------


مثلوا عتيبة خير تمثيل في شاعر المعنى

[الباااسل]

مرزوق المقاطي وسلطان المنصوري --------------


مثلوا عتيبة خير تمثيل في شاعر المعنى





كل شعراء عتيبه كفوووو ومثلوا عتيبه خير تمثيل وأولهم



حـــــــزام الــــــعـــــصــــيــــمــــي