المساعد الشخصي الرقمي

مشاهدة النسخة كاملة : رد الثنا عنهم وجب لامحاله


فهيد مقعد الرويس
30-Mar-2008, 05:38 PM
اخواني الاعزاء هذه قصيده موجهه لفهد بن حسين الحبابي القحطاني

فرج الله كربته ’


يامرحبا ياصادق في مقاله=عد الشجر واعداد مالاح براق

واعداد ما ينبت بوادي تباله=من الزهور اشكال والوان وارناق

يابن الرجال اهل الكرم والشكاله=واهل الشجاعه يوم نشفات الارياق

احباب ما فيهم احقود ونذاله=الورع منهم للصعيبات تواق

يامن تعنا ابوه يطلب خواله=ماقال ابا اخذ من بني طاق طرباق

وياللي لراس المجد طوح احباله=وادرك سنام المجد واعرض عن الساق

وخلى الرجال تشح به طاب فاله=وتطلق عن يدينه جويدات الاوثاق

ومن طيب ابوه وطيب جده وخاله=اغدق على ربعي بتمجيده اغداق

ورد الثناء عنهم وجب لا محاله=وكتبت ردي له على بيض الاوراق

الخط يعنيني وانا بالوكاله=عن عزوة الهيلا عريبين الاعماق

ابشر بعزك يا مكرم اسباله=لوكان ما يبقى لنا يافهد باق

من لا فدى بالروح يفدي بماله=اسمع كلام الصدق من قلب واعماق

اطلع سنود وخل عنك السهاله=من يعتزي بعتيبه يموت ما ضاق

والشيخ ابن جامع وجملة اعياله=وعشيرته سندك عن كل بواق

شيخ على الفزعه بجاهه وماله=يعط البشاير لا خسق كل خساق

في المملكه من الجنوب لشماله =تعانق التنعيم مع ذكره اعناق

ومن شرقها لا غربها من تساله=عن بيت ابو خالد يوديك مشتاق

قولة هلا بالضيف بادي اقباله=مقري اضيوفه باطيب الضان والناق

فهد ياراع الاوله والجزاله =لعل باق العمر لك عز واوفاق

انتم عل الطالات واهل البساله=يامكرمين الضيف بظهور واشناق

او حايل من ضين مصلح حلاله=لا جابها واغلا ثمنها بالاسواق

وانتم هل الافعال يوم الجهاله=لا كبرت القاله ولا عاد تنطاق

من اصل قحطان اصلكم والاصاله=ترجع لكم غصب على كل نقاق

اشيوخكم كما رواسي اجباله=اجمالها لو صارت اطباق اطباق

الشيخ منهم لو ببيته لحاله=من يزبنه ذراه لو ماله ارواق

من يزبنه ينال محد يناله=ما يلحقه من سو ء اليام لحاق

ولا يجحد التاريخ كود الحثاله=والصيد ما يدميه ياكود تفاق

وسعود كانه فيك سوى جماله=لولاك تستاهل لك الطيب مانساق

وحنا ترانا معك في كل حاله=يا من بدت شمسه عقب غاب باشراق

والله ياخذ من يشح بحلاله=كانه لفعل الخير ماهوب سباق

وحسبي على اللي يحكمون بضلاله=بالظلم عجلين على قطع الارزاق

والله موصيهم بحكم العداله=يلعنك مخلوق يخالف لخلاق

واختامها يالله ياذا الجلاله=ياواقي من الشر يالله ياواق

تفرج لمن هو عايش في ملاله=وصلوا على راع الهدايه والاخلاق

الشاعر:

محمد بن سعود بن هلال الرويس

وسعود الوارد ذكره فالقصيده

هو المقدم سعود بن سلطان الرويس

ارجواني قد وفقت فالنقل

وسلامة الجميع

محمد النفيعي511
30-Mar-2008, 05:40 PM
http://gigaup.net/uploads/0192c4041e.gif (http://gigaup.net)

مرزوق حمدان العتيبي
30-Mar-2008, 08:13 PM
...
صح لسان الشاعر الجزل
محمد بن سعود الرويس
ويستاهل الحبابي ولابته
وشكراً لك يافهيد على حسن نقلك ..
...

خلف العتيبي
30-Mar-2008, 11:10 PM
لاهنت يا فهيد على النقل..

يستاهل الحبابي كل خير..


بيض الله وجهك..

فهيد مقعد الرويس
31-Mar-2008, 12:46 AM
http://gigaup.net/uploads/0192c4041e.gif (http://gigaup.net)

حياك

يالنفيعي

والمعنى في بطن الشاعر:)

؟؟؟؟؟؟؟؟؟

مودتي

فهيد مقعد الرويس
31-Mar-2008, 12:52 AM
...
صح لسان الشاعر الجزل
محمد بن سعود الرويس
ويستاهل الحبابي ولابته
وشكراً لك يافهيد على حسن نقلك ..
...

صح بدنك يابومحمد

بانيابه عن ابوسعود

وجزيل شكري وامتناني لك

على الحضور المميز

تحيتي وتقديري

فهيد مقعد الرويس
31-Mar-2008, 12:57 AM
لاهنت يا فهيد على النقل..

يستاهل الحبابي كل خير..


بيض الله وجهك..


ولاهان من قال

ياخلف

مافي ذلك شك من دون اقصور في سواه

اسعدني تواجدك الكريم

تحيتي وتقديري