المساعد الشخصي الرقمي

مشاهدة النسخة كاملة : من قصص الشيم عند البادية بين العنزي والعتيبي...


عكاش
20-Nov-2003, 04:19 AM
الله بالنور يالربع النشاما،،،

هاكم هالسالفة وهي مبطية شوي وتدل على شيم العرب وطيبهم للي يعرفونه واللي مايعرفونه .....

في عام 1400هـ تقريبا حدثت هذه القصة

سافر نايف اللعاق العنزي من عرعر الى المنطقة الشرقية بسيارته الخاصة وفي اثناء مروره بقرية النعيرية بالليل حوالي الساعة 11 سالك الطريق العام وفجأة يخرج من أمامه قطيع من الاغنام السائبة فدهس أكثر من أربعين من الغنم قبل ما يوقف سيراته فأوقف السيارة على جانب الطريق واذا براعي الاغنام يحضر وينهال على صاحب السيارة بالسب والشتائم ، وحضروا رجال المرور فقبضوا على السائق لغرض ادخاله التوقيف لين يجي الصبح وينظر في القضية بالمركز ، واذا بذاك الوقت برجل يتوسل مسئول الدورية ويعرض كفالته لهذا المسافر سواء كان حضوريا أو ماديا ومهما طلب الراعي كان مستعد ، فقبل مسؤول الدورية كفالته وأطلق سراح نايف العنزي ، ونايف مايعرف من هو هذا الرجل الذي تدخل بموضوعه وعمل خيرا معه ، واذا بهذا الرجل فاعل الخير يقول له سافر يا عنزي في طريقك والى اي جهة تري\ ، وسوف أدفع كل ما يترتب عليك ، فقال العنزي للرجل فاعل الخير وكيف تتكفل بكل شيء وانت ماتعرفني ، فرد عليه فاعل الخير مايهمني ، وانما يهمني احياء عادات العرب الطيبة ، فقال العنزي : أسألك بالله من تكون انت ؟ فقال الرجل لاحاجة لك بمعرفتي يا عنزي وطلب منه نايف بالحاح وش اسمه فقال له :
اسمي / عبدالله بن ابراهيم العتيبي من سكان قرية النعيرية وتشكر منه نايف وواصل سفره ..
وبعد مرور خمس ايام عاد العنزي لكفيله العتيبي وأنهى دعواه مع خصمه صاحب الاغنام ، وبهذه المناسبة قال الشاعر / طايف اللعاق العنزي شقيق نايف قصيدة وفاء واعتراف منه للرجل العتيبي اللي سوى الجميل بدون سابق معرفه ، فينشد العنزي :

اكتب جوابي للقيل يوم فصلــــــــــت
،،،،،،،،،،،،،،،،،،،،،،،،،،،،،بفعل العتيبي وأشهر الفعل بالقيــل
وأذكر لك اسمه يوم قتل وتمثلـــــت
،،،،،،،،،،،،،،،،،،،،،،،،،،،،،اذكر لك اسمه وأرفع الصوت بالحيـل
عبدالله ابراهيم ونعم بما قلــــــــــت
،،،،،،،،،،،،،،،،،،،،،،،،،،،،،نعم اليا عديت فعل الرجاجيــــــــــل
عز الله انك يالعتيبي تجملــــــــــــت
،،،،،،،،،،،،،،،،،،،،،،،،،،،،،جمالة تذكر لجيل وراء جيــــــــــــــل
لموضوع ابن لعاق شلت وتحملـــــت
،،،،،،،،،،،،،،،،،،،،،،،،،،،،،مثل البليهي يرتكي لا أثقل الشيــل
أنت الذي عنه الصعيبات ذللــــــــــت
،،،،،،،،،،،،،،،،،،،،،،،،،،،،،ذللت صعبات المهمات تذليــــــــــــل
جيت وكلفته ماتفطنت أو قلـــــــــــت
،،،،،،،،،،،،،،،،،،،،،،،،،،،،،ما قلت ما أعرفه ولا لي مداخيــــــل
وأنت الذي للطيبة ماتجاهلـــــــــــــت
،،،،،،،،،،،،،،،،،،،،،،،،،،،،،فعلتها يابن الكرام المشاكيــــــــــــل
وكم قبلها من طيب الفعل حصلـــــت
،،،،،،،،،،،،،،،،،،،،،،،،،،،،،يوم الردى منها قليل المحاصيـــــــــل
وأنت الذي في صفحة المجد سجلت
،،،،،،،،،،،،،،،،،،،،،،،،،،،،،قصة شهامة يا بعيد المناويــــــــــــل
يا اللي علينا بالجمالة تفضلـــــــــــت
،،،،،،،،،،،،،،،،،،،،،،،،،،،،،ترفع لك البيضاء بروس الشهاليــــــل
نرفع لك البيضاء اليا أقفيت واقبلــــت
،،،،،،،،،،،،،،،،،،،،،،،،،،،،،،عد النهار وعد ماروح الليــــــــــــــــل
هذا وعلمي وسلامتك يالربع،،

أخوكم بالله

العنــــــــــــزي،،،،،،،،


منقول
http://www.enazh.com/vb/showthread.php?s=&threadid=172

مرزوق حمدان العتيبي
20-Nov-2003, 11:45 AM
""""

صح لسان اللعاق
وتسلم يمينك ياعكاااش
والشيم والقيم باقيه مع الاجواد الى قايام الساعه

اخوك:
مرزوق

ولد روق
20-Nov-2003, 12:10 PM
والنعم بهذا الرجل ..
اللي اعطى صوره حسنه عن قبيلة الهيلاء..
ومشكور على هالمشاركه ..

الشــــــعف
20-Nov-2003, 12:56 PM
مشكــــــور علـى نقــل هــذه القصـــة والقصيده الرائعه ؛

تقبل اجمل تحيه ....

ابن مشيب
20-Nov-2003, 03:50 PM
اخي عكاش/

مشكور على هذا النقل الرائع لهذة القصة الرائعة , والتي تبين ان فعل الخير والمعروف مايضيع مع من يعرفون المعروف مثل قبيلة عنزة الكبيرة.

الف شكر على هذا النقل , والف شكر على هذا الرابط لمنتدى قبيلة عنزة العزيزة.


تقبل تحياتي.

الخنفري
20-Nov-2003, 04:17 PM
الاخ عكاش

نشكرك على القصه الرائعه والتي تبين مدي فعل الخير المتوارث عند ابناء القبائل

وتسلم يميينك

بعيـد المرامع
20-Nov-2003, 07:39 PM
حي الله بن وايل وحي ماجاب ...

سالفةٍ طيبه من وجهٍ طيب ..
ولاهي غريبه على الطيبين مبادل الطيب بالطيب .....

سلمت ... ودمت على العز ...

المراقب بعيد المرامع|4|

هاوي نجد
20-Nov-2003, 09:06 PM
مشكور اخوي عكاش على هالنقل الطيب من وجهاَ طيب وبارك الله فيك والشيم مع العرب لين تقوم القيامه والعتيبي هذا اجودي
اخوك
ابو بندر الشيباني

عكاش
20-Dec-2003, 11:33 AM
بيض الله وجهيكم ياعيال العم
وبيض الله وجيه عنزة الي يقولون الي لهم ولي عليهم

متعب العضياني
13-Jan-2004, 10:24 PM
بيض الله وجهك على هالقصه


والطيب يبقى والخساره بالاعمار *** والرجل لولا الطيب وش ينبغابه
الله يعطيك العافيه