مرزوق العطاوي اقرب جاي لاعدمناك

[الحكيم]

ودنا نتعلل شوي يالعطاوي

اسمع يامرزوق


كان مرزوق العطاوي يقدر يسنّد كتيبه

قلتله يامرحبا وأهلا هلا يبن الحلالي

عدّها وان شفتها منجوبةٍ ماهي نجيبه

خلّها بين المحال وبين تصديق الخيالي





ياليت ينشال (الــ )

تحيات

حكيم|4|

[مرزوق المغيري العطاوي]

مرحبابك لاهنت

كان علمك يالحكيم يفوح لهل الطيب طيبه =قلت تبقا طال عمرك قول يالله لاتبالي

بدها ونشوفها هي مخطيه والا مصيبه =والرخصه حكمها ماهوب حكمٍ للغوالي

[وصل العطياني؟؟؟]

[QUOTE]كاتب الرسالة الأصلية الحكيم

ياليت ينشال (الــ )


نرجوا التوضيح..




وعلى العموم ...


نرحب بك أخي الكريم معنا...


بداية جيدة....



أتمنى لك التوفيق...



مرزوق العطاوي:


غني عن التعريف....




تحياااااااااااتي

[طلال الثعلي]

يالحكيم

حياك الله


اما وصل تراه في صف مرزوق


وانا في صفك

شد حيلك

[طلال الثعلي]

يامرزوق


خلك على ماني بخابر

تحياتي,,,

[الحكيم]

ياسلام يالعطاوي

صح لسانك



المجال اللّي نجيبه يالعطاوي نرتكيبه

والوفا للطيبين اللي يحبوّن العلالي

والذيابه ياعميلي سافرت تبغى الكسيبه

وانت مابين الحياة وبين تكرير السؤالي

[الحكيم]

وصل العطياني لاهنت يالذيب

واللي أقصده طال عمرك ( المعرف ) بدل الحكيم ( حكيم ) حتى لاأقع في الشبهات

وجزاك الله خير

وأسعدني مرورك

[الحكيم]

ابن ثعلي طلال

جوّد الصف زين :)

لاخلا ولاعدم يالذيب :)

[وصل العطياني؟؟؟]

شكراً لك حكيم..

وهذا من إختصاص الإدارة...


وبإمكانكم مراسلتهم ...



المهم :

ماني مشغلك عندك العطاوي...

عاد طلال في صفك وأنا أكيد في صف مرزوق...


قال سووا صفين قال ماغير إثنين...!!


لا بعد طلال معه مشع ...!!!


أمس يرقى نخلة والله عثره!!!

الهمام.. الهمام...


تحيااااااتي

[مرزوق المغيري العطاوي]

المجال اللي تجيبه لايجيبه نوع ريبه = والدروب تشاف والمقصود في عال الجبالي
من عناها اقفت وجات ولالقت ماتهتنيبه = وانت مدري عنك لادار الرشا فوق المحالي

[مرزوق المغيري العطاوي]

وصل العطياني
طابت اوقاتك بكل خير
ماعليكم زود
لك تحياتي

--------------------

طلال

يشرفنا وجودك يالغالي

لك تحياتي

[طلال الثعلي]

الحكيم

تكفاا ترى تكفا تهز الرياجيل-- لولا ضروف الوقت ماقلت تكفا

لا وصيك في مرزوق

والا وصل تراه رجالا كسلان وصفه ماهو باللي

ولاتشيل هم الصف

[طلال الثعلي]

يامرزوق

مساك الله بالخير
شد حيلك

[الحكيم]

ارتهج ليل المعنىّ وابتلش راع الضريبه

يحسب العمله جنيه ويحسب العمله ريالي

ان لزمتك يالعطاوي ترتقص كنكّ ذهيبه

والمثل قال الحموله مالها غير الجمالي

[الحكيم]

العطياني

أشكرك طال عمرك .. ولاهنت على التوضيح

وابد خلّك في صف العطاوي :)


طلال : لاهنت لاهنت مير احترص لايشغلك عن صفي وصل :)

[ذياب المرشدي]

مساكم الله بالخير

جميعا محاوره من ابدع المحاورات

والله لايهينكم

شدوا حيلكم العطاوي

وحكيم وماعليك من الاسم راعيه مات وهو حكيمهم وانت حكيم اهل السنه ان شاء الله

ولو العطاوي فطن فيها كان جتك علوم (امزح معكم ) بس لبصراحه محاوره رائعه

وزادها


حضور الطيبين

وصل وطلال


عسا الله يطول بعماركم على طاعته

تحياتي لكم جميعا

وانا بين الصفين ماقدر اميل مع احد منكم

واردد للجميع

[مرزوق المغيري العطاوي]

ابتدى درب المعذب ينثنيبه ينثنيبه =يحسبنه من ظنونه مثل ابوزيد الهلالي
لاوصلنا للملازم في يدي فانت القضيبه =والقضيبه فى الزريبه مالها غيرالحبالي

[أبوسلطان]

ياشعار

بيض الله وجيهكم

ويامراقبن الصفوف وجيهكم بيض

وانا تراني مع الشعار بين الصفين

[طلال الثعلي]

ذياب المرشدي

حياك الله

مانستغني عنك ياقرم

تحياتي,,,

[طلال الثعلي]

يامرزوق

الميل عليك انت وصفك

ههههههههه

تحياتي,,,

[طلال الثعلي]

يابو سلطان

حياك الله

بس اهم شي

ماتغشش الشعار

تحياتي....................

[الحكيم]

استلم لاهنت



ماخبرنا يالعطاوي راعي السر يعديبه

دحدروبه ياعتيبة كان طوّل فالمجالي

مادرا سيف الزناتي لافتق جاب المصيبه

بكتفيله مطرقين وأبمسطه مسط العقالي


حسبي الله عليك يبن ثعلي شبيّتها مير لاتخليني ههههههه

[وصل العطياني؟؟؟]

بكتفيله مطرقين وأبمسطه مسط العقالي


لا والله تفكى يا حكيم ...

خلّ المطرقين والعقال لطلال الثعلي...

اللي يقول في صفك ويذب الخريمة...

ها والله ما ينفعك من يوم كثرت عليه النخاوي...

إحزم وسطك يا مرزوق..

أنا معك..


تحيااااتي.

[مرزوق المغيري العطاوي]

وصل العطياني
كفو مادمك في صفي
ازهل الربع


انت وش دعواك ومن انته ليا شبت شبيبه =ياعتيبه ماحسبنا للذي فاقصا الضلالي
الزناتي ماتخفى يعتلي راس الرقيبه =وانت مجهولٍ كذيا لاحرام والا حلالي

[الحكيم]

طيب ياطيب :)



النفيعي لابغاها تنفض ارياك العصيبه

ماتخفّا والحكيم معربٍ عمي وخالي

والزناتي تعرفونه لاعوى ذيبٍ لذيبه

لاتلفتّ في يمين ولاتلفّت في شمالي




____________

وصل أسعدت بمرورك , بس طلال خوي وماسكٍ صفي , ماعنه مجناب :)