حسبي الله ونعم الوكيل رساله لأثنين

[خالد الجش المطيري]

السلام عليكم ورحمة الله وبركاته
بدون مقدمات اول شي شكرا لتفعيل عضوتي بالسرعه هذي لي نص ساعه مسجل ولو مافعلتو عضويتي يمكن اموت قهر انا الي خلاني اسجل بس بوجه رسالتين لشخصين واطلع واتمنى توصل مع اني متاكد راح توصل الليله اول شي منتدى قبيلة مطير الي هو منتدى قبيلتي مغلق مدري ليه مايفتح معي ثاني شي انا هنا بدون تزلف بين اخواني وربعي وجيراني المهم ماراح اطول عليكم انا بصراحه اول مره اسجل بمنتدى بحياتي كنت بس اتصفح وواضح من موضوعي غير مرتب وكله شخابيط بس انا مقهور وبقول الي بقلبي وهذا حق من حقوقي اقول الي بقلبي بوجه رسالتي بشكل مختصر واتمنى اختصر لاني مقهور اول رساله لتركي المريخي ياتركي اقسم بالله انا مطيري بس مقهور منك يا تركي لو فعلا الي سمعناه صحيح انك عطيت خالد اربعه بس وربي انك ماتستحي ياتركي ونا ولد عمك عيب والله قصيدة خالد والله تقشعر جسمي من قوتها وجزالتها وخصوصا انها بالرسول صلى الله عليه وسلم يا تركي راجع نفسك وانسحب ماتعرف تتكلم وتتمصلح مع الشيوخ يعني بالعربي واضح انك مساح جوخ وهذا مايليق بقبيلتك وثاني شي ترى انت الي جايب الدويش عشان تعطيه فرصه يمدح الامير الي مدحه والدليل انك تبوسمت وقلت القصيده رائعه وهي فضيحه ياتركي كفايه مسح جوخ دخيل اهلك فشلتنا وخاف ربك عط كل ذي حق حقه ولا استريح وربي كل ماجا دورك تبي تعطي رايك اغير القناة ادري تبي تجيب العيد الرساله الثانيه لحمد السعيد ياحمد يطولي بعمرك كفايه تزلف ونفاق طال عمرك ترى واضح ماعندك غير ترديد ابيات القصايد واخرتها فالك المليون اسلوب برنامج سوبر ستار وكفايه حقد على شعراء السعوديه اخر شي انا كتبت الكلام هذا لاني سعودي ميت قهر وشفت الضلم اليوم حسبي الله على من كسر بخاطرك يا خالد والله انك اكبر من مسابقه تدار بطريقة خذني جيتك اتمنى من الأمير سلمان يمنع مشاركة السعوديين لعبو فينا يلعبون على وتر الحميا وحنا مو فاضين يكفي غلاء الاسعار حتى البيبسي صار بريالين ومره ثانيه هذا اول موضوع واخر موضوع شي بخاطري وقلته الموضوع ادري ماهو مرتب ومابي احد يقول كلامك صح وشكرا لاني ادري اني صح لاني اتكلم من قلبي وتراني غشيم بالمنتديات وشكرا

[رمح جعيد]

الله يعيييييييييييين بس


تم التعديل

[عمر الدغيلبي]

أحييك يا خالد المطيري

على قولك الحقيقه

وكلامك في متمه يا ابن مطير

وانت من قبيلة عزيزه علينا

ونحن لا نعلم كم أعطى المريخي خالد وقد تكون اشاعه وقد يكون صدق

وشكرا لك

[عبدالرحمن الهيلوم]

بيض الله وجهك يالغالي

ونا اخوك المريخي جاني في المزاين واكرمناه لعيون امطير ولكن انا اخوك الي سواه في التقييم حرام علي رجال من قبيلة امطير !
وش سواله / خالد العتيبي

سؤال/ ليه ثم ليه

ياخوي لكل رجال ان تاخذه الحميا مع ربعه بس مو علي احساب الناس
الاخرين !!

باله /خالد مايستاهل 10من عشره

ونا اخوووووووووك شهادتك وكلامك دل علي معدنك ونت عزيز ومن حمران النواظر الجيران والانساب والله يحييك حنا الضيوف ونت راعي المحل يالغالي

تقبل مرور اخوك/

الهيلوم 1340

اقسم بالله العظيم اني مسجل في منتدي امطير من سنه واكثر تحت اسم الهيلوم 1383 وانهم مافعلوني ليومك 0واقسم بالله العظيم وروح هناك وبتلقي اسمي !!
وعموما مطير وعتيبه اكبر من صغائر الامور

[صور الرقيب]

حياك ومرحبى بين اخوانك

[عبدالله بن دبيس العتيبي]

بسم الله الرحمن الرحيم

السلام عليكم ورحمة الله وبركاته


الله يحيك يالمطيري

وانتم يامطير اخوانا وجيرانا وعوانينا ولايمكن يفرقنا احد لا شاعر مليون ولا غيره

وبعدين حنا ماندري وش دار بين اعضاء اللجنة علشان نقول ان المريخي غلطان ولا غيره

بخصوص خالد العتيبي متاهل ان شاء الله وهو حامل البيرق


وتقبلوا تحياتي

[عتيبـــــ ولد ــــــــة]

صراحة ما هضمته هالتركي

[ياسر الذيابي]

خالد اذا عندك كلام تكلم على انك عتيبي لانك فعلا عتيبي
وقتها قل اللي في خاطرك
وكلامك كله في محله

شاكر لك

[ابوقحط]

ع واتمنى توصل مع اني متاكد راح توصل الليله اول شي منتدى قبيلة مطير الي هو منتدى قبيلتي


لوكنت مطيري ماكتبت منتدى قبيلة مطير الي هومنتدى قبيلتي وخصوصن اللي هو منتدى قبلتي

اتق الله في نفسك وابتعد عن الفتن بين المسلمين واترك عتيبة ومطير واشتغل بنفسك

اخذو الحيطة ياعتيبه ويامطير من هذه الاشكال

[محمد العتيبي]

عافاك الله يالمطيري
وهذا دليل على طيب معدنك ..

انشالله ماتكون طلتك علينا هي الاخيره ..حاول ان تستمر مع
اخوانك ..

[خالد الجش المطيري]

مشكورين كل الي ردو على موضوعي الاول بحياتي واستغرب من الي يقول اني مو مطيري يعطيني رقمه بالخاص واتصل عليه ويواجهني ويتاكد اني مطيري يعني لازم اكون عتيبي عشان اقول الحق بالي صار اليوم؟ ياقلبي جالس مع اخوي وتوقعنا اثنينا خالد الاول واختلفنا مين الثاني هو قال الاماراتي انا قلت خلف المشعان وجت الصدمه على كل حال الي مو مصدق اني مطيري يعطيني رقمه خاص واواجهه بكره بالرياض باي مكان ويجيني محلي حياه بس بشرط يعتذر بموضوع مو بالرد وشكراا

[عبدالرحمن الهيلوم]

كفووووووووووو والله انك رجل من رؤس ارجال ونا اخوووووووووووك


وش دراك ان الي قال مانت مطيري! وش دراك انه اصلا عتيبي !!

كلن يكتب باسم مستعار ولكن الرجال تستسقي الصدق من اقلام الرجال شرواااااااااك


حياااااااااااااك وبياااااااااااك يالغالي

ومطير وعتابه الي يجمعهم اكبر من الي يفرقهم

[خالد الجش المطيري]

ابو قحط مشكور ع الرد ولو ان فيه ضلم لي الله العالم اني مانويت اسبب فتنه موضوعي واضح مجرد انتقاد للمريخي والسعيد وشوف وجه خالد العتيبي وتعرف ليش انا مقهور وارجع واقولك يا بو قحط انا مطيري ومطير وعتيبه اكبر من انهم ينساقون ورى كلمه من هنا وهناك صدقني ولهذا السبب كتبت موضوعي هنا انا مايفتح معي منتدى مطير لو يفتح كتبت الموضوع هناك وان شاءالله تشوفه هناك مكتوب

[راعي النيسان]

يعطيك العافيه اخي خالد

وانا من اول ماقريت موضوعك حسيت بصدق احساسك وغيرتك على قبيلتك وهالشي مو مستغرب عليك لانك انسان حر اصيل وانسان شامخ


بصراحه تركي المريخي الله يهديه زودها حبتين في مدح النساء وكذلك الامراء ...واليوم بصراحه كانت سقطه قويه جدا لتركي المريخي وكذلك احراج للشاعر الدويش ....

بالنسبه للكلام ان تركي المريخي قيم الشاعر خالد ب4 درجات هذا الكلام اعتقد غير صحيح ولانسيء الضن بتركي المريخي ...
وانا اقول ان هذا الكلام اشاعه وتركي المريخي من الممكن يجامل ابناء قبيلته الى حد ما لكن مايهضم حق احد وهذي ذمه ياناس مااحد يقدر يتبلاء فيها

وحييت يالغالي وابشرك النسخه الثانيه مطير وعتيبه متوحدين سواء واستفادوا من الدرس واللبس الي حصل السنه الماضيه ...
بسبب محبي الفتن


وعلى الرحب والسعه

[عبدالرحمن الهيلوم]

ياخووووووووووووووي الله يحفظك ويجعل شيابك الجنه

انا من اعتابه الهيلا
هيلوم من النفعه

وانت اخو وغالي واصدقائي اكثرهم منكم يالغالي
وش الطاري

ونا اخوووووووك الي يربطنا بمطير اكبر واعمق من جاء شاعر وراح شاعر

[ابوراكان2000]

قبيلة عتيبة وقبيلة مطير قبيلتين عريقتين ولن يؤثر علي علاقة القبيلتين

اي تصرفات فردية سواءاً في شاعر المليون او في غيره فالتراحم

والتآخي والجوار والعلاقة الحميمة بين القبيلتين اكبر من ذالك

[الحزيمي q8]

وشهد شاهدون من اهله والله ياخوي خالد المطيري ان تركي المريخي جابلكم الكلام قبل لا يأثر على بو محمد الكبير مو بس عن عتيبه بس عند القبايل كلهااا وجمهوره كبير ونت من الجمهور وعارف ولا الدويش يجيزه بس عشان اللممدوح بلقصيده هاذه تملق ونفاق والله حط كيده في نحره والمريخي ظاهره وبتختفي بحول الله لان اللي مثله ينهون نفسهم بنفسهم يعني وفيه نقص والله العالم انه يمر بمرحله نفسيه صعبه ويحاول يحول نجاح الاخرين له بس هاذي فعايل ؟؟؟؟؟؟؟؟؟؟
ولكم جزيل الشكرر

[سعود الشايوش]

اخي المسمي نفسه خالد .. يبدو من اسلوبك انك اندفاعي وتغلب عليك العاطفه اكثر .. واعتقد ربما لصغر سنك دور .. قرات مابين السطور ووجدت انك تتحدث بعاطفه قد يكون لها مسارين سأختار منها الحسن واجتنب الجانب السيء .. وقد يقودك الاعجاب بشعر خالد العتيبي للانفعال وعدم تقبل راي الاخر فيه ..

يجب ان نتحاور بعقل .. واسالك بالله هل ترضى ان تكون منتديات عتيبه او مطير .. لتصفية الحسابات .. او التعبير عن الامتعاض من اي شخص لانرغبه .. ومن اي فخذ في قبيلتنا .. نحن لانريد تقييم شخص بعينه ..

عتيبه ومطير اكبر بكثير من هذا ..!!

ولكن اعجبني جملة كتبتها انت وهي تنطبق معي دائما .. وهي بخصوص قولك حينما ياتي الدور عند المريخي لابداء رايه صدقني مرات اغير القناه عمداً .. ياخي المريخي يفشل السعوديين فما بالك بقبيلته ..

ولي تعقيب على تعليق احد الاخوان بخصوص تكريمنا للمريخي فانا اعرف انه كتب الكلام بحسن نيه .. ولكن اخي لايكن كلامنا عن تكريم المريخي فيه نوع من المنّه .. وكرمناه وحنا اهل الكرم .. ولاننتظر رد الجزاء منه او من غيره ..


خالد الجش : احفظ هذه الجملة وطبقها دائما صدقني ستنجح في حواراتك مع العالم ..


(( العقل ذكر .. والعاطفه انثى ..

والرجال قوامون على النساء ..

لذلك يجب على العقل ان يقود العاطفه .. ))


ومرحبا بك صديقا لنا ..;)





..

[روق والسماء فوق]

اخوي خالد الجش المطيري لاهنت يالغالي على الصراحه

ومانقول ( غير الله على الظالم ثم الله على الظالم )