طلب قصيده

[فارس الطايف]

من العايدين قبل الزحمه ياتاااااج راسي كلكم ياعتابه


ارجو منكم اللى يعرف القصيده ان يوردهاا وله منى الدعاء الصالح

اذكر منها ابيات يمكن تكون ماهى صحيحه

((رجلا بلا ربعن مثل طيرا بلا جنحان .......


اليا انكسر احد الجناحين ماطار ....... ))




والله يعطيكم العافيه

[خـالد الحافـي]

السلام عليكم ورحمة الله وبركاته

هلا اخوي فارس الطايف

اسمح لي بهذه المداخلة التي قد تفيدك


في البداية هناك خلط بين قصيدتين ولابد من التوضيح ومن المحتمل تكون ثلاث قصائد . لاكن ما اعتقد انك اوردت البيت بالصوره الصحيحه

عموماً

هذه الأبيات هي للشاعر عبدالله بن سجوان الرويس العتيبي وقد قالها وهو في الكويت حسب الأقاويل




ياحسين بلدان الجماعـه مريفـه=واللي مع الاجناب كنه علـى نـار
يمنى بلا يسـرى تراهـا ضعيفـه=ورجل بلا ربعٍ على الغبن صبـار
و الطير بالجنحان ما أحلى رفيفـه=واليا انكسر حدا الجناحين ما طار وأعتقد اللي تقصده في الشطر الثاني من البيت اللي قلته موجود

في هذه القصيده

والروايات الأكيدة أنها فقط ثلاثة أبيات قصيدة الرويس





وهاذي قصيدة الشاعر محمد النجدي الصقري العنزي وهي على قافية مشابهه ولكنها معكوسة لذلك يكون هناك خلط بين القصيدتين اذا قلب صدر وعجز الابيات وهي كما يلي كاملة :



يالله يالمطلوب يا والي الأقدار=أنت الذي مدّات جودك لطيفه
يالله يالمعبود عاون هل الكار=تحل شطاتٍ عليهم كليفه
اللي مجالسهم بها بن وبهار=ونجرٍ يصوّت للهشالا رجيفه
مكارمٍ للضيف أصيلات وكبار=ومفطحاتٍ في صحونٍ نظيفه
يا مزنةٍ غرا من الوسم مبكار=اللي جذبنا من بعيدٍ رفيفه
تومر على كل المفالي بالأمطار=تصبح به خدان قومي مريفه
غب الحيا فاحت بها ريح الأزهار=تخالف النوّار مثل القطيفه
ترعى بها قطعانّا سر وجهار=تقطف زهر مرباعها مع مصيفه
يبني عليها الشحم بنية جدار=عقب الضعف راحت رجومٍ منيفه
قطعانّا ما ترتع دمنة الدار=ترعى زماليق الفياض النظيفه
ترعى بها وضحاً من الذود معطار=غبوقة الخطّار عجلٍ عطيفه
ترعى بضف الله ثم جبران وجبار=خيالةٍ يوم الملاقا عنيفه
إن سوهجوا عنها قليلين الأبصار=من دونها نروي السيوف الرهيفه
ماهي حكاية مسردٍ عقب ما نار=اللي نكس وأطراف رمحه نظيفه
حنا كما مشخصٍ عن الصرف ما بار=بالوزن يرجح والمصاري خفيفه
هذا ولك الله من قديمٍ لنا كار=عن جارنا ما قط نخفي الطريفه
حنا نرى في زلة الجار لو بار=تضحك حجاجه بالعلوم اللطيفه
نرفى خماله رفية العش بالغار=ونودع له النفس القوية ضعيفه
ولا نبدي الخافي ليا صار ما صار=يفلج قصير البيت لو بان حيفه
ونكرم سبال الضيف حق وتعبّار=لامن ولد العفن شح برغيفه
الجار لابده مقفي عن الجار=وكلٍ بجيرانه يعد الوصيفه
نبغي ليا من بدّل الدار بديار=وعقب البطا كلٍ تذكر وليفه
كلٍ تذكر ما جراله وما صار=وكلٍ تذكر ما جراله من عريفه
لابدها ترجع تواريخ وأذكار=وتبقى لدسمين الشوارب وظيفه
أحدٍ على جاره بختري ونوّار=وأحدٍ على جاره صفاةٍ محيفه
الصبر مفتاح الفرج هو والأفكار=ومن لا صبر تصبح أحواله كسيفه
خطو الولد مثل البليهي ليا ثار=يا زين حمله ليا تمدرا زفيفه
يشدي هديب الشام حمّال الأخطار=زودٍ على حمله نقل حمل أليفه
وخطو الولد مثل النداوي ليا طار=حسّه على صيد الخلا له وحيفه
ترجي العشا في مخلبه وقع وطيّار=صيده سمان ولا يصيد الضعيفه
وخطو الولد ينبش على موتة النار=مع العرب يشبه لخطوى الهديفه
ليا بخصته ما سوى ربع دينار=صفرٍ على عوده تضبّه كتيفه
وخطو الولد يا مال قصّاف الأعمار=لا نافعٍ نفسه ولا منه خيفه
وصلاة ربي عد ما خضّر الأشجار=على نبيٍ له شريعة شريفه


أرجو أن أكون قد وفقت في توضيح معلومة وقدمت ما يفيد

[فارس الطايف]

مشكووور اخوى خالد وماقصرت والله يعطيك العافيه

والمطلوب فى الثلاثه الابيات الاولى ولكن اوردة قصيده جميله بمعنيها

واضفتها الى مكتبتى الشعريه ويسلمووووووووووووووووووو

تقبل تحياتى ومن العايدين وكل سنه وانت والجميع بخيرر،،،،