وا لح قلبي لح هجــنٍ نحايف …هجنٍ عطوا درب المخافة نحوره ( السماري )

[ابن نجد]

شاعر متميز ذو وصف عالي كيف وهو الشاعر الكبير خالد بن نويفع السماري العتيبي يصف بغزليه رائعة معشوقته.


عديت في ضلعٍ في ذري كشب نايف
عديت فيه اسبر مواكــر صقوره

وحولت من روس المراقيب عايف
حيث ان دمع العين فاحت قدوره

وا لح قلبي لح هجــنٍ نحايف
هجنٍ عطوا درب المخافة نحوره

مع ديرة الاجناب من كفو خايف
يبا الحجاز منكفٍ من شـروره

وردن لهم عدٍ بعيـدٍ ندايف
عدٍ على جوه تحاوم طيوره

وليا دليلتهن بالعين شايـف
ركبٍ مع الجره يقدم سّبُوره

شيف الطلب بأوساق ركبٍ خفايف
وتشاوروا والمرتهب ضاع شوره

وهجوا على مثل النعام الولايف
حادي القوايم واركبوهن حروره

يطرد وراهن صيفة العبد سايف
قاسا المهامز يوم عبت عصوره

يلوف هنه من وراهــن لايف
وما قدمهنه من العدود محبوره

تاطا سماريهن روس الحتايـف
بالقيض والمرزم حراوي ظهوره

عليك ياراع الثـمـان الرهايف
يلي عليك القلب يبست سيوره

يلي عليك من الادامي وصايـف
ليا شاف له ريغه وبرّز صدوره

قلبي كما طي القليب المهايف
ادنات ما جابه وكدر شعـوره

وليا تذكر وصف راع الردايف
كثرت طواعينه وزادت فجوره

واكثر حراه من الركايب نكايف
عن مرقمٍ حطت علينا زهوره

ما نلحق المال المولي حسايف
الله يبور اللي عميله يبــوره

ونرجو ان تحوز هذه القصيدة الرائعة على اعجابكم
----------------------------------------------------------------
زماننا غير زمانهم وحتى نتذكر الاولين
اخوكم ابن نجد

[ابن فرحان]

الله الله عز الله انها رائعه يا ابن نجد يا خوك اذا مافيها عليك كلافه حط لنا من قصايد السماري الله لا يهينك .. الا هو شاعر قديم ولا معاصر

انا صرت من المتابعين لما تقدم الله يعطيك العافيه

[مهاجر]

يا خوي ابن نجد
هل يوجد ديوان لهالشاعر
ارجو تزويدنا بما تعرف من قصائد
ولك مني الشكر

[طويل الذراع]

مشكور على هذه القصيده الجميله



تقبل تحياتي




اخوك طويل الذراع

[داهية عتيبة]

الله


رائع


من اروع القصائد

تسلم يمناك يا ابن نجد


الله لا يحرمنا من مواضيعك الشيقة


وصح لسان الشاعر

تقبل تحياتي ..

[smartdart]

الصراحه قصيده رائعه جدا وتدل على قوة شاعرية هذا الشاعر وكذلك طريقته في انتقاء المفردات والتسلسل في سرد الابيات وتصوير احداثها
شاكرين لك جهودك على نقلها وعلى ذوقك في الاختيار.
س:
كم عمر هذا الشاعر وهل لديك ابيات من قصائده الاخرى؟
وبالمناسبه هناك شعار اسمه خالد العتيبي نراه في مجلة المختلف احيانا
وهو شاعر متميز جدا بالنسبه لعمره وقصر خبرته الشعريه ولكنه متمكن جدا وله قصائد جدا ممتعه.
وعساكم على القوه

اخوك سعود الجذع الروقي