قصيدة ملفي

[نجم511]

السلام عليكم ورحمة الله وبركاته

ابي رايكم وبصراحه وش رايكم في قصيدة ملفي حقت المزاين ؟؟؟

انا بصراحه اقول مالها داعي وصوته ماله داعي مع احترامي له لو كان بدال ملفي حبيب العازمي أوسلطان الشيباني الجلاوي كان صحييح

على العموم معهم وقت يغيرون الي له صله بااللجنه يوصل لهم هاالكلام هذا مو رأيي أنا هذا راي المجتمع ورأي أغلب العتبان

[نبض عتيبه]

بالعكس قصيدة ملفي ما فيها اي نقص
ولكن تمنيت انها تكون اقوى من ذالك

[نجم511]

انا ماقلت نقص بس فيه أفضل منه أداء

[بندرالقثامي]

http://9q9q.net/9q9q.net.gif (http://upload.9q9q.net/file/WwVEEDieDRO/3_mzayan.ram.html-Accounting.html)

[راعي البرصا]

السلام عليكم


قصيدة ملفي لم ترتقـي للمسـتوى المطـلـوب وايضـاً الأخـراج فـاشـل

بكـل معـنى الكلمـه

وين اللجـنه مايتحركون ويتداركون الاخطـاء اللي المفروض ماتقع

ونحن مقبلون على منافسه شريفه مع قبائل عزيزه تقوم بعمل مزاينات

بنفس وقت مزاين الهيلا عتيبه

وجميع المشاهدين سوف يفاضلون في ما بين المزاينات بالنسبه

للفخامه والضخامه

هذا اختبار حقيقي للجنه وارجو ان توفق

والله ولي التوفيق

أخوكم / راعي البرصا الدعجاني

[نجم511]

اقول كلامك صحيح100%ياراعي البرصا

أنا أقول لو يلقي الشيله مهنا يكون أفضل بكثير

[محقني الخبر]

الكلمات حلوه


لاكن يمكن المشكله من البطئ في الالقاء


وابو وافي شاعر كبير



ومتخصص في شعر الابل

تحياتي لكم وهذا وجه نظر بس

لاكن حبيب اكبر الشعار واحسنهم على الاطلاق

[بعيـد المرامع]

مالها داعي!!!

ليه..عسى ماشر..

انقدها..يالغالي..ووضح..

وحدث العاقل بما يعقل.. واتركنا من المقارنات..

القصيده جزله..والصوت رائع..

وابوافي..وافي ..ولاقصر..

وهذا ميقاف..والداعي دعـــا

وملفي المورقي..تواجد و تبين...واجاد..وتحسب له..

والمجال مفتوح..للكل..

تحياتي ..

[خلف القثامي]

قصيده جزله في المعنى والكلمه


وابو وافي بيض الله وجهه


وبشهادة ابناء القبائل الذين يتابعون قناة الساحه

[كاسب الطيب انا]

والله القصيده جزله والإلقاء جميل ولكن الإخراج ماهو على مستوى الحدث اللي مقبلين عليه

[ابو ضيف الله]

القصيده توني اسمعها وبصراحه رهيبه بمعنى الكلمة

وبيض الله وجهك يالقثامي وصح لسان ابو وافي



وحنا كسبناها من اول وذا الحين = بالجهد وبعزوم الرجال القوية
وقمنا بواجبها كلاماً بتثمين = واللي يسوي مثلنا حي حيه

[بعيـد المرامع]

القصيده توني اسمعها وبصراحه رهيبه بمعنى الكلمة

وبيض الله وجهك يالقثامي وصح لسان ابو وافي



وحنا كسبناها من اول وذا الحين = بالجهد وبعزوم الرجال القوية
وقمنا بواجبها كلاماً بتثمين = واللي يسوي مثلنا حي حيه

هيضتنا يابوضيف الله :)..

وذكرتنا ابيات تركي بن حميد وذكر البل..


وحنا لحقنا فوق قب قرح = كله لعين البل وحلو ألبانها
وش عذرنا من دون حلوات اللبن = لاضيعت بالمعركة حيرانها
لا من عج الخيل ثور دونها = ورمت تواديها بحث اثـفانها

الى ان قال في نفس السياق..


ترعى بنا العرا ويكبر نيها = وننزح العدوان عن حدانها
وننزل بها في كل وادي مخضر = ترعى وسو الموت عند اركانها
في نجد نرعى مانعلق عاني = بسيوف هندٍ ماضي برهانها
يشهد لنا وادي الرشا بأفعالنا = وتشهد لنا نجد وحصا ضلعانها
قول بليا فعل عيب واضح = والصدق ما يمحاه طول ازمانها

:)..

[قرناس المقاطي]

قصيده جزله في المعنى والكلمه وشكران لبو وافي

[وثيلان]

لا بله توقعناه أفضل من كذا

عزالله قصيدة القرقاح أفضل منها واجد

من الملاحظات


أنه طول المقدمة باشياء مالها داعي

لم يمدح القبيلة مدح تستحقه

[الكنق]

عز الله انه ماقصر وبيض الله وجهه

لا كن مايرضينا الا ابوفيصل حبيب العازمي

وســــــــــــلامتكم

[ذيب الزيادي]

قصيده رائعه من بوافي قصيده جزله في المعنى والكلمه .

[العتيبي^العصيمي^ابن عاصم]

غلطان يا نجم قصيدة ملفي جميلة جدا

[ALOTHMAN 2010]

ياخوان هذا ماهو وقت النقد والتمني ابو وافي ماقصر وازود وهذا مايمنع من ان يجتمع كبار شعار القبيله لكتابة ملحمه شعريه للهيلا شامله وفي مستوى الحدث

[عـتـيـبـي والـهـوا ضـــدة]

قصيدة جزلة في المعنى والكلام
وقصيدة راااااااااااااااااااائعة
ونقول الشاعر الكبير / لملفي صح لسانك
و بارك اله فيك
ونشكرك على القصيدة

[نجم511]

ياأخوان مشكورين على مروركم ومشاركاتكم وأبداء آرائكم لكن خلنا نكون واقعيين بدون مجاملات القصيده لابأس فيها ولكن الألقاء فاشل جدا جدا خلاص مهيب مشكله قصيدة ملفي بس يلقيها واحد غيره مثال الصوت المبدع مهنا الدلبحي
أويكون من كلمات الشاعر الكبير حبيب وألقائه فاالألقاء شي مطلوب وعندك سلطان الجلاوي القاءه ممتاز ماوقفت الا على ملفي من غير قصورفيه

[نجم511]

ياالربع لازم نشوف حل والله لامني سمعت قصيدة ملفي يجيني تكه في صدري
ياأخوان قصيدته حزينه اهئ اهئ والقائه حزين كنه موب حفل اهئ اهئ

[نجم511]

ليش ماتحركون تشوفون حل في المصيبه هذي

[عاشق وضاخ]

تسلــــــــــــــــــــــــــــــــــــم على القصيده يبن العم وننتذر المزاين باقصى حد ممكن





اخوكم يوسف العتيبي

[نجم511]

مشكور على المرور ياالربع وخلاص القصه انتهت وقصيدةملفي ولت الله لايردها كننا في عزا الأخ محزن ياملفي صحصح تراك في حفل وملتقى قبيله مو كنك جالس ترثي لك واحد ميت

[ابو بدر الروقي]

نـــجم 511 صـــراحــــه ليــــه معــــترض قــــصيده قويه وجـــميله وجـــزلــــه بكل معنى الــــكلمه ممكن تفهمنـــي شى واحد كـــيف أكتب القـــصيده انا ويلقيها واحــــد غيري ؟ هل هذا قصور فى الشاعـــر ولو الله يفـــكنا من المـــندســــين حنا بخـــير ماكل من دخـــل بمعرف عتيبى عتيبى ويــــاعتيبه ماعليكم من كلام الحــــساد والمساله واضحه جدا واسف على الاطاله اللى يفهم يفهم واللى مايفهم خبل

[نجم511]

والله مافيها شي أن الواحد يكتب القصيده ويلقيها أحد غيره ولا أنت ماتابع الأعلام وتشوف ألقاء فلان وكلمات الشاعر فلان ولا الشعار ذولي فيهم قصور يابدر أدري عنك ياخي لاتفسر الكلام غلط والرجاء اغلاق الموضوع

[عاشق النير]

تكفون ياعيال القصيده وينها ماسمعتها

[عاشق النير]

ياعيال سمعتها تكفون والله ماتصلح وملفي ماقصر مير ماهي قويه

الصراحه لازم تمدح عتيبه بقوه فيه وبصوت الجلاوي احسن ويذكر

فيها واد الرشا ويمرر فيها حول المناويخ ذيك حتى لمتابعين الساحه من القبائل الاخرى يستوغبون اكثر

[ابن هندي]

السلام عليكم
ماقصر ابو وافي لكن مشكلتنا السباق والاستعجال وبالامكان ان تكون احسن من كذا بصراحه شيلة الدواسر غير شكل

[نجم511]

هل تقارن شيلة الدواسر بشيلة ملفي أقول ملفي لو يكبر الوساده ويرقد اريحله وأريح لنا

[صاطي]

وجه نظر معتدله ابو وافي ماقصر وابدا جهده لكن للامانه والله العظيم

انها ماهي احسن من شيله الدواسر وحنا لما ننتقد مانطعن فالشاعر

وشعره بالعكس حنا نفخر ببو وافي وامثاله الله يكثرهم لكن لكل انسان

تخصص صح والا لا يالربع مثلا حبيب او ملفي او اي شاعر جزل من

شعراء القبيله وافضل حبيب يعطينا القصيده وسلطان الجلاوي يشيلها

كلن في تخصصه ومافيها شي لو قال القصيده وشالها غيره كلنا ربع وكلنا

واحد ولحمه وحده

وشوفوا السبعان واحد قايل القصيده وواحد يشيلها يالربع كلنا لحمه وحده

وازيدكم من الشعر بيت السبعان غيروا شيلتهم لانها ماكانت فالمستوى

اللي يبونه السبعان وانا اطالب بتغيير الشيله الله يرحم والديكم وصولوا

اصواتنا

والله اني منصف وذا راي اكثر من واجهت من العتبان

يجب وضع الرجل المناسب في المكان المناسب عشان يرتقي المزاين

الى احسن الصور

تحياتي للجميع

[نجم511]

صاطي كلمك في محله ومشكور على مرورك ياالغالي

[ناهس بن نايف]

انا اقوووووووول ان القصيده حلووه
لكن المفرووض تكووون اقوى من كذا من حيث الكلمات والصوووووت


تناسب مكانة القيبله وعراقتها

وبالنسبه للصوووت انا اشوووف حبيب العازمي او مهنا العتيبي

[نجم511]

والله لو يكون الأداء لمهنا فهذا شيء لايعلا عليه

ناهس مشكور على مرورك

[ماجد المحياني]

مساكم الله بالخير


ياخوان والله شدني الموضوع

أولا نشكر الشاعر ملفي المورقي على قصيدته الجميله والتي بذل فيها جهد ولانريد أن نبخسه حقه

ثانيا هذه القصيده ليست هي الرئيسيه والمعمتده للمزاين .

حيث أن المزاين له قصيدتين بصوت حبيب والثانيه بصوت مهنا وذلك حسب علمي

لذللك المزاين باقي عليه قرابة الشهرين

وخلونا نستمتع مع قصيدة ملفي حتى المزاين ويكفيكم فخر أن القبائل الأخرى أشادو بها وهي ليست أساسيه فكيف بالمعتمده في المحفل

وبعدين بلعكس وش هي القبيله اللي عملت أكثر من شيله غير عتيبه


مفخره في مفخره ومشكككككككككككككككككككورين

[عبدالله المسعودي]

رايي ان كلمات القصيده
جزله وقويه ولافيها كلام
بس الالقاء لك عليه شوي

[max_2005]

يعطيك العافية اخوووووووووووووووووووي

[رجا بن فهيد الهاجري]

قصيده ملفي جزله واجاد فيها

واعجبني فيها بيوت كثيره

حين يقول

لا صار يا مشكاي وجه الدهر شين = ضاعت علوم اللي يسوق المطيه

ولكن لو بحث عن لحن غير هذا اللحن افضل

للامانه كل ما يعيدون الاغنيه انا اقصر عليها

ماهو قصور في القصيده ولكن في لحنها


هذا الحدث محتاج لحن حماسي اقوا بكثير من هذا اللحن

[motlak]

الله يهديكم

ملفي قصيدتة جزلة وافيه والله من ابو وافي طول الله عمره



والله انها قصيدة واخراج على مستوى رفيع بارك الله في شاعر عتيبة ملفي

[ابن هندي]

بالآمانه ظلمنا ابو وافي

نرجوا منه السموحه والمعذره

اول مانزلت كنا نطمع في احسن من كذا وطلعت هي افضل الشيلات

الله يجزاه عناخير

[ابن معيض]

بالعكس والله ابو وافي واااافي بالقصيد والماقف

وهذا ما قفه

وتبيض مع ربعه ما قصر

[نايف المحمد]

والله القصيده جزله والإلقاء جميل اعجبتني جدا وكل الناس حتى اللي مو عتيبي يحب يسمعها

[أسامه الروقي]

القصيده قويه وتعجبني وصوت ابو وافي الله يسلمه زادها جمال وبالنسبه لي اعتبرها اجمل قصيده قيلت في مزايين الهيلا

[الحبردي العطاوي]

صحيح من قال ان غاية الناس لاتدرك .
مشكور يانجم لكن ابو وافي ماخلا عن القصيده شي والقصيده موقفه اي كل بيت افوى من اللي وراه
ومع الاحترام للشعار اللي دكرتهم اقول ابو وافي لم يقصر عشان نقول ليت ولعل . الف شكر

[الحبردي العطاوي]

مشكورين يالربع بس ان كان هالقصيده ماجازتلكم لاعاد تدورون قصايد اقلبوها فصحى ازين

لا أحد يزعل يا اخوان بس من حبي للقصيده وبطلها