أعيش في نجد العذية على الطيب

[النايع]

أعيش في نجد العذية على الطيب

سلام
إليكم هذه الأبيات المتواضعة أتمنى أن تحوز على رضاكم. ومناسبتها هو أني بعد أن من الله علي بالتخرج قدمت على مجموعة من الوظائف في إحدى الوزارات. وتم قبولي. ويوم جيتهم. قالوا أن مقر الوظيفة في بيشة هناك في الجنوب!
يوم دريت أنها بعيد تركتها. وقلت خيرها بغيرها. عقب ما دروا الجماعة إني رفضت الوظيفة. بدوا العذال. (أنت مهبول. الناس ماعاد تلقى وظايف. الناس ذبحها الجوع... إلخ. وانت جايك رزق من الله وترفضه يالمهبول!).
قلت لهم: يالربع على هونكم. أعيش أطق بيبان الروقة واشحذهم. أشوى من إني عيش ميسور الحال في دير الأجناب. أتركوني الله يرحم والديكم!

عاد تمثلت بها الأبيات..... أقول


يالله يا معبود يا عالم الغيب = يا كاسي الحيد الطويل بحشيشه
تفرج لمن قلّت عليه المهاذيب = راح الزمان وسهم قوسه يريشه
كني بغارٍ رابضٍ قدمي الذيب = و وراي دابٍ هد قلبي وشيشه
تلعب بي العالم وانا اعيل واصيب = وإبليس حطوني وزيرٍ بجيشه
والله يا لولا الميز وادرى من العيب = لا اقول كل الناس هاذي خريشة
ناسٍ تلقّف ما تعرف المواجيب = منطق نباهم حط راسك بخيشة
واللي تحسب انه حصان الاطاليب = صيّور ما تلقى علومه كديشة
ويا خوي يا مشكاي كب العذاريب = تكفى يا ابو نواف صك الدريشة
يا خوك انا عن نجد ما ودي أغيب = وشمّة هبايب نجد شطر المعيشة
أعيش في نجد المسمى على الطيب = آرَد ركايا ماه واقضم هبيشه
وجوٍ يروده من سحيتة عواقيب = أخير من طخ البرد فوق بيشة
إن كنت ثاوي في ديار الأجانيب = أصبر على ضيم القلوب الغشيشة
ولاني وانا نايف على كل ما اجيب = أخاوي البيشي واجاور عريشه
وقد قيل بالأمثال حقٍ بلا ريب= ما من ورى بيشة يا بو زيد عيشة

وسلامتكم

[أبو نجر النفيعي]

..
.
الله الله الله يالنايع ...
ابداـــــع ابداـــــــع..
صح لسانك واعتلا شانك .. قصيده تستحق الثنى عليها ..
دومت للابداع ..
.

[النايع]

شاعرنا المميز أبو نجر النفيعي

والله مرورك يشرفني

صح بدنك

[مرزوق حمدان العتيبي]

ويا خوي يا مشكاي كب العذاريب
تكفى يا ابو نواف صـك الدريشـة
يا خوك انا عن نجد ما ودي أغيب
وشمّة هبايب نجد شطر المعيشـة
....
.

ان كان بي عذروب حبي لهل نجد
------------- احبها واحب شمة هواها
..
النايع الاكيد انك رائع ....
قصيده جزله من جزل
عليها نقول الف صح لسانك ...
...

[رشيد النقريني]

صح لسانك وعلى شااانك وبيض الله وجهك اخوي

قصيدة جزله من رجالٍ جزل


ولاهنـــــــــــــــــــــــــــــــــــــــــــــ ـــــــــت

[مخلف الهقاوي]

النايع..ابداع حقيقي لاهنت وصح لسااانك ننتظر ابداعك القادم

[الــوآفــي]

الله لا يلومك في نجد وفي بيشه


قصيده جزله جزله جزله جزله


صح لساااااانك يا نايف مليووون


معاناه نعانيها من بعض القريبين منا وهو الحرص الزايد وعدم بعد النظر


والمكتوب حاااااااااااصل لنا على كل حال


لك كل التحيه يابن العم

[ابوبجاد الرويس]

مشكور ولاهنت يالنايع

على القصيده الرائعه

ولك مني احلى تحيه من اخوك اوبجاد

[النايع]

أبناء العمومة الكرام

مرزوق العتيبي
رشيد النقريني
مخلف الهقاوي
ذيبان
ابو بجاد الرويس

صحت أبدانكم جميع

وحياكم الله

[عاشق النور]

اخوي النايع ( نايف )

قصيده رائعه بكلماتها وبعانيها والصور التعبيريه

والقافيه صعبه وانت ابدعت فيها

مهما اقول عاجز عن التعبير ومجارات ابياتك الرائعه

والله لايلومك في نجد وعشانك هيضتني بقولك بيتين لي

جيتك وانا يانجد بالحيل مشتاق وقلبي من اللوعات يانجد محروق

ياكثر حبي لك وياكثر الاشواق وغلاي لك مايعرفه اي مخلوق

لا ابعدت عنها ياهلي خاطري ضاق مارتاح احس اني على طول مخنوق
هذي بعض ابيات القصيده واتمنى ان تعجبك

وتقبل تقديري

[النايع]

جيتك وانا يانجد بالحيل مشتاق = وقلبي من اللوعات يانجد محروق

ياكثر حبي لك وياكثر الاشواق = وغلاي لك مايعرفه اي مخلوق

لا ابعدت عنها ياهلي خاطري ضاق = مارتاح احس اني على طول مخنوق

أبن العم عاشق النور

أبياتك مقبولة وبلا شك هي محل إعجابي بسبب قوة الحبك والسبك وشرف المعنى

شرفني مرورك
تحياتي

[عبدالعزيزالسلولي]

ما سكن ديـــــــرة الأبطال غــــــــير الــــشجاع
000000000ديــــــرةً ماسكنها الا كــــــريم الـــــسبال

ما ســــــــكنها بــــــخيل ولا سـكنها رعــــــاع
000000000اذعـــــــن العلم وأفهم يا طويل الـــــخطال

بيشة الـــــــــخير يا نــــايف تـــراها شـــــعاع
000000000نـورها اللي تلائلئ فـــــوق شم الــــــجبال

شاهده بأم عــــــينك لانــــــــــزعت الـــــــقناع
000000000ما يصيب الـــــكلام الا بـــــصدق الــــــمقال

الـــــــكرم والـــــشهامه في ولــــــدنا طـــــباع
000000000راضع(ن) من حليب أمــه حــــــميد الــخصال

الـــخصال الــــــحميده ما تـــــــجى بــــــصتناع
000000000ولا يشد بالظهر غير الـــــــــرجال الــــشكال

الــــــشجيع الـــــمعرب له صـــــفه وانـــــــطباع
000000000الشجاعه ورثــــــها من أســـــود الــــحيال

من ســـباع(ن) تـــربت في عـــــرين الـــــــسباع
000000000من سباع(ن) ترفع مــــــن جحور الــــــثعال

بيشة الــــــخير غـــــابه يا وغــــــيد الــــــرضاع
000000000كان تجهل نباها خـــذ من الــــــعلم فـــــال

بيشة الـــــعيش فيها ومــــــا ورهـــــا جـــــــياع
000000000الــعذر يا قبائل يــــوم ضــــــربنا الـــــمثال

ودي أشرح و يـــــفهم عـــلـــــــــــمنا بـــقتناع
000000000كل جــــاهل يجاوب لا طــــرح له ســــــــؤال

وان تطاول عــــــقب فهمه غـــــسلـنا الـــــشراع
000000000لين يـــرضى ويـــــعدل عقب ذاك الــــــميال

والهجوم ما يجي ضـــــده يـــــوكون الــــدفــــاع
000000000ضــــربة(ن) باليمين ولا طـــمة(ن) بالــــشمال

من يكيل الــــــخزى قــــــنطار نـــــعطيه صـــــاع
000000000وأقصري يا حـــباله بالـــــــسيوف الـــسلال

الــــــمثل يا الـــعتيبي لـــــــه بـــــــنود وســـــاع
000000000لا تكـــــــرر ســــــوات الببغاء رح تــــــعال

المثل يا طـــويل الـــــــــعمرصـــــــيت(ن) يــــــذاع
000000000من عصور(ن) قـــــديمه والــــمثل ذا يـــــقال

الـــــقبائل فــــــي بـــــيشة كــــــلبوها شــــــباع
000000000من فـــــضل ربي الـرحمن راعـــــــي الكمال

التمر في عــــــذوق الــــــغرس يـــــــهدا ويــــــباع
000000000كا الـــجواهر معلق في عـــــنوق الــــــطوال

صفري بيشه ولـــــونه كا الـــــذهب لـــــــه لـــــماع
000000000مـــــن مناجم بـــــــلدنا رزقـــــنا بالــــــحلال

سٌوقه كــــــــل تاجـــــــر في جـــــــميع الــــــبقاع
000000000ثروة(ن) تشبه الــــبترول لــــــه راس مـــــــال

كـــــم كــــريم(ن) شرى مـــن تــــمرنا مــــــستطاع
000000000قــــــدمه في صــــــحونه بين صفر الـــــــدلال

وبـــــــــيشة الـــــخير فيها يا الــــــعتيبي مـــــتاع
000000000شوفة البل عطايا الله عــــــــــظيم الـــــــجلال

بين مجهم وصــــــفراء وبين وضــــــــح(ن) ربــــــاع
000000000مربعه دون راعــــي ولا تـــــــعرف الـــــــعقال

أمنه مــــــــــن نماره وأمـــــــنه مــــــــن ضــــــباع
000000000أمنه في حمى الله ثم رجـــــــــال(ن) عــــــتال

ثم شــــــــــاهد قلوب الناس بــــــيض(ن) نــــــــصاع
000000000ذي قلوب أهـــل بيشه لا وصــــــفنا بــــــخيال

تــــــــشبه الــــــــصايره والمجد قــــــمه وقـــــــاع
000000000في شموخ الجبل عــــــزه ورمـــــز ومـــــــثال

هــــذي علـــــومنا والــــــــعلم قــــــــله قـــــــناع
000000000وأن قـــــــصر علمنا وأن طال جبنا الـــــــجزال

ولا عـــــندي السوالف والــــــورق والــــــــــــطباع
000000000 شاعـــــــر(ن) ما نقلت الا الـــــــعلوم الـــــثقال

فــــيه عــــــــلوم(ن) يخالف أمــــــرها ما يــــــطاع
000000000هاجسي ما نقلها فــــي جـــــــميع الــــــمجال

وفـــيه عـــلوم(ن) لها فــــي القلب رنــــه ويــــقاع
000000000لا نــــطقها لـــــــساني يـــــــنطلق بــــــنفعال

والــــــعلوم الـــــهزيله حبلها فــــــــي انــــــقطاع
000000000ما نقلها يكون رجــــل(ن) بــــــراسه خـــــــبال

ياعتيبه ولــــــــــدكم بين (قــــــــوسين) ضـــــــاع
000000000ضـــــاع بين السمان وضــــــاع بين الــــــهزال

لــــــين علمه تــــــسرب عــــــندنا ثـــــــم فــــــاع
000000000نحسبه مــــــــن شغاميم الــــــقروم الـــــــعيال

ما يجاري الزحـــــــــول الا زحــــــول(ن) تـــــــراع
000000000جـــــــــيرة اللي تـــــــنومس جيرته للـــــــرجال

طيبنا بلسم(ن) يشفي الكـــــــبود الــــــوجـــــــاع
000000000دلــــــة(ن) من شـــربها ما أنقطع بالـــــــوصال

دلــــــة الــــــطيب ماهي مثل قـــــــدر الـــــقطاع
000000000والــــــنفوس الــــــــمريضه شـــــــربها من زلال

كب بيشه وهــــــــــــلها وانت ربـــــعك رفــــــاع
000000000روق وأن قلت بـــــرقا لا طـــــــمين الـــــــعٌيال

يا عــــــتيبه لـــــــكم با لـــــــطيب قامه وبــــــاع
000000000ولا يسب الــــــــرجال الــــــــطيبه الا هـــــــتال

يا عـــــــتيبه تـــــــرى ولى زمــــــــان الــــــــنزاع
000000000كــــــــلنا شعب واحـــــــد راح وقت الــــــقتال

لوبقت كـــــــل قبيله في حــــــــريٌب وصـــــــراع
000000000كــــــان شـفت الـقبايل نارها في اشـــــــتعال

يا عتيبه لكم صــــــــــيت(ن) قديــــــــم مــــــــذاع
000000000صــــــــيتكم يا عتيبه دايم(ن) في أعــــــــتدال

لا طــــمين الــــــعياله ومـــــــطعمين الــــــــجياع
000000000وأن لفى الــــــضيف قمتوا تنحرون الــــــــجمال

هذا علـــــــم الـمعاوي وقـــــــبل قـــــــولت وداع
000000000ننتظر عـــــلمكم يأتي ســـــــريع(ن) عـــــــجال

[الاد الكريزي]

صح لسانك
وبيض الله وجهك
وقصيدة مؤثره

[الشيباني 2000]

مشكور ياالنايع وماتقصر








الشيباني ((2000))

[النايع]

أبناء العمومة

آلاد الكريزي

الشيباني2000

صحت ابدانكم

تحياتي

[>>الامبراطور<<]

صح لسانك ع القصيدة الرائعه

[النايع]

صح لسانك ع القصيدة الرائعه

صح بدنك

وحياك الله

تحياتي

[خالد بن حمزة]

نجد وعتيبة..وقصة لا تنتهي

صح لسانك يا النايع

وبيض الله وجهك على القصيدة الطيبة

ذكرتني بقصيدة لأحد أبناء العمومة في الكويت أحفظ منها



يا نجد جور الوقت غير زمنا=ما عادنا حنا ولا انتي وطنا

[النايع]

نجد وعتيبة..وقصة لا تنتهي

صح لسانك يا النايع

وبيض الله وجهك على القصيدة الطيبة

ذكرتني بقصيدة لأحد أبناء العمومة في الكويت أحفظ منها



يا نجد جور الوقت غير زمنا=ما عادنا حنا ولا انتي وطنا

ابن العم خالد

صح بدنك

وصح لسان ولد عمك ونجد اشغلت من سكنها من الشعوب والقبائل على مر التاريخ ولسنا نحن الاولين في حب نجد

تحياتي