يامعدي المرقاب خله لمشتاق ....(افتح الصفحة)

[الرأي الآخر]

السلام عليكم ورحمة الله وبركاته أبناء الهيلاء الكرام استفسار بسيط وياليت أحد يجيب الرد مشكورا

لمن هذه القصيدة التي منها البيتين الآتيين:



يامعدي المرقاب خله لمشتاق **** حول وخل معذب القلب يرقا
يالبيت ربي ماخلق حب وفراق **** ولا خلق حبٍ على غير فرقا


واللي يعرف القصيدة كاااااااااااااااملة لايبخل علينا وله الشكررر

[ابوبجاد الرويس]

مشكور اخوي

والله القصيدة مهب غريبه علي

[الرأي الآخر]

مشكور على مرورك العبق وبالفعل فالقصيدة ليست غريبة ومعروفة ولكن ننتظر من الأخوان يفيدونا عن قائلها وتكملة القصيدة

[حاتم العطاوي]

البيتين للشاعر محمد الأحمد السديري

ولا أعرف لها تكملة علماً بأن هناك قصيدة أخرى لمحمد السديري موجهه
للشاعر نمر بن صنت قريبه من فكرة هذين البيتين ويقول السديري فيها

يا معدي المرقاب خله لمشطون=حول وخل مولع القلب يرقا
خله لمشطونٍ تزايد به الكون=على عشيرٍ زود الهجر فرقا
كبدي من الغالي بها تسعة اطعون=والعاشره يا نمر بالقلب زرقا
طفلٍ يتل القلب تلٍ بلا هون=يسبا الفؤاد ويسرق الحال سرقا
محدٍ عشق مثلي من الحضر وضعون= شمر وعنازٍ وروقٍ وبرقا
سهرت يوم ان الخلايق ينامون=ويزيد نوحي كل ما ناح ورقا
ياسف لي اللي للهوى ما يعرفون=ويا نمر شلاني من الدمع غرقا

وهذا رد نمر بن صنت الحافي:

عز الله اني شفت برقٍ تخيلون=من خلقتي ماشفت حلياه برقا
ما اجديت عن قلبي يا بو زيد مرهون=وعلى صخيف الكبد وسمٍ معرقا
عينت بصري قبلنا وابن لعبون=اهل القلوب اللي من الود حرقا
وقيس الملوح من هوى البيض مجنون=ينوح مثلك كل ما ناح ورقا
الود قدامك على الناس مسنون=الهيف والقبله،وشامٍ وشرقا
ود[ن]على وضح النقا منه مأمون=وشيخ العرب ما يدرق الحب درقا

[الرأي الآخر]

مشكور يالعطاوي على ردك الجميل وهل هي مؤكدة للسديري أو لغيره لأنه وصلتني بعض الأخبار التي تقول أنها لشاعر من عتيبة والهدف هو أن نصل لقائل الأبيات والقصيدة كاملة أكرر شكري لك عزيزي وفي انتظار مشاركات أخرى

[أبوثنتين]

صحيح الذي ذكره حاتم العطاوي أن هذين البيتان للشاعر/ محمد بن احمد السديري رحمه الله ....... وهي مؤكدة:


يا معدي المرقاب لخله لمشتاق ......... حول وخل معذب القلب يرقا

ياليت ربي ما خلق حب وافراق .......... ولا خلق حباً على غير فرقا


وأما تكلمة القصيدة فأبشر بها ........ سوف أبحث في الأرشيف وخلال أيام تجدها كاملة


وإيضاً قد قريت للمساجلة المذكورة بين السديري ونمر بن صنت ..... وأعتقد أنها صحيحة



تحياتي

[رجا الروقي1]

شكرااااااااااااا
يالعطاوي على التوضيح

[الرأي الآخر]

لاهنت يابوثنتين على التوضيح ونحن في انتظار القصيدة كاملة ولك الشكر

[ابو براك]

ماقصرو معك الذيابه جابوها لك

الله يحفظكم لنا ياأغلى أعضاء ومشرفين

[الرأي الآخر]

في انتظار تكملة القصيدة يالله يالنشاما ....

[الرأي الآخر]

لايعقل أن تكون المشاهدات أكثر من 300 مشاهد للموضوع ومافيه ولا واحد يعرف تكملة القصيدة ((هذا العدد هل يعني جميع طاقم المنتدى؟!!)) لايمكن ولازلت في انتظار النشاما اللي إلى الآن ماشافوا الموضزوع ولا اطلعوا على القصيدة وهم إن شاء الله اللي بيكملونها .. ولاتخلوني عاد أرجعها للرواة اللي بالمنتدى وفي هالحال لاشوف أحد مدخل علي خشته ويتفلسف ههههههه ههه هههههه ويقول ويزيد على الراوي لأن مابعدووووه كلام ..
يعني رجا يا أخوان بعد وصول الرواه اللي بيتشرفون ويكملون القصيدة ويعطوني مناسبتها كل واحد ((يطفي النور )) ويديور هههه ...

ترا ماصارت حلا ياعيال الحلال أكثر من 300 ولاواحد يعرف (والله بغبسه)

يسلملي ((العطاوي و أبوثنتين)) ماقصروا الرجال قالوا اللي يعرفونه ولايهوووووووووووووووون الباقين ..

ترا الموضوع مطول ((نبي الفزوع )) وملينا الانتظار
ولكن كما قيل كل تاخيره فيها خيره

[سليمان]

السلام عليكم اخوكم الهاوي هاذه قصيده التي احببت انا تكون بالمنتدى وهي تقول تقوى الهجر هههه واكسي الي له شوارب وغليون عيت مصرمت البن يفتحونه مايفتحونه غير جذعان ماني بقايل الي ماني بقايل يفتحونه

[البهلول]

يامعدي المرقاب خلـه لمشتـاق

حول وخل امعـذب القلـب يرقـا



دام الكلام اليوم ما عـاد ينطـاق

بين الولايف نبرة الشوق غرقـا



قال السديري عقب ماخاطره ضاق

بيت(ن) يخلي ظامـي القلـب يشقـا



ياليت ربي ما خلق حب وفـراق

والا خلق حب(ن) على غيـر فرقـا



جعلتني خبل(ن) يـدوج بالاسـواق

هبيل عقل وفوق راسـه معرقـا



بيت(ن) يخلي ضايق الصدر يشتـاق

لمعانق ايـام الصبـا لـو تبقّـا



ياليت حظي مـا تعثـر ولا بـاق

ولا شفت وقت(ن) فيه قمـت اتوقّـا



من عانقوا دربي قليلين الاوفـاق

وانا علـى ماقيـل حالـي تشقّـا



ما بيننا يابنت حشمه وميثـاق

وما بيننا نفسن على الود شفقا



وشلون صدرك للخيانات ما ضاق

وانا الوليف اللي على الود يبقـا



عشر ليالي ساهرينه على سـاق

تهون عندك.. والمخـاوي مشقّـا



ياحيف ياللي كل ما قلـت خفّـاق

قلبه على شوفي واياديـه عرقـا



ياهيه يالمشتـاق لاعـاد تشتـاق

ويامعدي المرقـاب لاعـاد ترقـا



كلام شوقن حافظه وسط الاعماق

خل الرجم وانزل على راس برقـا





محمد الاحمد السديري رحمه الله

[راشد النفيعي]

الله يرحمه