الحقوا ياعتابه وياشعارها

[العالي البرقاوي]

السلام عليكم ورحمة الله وبركاته
اقتراح مني واتمنى منكم الردود واتمنى تأخذوا كلامي على محمل الجد
لما في الشعر مكانه في قلوب جميع القبائل وخاصة في قلوب قبيلة عتيبه
ولما لعتيبه من زعامة في شعر النظم وشعر المحاورة ولا على القبايل قصور
لدرجة اذا قالوا فلان عتيبي قالوا بس هذا شاعر
وبما ان الدنيا في تغير وتطور وتحضر وصار البدوي حضري وتغيرت طباعنا وسلومنا ولا بقي إلا القليل
لدرجة ان الناس من افراد القبيلة اصبحوا يكرهون الشعر
وقد تلاحظ اذا كان الأب شاعراً فبعض الأبناء لايفقه في الشعر شيء بسبب التحضر والعيش في المدن
فما بالك إذا كان الأب ليس بشاعر فلا تشره على الأبناء
وصار عدد الشعار في فخذ القبيلة لا يتجاوز اصابع اليدين
وقليل منهم يعشقها واذا اراد ان يلعب مع احد محاورة أو يكتب قصيدة فلا يوجد احد يحاوره ويوجهه ويعلمه اذا كان البيت مكسور او لا ( لا حظ ذلك في فخذك )
فيترك شعر آبائه وآجداده ويلهي مع حضارة الدنيا
ومع مرور السنين سيقل شعار عتيبه وبخاصة اللي عايشين في المدن وتذهب الزعامة إلى قبيلة آخرى
فأتمنى من منتدى قبيلتي وشعاره ان يفتحوا قسم خاص للشعار المبتدئين
فإذا المبتدىء كتب قصيده . فيقوم الشعار بالردود عليه ويبينون له هل هي مكسوره ام لا ويعلمونه مكان الكسر ويعدلونه إذا أمكن ويوجهونه أو تكون الرساله عبر الأيميل
وإذا كتب بيتين محاوره فيحاوره أحد شعار المنتدى فإذا اختل الوزن يعلمه مكان الكسر
ولابد من ردود الشعار في اختلال الوزن وكيفية تعديله وتوجيهه وتعليمه
وذلك لإخراج واحياء شعار يحملون اسم قبيلة عتيبه في النظم والقلطة

تكفووووووووووووووووووووون الفزعة ياربعي

[ابوناصر المقاطي]

العالي البرقاوي

فكرة تسهم في صقل من يمتلكون الموهبة و تثري ثقافة الجميع

و ننتظر رد المشرفين

[محمد بن صالح]

هذا الراي السديد



واتمنى الأدارة



تأخذ هذا القرار بمحمل الجد



وتسوية ولها الأجر انشاء الله

[عاشق النور]

العالي البرقاوي

الفكره جيده والاقتراح حلو والمشكله موجوده ولكن في رايي

ان هذا مابيحل المشكله لاسباب كثيره منها :

1- الشعر يعتبر موهبه وتفرق بين الشخص والثاني وكلاً يكتب

حسب محيطه وتجاربه فالحياه وخياله ومفرداته اللغويه وما كل

من اراد ان يصبح شاعر اصبح شاعر 00

2- بالنسبه للناس المتحضره اللي تقولهم رغم ان اكثر الناس الحين

متحضرين ويعيشون فالمدن لكن اللي انت تقصدهم وماهم مهتمين بالشعر

ماراح يجون للموقع هذا اكيد بيدورون المواقع اللي يهتمون فيها 00

3- لو فتحوا قسم مثل ماتقترح وواحد نزل قصيده مالها داعي وغير موزونه

اذا انتقدته وقلت ان قصيدتك فيها كذا وكذا زعل ويمكن معاد تشوفه بعدها

واشوف انها صعبه انك توجه او توصل المعلومه عن طريق النت 00

4- النقد ممكن يكون في بيت في شطر في وصف معين الشاعر ماوفق فيه

لكن بتنقد قصيده كامله صعبه جداً والتوجيه اصعب 00

4- اكثر الشعار ماعرفوا النت ولا درسوا الشعر ومع هذا ابدعوا

لانهم يملكون موهبة الشعر 00

هذا رايي

مع احترامي وتقديري للجميع

[العالي البرقاوي]

حامد المقاطي ومحمد بن صالح
مشكورين على ردودكم وتفاعلكم مع ابناء القبيلة

[هضيباني]

السلام عليكم ورحمة الله وبركاته
ردا على موضوعك فاني احب انوه ان في منتدى الهيلا في منتدا للشعار المبتدئين في قسم شعر الاعضاء
وشاكرلك على اهتمامك في مستقبل شعر عتيبه لكن احب اقولك ان حنا فالقمه
حتا لو مابعتيبه غير شاعر واحد فهذا الشاعر اكيد يسوا قبيله من جهة الشعر ولا قصور فالقبايل الثانيه
ولا تخاف شعارنا واجد وماشالله عليهم طوال فالعمر عمرو :)
مع احتراماتي للشعار
مع التحيه

[الــوآفــي]

اخي العزيز


يوجد قسم للمبتدئين في الاقسام الادبيه تحت اسم :


قسم المحاولات الشعريه


وهو خاص بالمبتدئين للاحتكاك والفائده


كل الشكر على حرصك

[العالي البرقاوي]

السلام عليكم ورحمة الله وبركاته
اما بالنسبة لعاشق النور
فردي على رقم واحد واثنين:
ادري ان الشعر موهبة ولكن بعضهم يحتاج الى صقل هذه الموهبة وتطويرها وما لقى احد يساعده على صقلها
وانا اعرف شاعر من قبيلتي ترك الشعر وصار معد يهتم بهذه الموهبة وصقلها مع العلم ان جده واثنين من عمانه وخاله شعار يعني اخذها الشعر وراثه
ويوم اني سألته ليه معد تهتم بالشعر قال مافي احد العب معه
طبعاً بتقولون ليه مالعب مع عمه وخاله . عمانه كبار في السن ومنشغلين في الدنيا الله لا يشغلنا إلا في طاعته اما خاله فكان يلعب معه ونقل خاله الى الجنوب بحكم الوظيفة وصار معد يجي إلا قليل
وهذا نموذج من عندي وشوف اللي عندك من جماعتك وغيرهم كثير
وبعدين انا قلت الناس المتحضرة العاشقين للشعر هم اللي بيدخلون ويحاورون ويعرضون قصايدهم ويستنون نقد الشعراء
وردي على رقم ثلاثه واربعه:
يأخي وضح له الكسر مافيه عيب اذا كان في بيت أو بيتين وعدله قدام الناس وايش سبب الكسر في حرف ولا كلمه يستفيد وناس غيره تستفيد
اصلاً انت عارف انك ماكتبت القصيده الا و 90% ان فيها كسر وتبى تعرف الكسر وينه وكيف اعدله
وانت مادخلت القسم إلا وتبى تنمي هذه الموهبة
اما اذا كانت القصيده مكسوره فيكتب الشاعر في الردود ان فيها كسور علشان مايجرحه ويرسل على ايميله ان قصيدته مكسوره ولازم يتقبلها المتعلم لانك في موضع نقد ويعطيه نصايح
وردي على اربعه مكرر :نعرف ان فيه شعار مادرسوا الشعر وانها وراثه وانها موهبه وانهم اكتسبوها من البيئه اللي حولهم لكن فيه شي اسمه صقل الموهبة وتطورها
وانا اعرف لي شعار ابياتهم موزونة لكن مايمدحون قصايدهم ولا محاوراتهم لإنهم ماطوروا موهبتهم فمحد عجب فيهم ولا لقوا الا السب واللعن في شعرهم

نقطة اضافية :
اذا لقوا من المبتدئين تطور يختارون اثنين ويخلونهم يتحاورون تحت اشراف شاعر
وهذا اقتراح

عاشق النور مشكور على الردود والتعقيب

[عاشق النور]

السلام عليكم ورحمة الله وبركاته
اما بالنسبة لعاشق النور
فردي على رقم واحد واثنين:
ادري ان الشعر موهبة ولكن بعضهم يحتاج الى صقل هذه الموهبة وتطويرها وما لقى احد يساعده على صقلها
وانا اعرف شاعر من قبيلتي ترك الشعر وصار معد يهتم بهذه الموهبة وصقلها مع العلم ان جده واثنين من عمانه وخاله شعار يعني اخذها الشعر وراثه
ويوم اني سألته ليه معد تهتم بالشعر قال مافي احد العب معه
طبعاً بتقولون ليه مالعب مع عمه وخاله . عمانه كبار في السن ومنشغلين في الدنيا الله لا يشغلنا إلا في طاعته اما خاله فكان يلعب معه ونقل خاله الى الجنوب بحكم الوظيفة وصار معد يجي إلا قليل
وهذا نموذج من عندي وشوف اللي عندك من جماعتك وغيرهم كثير
وبعدين انا قلت الناس المتحضرة العاشقين للشعر هم اللي بيدخلون ويحاورون ويعرضون قصايدهم ويستنون نقد الشعراء
وردي على رقم ثلاثه واربعه:
يأخي وضح له الكسر مافيه عيب اذا كان في بيت أو بيتين وعدله قدام الناس وايش سبب الكسر في حرف ولا كلمه يستفيد وناس غيره تستفيد
اصلاً انت عارف انك ماكتبت القصيده الا و 90% ان فيها كسر وتبى تعرف الكسر وينه وكيف اعدله
وانت مادخلت القسم إلا وتبى تنمي هذه الموهبة
اما اذا كانت القصيده مكسوره فيكتب الشاعر في الردود ان فيها كسور علشان مايجرحه ويرسل على ايميله ان قصيدته مكسوره ولازم يتقبلها المتعلم لانك في موضع نقد ويعطيه نصايح
وردي على اربعه مكرر :نعرف ان فيه شعار مادرسوا الشعر وانها وراثه وانها موهبه وانهم اكتسبوها من البيئه اللي حولهم لكن فيه شي اسمه صقل الموهبة وتطورها
وانا اعرف لي شعار ابياتهم موزونة لكن مايمدحون قصايدهم ولا محاوراتهم لإنهم ماطوروا موهبتهم فمحد عجب فيهم ولا لقوا الا السب واللعن في شعرهم

نقطة اضافية :
اذا لقوا من المبتدئين تطور يختارون اثنين ويخلونهم يتحاورون تحت اشراف شاعر
وهذا اقتراح

عاشق النور مشكور على الردود والتعقيب



اخوي العالي البرقاوي

كفيت ووفيت وبيض الله وجهك وردك وتوضيحك يدل على طيبك واخلاقك العاليه

واقتراحك جميل وكلامك واقعي وانا معك بس فيه نقطه مهمه وهي ان الشخص هذا

لازم هو اللي يبحث عن التطوير وزود المعرفه والاحتكاك بشعار كبار يستفيد منهم

ومثل ماقالوا الاخوان ان فيه قسم يهتم بهالناحيه

وعلى فكره تراني جديد مالي 3 ايام معكم ومدري عن القسم

لكني حبيت اشارك برايي

وتقبل تقدير واحترامي

[الهراني المقاطي]

السلام عليكم ورحمة الله وبركاته:

الموضوع اللي طرحه الاخ عالي البرقاوي موضوع صراحة ممتاز جدا وارجو
من الادارة الاخذ بمحمل الجديه لان والله ما قاله الاخ عالي هو عين الصواب

وانا اول الشعراء المبتدين وانا احاول اني اكتب شعر لاكن ما لقيت احد يوجهني
التوجيه الصحيح........... وشكرا

[العالي البرقاوي]

ووجهك ابيض ياعاشق النور
وحياك الله في منتدى عتيبه
وبالنسبة للهضيباني مشكور على الرد
والشعر انشاء الله مايروح عن عتيبه
لكن الايام دول بين الناس والدنيا في تغير
والله يستر من السنين الجاية
وبالنسبة للهراني مشكور على الردود
وليت القى ناس مؤيديني على الفكرة مثلك وشرواك والقى ردودهم
عسانا نثير المنتدى ويفتحون القسم الخاص ولا يطورونه اذا كان موجود على قوله ذيبان
اما بالنسبة لذيبان ان تقول موجود لكن اسألك بالله يردون الشعار على المبتدئين ولا يعطونهم وجه صدقني لا ولا يرسلون ردهم على الايميل ؟
يمكن تقول ماهم فاضين
اذا كان بيتين محاورة اعقب عليه واعلمه واوجهه في ربع ساعة واعدله الكسر والخلل
واذاكان في قصيدة اعطيه نصايح ولا تأخذ ثلث ساعة بالكثير
يأخي في ناس كتبوا بيتين محاوره ولا احد رد عليه وهو ماهو داري موزونه ولا مكسورة واذا كانت مكسورة محد وضح له وعلمه الكسر في حرف ولا كلمه
يمكن على قولك مفتوح القسم لكن فيه ردود الشعار على المبتدئين ؟
99% مافي ردود ليه محد يدري
فيه ناس يبون يصقلون الموهبة بالاحتكاك مع الشعار الكبار مثل وصل العطياني وغيره
ولا احد من الشعار الكبار يردون علاه ويعلمونه ولا يوجهونه
ابى منكم الردود والتوضيح وابي اللي مؤيدني على الفكرة الرد والتفاعل مع الموضوع لمصلحتنا ومصلحة قبيلتنا جميعاً
وان رديتم ردي يكون يوم الاثنين علاكم لاني مسافر

ومشكور ياذيبان على المشاركة والرد

[صنداح الزلامي]

الزلامي العالي بســـــــــم الله الرحمن الرحيم


أخــــوي العالي البرقاوي موضوعك ممتاز وتستحق عليه الشكر وبما يختص بألشعراء المبتدين
يجب على من توجد عنده هذه الموهبه أن ينميها هو شخصيأ لعلمك اليوم أن الانسان التي لايبرز
نفسه لن يساعده شعار هذا الزمن حتى ولو أنه متمكن يقولون له ليس شاعر وهذا الصحيح

[لطام الصوينع]

اخوي العالي البرقاوي مشكور على هذا الطرح الرائع

اود ان اقترح ان تكون هناك لجنه تعتني بالشعراء المبتدئين وتسمى \ديوانية شعراء عتيبه \ تعتني بهم وتبحث عنهم وتستمع لشعر هم ومن ثم تقيمهم والي يحتاج الى تقويم يدرس في الدوانيه على الشعر الصحيح ومن يكون مبدع فيقومون باضهاره على الساحه ويوجد العديد من ابناء القبيله الاعلاميين الي مهوب مقصرين ان شاء الله وانا مستعد لاي شي من شانه اكتشاف المواهب بس همة اعضاء المنتدى معنا
وشكرا

[سعود المغيري]

بيض الله وجهكــــــــــ

[العالي البرقاوي]

صنداح الزلامي ولطام الصوينع وسعود المغيري مشكورين على التفاعل والردود ووجيهكم بيضاء انشاء الله في الدنيا والآخرة
والله انه يفرح الصدر يا عيال عمي في ردودكم ولو انها قليلة
لكن كفيتوا ووفيتوا
واتمنى من المنتدى الاهتمام بالموضوع ومساعدة الشعراء المبتدئين
واتمنى الموضوع مايأخذ وقت من الدراسة والتفكير
وذلك لإظهار شعراء يحملون بيرق عتيبه في السنين القادمة
وشكراً

[مخلف الهقاوي]

السلام عليكم ورحمة الله وبركاته

اخوي العالي البرقاوي بيض الله وجهك على طرحك هالموضوع المهم جدا وفعلا كلامك في محله

يجب على الشعراء المتمكنين في هذا المنتدى وهم موجودين ويشكرون على جهودهم لكن نطمح

في بذل جهود اكبر للوصول بالشعراء المبتدئين الى مستويات اعلى , واوجه رساله الى ادارة

المنتدى بتفعيل قسم المحاولات الشعريه وبذل المزيد من الجهد للوصول الى الغايه التي وُضع

من اجلها هذا القسم واوجه رساله ايضا الى الشعراء الكبار في المنتدى بأعطاء كل ذي حق

حقه من النقد البناء ولايبقون في دائره منغلقه بينهم تاركين الشعراء المبتدئين يرجون من

يبين لهم مواضع الخلل في الابيات التي يشاركون بها ,,ومااقول الا ماقال البرقاوي

(تكفووووووووووووووووووووون الفزعة ياربعي)

[العالي البرقاوي]

ووجهك ابيض يا مخلف الهقاوي
وعسى يتحد معنا ناس من ربعنا ويأيدون الفكرة بردودهم علانا
وعسى الادارة تنفذ الفكرة
وشكراً

[وصل العطياني؟؟؟]

اخوي العالي ..

موضوعك جداً قيّم ...

والقسم موجود كما ذكر الإخوة ...

ولكن المفقود هو ثقافة تقبـّل النقد ..!!

لأن البعض لا يتقبـّل النقد ...

والمفروض انه طالما الشخص مبتدئ فعليه تقبّل النقد .,.

بشرط أن يكون النقد من اصحاب النقد ...

فاذا عرفت كشاعر مبتدئ أن هذا الناقد جدير فعليك تقبل وجهة نظره ...

والأخذ بها فهو الدّال للطريق الصحيح ...

كذلك يجب أن يعرف الشاعر المبتدئ بأن هذا تشجيع ...

لأنـّي مرّة انتقدت عضو في ابيات مكسرة وعدلتها له ..

وردّ علي ّ يقول شكراً على التحطيم ..!!

واشكرك مرة اخرى على الموضوع ..





تحياااااااااااااتي .

[العالي البرقاوي]

هلا باخوي وصل
انت شاعر غني عن التعريف
ولك مكانه في قلوب ربعي عتيبه
وعلى قولك القسم موجود
لكن يحتاج متابعة منك ومن الشعراء في الرد عليهم وتوجيههم
واذا سمحت الظروف محاورتهم
اللي مثلك ماحد يستغني عن توجيهاته وتعليماته
اما بالنسبة للنقد
والله شرف كبير ينقدني شاعر مثلك أو شاعر من المنتدى
ياوصل المبتدىء ماحط قصيدة او بيتين للمحاورة الا ويبى يعرف ويش اخطائه لانه مبتدئ
ويبى منكم النصح والتوجيه والتعديل
اما بالنسبة للي نقدته وزعل فهذي حالة شاذة
فانا ماحطيت الابيات الا وابى اعرف ويش اخطائي وابى التعديل ان امكن

وشكراً ياوصل على تواضعك في ردك
وبيض الله وجهك
واتمنى منك ومن غيرك الاهتمام بالقسم ان وجد

اخوكم العالي البرقاوي