محاوره جمعت أعلام المحاوره على مستوى الخليج بين حبيب العازمى وفيصل الرياحى

[ثامر النخيش]

فــيــصـــل الــريــاحـــي
سلام ياهل الديـار اللـي عليهـا سـلام****حامينها أهل السيوف الحـدب حامينهـا
الليلـه الملعبـه ماتعـتـرف بالنـظـام****وليا حضرنـا تبـى ترجـح موازينهـا


حــبــيـــب الــعــازمـــي
يامرحبا يارجال(ن) من ديـار(ن) كـلام****يازينهـا فـي ليـال الصيـف يازينهـا
الليلـه الملعبـه تحتـاج ربـط الحـزام****وليـا وقفنـا نبـى نخـزي شياطينهـا


فــيــصـــل الــريــاحـــي
اليا خلطت السوالف من حـلال وحـرام****لكلمـه الثانـيـه عـنـدي براهينـهـا
ياحبيب اليوم خلك شعرة(ن) فـي سنـام****والبـدو تلقـاك لاشــدت بعارينـهـا


حــبــيـــب الــعــازمـــي
أن جنبت في اللحم وأن وافقت في العضام****والكلمـه الثانيـه تاصلـك فـي حينهـا
ماني بشعره أناخصمـك قطـوع العـرام****وان زاد جن البقـوم أحشـر مجانينهـا


فــيــصـــل الــريــاحـــي
أن وقعت في الصخر وان وقعت في العدام****حنا سيـوف المعـارك وأنـت سكينهـا
الله ربـي وربـك يامـطـوع جـهـام****تسجد علـى الأرض لاثـارت براكينهـا


حــبــيـــب الــعــازمـــي
لو مامعي غير سكيـن ومطـرق بشـام****أخذ سيوف أكثر البقمـى مـن يدينهـا
الله رب الجميـع وصاحـبـي مـايـلام****هجـت ذلولـه تلـوى فـي كراعينهـا


فــيــصـــل الــريــاحـــي
كم عالم(ن) يحلمون ويشمتـون الحـلام****مـاردك عـن البقـوم ألا سلاطينـهـا
ترا هذيك الهنـوف أم الذهـب والزمـام****ماعدك ألا قذاة(ن) فـي طـرف عينهـا


حــبــيـــب الــعــازمـــي
وين السلاطين يوم(ن) الشجـاري خيـام****هي بيـض مـن طبعهـا ولا مكسينهـا
وأنته بعد في حدا الخديـن دقـت وشـام****لله يعينـك عـلـى الأيــام ويعينـهـا


فــيــصـــل الــريــاحـــي
شهد لنا بخيت يوم الهوش تحت العسـام****ماهـي بكذبـه مـع العبلـه مسوينهـا
عاملتهـا بالوفـا والطيـب والأحتـرام****وأنته تجمـع علـى الخبـزه وراعينهـا


حــبــيـــب الــعــازمـــي
شهـادة طيبـه لاهـل الهـوا والغـرام****قصيدتـن كـل خـلـق الله مغنينـهـا
ياصحابنا لايزيـد الطـق فـوق اللحـام****أنـتـم مغدينـهـا حـنـا معشينـهـا


فــيــصـــل الــريــاحـــي
أنتم كما الزرع ياعتيبه وحنـا الصـرام****لأرض مـاعـاد تحمـاكـم ميادينـهـا
ياشاعرن في الملاعب لبسـوك الوسـام****ضيعت في الليـل عشرتهـا وعشرينهـا


حــبــيـــب الــعــازمـــي
كلمتك هـذي ماتنقـص للنشامـا مقـام****ياللـي تهـدد عتيبـه وينـك ووينهـا
يالشاعر اللي نبتلك مثـل ريـش النعـام****ماصالـحـن للبـقـوم ألا دكاكيـنـهـا


فــيــصـــل الــريــاحـــي
ندخل على الله ترانـا مانسـب الكـرام****أقوللـي سالـفـه مـاهـم بناسينـهـا
من يوم ركبت طوقن مثل طـوق الحمـام****حتى أم ضرفين جادينـك علـى دينهـا


حــبــيـــب الــعــازمـــي
السـب مالـه مجـال ولايفـك الزحـام****وأن جبتلـك سالفـه ميعـادك دوينهـا
مايختلف هالرياحـي منتفـخ كـل عـام****كـن أم ضرفيـن غاذيتـه بضرفينـهـا


فــيــصـــل الــريــاحـــي
مزكـوم ياصاحبـي واعديتنـي بالزكـام**** دينـت بنـت الحـلال ولا قضـا دينهـا
سبحان من حط جسمك مثل عود الثمـام ****كنـك مـن أفريقيـا وأحـد مساكينهـا


حــبــيـــب الــعــازمـــي

خلـه لعلـه عساكـم كلـكـم للهيــام**** العافيـه صــح منـتـم مستحقينـهـا
وزن الخشب طن ولا الماس كيلو جـرام**** حمـر الفلسطيـن نكبتهـا فلسطينـهـا

[ابوبسام]

الله يعطيك الف عافيه .
( اخونا ثامر)

[سعود النفيعي]

ثامر الله لايهينك على المحاوره وصح لسان الشاعر حبيب العازمي والشاعر فيصل الرياحي

وهم غنيين عن التعريف

لاهنت يا بوساير

تحياتي لك

[مدسم الشوارب]

الله يعطيك الف عافيه .

[وصل العطياني؟؟؟]

محاورة قوية جداً ...

بيض الله وجهك وصح لسانك ولسان حبيب وفيصل ...




تحيااااااااااااتي

[ابن نميان]

من أقوى المحاورات بين الاثنين


شعار غنين عن التعريف


كل له مكانته


لو مامعي غير سكيـن ومطـرق بشـام****أخذ سيوف أكثر البقوم مـن يدينهـا

صح لساكنك يابو فيصل

بيض, الله, وجهك , ياثامر


دمت بود , يالغلا


ابن نميان ,

[فيصل الحويماني]

محاورة قوية جداً ...

بيض الله وجهك وصح لسانك

ولسان كل من الشاعرين الكبار


حبيب وفيصل ...