قصيدة مطير وعتيبه

[ابوقحط]

ارجع واقول مطير وعتيبه اخوان



ياشاعر المليون حطمـت الامـال=
منت الطموح اللي نبيـه ونريـده

سببت لك فتنه على روس الاقذال=
وراحت ضحياها القلوب البليـده

ناسٍ تحسب المسأله ساحة قتـال=
وكلٍ على الثاني يحد الحديـده !!

ياناس ياعالم هذا الحكـي بطـال=
والمسأله مغيـر ذوق وقصيـده

الشاعر اللي يعجبك كـل ماقـال=
ارسل على شانه رساله وحيده !!

فزعاتنا ماهي بتصويـت جـوال=
فزعاتنا حطّت حكومه رشيـده !!

حنا قبايل نجـد ذربيـن الافعـال=
اصغر ورع فينا عن امية وليـده

وياعتيبه الهيلا صناديد الابطـال=
حنا مطير اهل العلـوم الفريـده

حنا سما عالي كما الغيث همـال=
وانتو الجبال الراسيات الشديـده

وانتو فعايلكـم تـدرّس للأجيـال=
وحنا وصلنـا للنجـوم البعيـده

رجالكم على العدو سيـف سـلال=
ورجالنـا دايـم عـدوّه فقـيـده

انتم وحنّا كالبناخـي مـع الخـال=
الطبع واحـد والعلاقـه وطيـده

مطير وعتيبه تقل نسـل رجـال=
كـل البدايـد تعتبرنـا بديـده !!

وان عودت شعر وقوافي ومـوال=
انتـم عواميـده وحنـا رصيـده

شعاركم اهل الجزالـه والامثـال=
وشعارنا الشعـر نفسـه تزيـده

فيكم حبيّب والفحـل ابـن هـذال=
وفينا سعد سلطان وتركي الوليده

شعار صح وابياتهم كلها اجـزال
وقصيدهم يزيـد سعـر الجريـده

نبقى على روس النوايف والاقذال=
وياشاعر المليون ماهـي جديـده

مطير والعتبان حطّـووك بالعـال=
ومن دوننا رصيدكم عالحديده ؟!

الشاعرتركي الديحاني المطيري


بس فيه ناس تكبر الموضوع على غير سنع

صحيح اني قحطاني بس مهما كان نحن مسلمين واقسم بالله انه يضيق صدري اللي يحصل وهي سحاية صيف ان شاء الله

ليت مطير وعتيبه يقفلون منتدى شاعر المليون فقد انتهى البرنامج الذي سبب النعرات

وكلمتي الاخيره في منتدى الهيلا اهل الشيم والكرم وتمنت ان استمر معكم ولكن الظروف غلابه
استودعكم الله الذي لاتضيع ودائعه

[فيصل العوني]

صح لسان تركي الديحان
والله ونعم في ربعي ولابتي مطير ونعم في خوالي و زملائي عتيبة

ولا اقول في باقي الاجواد قصور


شكرا يا بن قحطان

[البرق العصيمي]

الله يبيض وجهك ياابو قحط

والقصيده قريتها في منتدى المطران

وبيض الله وجيههم تفاعلوا معها

وانا ادعو الجميع الى نبذ التعصب والنعرات الجاهليه



شكرا لك ايها العزيز

[البرق العصيمي]

نسيت اقول صح لسانك يالديحاني

ابيض وجه

[فهيد الايدا المورقي]

صح لسان الدحاني وبيض الله وجهه

وبيض الله وجهك ياصبي قحطان

وعتيبه ومطير وجميع القبايل والله والنعم فيهم جميع

قبائل رفعت راية التوحيد وسطرة التاريخ

وعتيبه ومطير اكبر من مليون الامارات وهم ربع وخوال وبنيخي

ونتمنى من الله ان تعود الامور لمجراها الطبيعي

وتقبل تحياتي

[صقرالبراري]

مساء الخير بيض الله وجهك ابو قحط ونعم فيك هذا اندل أنما يدل على طيب أصلك وعلومك غانمة

ترى الدعوى بسيطه يربع سوى عتبان او مطران الموضوع كبر أكثر من اللازم وفيه جهال يكتبون في المنتديات سوى منتديات مطير او عتيبة وهذا الي حصل والا المطران والعتبان أصحاب وربع وكل يوم نجيهم بحفالاتهم ويجون في حفالاتنا الدعو من من جهلة لا أكثلا ولا أقل ولا احد يلتفت لاهؤلاء السفهاء .


بس لي طلب من المشرفين على منتديات عتيبة ومطير منع اي موضوع يتطرق لاي قبيلة سوى عتيبة او مطير وحذف الموضوع فوراً
شكراً للشاعر الديحاني

هذا الف شكر

[ذيبان ظلم]

التعصب منبوووذ من أشرف الخلق عليه السلام

والرسوول نهانا عنه
سواء بين عتيبه ومطير والا بين اي مسلمين


ياناس .. الإسلام دين تكاتف ماهو دين تناحر

[ربعي العتبان]

صح لسانك يالديحاني وهذا اللي نبي من القبيلتين

ما قصروا اخوانا المطران

والله يجزاك خير أخوي القحطاني على نقل القصيدة..

[مرزوق حمدان العتيبي]

...
.

الله يجزيك بالخير ياقحطاني ..
وبيض الله وجهك .. على نقلك هذه القصيده
الشريفه الرائعه كروعة شاعرها وطيب اصله..
وحسن طويته ....
صح لسان الديحاني ....
ونكرر ان مابين ابناء هذه البلد ومن جميع القبائل
يجمعه شي اسمى واكرم من هذه المسابقه الفاشله ...
يجمعهم الدين والنسب ....
ومايكتب في النت لايمثل العلاقات والموده بينهم ...
وانما هو صادر من صغار سن .. لايعتد بمايكتبونه البتّه ....
مودتي
....

[ابن مشيب]

قصيدة جزلة ومعبرة , صح السان الشاعر تركي الديحاني المطيري , ولك كامل الشكر يابوقحط على نشر هذه القصيدة , المؤلفة للقلوب , وجزاك الله عنا كل خير , ونتمنى من الله ان يعينك وييسر لك ظروفك , كما نتمنى منك يابوقحط , عندما تزول او تخف ظروف , ان تطل علينا من جديد في منتديات الهيلا , ونحن في إرتقابك يابوقحط


تحياتي