اذا كان عندك حمية لعيال عمك ادخل!!!!!

[الخيـــــل]

يارياجيل
حيا الله كل باسمه
اعترف ان العنوان مثير شوي |194|
خلوني ادخل بالموضوع سيدا
فيه حالة بصراحه وجدتها بنفسي عندما اكون في احدى الدوائر الحكوميه
وهي بالظبط:
اذا دخلت وحصلت واحد عتيبي في نفس الدائرة يشتغل... بدون شعور اعطيه اوراقي يخلصهاواكلمه وانا واثق جدا من فزعته |194|
ولك ان تقيس هذا الامر عند المخالفات المرورية والجوازات اقصد المنافذ
الغريب بالامر اني اكلمه وكانه اخوي وكاني اعرفه من زمن يعني واحد من الشله |165| وهو بنفس الوقت يبادلني نفس الشعور بالمزح والتعليق
اذكر مره كنت مسرع وصادني الرادار وطحت بيد ملازم اول فاعطى اوراقي لاحد الافراد وسلمها للي يكتب المخالفات وكان عتيبي جندي ( الله يذكره بكل خير )
المهم يوم روحوا الناس ومسك بطاقتي ذا العتيبي جاء بيكتب القسيمة ومن حقه بصراحة لان هذا شغله
قلت له الاسم ماله خاطر عندك؟ مافيك طيب ولا حمية انت؟
قال حياك ربي نقهويك وتشوف طيبنا
قلت انا ماجيت اجرب طيب عيال عمي لاني خابره لكن لابوها من وظيفة تخليني ما افزع مع ولد عمي ــ اعترف اني اخطيت لان هذا واجبه ومحد قال لى اسرع وماني مظطر للسرعه ــ
رمى اوراقي عليه بجزع وقال لى : روح الله يستر عليك والله لو هي على فصلي من وظيفتي !!
والمواقف كثيره مثل هذا الموقف
سوالى للجميع
هل تحس بما احس به من حمية تجاه ابناء عمك من عتيبة؟؟
لاتطلع الا وانت مشارك تراني جالس واعاين فيكم واللى فيه خير يطلع وهو ماشارك |165|
تحيتي للجميع

[نبض المشاعر]

الخيل

نشكرك على هذا الطرح ..

بالنسبة للحمية هي موجودة لدى اي شخص ولكن في ظروف ماتسمح ونحن نقدر هذا الشئ...

[صقرنجد]

يعطيك الف عافيه
يـــ " الـخــــــيل "

وماقصرت على هذا الطرح

ومثل ما قال اخوي " نبض المشاعر "

وكل شي وله وقته

اخوك"
صقر نجد

[الخيـــــل]

^^^^^^^^^^^^
اخواني
صدقوني وكلامي هذاليس فيه مبالغه وهو من قول ابناء من القبائل الثانية :
عتيبه اشتهرت بالحمية بفارق كبير عن بقية الناس والقبائل الاخرى
قال تعالى في وصف قبيلة هوازن
( قل للمخلفين من الاعراب ستدعون الى قوم اولى باس شديد تقاتلونهم ويقاتلون..)
اشكركم على المشاركة

[صقرالقثمة]

احس بحقد وبغضاء ههههههههههههههاي تبي الصراحة ايه شي فطري ما أظن أحد يختلف فيه يعني لوجاني فلان من الناس من قبيله وفلام أخر من قبيلتي ويبي خدمة وش راح يكون رد اي شخص ؟أكيد ولد عمك وشكراً على الموضوع وقال الرسول صلى الله عليه وسلم (الاقربون أولى بالمعروف)

[الخيـــــل]

احس بحقد وبغضاء ههههههههههههههاي تبي الصراحة ايه شي فطري ما أظن أحد يختلف فيه يعني لوجاني فلان من الناس من قبيله وفلام أخر من قبيلتي ويبي خدمة وش راح يكون رد اي شخص ؟أكيد ولد عمك وشكراً على الموضوع وقال الرسول صلى الله عليه وسلم (الاقربون أولى بالمعروف)

كلام جميل |194|

[البقعاوي99]

بارك الله بك , شكراً أخي الكريم

[عبدالعزيزالعصيمي]

اللي ماعندة حميا مافية خير

[الخيـــــل]

العذر من الله ثم منكم ياعيال عمي
كل ماسجلت عيا يدخل
اسف على التاخير بالرد

[عبد الحكيم]

بيض الله وجهك .. هذي المواضيع الطيبة وانا اخوك ..

اي بالله عندي حميا لكل عتيبي وعندي والفضل لله فزعة لمن طلبها مني من باقي القبائل وهي من باب المساعدة واغاثة الملهوف والتي حثنا عليها الدين الاسلامي الحنيف .

والعتبان مشهورين بالفزعة والعلم الطيب .. ولا ينكر هذه الصفة الشائعة فيهم إلا مجحف او ظالم .

تسلم على الموضوع .

[برق المدى]

أخوي الخيل وغيره من العتبان ومن جميع القبايل اسمحولي على هالرد البسيط ولا تزعلون مني دام هذا المنتدى وغيره من المنتديات اللي تتميز بحرية الطرح ... الحميه لها شان عظيم واعظمها الحميه في الدين الاسلامي وبعدها للوطن ثم حمية العروبة ثم القبيله وهذا شي واجب لكن ان تصل الحميه الى الإضرار بالأخرين من باب مصلحة الوطن والمواطن فهذا الشي والله العظيم انه هو واسمحولي اقولها نوع من انواع الفساد الاداري المرادف للفساد المالي واللي دهور البلد وحاسنا وحاس جميع المصالح اللي تتعلق بالمواطن والوطن ولا تتهاونون بأشياء تافهه ترى والله ان كلها يجر بعضها بعض واذكر لكم مثال وبكل جرأه بعض الوزارات اذا بغيت تتابع معامله يقولك الموضف معاملتك بشفيع ولا بدون شفيع مثل اللي يقول تبي أقدم معاملتك على حساب واحد مسكين متضرر على عجله من أمره ماعنده واسطه ويقعد يتاخر يتاخر والواسطات ترميه في زمن النسيان حتى ينتهي أمره ويهلها اربع اربع ومثال ثاني الوظايف وما ادراك ما الوظايف هناك من يحمل شهادات ودرجات عليا ويخاف الله قبل كل شي واحوله تعبانه وامه وراه تنتظره عشان يتوظف ويأكلهم عيش وعند تقديمه للوظيفه هو وغيره اللي يجون أكثر من سبعة آلاف مثلاً والمطلوب 500 فقط للوظيفه مايدرون إن أهل الحميه والشفعاء يعني الواسطات قد انتهوا من تسجيل من هب ودب اللي تقديره ضعيف واللي عليه سوابق وغيره وما يدرون إن الإعلان عن الوظيفه ليس إلا روتين والظهور أمام المسؤلين بصورة الحسنه وليتهم انتهوا عند هالشي فقط .. خسروهم مصاريف السفر والسكن وكسبوا النقل الجماعي وغيره.. ليتنا نتكاتف ضد بعض انواع الحميه المهلكه وآسف على هالإطاله ونسيت أقلولكم ان البسيط عندي معناه العكس في الإطاله.

[أخا هوازن]

يا اخوان تحياتي
محد ينكر حمية العتبان لبعضهم
لكن يجب ان نفرق بين الحمية والعنصرية
في يوم من الأيام كنت في نقاش مع احد الزملا
وهو من منطقة من مناطق السعودية التي تشتهر بعنصريتها
وهي طبعاً عنصرية بغيضه
قالي انتم يالعتبان معروفين بالعنصرية لبعظكم
قلت له وقف
فيه فرق بين العنصرية والحمية
الحمية ان اقف بجانب ابن عمي وقت الشدايد وإذا كان عليه جور او بغا فزعة بشرط ان لا يتضرر احد من فزعتي له
اما العنصرية ان تقف معه حتى ولو كان مخطي
نحن العتبان إذا اخطا الواحد منا قلناله ياولد تراك مخطي
وعلمناه بخطاه
ورفيقنا حتى ولو ماهو عتيبي يبشر بعزه
نفزع له مثل ما نفز لبعضنا
وسلامتكم

[ابوراكان2000]

يا اخوان تحياتي
محد ينكر حمية العتبان لبعضهم
لكن يجب ان نفرق بين الحمية والعنصرية
في يوم من الأيام كنت في نقاش مع احد الزملا
وهو من منطقة من مناطق السعودية التي تشتهر بعنصريتها
وهي طبعاً عنصرية بغيضه
قالي انتم يالعتبان معروفين بالعنصرية لبعظكم
قلت له وقف
فيه فرق بين العنصرية والحمية
الحمية ان اقف بجانب ابن عمي وقت الشدايد وإذا كان عليه جور او بغا فزعة بشرط ان لا يتضرر احد من فزعتي له
اما العنصرية ان تقف معه حتى ولو كان مخطي
نحن العتبان إذا اخطا الواحد منا قلناله ياولد تراك مخطي
وعلمناه بخطاه
ورفيقنا حتى ولو ماهو عتيبي يبشر بعزه
نفزع له مثل ما نفز لبعضنا
وسلامتكم

كلام درر يا اخا هوازن وانا اضم صوتي لصوك نعم حمية لا تعتمد علي ضرر الآخرين

اما العنصرية فهي مقيتة

[سعود المغيري]

مشكووووووووووووووور..الحميه لابد منها..

[الحاير]

الشجرة اللي ماتظلل على عروقها مابها خير

مشكور على الموضوع

[الخيـــــل]

للجميع مرحبا ومسهلا
شدني كل من علق واحترم وجهات النظر للكل
حاشي لك واحد فيكم

[الخيـــــل]

لكل من شارك بالموضوع كل باسمة
مهي غريبة علينا الحمية والكل وافقني الرأي ومكان عندي والله شك ولكن قلت لعل هذا المقال يكون تعريف لعيالنا على ابرز مقومات الاخوة بيننا وهي الحمية

بدوووووون استثناء

اسف لتاخري بالرد

وشكرا لكم حسن المشاركة

اخوكم الخيل

[طلال العازمي]

مساكم الله بالخير


ماعندي زياده على كلاااام الخوان

تعقيـــب مهم
ذكر الاخ صقر القثمه في كلامه حديث للرسول (الاقربون اولى بالمعروف)
والصحيح ان هذا الحديث موضوع
اي ليس من كلام الرسول صلى الله عليه وسلم

انتهى الكلااام

طلال العازميـ

[> الحزيمي <]

والله لو المساعده اللي راح تجيني من ولد عمي تضره والله ما ارضاها لها ان كان فيها مساعده من لا غير لا تضره الله يجزاه خير





تقبل تحياتي

[العصيمي العتيبي]

ياهلا بالحمية اللي تنفع بني عمي ولعنوا ابوها قسيمة اللي بتضر ابن عمي ، والحمية عند عتيبة مشهود لها ، حتى انك تشوف من القبائل يستفزعون بعتيبة

[ياسر الذيابي]

تبون الصراحه
انا والله ماني يم الحميه
ولاني بحولها
والله يارجال اني افتقد للشي هذا فعلا
شوفولي حل
كل ماجيت ابي اسوي حميه
واخفف وزني احس اني اجوع زياده
فعلا شي يقهر الواحد
ههههههههههههههههاااااااااااي

[ابو مالك.]

ولو ياخوي الخيل

حنا مهب لازم نضغط عليه يمكن عنده ظروفه الخاصه

يعني بالعربي بدون احراج

وبارك الله فيك

والله يعينك يا ياسر الذيابي

اصبر وربك يفرجها

[محمد بن صالح]

ليش ما تكون طيبة



مو حمية



يعني تفزع لأي واحد



مو شرط من افراد قبيلتك



ياخي خلو عنوان القبيلة الجود والطيب



مو حمية !!!



مشكور اخوي


الخيل


على طرح الموضوع

[خالد الأسعدي]

اكــيــد فيـنا حـمـيـه ياخــوك

ولو انا مـكانـه الـعـسـكري كان سويت مثل ماسوا هو

مشكور على الموضوع

[عنادالرويس]

السلام عليكم
هذا شي معروف عندنا الحميه شديده بالفزعه وفي المواقف اللي زي كذا وغيره
وعلى فكره انا اشتغل في شركه لها مجالات كثيره المهم فيها كذا مجال يقبل عليه
ناس وبستمرار كبير وبعض الاحيان اكون انا المسؤل عن هذا الشي
على فكره مهو فخر او مايسمى اسفزاز الاخرين مني
المهم اذا جاني عتيبي اعطيه باللي يطيب خاطره واهتم فيه ووصي عليه وحتى كذا
اشخاص من غير القبيله اذا شفت قبيلته وبالذات لاجاني مطيري ولا دوسري ولا حربي ولا قحطاني ولا سبيعي وغيره من القبايل الاخرى اوقف معهم وارحب فيهم
والله عندي كلام كثير بس خايف يقولون هذا من جد شاف نفسه علينا

تقبلو كلامي واطالتي عليكم
اخوكم الصغير
عناد الرويس