معركه بين الجوابيح وشمر ---- قتل فيها غضبان بن رمال

[الجوباحي]

السلام عليكم

اخواني الاعزاء

يذكرون شيابنا معركه بين عتيبه وشمر وهي مؤكده ولكن تنقصها بعض الاثباتات فمن يعرف عنها شي يفيدنا

الجوابيح من المعاليه فخذ من الدعاجين وهي مجموعه اشتهرت بالفروسيه ولها صولات وجولات في الشجاعه رغم قلة عددهم ولهم مرابط للخيل والابل وكان فارسهم ذلك الوقت رجل يقال له ذيبان بن هذال بن جوباح ومعه اولاد عمه حمير بن مناحي بن جوباح ومناحي بن هوشان بن جوباح ومعهم بعض الدعاجين من ذوي خيوط والمعاليه

يقولون صبحهم قوم كلهم فرسان في شمال نجد ويذكرون الرواه ان عددهم ستين فارس على خيول مصقلات ومدقلات ويقولون ان ابلهم تسد مذر عين الشمس من كثرها وان راعيها حشر بن ذيبان المذكور يوم شاف القوم انحاش وخلاها وزبن اهله وان الفارس ذيبان تقلد محزمه ولسوء الحظ ماحد عنده بندق هاك اليوم الا ذيبان ويذكرون انها صمعا اللي تحشى بالبارود

يقولون ان الغزاه وهم شمر قاموا يسوقون الابل من الحجره اللي كانت فيها للسهل وهم يمينها ويسارها عندما اوعز الفارس ذيبان لعيال عمه ان يقعدون بمضيق ضلعين متقابله وقال ان لحقني منهم احد سوقوا عليه شهب الرماح

يقولون ان ذيبان تعزوا بالعزوه وقام يحدي

خيل الخيل منا ومنا@@@@خيل الخيل وانا ذيبان

يقولون الرواه انه غار عليهم ستة عشر غاره وهو يتدرق بالبل وانها كلها اللي ماهي في خيال كانت في فرس
وفي الغاره الاخيره وبينما هو يتدرق بالابل سمع صوت واحد فيهم يصيح ويقول

لا رحم الله ابو ذا الرميمات ماذبحكم الا سمي الكلب

يقولون انه شاف دقلة الفرس بين رجلين الابل وعرف انها فرس عميد القوم وهو يحرف الفرس وينحاش والفارس وراة ويقوم الفارس يرميه بالفرد ويقوم يتبطن بطن الفرس وينتبه ان الصمعاء مربوطه على فخذه وانها مزهبه وهو يرتكز ويسوقها عليه خلف خلاف ويقولون انها ضربت الصفره على جبهة الفرس والا ردها الا راس الفارس

يقولون ان شمر تجمعت تنوح على فارسها وهذا طبع شمر لا ذبح عميد القوم انهزمت

حسب الرواه ان الفارس هو غضبان بن رمال

وعند سؤالي لبعض العرافه من شمر قالوا انه احد شيوخ الجرباء وليس غضبان وان السالفه مذكوره لديهم وشيباننا يصرون على انه غضبان

سالفه مؤكده عند شيابنا وعند شمر ولكن تفاصيلها الدقيقه مجهوله

تحياتي للجميع والا نستغني عن مداخلاتكم

اخوكم الجوباحي

[فهد النفيعي]

لاهنت على القصه واللي عنده شي يفيدنا اكثر

[الجوباحي]

اخوي ابن الدلوح شكرا لمرورك

مازلت انتظر مشاركة باقي الاخوان

[! محتميها !]

لا هنت اخوي ابن جوباح


وبيض الله وجهك


واتمنى بصراحه يكون فيه احد الاعضاء من شمر يشاركنا في هالموضووع


وماهي غرريبه على فرسان الدعاجين


وشمر مافيهم قصوور الطنايا



تحياااتي

[ولد الرمال]

السلام عليكم ورحمة الله وبركاته

كيف الحال اخوووي مشككور اخووي على القصه بس حبيت اعطيك ملاحظه على القص انا رمالي من الرمال وغضبان الرمال منا هو فارس وشارك بالحروووب والي انا اعرفه وعندي ملاحظه ان غضبان الرمال مات شايب ماكان يقدر يركب الرفس لانه كان شايب وحنا نعرف ان الشايب الكبير مايقدر يركب الفرس استدل بهذا الاسنتاج يوووم ساله الملك عبد العزيز وقاله هاااه يخوو دليل شلون الجلس قال انفض الرجال عنه وقال طيب شولن الاثنين قال صاار لها ثالث
يقصد المجلس هو الفم ويقصد الرجال هي الاسنان
اما الاثنين رجليه والثالث هو العصا

طبعا هو مات في هاذي الرحله ويقال ويقال والله اعلم انه مات مسموم بس الوكاد انه مامات مقتووول وهذا الي انا اعرفه وانا جلست مع حفيده امير الرمال (الشيخ ممدوح بن طلال بن غضبان الرمال)
وقال جدي ما انقتل
والشي الثاني الي حبيت اعلق عليه يووم تقووول شمر تنهزم اذا مات عتقيدها وتقووول (عاده)حبيت اصحح لك ان شمر في معركه الصريف المشهوره في عهد الجنازه كان العقيد هو ماجد الحمود العبيد الرشيد ويووم اغروا مات ماجد من البنادق ويووم طاح شال البيرق والعقاده عنه اخوووي مهنا يوووم طاح مهنا ومااات شالها عنه اخوووه الثالث الي تصوووب ومات في مابعد المعركه واذا انت منت مصدقني ادخل اليوتيوب وتلقى شايب يتكلم عن السالفه
وانا انشالله رااح اكوون اجيب كل قصص الي صارت بين شمر وعتيبه ومستدل في قصايد..

[خلف الروقي]

لاهنت على القصه








دمت بود

[هايس القعيط]

غضبان مات كبير بالسن في وقت الملك عبدالعزيز

وياخي غضبان شخص معروف ومشهور من فريس شمر ومعظم القبايل تعرفه لانه فارس معروف
وشيخ وراس عرب ماهو خفي

وهو اللي كان في مجلس الملك عبدالعزيز وساله ابن سعود سؤال احرجه

ورفض غضبان الاجابه لانه ما يجامل حتى اعطاه الامان
عندها اجاب على السؤال ولكن الجواب اغضب الملك عبدالعزيز

وطلب منه الخروج من المجلس وقال يا غضبان سلمني على اللي قدامك

وفهمها غضبان ان موته قرب وان اللي قدامه هم الاموات فقال

((( كلنا لها يا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟)))

ويقال انه مات بعد عودته وناس تقول مات مسموم وناس تقول مات موت الله

لكن الاكيد انه مات بين جماعته كبير بالسن ولم يقتل في معركة

اما بخصوص المعركة التي ذكرت فانا اول مره اسمع بها

ربما تقصد معركة حدثت بين التومان والروقة

ولكن هذه المعركة حضروها شيوخ الر وقه ومنهم بن ربيعان والضيط وكذلك
حباب بن زريبه واخيه عايض

وقتل فيها من شمر الفارس مثقال الربع
وقتل من عتيبه حباب بن زريبه واخيه وزبن ولد الشيخ مسلط بن ربيعان وك1لك ولد الضيط في بيت
مشل التمياط وفكهم من شمر

ويقال ان رجل جاء لبن ربيعان يبشره بسلامه ولده وولد الضيط فرد عليهم وقال
اللي يبي البشاره يبشرن بحباب ابن زريبه ؟ وعندما علم انه قتل حزن على موته اكثر من فرحته
بسلامه ولده والله اعلم

[نــايف الــبــرقــــاوي]

ونعم والله يالجوباحي وكفو يالدعاجين.

[سبيـ الصقر ـشل]

السلام عليكم ورحمة الله وبركاته
أخواني أود أوضح لكم صحة مقتل غضبان بن رمال عندما غزا ابن رمال بشمر على المعاليه من الدعاجين وكانو المعاليه في شمال نجد في وقت الربيع وكان الفارس مناحي بن هوشان بن جوباح يعاني من كسر في أحدا رجليه على أثر معركه بينهم وبين قبيلة قحطان وتفاجئو بغارة القوم شمر على أبلهم على رأس عقيدهم الشيخ غضبان بن رمال فقال الفارس ذيبان بن هذال بن جوباح لابن عمه يامناحي هوشنا اليوم دون أبأعرنا فرد عليه مناحي ياذيبان يوم يتبعونا المعاليه لليوم ومثله فنتخى ذيبان وقال أنا أبو عمشاء أوجيه الخيل (خيّل الخيل منا ومنا خيّل الخيل وأنا ذيبان )وركب هو وابن عمه الفارس حمير بن همجان بن جوباح ودارت المعركه بينهم وبين شمر ونزل حميّر وترجل على رجله وسط الأبل وكان سلاحه شلفى ورمح وذيبان على فرسه (الكحيله) وسلاحه بندقه الصمعاء وقُتل سبعه في المعركه من شمر وأخرجوهم من الأبل وأنتخى بن رمال عندما كان يراقب المعركه وقال (لعن الله أبو هالرميمات يقصد ربعه شمر كيف سميّ الكلب يطلعكم من الأبل ) واندفع بحصانه اتجاه الفارس ذيبان وكان حصانه أبيض ويرتدي ملابس بيضاء وكان سلاحه سيف ومسدس وعندما تقابلت الخيل بالفارسين أشعل ابن رمال المسدس بعدة طلقات نحو ذيبان وعندما أقتربت الخيل مع بعضهما ثأرت بندق ذيبان وأطاحت ابن رمال من ظهر حصانه قتيلا وأنكسرت شمر وردو الجوابيح أبلهم وأبل جماعتهم.

[طنايا]

عطنا القصايد اللي عندك بمقتل الفارس غضبان.......كل شي يمسح مدري ليه

[قحص ابن هاجد]

كفووووووووو ياعتييبه فووووق مع برقا وروووق

[سنجـار]

اخي الكريم ..


وسبعة انعام بالهيلا عتيبه ...



واكيد مثل هالفعول ماهي غريبه عليها ...



لكن احب ان اقول مؤكداً ان غضبان بن رمال مات بكبر سن ولم يقتل في معركه وكان حاضر الملك عبدالعزيز رحمه الله تعالى ...


واصلاً لم تكن هناك معركه بين غضبان بن رمال وعتيبه



وهذه القصه وبصراحه لم نجد لها حقيقه ...






واذا لديك ادله تثبت عكس قولنا وتثبت قولك ارجوك بان تزودنا مشكوراً




عاجلاً غير اجل





انا بانتظارك

[مجرّي الهيّاب]

ياجماعه شمر لاتزعلونهم اعز قبيله على قلبي



ياطيبهم لاشفت غيرهم

[هايس القعيط]

شكرا مجري
ابادلك نفس الشعور

سيم سيم

[ابو حارث الشمرى]

اخى الجوباى

الشيخ غضبان بن رمال لم يمت مقتولاً
وهو فارس ورجل معروف ولو قتل لم يخفى امر قتله على احد

ثم هو عاد الى الملك عبدالعزيز بعد سقوط حائل وسلم عليه
ورفض اخذ بيرق مع الاخوان وقال له الملك شيبت ياخو دليل
قال ..

بعض العرب لا شاب خاب .. وانا من شبت طبت
تسمع جضيض الركاب.. قفوى ليا من ركبت

وقد شارك بمعركه المسعرى مع شمر وامير حائل عبدالعزير بن مساعد
ضد الاخوان بقياده عزيز الدويش والذى قتل فى تلك المعركه

واظن انه بعد هذه المعركه لم تكن هناك معارك وغزوات قبليه فاذا قلت ان
المعركه مع الجوابيح قبل هذا فكيف يكون قتل هناك وشارك تحت قيادة الامير ابن مساعد

يعلم الله اننى اكن الاحترام والتقدير لقبيلة عتيبه
والتى تملك من التاريخ المشرف والثابت مايغنيها عن هذه
القصه التى هى موضع شك ولم تثبت .

ويعلم الله لو ان غضبان قتل لقلنا انه قتل وليس عيباً

[سيحان]

ان كان غضبان بن رمال صاحب البيتين الشهيرين


الشايب لا شاب خاب ___________ وانا لمن شبت طبت


تسمع جضيض الركاب ___________ باثري لامني ركبت


فهو مات شايب حسب ما نعرف .


ويمكن قتيل الدعاجين شيخ(ن) ثاني .

[.الدعجاني.]

بيض الله وجهك يالجوباحي انا ولد عمك من الزرقان

ولاتهون باقي ربعي عتيبه من برقا وروق
ولاتهون باقي القبايل
تقبل مروري

[سعدالاطبن]

الله يرحم اموات المسلمين والنعم في جميع القبائل

[علاي الحافي]

ونعم وستين نعم

وهذا لاينقص شمر حقها ابداً

شمر هم هل الطالات وربعنا

عتيبةلطامت العايل

لاكن ماهو الهدف من هذا الموضوع ولماذا اثير

هل لفائده معينه نتمنى ذكرها وبكل تفصيل

تقبل مروري

[خالد بن مورق]

ونعم والله في شمر ولاهنت ياصاحب الموضوع

[الدقيق]

الموضوع قديم يا جماعه صارله سنه

لاتوقدونها