شاعر المليون هو صاحب الرقم "7" وعتيبة الهيلا هي الشاهد له,

[يام ابن يصبا]

الى عتيبة الهيلا,
تفازعنا مع ولدكم ومنتدياتنا تشهد علينا قبل الرسايل ويعلم الله ان فوزه كانه فوز احد عيالنا, انا هنا لست اطلب فزعتكم لولدنا ابن فطيس المري اليامي لاننا نحن جميعا في نفس المعركة,
ولكن رغبة منا في سماع رائكم في هذا المنتدى هو في حد ذاته عنوان للشاعرية الصادقة الحقيقة التي انتم احد جذورها, ترى من هو الشاعر الحقيقي المفضل لعتيبة بعد ولدهم العصيمي من هؤلاء الشعار الخمسة؟
ارجو ان يكون ردكم بعيد كليا عن الفزعة والقبلية والوطن, وان يكون فقط من منظور شعري, فانتم احد رموز الشعر في الجزيرة ولا يجهل ذلك الا من كان مكابرا.
وفي الواقع انتم اجتهدتهم سابقا معنا وخانكم كما خاننا الحظ في ذلك الموقف والاسباب والظروف اعتقد انكم تعلمونها مثل مانعلمها نحن.!!
ولكن نحن في هذ ه المره سوف نراهن على افكار بنت صوغان, صاحب الحس الشعري الرهيب ابن فجاءة زمانه قائل الابيات التالية:



بعض العرب حبـه يـوردك الجنـون=ولا يوصف لـه غـلاه احكـاك لـه
الموت جـاك وهـو تقلبـه الضنـون=ولا لك الا الصبر....وش وداك لـه؟
ان قلت ضايق..قال : هونهـا تهـون=مايدري ان ضيقتـك لـه وبكـاك لـه
تقعد تحبـه وانـت ساكـت ومغبـون=يمكن بيوم يقال لـه مـا اوفـاك لـه
وكانك مشكك هو يمون .. او ما يمون=تخيّل ان عفـت الصبـر فرقـاك لـه
غلاه من فـوق الغـلا ماهـو بـدون =وحكاه سمعك يجبـرك بارخـاك لـه
ودك تحطـه فالعيـون مـن العيـون =وتبسط على رمضى الثرا يمنـاك لـه
وتظله من الشمس في ظـل الجفـون =ولا يمـر اذنـه سـوا لـبـاك لــه
وتسج مـن غيـره لونهـم يذكـرون =ومنين ما سجت القـدم ممشـاك لـه
فلو ٍ يميلـه التـرف ميـل الغصـون=غصن ٍ ليـان ومكرمـه بسقـاك لـه
جديله الى اقفى ستـر منـه المتـون=كنّـي بريحـه لالتفـت لدعـاك لـه
يزها الملابس ..اي لبس ..واي لـون=وفالليل وجهـه لا ظهـر قـداك لـه
كيك وعسل لكن ماهو فـي صحـون=ودعاك من عين الحسود اغطـاك لـه
الله لا يعطيـه نـاس س ينضـلـون=ويستر عليـه مـن النحـل لا ياكلـه
الوصف والتعبير في وصفـه يخـون=غير اطلب الله يستجيـب ادعـاك لـه
وعذال قلبـك فـي محبتـه يخسـون=سكينهـم عـن قطـع حبلـه حاكلـه
اللـي مـن لحـوم الاوادم ياكـلـون=وحلوقهـم دافـع الـبـلا متواكـلـه
ناس ٍ عن اعراض العرب ما يعرضون=ودايم على نفـس الشكـل والشاكلـه
فـي سلمهـم اولا بالاكـل الاقربـون=واطيبهم اللـي صيدتـه شكـواك لـه
يدعيهـم الشيطـان للذنـب ويجـون=هـذا يقـطـع لــه وذاك يواكـلـه
يا جعلهم فـدوة ثـر الغـض الفتـون=اللي على الدرب الطويل اخطاك لـه
طيفه الى نـام البشـر زارك بهـون=وطيفك الى نـام البشـر سـرّاك لـه
حبه دفان ومقبـرة خضـر الطعـون=بيـن العظـام العـوج كنـك ناكـلـه
اللي كذا حبـه لـو تمـوت مغبـون=ولا لك الا الصبـر .. وش وداك لـه

قبل ان نقول لكم لماذا نراهن عليه في هذه المعركة , ليس لشاعريتة فقط بل لانه قيل ايضا ان من يحمل الرقم الجوهري تنهار له الامور و يصبح الجميع معه وليس ضده ذلك الرقم الجوهري هو العدد السحري "7"

شاعر المليون هو محمد ابن فطيس المري اليامي صاحب 4+3= 7

قائل الشعر والحكم التاليه:


ماني بمن ياتي و لا يدرى به
شطرٍ حفظته ما اعرف كتابه


شطرٍ يناسبني لمثل الليله
و آشوفني في ذا المكان أولى به


أباتكل بالله و نعمٍ بالله
اللي ما يوصد دون خلقه بابه


باقول و اللجنة تقيم قولي
و من كثرة الشعار ماني آبه


الحمد لله واثقٍ من روحي
و إن كنت ذيبٍ فالرجال ذيابة


ما أقول أنا أشعر واحدٍ في العالم
لكن قصيدي كفو و أنا ادرى به


الشعر جمعنا لو تفرقنا
حدودنا و ظروفنا الغلابة


الله يبيض وجه راعي الفكرة
عز الله انها تنحسب لحسابه


و الله يبيض وجه من يرعاها
محمد الله يحفظه لأحبابه


محمد ولد زايد عريب المجنى
ولي عهد الديرة الخلابة


الشعر تاريخٍ لنا من مبطي
و إعلامنا يوم السنين نهابة


الشعر بيتٍ و الوزن عمدانه
معناه طنب و قافيته حجابه


الشعر وادٍ فيه صيدٍ واجد
و كلٍ على الوادي يهج ركابه


و الأفكار صيد و كل شاعر قانص
و كلٍ يدسم شاربه مخلابه


أحدٍ خياله حر .. و أحدٍ وكري
و أحدٍ خياله كوبجٍ بقطابه


و أنا خيالي كل ما هديته
حول على الوادي و صاد عقابه


شاركت أمثل ديرتي و ربوعي
و كلٍ يمثل ديرته و أقرابه


و الله إلى الله راد و الله قاله
إني لاسلمها الفخر و كتابه


داري قطر و أنا هنا أمثلها
المجد مطلوبي و أنا طلابه


عهدٍ علي إني لاشرف داري
ترْك صبيٍْ ما يعز ترابه


شوفوا دمي من حبها عنابي
و حماستي من ضوها شبابه


شاعر خليجي و العروبة بيتي
و البيت ما ياقف بدون أطنابه


و إن عودت بين القبايل فزعة
أنا أشهد أن لي في اللوازم لابة


لي في القبايل ربع .. و أقدْرهم
ماني بمن يجهل مقام أصحابه


و إن عودت لأصلي فأنا أصلي مرْي
من صلب يام أهل القنا و خضابه


قومٍ لنا فوق المعالي بيرق
و السيف قوة سلْته بنصابه


الشعر طوْقني و أنا طوْقته
قمت آتمشى به و أفك أبوابه


يا بنت ياللي تفرقين بعودش
ما ألومهم لا كثروا الخطابة


لا مر بش دربش على خلق الله
قالوا كذا .. بالإصبع السبابة


زينش يزينه فعل أبيش و جدش
و أنتي بدورش للنقى كسابه


قومي تباهي بي و فلي راسش
عليش من ستر الشرف جلبابه


و إن ما سترتش بالفعول و باسمي
فعقبني الفنجال يا صبابه

من يرتب تنسيق القصيده الاولى له الشكر,

[**إبن عاصم**]

والله ان اخذ المليون ابن فطيس فهو يستاهله ......



ولكن حنا في نفس المعركه يعني لاتحترون منا التصويت ......... لأن كل جهدنا للعصيمي ولد عمنا


وانا اقول لك ترا المليون للعصيمي وراح اذكرك يوم الثلاثاء القادم


اما بالنسبة لفزعتكم فابشروا انا نردها اطيب منها وهذا وعد نقطعه على انفسنا .......... تحياتي

[سعود بن مويسان]

ان جينا للشاااعريه والله ابن فطيس افضل من اللجنه ماهو الشعااار اللي معه وحرام انه اكبر من المسابقه .


وحنا مع يوسف وفاله المليون .

[يوسف سوف]

بن فطيس شاعر قوي ومنافس كبير ويستحق اللقب بكل جدارة وابن قبيلة عزيزة وغالية
لكن\\\\
\\\\
ان بغيت الصراحة اتمنى يكون اللقب من نصيب عملاق الشعر النبطي يوسف العتيبي
\\\\
والله انكم يا يااااام تستاهلون كل علم طيب

[(ابو متعب)]

بما انك قلت امانه


صراحه اذا انت تبي الشاعر بعد يوسف العتيبي





العازمي

[عيد الغنامي]

صدقني لو العصيمي ماكان موجود ليروح تصويتي وتصويت الكثير من عتيبه لمحمد فطيس المري فهو شاعر كبير جدآ وحرام يقارن بالشمري وتركي شاعر وشاعر بحر ماهو بسيط بعد
بس موقفنا مع يوسف
ونوعدك بالوقفه في مرات قادمه

[غازي بن ردن]

اخوي اليامي
والله وتسعين نعم بك وببن فطيس وبيام كافه
وتستاهلون كل علمٍ غانم
وبن فطيس والله انه شاعر متمكن ولايهظم حقه
ولكن وانا اخوك حنا في منافسه شريفه ولايعاب الرجل اللي يحمى في ربعه وقبيلته
والله يكتب مافيه صالح الجميع
والتوفيق بالله

[بندر الحافي]

يعطيك العاافية

اخووي ع الموضوع

لـكـن كل منا يبغى الفوز

لولد ديرته او ولد قبيلته

وان شاء ان يفووز يوسف فوز ساحق

ثم يتليه محمد بن فطيس المري

واذا تبغى رايي في ابن فطيس

شاعر لا عليه غبار فحل من فحول يااااااااااااااام

وان شاء يشرف قطر في المحافل الدوليه والخليجيه

تحياتي

[العازمي 2007]

العازمي افضل من ابن فطيس بكثيررررررررررر
شفنا ابن فطيس والغلطه الي سواها في الحلقه القادمه
كان مطلوب منه مجارات قصيدة قطري ابن الفجاء وهو راح في وادي ثاني
واخرتها صررررررررف الموضوع

[مرزوق حمدان العتيبي]

يام ابن يصبا
..
الله يحييك اولا ً .. وشكرا لك على ايراد
هذه القصايد الجزله للشاعر الجزل والمحبوب
محمد بن فطيس....
ثم يسرني ويلزم علي ان اشكرك على وقفتك
الطيبه فالاسبوع الماضي وذلك ... بحثك ابناء قبيلتك
على التصويت للعتيبي بجنب المري ... وهذا الكلام...
اطلعت عليه بنفسي .... فبيض الله وجهك .. وانتم اهل وفاء ونخوه ...
ثانيا يعلم الله اني اتمنّى اذا ماراح المليون لبن العم يوسف
ان لا يذهب لغير بن فطيس ... والهدف ان هذا الشاعر جدير بذلك ..
ويعتبر هو الابرز في جيمع المشاركين ... شعرا وخلقاً...
وكل مجتهد ان حصل شي يستاهله ...
... والسلام ....
...

[الرومي]

ابن فطيس المري شاعر بكل ماتعنية الكلمة.

[نمر العتيبي]

حنا في نفس المعركه واللي يستاهل المليون يوسف العصيمي واللي افضله ابن مريبد العازمي بعد يوسف والميدان ياحميدان

[مشل]

الاخ العزيز يام ابن يصبا .. تحية طيبة وبعد
نشكرك على مشاركتك منتدنا .. والذي هو بحق منتدا ومنبر للجميع من الوجيه
الغانمه مثلك وشرواك . وبالنسبة لابن فطيس مااحد يختلف على شاعريته والله
انه يزها المحيط الهادي . وتوحيد اصواتنا لابن عمنا يوسف اللي مثلك لايستغر
به منا فانت ابن قبيلة عزيزه وتعرف واجب الشخص تجاه قبيلته.لكن اللي اقوله وانا صادق اذا
مااخذ العصيمي المليون (لاسمح الله.وان شالله ياخذه) اكيد اتمنى ياخذه(مروض
بنت صوغان الافكار) .. رايي الشخصي ودمتم...

[(( المقاطي ))]

ارحب يابن يام

وابن فطيس ما هو في حاجة لشهادة من احد

شاعر جزل وعفيف نظيف معنى ولا اقول انه اشعر واحد على الساحة الشعرية بس في البرنامج نعم

وثاني شيء ابن فطيس من قيبلة والسبعة انعام بآل مره

وعز الله انهم ماخذين النعم بيمانهم ويستهلون كل خير هذا الكلام من واقع خوتي لهم


والله لو لا ماقفي دون ابن عمي الحر النداوي يوسف ما صوّت الا لابن فطيس

بس الماقف الغصاب يحدني على التصويت ليوسف

والله يوفقهم الثنين قل آمين

اخوك المقاطي

عتابة يعصابة راسي عليكم بالتصويت دبل وثري

[قناص العتيبي]

حياك الله يا صبي يام

والله ثم والله لولا أن في المنافسة ( شاعر المليون ) عتيبي لما صوت لغير ابن فطيس هذا الشاعر الداهية بكل ما تعنيه هذه الكلمة من معنى ...


شاعر شاعر شاعر ..............................................

وتقبل تحيات أخوانك العتبان ،،،،،،


.

[جااار القمر]

هلا وغلا
بيام ولد يصبا
جهودك وطلب الفزعه ليوسف فى منتدى العجمان مشهوده ومقدره ياابيض الوجه
والله انى ارسل لذا ولذا واعرف مانتم بحاجه فزعه لاكن تقدير وعرفان للجميل
انت تسئل عن الافضل شعريا من الخمسه المتسابقين شعريا
انا اقولك بكل امانه
ابن فطيس الاجدر
وان على الامنيه اتمنى يكون يوسف
وبيض الله وجيهكم يابنى يام وعز الله انكم عز الرفيق
ومايخفا على امثالك ليه خلو 25& للاسبوع القادم
لاكن الله يقبلها على رراس كل نذل وخاين للاماته
لك ولقبيلتك اعطر وازكى التحيااا

[العسـ نواف ـاف]

والله وشبعة انعام بفطيس ويستاهل التصويت
عتيبه ويام عينان في راءس تاريخ مشرف لها القبيلتين مو بعض القبائل الي تسبسب في القبائل الثانية ويقولون حنا ربع وحنا اهل وتعرفون من اقصد انا

[طلال الثبيتي]

كفو يايام ومالحقنا شك فيكم ويعلم الله لو ان العصيمي كان خارج المنافسه كان صوتنا لــ ابن فطيس وذلك انتصارآ للشعر الحقيقي ..

[فارس الوصيص]

ولله اللي يستحق المليون الي جابوه عتيبه من قاع اللجنه لين صار فوق مع النجوم وهو يوسف وهو اللي يستاهل
لن ربعه هل الفزعات مخلفت الهقاوي اما الثاني اعتقد الشمري لانه ابدع في كل انواع الشعر اما ابن فطيس مع اعجابي فيه ابدع في الوصف ويستاهل

[خالد السيف]

اذا مااخذها يوسف افضل ياخذها ابن فطيس

لانه شاعر جزل وكلنا معه

وياليت تنقل تحياتنا لقبيلتك العزيزة يام

[الفيصل6703]

والله وتعومك يايام عزالله انكم من قروم القوم

لكن العذر والسموحه ياخوك اذا حظر الماء بطل التيمم

وابن فطيس شاعر ابن شاعر ولسنا هنا كي نقيمه فهو
شاعر من قبيله عزيزه وغاليه وكذلك كل الشعراء المشاركين
نكن لهم ولقبائلهم كل محبه واحترام ولكن الموقف يحتم
علينا وعليكم الوقوف بجانب ابن القبيله


تحياتي لك

[يام ابن يصبا]

الله يعيني على الرد عليكم يالطامة العايل,

اخي ابن عاصم,
بيض الله وجهك يالغالي على المرور , وتاكد اذا فاز ابن عمك فتراها بتهون علينا والحر النداوي قال" استريحوا استريحو...ارتاحو..وانشاء الله المقبلات خير"
ونحن مثله نقول انشاء الله المقبلات خير, لكل وقت رجاله ومثل ماكان ضيدان ابن قضعان في وقت ما ملك من ملوك الشعر بشهادة الجميع وشهاده شاعر الوطن ابن هذال,فهي من عادة يام انها ايضا تظهرملوك اخرين اذا لزم الامر وابن فطيس خير مثالها في وقتنا,

الشعر تاريخٍ لنا من مبطي و إعلامنا يوم السنين نهابة

دخلنا المعركة بسبعة "7" شعراء وخرج الواحد تلو الاخر وضحى الجميع ولم يبقى الا السابع الذي لا يخفى على العقول النيرة معنى ومفهوم السابع, والذي كما اسلفت من قبل هو رهاننا وهو من نعتقد ان الجميع سوف يكونون معه وليس ضده عندما يتم تتويجه وسوف يكون علما فوق الجبال النايفات ويوم الثلاثاء هو الشاهد على كلامنا,

لي عوده على الردود
اخي المشرف لم استطع تعديل القصيده الاولى وبيض الله وجهك مقدما على تنسيقها"

[شامان]

..


ظهر ابن الفجاءة في زمانه=وانا ابن فطيس تظهرني ذراعي

اخوي اليامي :
ابن فطيس مثل ماقالوا الاخوان (ماهو في حاجة شهادة أحد) .

وانا اتمناله كل التوفيق والنجاح ،،،

وتقبّل خالص تحياتي ،،،،،،،

[يام ابن يصبا]

اخي سعود ابن مويسان,
تسلم يالسنافي على الرد, وابن فطيس يهديك اجمل سلام وتحيه,

[يام ابن يصبا]

الاخ الغالي يوسف سوف,
تسلم يالغالي يانسل الاجواد وانشاء الله ان المليون عدا يكون فالي وفالك ,


الاخ ابو متعب ,
انا ايضا معجب بالشاعر الجزل العازمي, لك مني اجمل تحيه ,

[غازي البقعاوي]

والله والنعم بيام
والنعم بابن فطيس

وانا صوتت لابن فطيس
وابن فطيس اعتبره اشعرهم وشعره جزل وابن مريبد اعجبني
اما يوسف رغم انه اصغرهم وشعره لايتفوق على شعر ابن فطيس برايي الخاص الا انني ساستميت بالتصويت له
وان فاز ابن فطيس انا من اوائل المهنئين له بكل سرور لانه يستاهل
اوليس القائل نحلب الناقه قبل نذبح ولدها ...........
والله والنعم يايام ياهل النخوه والحميه والوفا للخوي والرفيق

واتمنى ان يفوز بشاعر المليون عتيبي ولا يلومني الا ردي اصل
ولك تحياتي من ساحل الخليج الى جبال نجران وبعدد ذرات رمل ديار عيال همدان يام وادهم ووايله

[السلطان العتيبي]

[color=#003333][align=justify][size=6][font=Verdana] ونحن مثله نقول انشاء الله المقبلات خير, لكل وقت رجاله ومثل ماكان ضيدان ابن قضعان في وقت ما ملك من ملوك الشعر بشهادة الجميع وشهاده شاعر الوطن ابن هذال,فهي من عادة يام انها ايضا تظهرملوك اخرين اذا لزم الامر وابن فطيس خير مثالها في وقتنا,
"

ضيفنا الكريم العزيز ولد يام

ومن قال لك أن ضيدان بن قضعان (( كان ))

ضيدان لازال من ملوك الشعر ومن قال غير ذلك فهو لايفرق بين الشعر والشعير

.

[ثابت الروقي]

في ذمتي ان بن فطيس بحر بحر بحر كل ماتعنيه الكلمه ويستاهل المليوووون ..


لكن يوسف تاخذنا يمه الحميا وهو كفو الا فوووق فوووق الكفو ..


لكن الزبد ه ان المليون لا يطلع نت الأثنين العتيبي ولا اليامي تكفووووووووووووووون ..

[يام ابن يصبا]

هلا بك اخوي عيد الغنامي,
ونبادرك نفس الشعور, وحياك الله يالغالي على كلماتك الطيبة , اجزم لك ان الفائز سوف نصفق له نحن صبيان يام, واللي اتمنى ان يكون اذا ماكان من صلب يام ان يكون من صلب عتيبة الهيلا او شمر الخالده,

اخي الغالي السلطان العتيبي,
نعم يالسنافي ضيدان كان ومازال ملك في الشعر وهو فرزدق زمانه, واستمتع معي بقراءه احدى قصائده الاخيره , وشاكرا مرورك,


انـا عجمـي ولانـي بعجميـا
رماه الموج في ساحـل عمانـي
انا من خير من في الارض سادو
كلاما يختـرق صـم الاذانـي
فلا مجدا يطـاول مجـد قومـي
اذا ماطـاول الفخـر الغوانـي
لنا سلمـا فرقنـا عـن سوانـا
عدا ملء البطون مـن الاوانـي
قبـل يبعـث رسـول الله فينـا
ولايصـدح بـلال بـالاذانـي
اذا ان الجبـان اشتـد عــودا
وبـان الجبـن بالعـود الليانـي
اشــارت امــه ان اقتـلـوه
حـلال قتـلـه آن الآوانــي
فذبحناه وضحك عمـه وخالـه
ولو ماله خـوات ولا اخوانـي
وما ملء القلـوب منـه حزنـا
وما سالـت مداميـع الحسانـي
لذلـك لاتجـد فيـنـا بخـيـلا
ولا فينـا ذلـيـلا او جبـانـي
ولانغـدر ولانخلـف وعـدنـا
ولانضهد ولانرضـى الهوانـي
ولامـنـا تحالفـنـا وفـيـنـا
ولو وجه الزمان الصلف شانـي
علـي الشاهـد الله ثـم يشهـد
علـى ميثاقنـا كـل قحطانـي
كـفـاك الفـخـر يـاراسـي
اذ انت يماني تسلسل من يمانـي
وليس المجـد قـد كـان ابائـي
ولاقـال فـلان عـن فـلانـي
بـل المجـد وقوفـا ذات يومـا
كهـذا اليـوم ان ربـي هدانـي
مابين يدين احمـد بـن محمـد
وقوفـا بأفتـخـار بأتـزانـي
بقلـب صادقـا والخـوف فيـه
مضادا قد يرانـي مـن يرانـي
اذا ماغامـر الانسـان يـومـا
فلن يكسب بعيـرا او حصانـي
وقبل اختم كلامـي ودي ادعـي
على الي عن غثا الساحه كفانـي
عسى (ابن الذيب) لسهوم المنايـا
عشان اعيش باقي العمر هانـي
ضرب سوقي وحطم بورصاتي
بعد مانيب الاول صرت ثانـي
وليـا مـن شافنـي للعـد وارد
سبقني له وعـن مـاه احتدانـي
انا وايـاه صرنـا مثـل بيتـا
قريته فـي كتـاب الاصفهانـي
(( اعلمه الرمايـة كـل يومـا
فلما اشتـد ساعـده رمانـي ))
واذكـر سيـدي احمـد بكلمـه
قبل ما اشـد باليمنـى العنانـي
شرف لي يوم اوقف بين يدينـك
كـأن الله لـدبـي اصطفـانـي
وانـا داري دار اخـوان نـوره
هل العوجا ليـا مـس البطانـي
وصلى الله علـى محمـد وسلـم
عدد ماقيـل صـح الله لسانـي
.

[مالك الذيابي]

اخي / يام ابن يصبا


اولا / بيض الله وجيهكم لوقفتكم المشرفه

ثانيا / ابن فطيس قسم بالله دون مجامله شاعر له جمهورة

ونعم فيه وفي جمهوره وقبيلته وانا ارشح يوسف وابن فطيس

------------------

تـــــصـــــويــــــت جــــــارف

[يام ابن يصبا]

الاخ غازي بن ردن,
كفو يا نسل الاحرار ومن مافيه خير مع بني عمه وربعه كيف اترجى خيره مع الناس, الله يقويك يالسنافي ويوم الثلاثاء بقى عليه يومين ويظهر شعاعه,
لك مني التقدير والاحترام

[ممدوح الروقي]

ابن فطيس شاعر جزل وشاعرمعنى وله هيبه في الشعرلكن يعلم الله ان خروج ابن عبيان مصيبه لمتذوقين الشعرشاعراذهلني اسلوبه وشاعريته وانامن المعجبين بشاعرية ابن عبيان

[ابن مشيب]

يكفي من ابن فطيس , هذين البيتين:


احدٍ خياله حر وحدٍ وكري=وحدٍ خياله كوبجٍ بقطابه
وانا خيالي كل ماهديته=حول على الوادي وصاد عقابه


وكلمة شاعر نتمنى ان تليق بإبن فطيس , إن لم تكن دون من مستواه الشعري , وشعرياً شهادتي فيه مجروحة بكل ماتعنيه الكلمة


تحياتي

[سعدالقثامي]

والله ياخووووووووي ابن فطيس شاعر
ويوسف شاعر بعد
لكن حنا بالعربي تهزنا كلمة عتيبي ونعرف قيمتها
وعلى ماقلتوا (مروض بنت صوغان مدري صوعان )الله يوفقه ان فاز !!!!!!!!!!!!!!!!
ونبي نقوله مبرووك رغم اني متاكد ان يبي يصير خياااانه في في التصويت لكن حنا نبي
نسوي اللي علينا والباقي على الله
وبعدين حنا ماعندنا مروض نياق ولا الحيوانات كلها
حنا عندنا طال عمرك شعار يروضون الرجال وانت خااااااااابر زين

[نادر العش]

الله يحييك ياصبي يام ..
والله يحيي قصيد بن فطيس معك ..

أولا ً .. أنت تعرف الإجحاف اللي حصل في حق ابن عمنا يوسف ..
مما جعلنا حتى الآن في محاوله لتكثيف التصويت له وتعويض النقاط التي خسرها في مجموعته السابقه ..

وانتم يا يام لو مالكم حيله في ابن عمّكم والله لنفزع لكم فزعة ٍ تشكروننا عليها .. لكنكم أهل وقفات وأهل نعم .. وولد عمّكم مايبي الا تصويت رسايل ماهي أكبر من هالشيء .. وعندكم إتصالات ٍ أطيب من إتصالاتنا ومخفضة ٍ التصويت :)..
واليوم عسى اللي يآخذ المليون ياخذه من تصويت ربعه ماعاد نبيها قصيد وشاعريه ..

وليا عودت للشعر ولد عمّنا شاعر ولا لقينا على قصيده مثل مالقينا على غيره يالذيب ..

لكن يوم جبت للقصيد طاري وصار له مجال .. وش قولك فالبيت هذا :

طيفه الى نـام البشـر زارك بهـون=وطيفك الى نـام البشـر سـرّاك لـه
قريته قبل شوي في موضوعك .. ولقيت لي عليه ملاحظه ..
مدري من يلاحظها ..!
أنا اللي يشككني في شاعرية ابن عمي يوسف ألقى عليه درب :)

الختام:
الله يحييك بقدر ماتستحق الشكر على حضورك بين أخوانك العتبان وعلى بادرتك الطيبه اللي سمعنا فيها , ولاهي غريبه عليكم , واللي ينسى وقفتكم هذي غيرنا ماهو حنّا .

أخوك/نادر

[يام ابن يصبا]

اخي ابو عتب الروقي,
شكرا يالغالي على مرورك وكلامتك, واليوم هو يوم الحسم, وساعتة قد قربت, ترى من هو شاعر المليون؟
الجواب:هو ذلك الشاعر الذي اراد الله له ان يكون له الرقم 4+3=7
اما اذا اختلت الامور واهتزت اركانها فما لها الا العصيمي, نسل عتيبة الهيلا,

اخي العازمي 2007
احيانا يقول الانسان سؤلا ولا يعرف اجابتة, واعتقد ان اللجنة الموقرة ينطبق عليها هذه العباره اتدري لماذا لانها مثلك لم تفهم ان رد ابن فطيس عندما سالته هو فعلا مجاراة لابن الفجاءة بكل ما يعنيه موقف كليهما,
ولك مني و ل ابن مريبد , اجمل تحيه ,

[يام ابن يصبا]

السنافي نسل الاجواد مرزوق العتيبي,
الشكر لك ولربعك عتيبة الهيلا لموقفهم السابق وانتم هل الطيب ومعدنه واهل الوقفه الصادقه اللي مايضاهيكم احد فيها الا يام وفزعاتهم المشهوره, هكذا اخبرنا التاريخ وهكذا توارثناها من اجدادانا,
اتمنى ان تكون الساعة القادمة هي ساعة تكون الشاعرية والقوافي هي من تظهر شاعر المليون لنصفق له جميعا, واكون معك صادقا ارى ذلك الرجل الذي يمشي بهدوء واثق الخطوة, عيونه تشبة عيون الصقر هو الاقرب لها,

[يام ابن يصبا]

الاخوان الرومي, نمر العتيبي,
شكرا لمروركم

الاخ الغالي مشل,
سوف يفوز من اراد الله له الفوز ولو اجتمعت الجن والانس لغير ذلك فتاكد ان الله وحده هو فقط من سيفرض امره, لك مني اجمل تحية.
مازلت اراهن على صاحب الرقم الجوهري,

[يام ابن يصبا]

الاخ المقاطي,
وقفة الرجل مع بني عمه تحسب له, ووقفة الرديء مع نفسه تحسب عليه,

الرجال طبعهم مخاواة الرجال,
سبعة انعام في عتيبة وفي ال مره يام, لك مني اجمل سلام والله يحييك,


الاخ قناص العتيبي,
شكرا لمرورك يالغالي, وقفتكم مع ابن عمكم تزيدكم فخروتحسب لكم, وبعد ساعة من الان بتشوف شاعر المليون وهم يصافحونه.......

[يام ابن يصبا]

جاار القمر
اولا ابارك لنفسي ولعتيبة الهيلا فوز ولدنا ابن فطيس, واتمنى ان يكون الحظ اوفر لكم في المرات القادمة ويعلم الله ان موضوعي هذا لم اكتبه في منتداكم الا لتكسبوا الجميل والعرفان من كل من قراءه وما اختياري للعنوان الا للدلاله المسبقه انكم اهل الشعر وانتم ميزانه ولنظرتي السابقه انكم من سوف ينصف شاعرنا ابن فطيس وينطق الحق ولا يركن الى تهميشه
ثانيا اخي جاار القمر صادف الحظ ان اتوقف عند الرد على مشاركتك ليلة البارحة لاكملها اليوم وقد ظهر شاعر المليون واصبح علما للجميع , فانت بالنسبة لي من علامات التفاءل ولك مني الاحترام والتقدير



الاخوان نواف, طلال, فارس, خالد, الفيصل, ابو شمروخ الحافي, غازي البقعاوي

شاكرا ومقدرا كل كلمة اظهرتموها ولكم من يام كل التقديروالاحترام

ثابت العتيبي
اشكر لك مشاركتك الاولى والتي كانت في موضوعي هذا واتمنى لك كل الخير يالغالي

ذيابي ولد روق
لك مني التقدير على مشاعرك النبيلة,

ممدوح الروقي
خرج ابن عبيان كم خرج يوسف اتدري لماذا ,لان ذاك الذي يعيش هناك فوق استطاع ان يتحكم بالصوت والتصويت لانه يستطيع ان يفعل شيئا في هذا الامور مادامت تحت تصرفه ولكن شاعرنا ابن فطيس اراد الله له ان يكون في وادي غير ذاك الوادي وما نتيجة الميزاني ومحاولة الوصول الى شرف المليون الا دليل على صحة كلامي...

اخي الشيباني سعدت بمشاركتك يالسنافي يانسل قوم تخاف الاسود قبل الضباع عند مواجهتهم,

اخي سعد القثامي
لا تعليق

نادر العش
وفعلا نحن يام اذا اظهرت النار شرارها ولتعلم بدون نطق القسم والايمان انه لولا الظلم من اصحاب النفوذ وامور نحن نعلمها ان ياالاول ويالثاني ويالثالث مايكون الا ليام "اعرف ربعي وقومي قتلة جبانها هل الفزعات على مر التاريخ اصحاب الحكمة والشعر ونطق الكلام الجزيل عندما ياتي وقته" وتكفون ياعتيبة لا احد يلومني على كلاماتي هذه


ولكم جميعا مني كل الاحترام والتقدير,


واخيرا مبروك لابن فطيس ومبروك ليام كافة ومبروك لعتيبة مرة اخرى دخول ولدهم المرحلة النهائية رغما عن انوف الخصام الذي اعتبره في حد ذاته هو انتصار لعتيبة الهيلا ويسجل لهم باحرف من ذهب واتمنى ان ياتي العام المقبل ويظهر الشعار الاخرين منا ومن القبائل الاخرى ويكون الود والاحترام للجميع