عاجل قصيدة بدهان الشمري يطلب من قبلان الشراري اعتاق رقبته

[عبدالمجيدالشمري]

بسم الله والصلاة على رسول الله اما بعد
انقل اليكم هذه القصيدة من السجين بدهان عبد الله الرفيد الرمالي الشمري من سجنه وهو يوجهها الى ابو القتيل قبلان الشراري راجين من الله ثم منه اعتاق رقبته لوجه الله معرب"فيها عن ندمه واسفه بما قام به ومعتذر منه ومن جميع الشرارات راجين منهم العفو والمغفره وارجو جميع من قراء هذه القصيده نشرها لاكثر عدد ممكن جعلهاء الله في موازين اعمالكم



يقول بـــــــــــــدهان فك الله أسره واعتق الله رقبته اللهم آمين


سميـت بإسـم الله ربـن ورحمـان=الواحـد اللـي لكعبتـه يسجدونـي
اللي خلق بالكـون جانـن وإنسـان=ولعبـادة الله يومـهـم يخلقـونـي
ومن بعـد ذكـر الله يقـول بدهـان=بالخط الأبيض في ظـلام السجونـي
سـلام يانسـل الكرامـه ياقـبـلان=إعـداد مابرقـن لعـج بالمـزونـي
وإعداد مايسمع صدا صـوت الإذان=وإعداد مايضوي صحى الشمس كوني
وإعداد مافوح شـذا ريـح ريحـان=وإعداد ماورقـن سجـع باللحونـي
وإعداد خلق الله في شتاء الأزمـان=ومن قبل خلـق آدم يامـا يبعثونـي
وسلام لعيالـه هـل العـز والشـان=عيالـن عـن الطـولات ماينثنونـي
ولأعمامهم منـي سلامـن بتيجـان=ولأخوالهم سـلام فـي كـل لونـي
وعم القبيله عم مـن دون نقصـان=سـلام يحونـه خفايـا شجـونـي
ولإشيوخهم مني سلامـن بمرجـان=وأعمهم من غيـر دونـن ودونـي
مني سلامن في سلامن لـه أركـان=سلام خاص وعـام مابـه ظنونـي
إعداد ماقالوا هـل الديـن سبحـان=وإعـداد مالخلاقـهـم يركعـونـي
وإعداد مانجمن سطع فوقـن وبـان=وإعداد مالساعات تجـرح شجونـي
ومن بعدهـا قبـلان قبـلان قبـلان=تكفـى تـرا تكفـى تهـز المتونـي
والمعضله ماله سوا رجـال الإيمـان=وإنتـم رجـال لـه ولا تنثنـونـي
أنا سجينك وأطلب العفـو وإحسـان=تكفـى رجيتـك لا لنـا يذبحـونـي
غلطه غلطته كلـه أسبـاب شيطـان=يالعنبـو يومـن جرالـي بكـونـي
وقبـلان ياقبـلان قبـلان قـبـلان=تكفـى تـرا تكفـى تهـز المتونـي
أخطيت أنا واليـوم بإيـدي سجـان=وأرجوك عطفـك يالأبـو الحنونـي
تكفى بأمك تعتقن كـان لـه شـان=وتكفى بأبـوك العتـق لا يقتلونـي
وتكفى أنا أرجوك في كـل الإثنـان=وتكفى بأغلا شخص بـه تعتزونـي
وقبـلان ياقبـلان قبـلان قـبـلان=تكفـى تـرا تكفـى تهـز المتونـي
تكفى بضناك اللي لي اليوم إخـوان=وتكفى بكـل اللـي لكـم يقربونـي
وبأهلك وربعك أطلبك عتـق بدهـان=وبإشيوخ شـرا أطلبـك فإرحمونـي
وتكفى بشرارن كلها العتق بإحسـان=وتكفـى بكـل العالميـن أعتقونـي
وقبـلان ياقبـلان قبـلان قـبـلان=تكفـى تـرا تكفـى تهـز المتونـي
مايرجع المقتول فـي قتـل بدهـان=ووالله لـو يرجـع لاقـول إقتلونـي
وتكفى وأنامديون لك وإنـت ديـان=غمض عليهـا وأعتقـن لا تهونـي
وأنا ولدك في كل مجلـس وميـدان=ورهن الإشاره وحاضر بمـا تبونـي
وقبـلان ياقبـلان قبـلان قـبـلان=تكفـى تـرا تكفـى تهـز المتونـي
ماقول أنا مانـي بمخطـي وغلطـان=والله مخطي والخطـاء بكـل لونـي
لعب علي إبليـس واليـوم ندمـان=كنت بجهل صغري وذقت السجونـي
ياماجرعت الهم مع ويـل الأحـزان=وبكيت ناس ونـاس واجـد بكونـي
وقبـلان ياقبـلان قبـلان قـبـلان=تكفـى تـرا تكفـى تهـز المتونـي
تكفى وفيك الخيـر ياطيـر حـوران=أرجوك عن ساحه بهـا يكلبشونـي
تكفى تحل العقـد يـاذرب الأيمـان=بدمعن على خـدي وأتلـف عيونـي
أخوك أنا بالدين وأرجوك الإحسـان=تكفى طلبتك من صميـم الشجونـي
وقبـلان ياقبـلان قبـلان قـبـلان=تكفـى تـرا تكفـى تهـز المتونـي
أمانتـك بالله يالـذيـب سـرحـان=أنـا دخيلـك ويـن مانتـه تكونـي
وعسى الفقيد بمنزلـن كلـه جنـان=ميـن ياللـي لكعبتـك يركعـونـي
وتالي الحياة فكل مـن فوقهـا فـان=ولا دايـم ألا وجـه ربـي بكونـي
وقبـلان ياقبـلان قبـلان قـبـلان=تكفـى تـرا تكفـى تهـز المتونـي
تكفى لي أرحم وأعتق اليوم بدهـان=دخيلـك اللـي يطلبـك بالسجونـي
وعلى الرسول المصطفى نسل عدنان=صلاة ربـي عـد وبـل المزونـي
منقول

[نواف العصيمي]

.. ماقصرت وبيض الله وجهك

وإن شاء الله يفك قيده .. ويعفي عنه الشيخ قبلان الشراري



ولك التقدير والإحترام

[نبض المشاعر]

عبدالمجيد

الله يعطيك العافية

وان شالله الله يفك اسرة

[فيصل الحويماني]

اخوي عبدالمجيد الشمري

.. ماقصرت وبيض الله وجهك

وإن شاء الله يفك قيده .. ويعفي عنه الشيخ قبلان الشراري

وصح الله لسان الشاعر بدهان الرمالي الشمري

ولك التقدير والإحترام

[ابو براك]

أخوي عبدالمجيد الشمري

ماقصرت وبيض الله وجهك

وإن شاء الله يفك قيده
ويعفي عنه الشيخ قبلان الشراري

[عبدالمجيدالشمري]

هلابك اخوي نواف العصيمي اشكرك على الأطلاله وتقبل الله دعائك ولك خالص تحاتي والسلام

[عبدالمجيدالشمري]

هلابك نبض المشاعر سعدت بمرورك وتقبل الله دعائك ولك تحياتي

[عبدالمجيدالشمري]

هلابك اخوي فيصل الحويماني سعدت بمرورك وتقبل الله دعائك واسعد الله ايامك

[عبدالمجيدالشمري]

هلابك اخوي ابو براك سعدت بحضورك وتقبل الله الدعاء واستجاب لما فاض من دعاء المسلمين لفك رقبة بدهان واعاده سالما الى ذويه وغفر الله ذنبك وبقيت سعيدا في حياتك

[الحرالنداوي]

جزاك الله خير الجزاء

[أبو صقر]

الله يفرج عنه ولا يبلانا
لكن ماهقيت يجي وقت شمر تصير تحت امر الشراري




تحيتي ........

[المداوي]

بيض الله وجهك بس عندي ملاحظه على البيت الاول حيث ان المسلمين يسجدون لله تعالى وليس للكعبه

وتقبل تحياتي

[الشاهين.]

والله يالربع مدري وشنقول قضية بدهان عمت العالم كلة ومن وجهة نظري لو يعدمونة أفضل من بقائة لأن قتلة للشراري كبرياء وأستهزاء بالكرامة الأنسانية0

فالأفضل أخماد المشكلة ولو إن العتق أفضلة من أجر وحسنات ولكن لإخماد نار الشر0

[عبدالمجيدالشمري]

جزاك الله خير الجزاء

اشكر لك المرور وعسا الله لايهينك

[عبدالمجيدالشمري]

الله يفرج عنه ولا يبلانا
لكن ماهقيت يجي وقت شمر تصير تحت امر الشراري




تحيتي ........

ابدا يالغالي :
عزة النفس منا وان وطنت به زعلنا = كسبها طيب سبلا وللمراجل عهد
جودها جود ربعي وللعدل به مشينا = زندها كف سلمى وفي يديها سند

[عبدالمجيدالشمري]

بيض الله وجهك بس عندي ملاحظه على البيت الاول حيث ان المسلمين يسجدون لله تعالى وليس للكعبه

وتقبل تحياتي

شكرا لمرورك ولاجابتك احيلك الى الشطر الثاني من البيت الثاني

[عبدالمجيدالشمري]

والله يالربع مدري وشنقول قضية بدهان عمت العالم كلة ومن وجهة نظري لو يعدمونة أفضل من بقائة لأن قتلة للشراري كبرياء وأستهزاء بالكرامة الأنسانية0

فالأفضل أخماد المشكلة ولو إن العتق أفضلة من أجر وحسنات ولكن لإخماد نار الشر0

تسلم على مرورك وشكرا لتدخلك السريع

[اخ العرب]

قصيده رائعه

وتقطع القلب

الله يفك اسره ان شاء الله

مشكور يالغالي

[شمالي من إلي]

بما أنكم تعرفون القصـــــــة فسأكتب لكم قصيد
قبلان بن عتيق الشراري
رداً على من انتخاه من القبائل كافة وجدتها باحد المواقع واحببت نقلها هـنــا
-------------------------------





أرد لـك ياللـي نخيـت الشـرارات = ومدحتهم هم سعـد عيـن الرجـاوي
صدقت في مدحك وانا اريـد كلمـات = هم عز منهو عاش ضيـم وبـلاوي
نخيتهـم طـلاّب عفـوٍ لمـا فـات = وحق لمن تنخـاه سـرد الحكـاوي*
شي حصل ذلـل كريـم وثـم مـات = بدهان يومنـه علـى الغـدر نـاوي
نسى الملا ورب الملا حـي مامـات = شيب رموش العُوْدْ والعُـودْ ثـاوي*
قدام عينه بولده صـب طلقات = ومـاتالـولـد والأب ينـخـى خــلاوي
يجاوبـه بدهـان ضحـك وصيحـات = ويـرد نخواتـه بسـب ودعـاوي*
الأب شاف البيـن لحظـة بلحظـات = والـذل عاشـه بيـد مـن لايوالـي
بدهـان ماراعـى لدينـه ومـروات = ولا لحكـم ابـن سعـود النـداوي*
تنخون من يحيي نفس له الاجر مرات = لكـن نسيتـوا قتلهـا وش يسـاوي
لو هو خطا قلنا لك ابليـس مامـات = لكـن تعمـد ذل وللقـتـل نــاوي
منك العـذر يامـن نخانـا بالأبيـات = لازال شـرع الله فـالأرض جـاري

وقد قيل بانه قال لإمير منطقة الجوف عندما اتاه البارحه لليله الثلاثاء لينقل له جاه الملك و يطلب منه ان يعفو
فقال له قبلان لو انني علمت وابلغت بان اولادي الثلاثة الكبار بما فيهم المقتول ضيف الله قتلوا لفكرت بان اعفو اكرام لمن ارسل وحضر ولكن ان اعفو عن من قتل ابني وهو يدافع عني وامامي وامام اخوه الصغير وبحظور رجال كبار يرجى منهم العقل والتعقل ومع ذلك لم يتشجع او تكون عند واحد منهم ذرة رجوله بعد مقتل ابني ووقف ليقف معي ويحمل ابني معي للمستشفى او حتى يساعدني لرفعه للسياره او يبعد الصغير عنى كي لايرى مارءيت وتخيل بعد حملي لإبني ماذا حدث وكم المسافه صحراء واسفلت وكم الوقت المستغرق واين كان راس ابني المقتول وماذا كان يعمل صغيري الثاني وكيف تحملت القياده حتى وصلنا لما وصلنا له ,,,,,,,,
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــ
منقووووووووووووول

[عبدالمجيدالشمري]

اخ العرب اشكر لك المرور واثمن لك المشاعر

[عبدالمجيدالشمري]

اخو شمالي من الى اشكر لك المرور وارجو التاكد من الحقائق قبل النقل ولك تحياتي