ربعن لهم فوق الفخر محراب..((((قصيدة الروقي اللي سرقها الحربي

[سيف العضيان]

خسيتي لعنبو جـدك ؛ خسيتـي والغلـط ينعـاب
خسيتي واقلبي وجهـك ؛ ولا كلمـه ؛ ولاجابـه

خسيتي والزمي حدك ؛؛؛ تراها ضاعـت الاداب
انا ليا طاشت جنونـي ؛ يعـرف الجاهـل ادابـه

وش المغزا من الكلمه وش الداعي!! وش الاسباب
وهرج الكذب والتجريـح!! قوليلـي وش اسبابـه

انا الشرهه علي اني فتحـت لخافقـي كـم بـاب
ولكن مثل ماجيتـي !! تـرا كبـر الجمـل بابـه

خذي نفسك معك برا ؛ ثم انقلعـي بـدون إيـاب
فمان الله ؛ والا اقول : فمـان ابليـس واصحابـه

تحسبيني على فرقـاك ابنـدم واغـرق الاهـداب
انا مبسوط يوم اني ؛ طـردت الشـوم وغرابـه

انا ما اعاشر الخاين.. ولا اسمع هرجـة الكـذاب
ومثلـك قيمتـه عنـدي تحـت الزيـرو حسابـه

رفعتي خشمك الواطي ..وغرك زينـك الخـلاب
تـرى والله ماحـرك.. جمالـك نظـرة اعجابـه

تغطرستي على الفاضي .. وانتي من علق وتراب
ومصير ابـن ادم المسكين..يدمـدَم فوقـه ترابـه

وهذاك اللي تحبينه ؛ حقيـر و خكـري ولعـاب
عاجبك ان قذلته شقراء ..ويميّـل بالشعـر كابـه

صحيح انه حقير و زين . وشكله للنسـاء جـذاب
تشّبـه بأختـه فلانـه ؛؛ ومنهـا الـدم متشابـه

وانا مانيب حرف الجر ؛؛ تجرينه على الاعـراب
انا حرف(ن) جزم نفسه ؛ ومثلي يصعب اعرابـه

تشوم النفس عن زينك عقب ماطـاح فيهـا ذبـاب
وانا حر(ن) ولد حـر ؛؛ تركـت الزيـن لذبابـه

انا يابنت من ربع(ن) لهم فـوق الفخـر محـراب
انا من روق ياخبلـه ..وربعـي الهيـلا اعتابـه

نسينا ما كلى عمهوج و كم روس بـدون إرقـاب
رزقك الله بحكم اللي حفظ عمهـوج فـي نصابـه
انا شيخ(ن) ولد شيـخ ؛ بذكـره تنعـم الانسـاب
وقليل الاصل يافلانـه !! يراجـع دفتـر انسابـه

ولد شيخ(ن) وسط ربعه له بين الرجـال حسـاب
اليا ضاقت بـه الدنيـا ؛؛ يهـز الارض مشعابـه

محنكني على الطيبه من يومـي صغيـر وشـاب
اجل : وش رايك بطفل(ن) دلال القهـوه العابـه

انا ليا جتني الزله ؛ مـن الجاهـل وهـو كـذاب
تركت القافلـه تمشـي ؛؛ وراهـا تنبـح كلابـه

وانا ليامن كشفت ان الخوي اصبـح لسانـه داب
نزعت السم من عرقه.. وكسرت بمخلبـي نابـه

ترى بدري على مثلـك تعيـب وساسهـا معيـاب
ياليـت اللـي يعيبنـي ؛؛ يحـاول يستـر اثيابـه

خلاص اليوم يافلانه ؛ كرهتك والقلـوب اغـراب
وترى كل طير(ن) بكبد السمـاء يشبـع بمخلابـه

خساره !!! مثلك بقلبـي يتـوج سيـد الاحبـاب
وخساره غلطـة العاشـق ؛ يحطـك اول احبابـه

بعد هذا تبين ارجع لاجل عينك نصيـر اصحـاب
خسيتي واقلبي وجهـك !! ولا كلمـه ؛ ولاجابـه



أخواني العتبان شدني اثناء تصفحي لمواقع النت هذه القصيده التي انتشرت في المنتديات انتشار النار في الهشيم
وحظيت باعجاب هائل من متصفحي النت
يحار المرء اذا طلب منه استخراج افضل بيت فكل بيت اجمل من الآخر وواضح من سياق القصيدة ان قايلها عتيبي وبالتحديد من < العضيان >
فهو يقول فيها

انا يابنت من ربع(ن) .......لهم فـوق الفخـر محـراب
انا من روق ياخبلـه ..........وربعـي الهيـلا اعتابـه
نسينا ما كلى عمهوج ........و كم روس بـدون إرقـاب
رزقك الله بحكم اللي ........حفظ عمهـوج فـي جرابة

ولقد لفت نظري أكثرمافعله احد سفهاء قبيلة حرب وتجرئه على سرقتها بعد تشويهها !وكسر ابياتها ثم ادعاء ان قائلها حربي !!
حيث قائم بتغيير البيت (انا من روق ياخبله وربعي الهيلا عتابه) الى انا من حرب ياخبلة...ورعي حرب حرابه!!!
مع بقاء البيت الآخر اللي فيه ذكر عمهوج فاضحاً له فان كان الحريبي السروق قد نسي تغييره فهو غبي
وان كان تركه عمد ونسب عمهوج لحرب فيبدو ان حرب معجبين بعمهوج بعد جربوه في رقاب فرسانهم|165| وعرفو انه سيف جيد وطيب واصبحو يتمنونه ويسعدهم الافتخار به |165| وللأسف ان جميع حرب سعداء بهذه السرقه حيث نقلو القصيدة لمواقعهم وافتخروا بها فالقصيدة موجودة في جميع منتديات حرب بهذا التشويه المضحك بل قام الحروب بنقلها والافتخار بعمهوج سيف العضيان :p في كثير من منتديات النت!! ويكفي ان تكتب كلمة خسيتي لعنبو جدك في قوقل لمشاهدة مافعلة الحريبي السروق وابناء عمه

لانريد ان نعكر عليكم جمال هذه القصيدة الأصلية للشاب محمد العضياني لكن حبيت التنويه
فدعونا نستمتع بالأصيل ونترك المفلسين والسرقان يفتخرون بالمزور

[النايع]

ونعم بالشاعر محمد العضياني وصح لسانه


انا يابنت من ربع(ن) .......لهم فـوق الفخـر محـراب = انا من روق ياخبلـه ..........وربعـي الهيـلا اعتابـه

*******************************************


انا يابنت من ربع(ن) .......لهم فـوق الفخـر محـراب = انا من حرب ياخبلـه ..........وربعـي حرب حرابة

أجل راحت مرواح مجرش وخروفه!!!

حكموا العضو راع العرف فيها تراه في مثل هالامور قاضي

[الوليد الاسعدي]

عز الله انها ترانيم عتيبه وشاعرها الشاب محمد العضياني ، وهذي مقادير الله تنسرق وينفضح السارق ويعود المسروق لاهله ... ماقصرت على التنويه ياسيف العضيان .
واسمح لي سانقلها الى قسم شعراء عتيبه .

[سيف العضيان]

النايع
اللي شدني في القصيدة من اول مره كسر البيت واختلاف معناه وهذا يعني انه حصل فيه تغيير
والمضحك ان السروق ماغير البيت حق عمهوج :pيمكن لان الحروب اكثر خبرة بفعل عمهوج



الوليد الاسعدي
لاهنت
القصيدة حملت افتخار بعتيبة فلايليق ان تسرق وتذهب لمنتديات قبائل اخرى
واكثر مارايت القصيدة المحرفه في منتديات الحروب والمشكلة كاتبين العنوان
انا يابنت من حرب للحرب حرابة :p !!!!! لا ويشكرونه ومبسوطين !

القصيدة للشاب محمد العضياني وكان يكتب بمعرف اسمه راكان العضياني وقد شاهدت له موضوع في النت بعد كتابتي لهذا الموضوع يستنكر مالحصل من سرقات

[راع العرف]

الاخ سيف العضيان
اشكرك على الايضاح وذكر الموضوع رغم وجود بعض التحفظات لي على بعض
ماقلته سوف تراها من خلال سياق الحديث .................................................. .

موضوعك جميل وأدلتك لاغبار عليها
والحقيقه لفت نضري ماكتبته انت واعجبني بعضه واستهجنت بعضه

فأنت قلت (((( ولقد لفت نظري أكثرمافعله احد سفهاء قبيلة حرب وتجرئه على سرقتها بعد تشويهها !
وكسر ابياتها ثم ادعاء ان قائلها حربي !!)))

كلمة سفهاء حرب كلمه لاغبار عليها فالسفهاء بحرب وبعتيبه وهذا المعروف ان كل قبيله بها عقلاء وبها سفهاء ولاضير في كلامك فالسفيه اللي يفشل قبيلتنا مع أخواننا من ابناء القبائل لايمثلنا وحتى الحميْه لاتكون له منا في أي حال من الاحوال وان كان كتبها ونسبها لشاعر حربي فأنا اول المعترضين عليها فالحق لابد أن يعود لأصحابه ووالله ثم والله لو اعلم عنها لكنت رديتها لصاحبها العضياني والموضوع اللي تتكلم عنه ذهبت لقوقل وبحثت ووجدت الموضوع موجود بمجالس حرب وهو لم ينسبها لحربي وانما قال هذا (( اخواني أعضاء ومشرفي مجالس حــــرب يشرفني أن اضع بين أيديكم قصيده تمتلك الشجاعه والفخروفي قمة الشجاعه.....لكن للأسف لم أعرف أسم شاعرها )) فربما اتى انسان لايمت لحرب بصله وحرف فيها ونسبها لشاعر حربي يريد إثارت فتنه ببين شعراء القبيلتين وانا اعتب عليه انه أوردها قبل أن يتأكد من هو قائلها أو على الأقل استفسر عن معاني أبياتها ف(عمهوج) معروف أنه سيف العضيان وأنا عندي تعليق على بعض من الكلام انت أوردته ولاأرى أن هناك داعي لإيراده وأرجوا أنك تتقبله بصدر رحب وهو كلامك هذا :

((( مع بقاء البيت الآخر اللي فيه ذكر عمهوج فاضحاً له فان كان الحريبي السروق قد نسي تغييره فهو غبيوان كان تركه عمد ونسب عمهوج لحرب فيبدو ان حرب معجبين بعمهوج بعد جربوه في رقاب فرسانهم)) ...
لايوجد داعي لقولك ( الحريبي ) المعروف أنه الحربي فلاداعي لتصغير حجم رجل من قبيلة حرب بهذا المسمى فالرجال تنده بأسمائها فهل ترضى أن تسمع من يقلل من شأن قبيلتك ويحرف أسمها من عتيبه
إلى (عتبه) أرى أن ذلك غريب منك وأنت من قبيله عريقه تاريخها ناصع البياض فاللي نعرفه ولااقول اللي نعرفه بل اللي جربناه من رجال عتيبه ولمسناه منهم التقدير واحترام الاصحاب فوالله اني معاشر عتبان واكثر ربعي من عتيبه ولم أسمع يوم من الايام استنقاص منهم لأي رجل من أي قبيله ولكن في المنتديات ومن خلف الكيبورد ليست بشجاعه فنحن في منتدى راقي ولولا رقيه لما كان سجلنا فيه , حرية الرأي مطلب كل عضو ولكن بحدود الأدب والاحترام فأنت تعكس صوره غير التي نعرفها عن رجالات عتيبه حتى هؤلاء الفرسان الذين تفخر بهم ويحق لك ذلك كانوا بالماضي يقدرون شيوخ القبائل ويحترمونهم ولاينزلون من قيمتهم لأن من احترم الرجال فهو اولا ً وآخرا ً محترم لنفسه وايضا ً يحترمون القبائل كلها ولايوجد بينهم هذا الكلام , اما من ناحية قولك اضنهم معجبين بعمهوج بعد جربوه في رقاب فرسانهم فأشكر لك هذا الاحترام والتقدير وليتك تعرف ان كل قبيله فيها حقها ,فقبيلة حرب عندها من السيوف الكثير اللي تفخر به ولاهي بحاجه لعمهوج لكي تعجب فيه فعندك على سبيل المثال لا الحصر ..

(الفسقان ) فهذا سيف الشيخ محسن الفرم يقول الشاعر سبيل بن سند :
شريدة الفرسان وشلون تنســـــاه .. وشلون تنسى يالعــــين الصلايب
اللي على شيل الجماهي مضراه .. يمناه و(الفسقان )سيف العطايب

(اللويصق ) وهو سيف الشيخ محمد عقاب الذويبي يقول الشاعر مطر الطريسي :
كم منهل ٍ نجع الذويبي يـــدله .. ايام صولات العرب والمـــــــــــــــغاتير
وكم فارس ٍ فارق براد الاظله .. بضرب (اللويصق)والحرار المساطير
وهذه السيوف التي يمتلكها فرسان حرب ايضا ً جربت بروس الفرسان وبترتها .......

وعندما قلت (( وعرفو انه سيف جيد وطيب واصبحو يتمنونه ويسعدهم الافتخار به )) ..
هذه السيوف اللي ذكرتها لك تكفي حرب بالافتخار ومحرف القصيده لانعلم هل هو حربي ام واحد يبي يشبها بين شعار حرب وعتيبه وانت اثبت انها لعتيبي اللي هو راكان العضياني فلماذا هذه التعليقات اللي تنزل من قيمة حرب علما ً انه كلام والكلام لايؤثر على سمعة احد ولكنه يجرح ياأخي وحنا لنا تاريخنا واذا عندك سيوف خلاص مااحد عنده سيوف من اسلافنا لاتلغي تاريخ غيرك علشان تثبت تاريخك تستطيع وبأمكانك اثبات تاريخك من غير ماتلغي تاريخ غيرك .......


وقولك (( وللأسف ان جميع حرب سعداء بهذه السرقه حيث نقلو القصيدة لمواقعهم وافتخروا بها فالقصيدة موجودة في جميع منتديات حرب بهذا التشويه المضحك بل قام الحروب بنقلها والافتخار بعمهوج سيف العضيان )) ..
صدقني انا حربي ووالله انني مستاء منها ولست مفتخر بها ابدا ً ولااتوقع ان حربي يفعلها وان فعلها
حربي فاانا متبري منه ليوم الدين ولاله من حميتي شي لانه سروق والسروق مايمثل حرب القبيله العزيزه المليئه بالشعراء وانا تراني شاعر ومستعد اجيبلك قصيده فوق المية بيت من نضمي وعلى اطلق قاف وتكون مدح بحرب ووالله انها ماتعجزني ,, لكن ليه انت متأكد انه حربي يااخي يمكن ماهو حربي وان كانه حربي وطلع بااسمه وصورته واثبت انها له انا اول واحد اعترض عليها ووالله لااحاربه بكل السبل لين يرجع الحق لااصحابه وان كان سواها تعال بذاك الوقت وقول انه حربي واللي نقلها يمكن جاهل ويمكن مايدري ويالله يااخوي روح لمنتدى حرب اللي منشوره فيه القصيده وصحح لهم علشان يصيرون على بينه ويغيرون هالمشاركه او يلغونها وانا بأذن الله بااسجل بالمنتدى ومالك الا اني ارجعها لصاحبها الاصلي واللي ماعرفت اسمه واضنه محمد العضياني او راكان لكن ابشر بااعادتها لااصحابها ,,,والافتخار بعمهوج سبق ان قلتلك اننا عندنا اللي مكفينا من السيوف اللي شلعت روس القوم بهاك السنين ولافيه داعي انك تعيد هالكلام ..........


وقولك (( ويكفي ان تكتب كلمة خسيتي لعنبو جدك في قوقل لمشاهدة مافعلة الحريبي السروق وابناء عمه )) ...
تكررارك لكلمة ( الحريبي ) .؟؟ ماكان له لزوم فغضبك لاتصبه على كافة قبيلة حرب بذنب شخص وهمي لانعلم هل هو حربي ام صاحب فتنه حرف بعض الابيات يريد اشعال نار الفتنه ,والتعميم ليس من شيم اي عتيبي فأنا حربي وغيري كثيرمن ابناء حرب لانرضى بهذه السرقه وارجع اقولك انه ناقل ولم يذكر انها لحربي بل اتى شخص صاحب فتنه وقام بتحريف البيت الذي يقول:
انا يابنت من ربع(ن) لهم فـوق الفخـر محـراب .. انا من روق ياخبلـه ..وربعـي الهيـلا اعتابـه ( ونعم )
الى :
انا يابنت من ربع(ن) لهم فوق الفخر محـــراب .. انا من حرب ياخبله .. وربعي حرب حرابـة

ونقلها قبل ان يتأكد من هو شاعرها الحقيقي .................


وعدت برد آخر وقمت بالتكرير وقلت (( اللي شدني في القصيدة من اول مره كسر البيت واختلاف معناه وهذا يعني انه حصل فيه تغيير والمضحك ان السروق ماغير البيت حق عمهوج يمكن لان الحروب اكثر خبرة بفعل عمهوج )) ؟؟؟؟؟

البيت صحيح انه لايستقيم الا بنطقه على ابيات الشاعر محمد العضياني ,, واللي حرفها وهو اكيد ماهو حربي لأن مافيه احد بيجي ويشوه سمعة قبيلته بهالطريقه العلنيه المهم اللي حرفها اذا قريتها بتحريفه ينكسر الوزن ,, واما من ناحية قولك انه ماغيْر عمهوج وان الحروب اكثر خبره بفعل عمهوج فكيف يكون الحربي اكثر خبره بفعل عمهوج ويعرفه زين انه للعضيان من عتيبه وينقل البيت كما هو هذي فيها حالتين ياان الناقل ليس من حرب او من حرب وان كان ليس من حرب وهذا الاكيد فهذي ماعليها كلام وان كان من حرب فاضنه مايعرف عمهوج اللي تتكلم عنه لأنه بأبسط الحالات لم يعرف فعله اللي قلته .. ونحن هنا بمنتدى شعر ولسنا بمعارك وبطولات فياليتك كنت بالشعر ولم تتطرق لهذه لأمور المعارك ( وحنا ذبحنا وصلخنا ) وان كنت لاتجيد الا هذه السوالف فدع لغيرك المجال من من لهم خبره بالشعر .......................

الاخ النايع
تقول (( أجل راحت مرواح مجرش وخروفه!!!

حكموا العضو راع العرف فيها تراه في مثل هالامور قاضي)) ..

برغم كل مابيننا من معارضات الا انني اشكر لك ذكرك لي وانك لم تنساني
وانا سوف آخذ كلامك بحسن نيه وليس بمفهوم ( الغيبه ) وهو وصفك لي بالقاضي
فشكرا ً على هذا الوصف وان كنت لااعلم هل هو تهكم ام صدق من قلبك , ووالله
يااخي النايع اني باارد بردي السابق بدون ماتطلب من الاخوان انهم يحكموني ........
وشكرا ً لك من القلب على كل حال .........................................

وفي النهايه ارجوا ان يرجع الحق لااصحابه وتعود القصيده لصاحبها الاصلي محمد العضياني
بااقرب وقت وسوف اعمل مابوسعي بهذا الشأن ,وانا كان بودي ان الموضوع يذكر من غير
اسلوب التهكم والسخريه و الاستهزاء بقبيلة حرب العزيزه التي تكفيها قصائد شعرائها بالذود عنها والدفاع عنها وهي لاحصرلها واكرر ان محرف القصيده لااحد يجزم بأنه حربي فلايوجد انسان من ابناء القبائل يسيئ لقبيلته بهذه الطريقه العلنيه نهائيا ً واكرر انه لو كان حربي وظهر بأسمه الحقيقي وصورته فأنا أول من يقف بوجهه ويكعمه اما بالمنتديات وبأسماء مستعاره مره باسم حربي ومره بااسم عتيبي ومره بااسم مطيري ومره بااسم ماله علاقه بالقبائل وهذا ماوجدته عندي بحثي بقوقل فهذا ليس بدليل ..................
واختم بقولي ....
راع العرف مع دربه مشى عســاس ** يبا ينصى له اجواد ٍ شقـــــرديه
ولااحب الردي لالاولا الاخــــــساس ** ولاانصى الامن ابه الطيب ماريْه
رفيق ٍ لي من عتيبه عريب الساس ** هذا من روس برقا صافي الــنيه


اتمنى ان نقاشي يليق بمنتدى قبيله بحجم عتيبه الهيلا وانني التزمت بادب الحوار
وكثر الله خيركم ياعتابه .....
تقبلوا تحيات اخوكم راع العرف ..........
والسلام عليكم ورحمة الله وبركاته

ياعتيبه ياطويـــــلين اليـــــمين ** مكرمين الضيف واهل الشاذليه
يوم وقت ٍ فيه ضرب ٍ بـــاليدين ** محتمين دياركم بــــــــــــالمقدريه
غصب ماهو طيب ولابالمارتين ** بالسيوف الحدب حامين الـــرعيه
وسلامتكم ياعتيبه الهيلا
تحياتي
راع العرف
.........................

[سيف العضيان]

الأخ العزيز راع العرف الحربي
حنا في النت ونسولف واذا حصل سوء فهم لاسمح الله فقبل هذا كله حنا اخوة في الدين
لكن لايعني انا نكتب باسماء مستعارة انا نسئ للاخرين ونتعدى على حقوقهم
وانت من قرائتي لبعض كلامك وردودك يبدو عليك التعقل والحكمة
نرجع للموضوع
ركز على الش الاساسي ولاتخرج للاشياء الجانبية لو عرفت ماجرى يمكن ماتشره علي بخصوص ماقلته عن عمهوج والحروب لأن سنتين كاملات ووسفها الحروب يسرقون قصيدة العضياني ويحرفونها ويلحقون معها سرقت عمهوج يأخي الكريم هذه القصيدة انا اول ماقراتها في منتدى تقني لاعلاقة له بالشعر
مكتوب انا ياخبلة من حرب !!!!وشدني التغييرو كيف الحربي يفتخر بعمهوج وعرفت انالامر فيه شي
فبحثت عنها ووجدتها في مجالس حرب تحت عنوان انا يابنت من حرب ....ووجدت عناك عضو ينكر في رد له ويقول لا لا لا هذي سرقة والقصيدة لعتيبي لكن وجدنت انه انطرد من الادارة ومكتوب تحت اسمه bandd!!! وبقيت الردود يشكرونه ومافيه احد نبه سواء من الردود او الادارة ! ثم رجعت مره اخرى ووجدت منتدى الوهوب من حرب نفس التحريف ونفس الردود شكر و نفس الشي مااحد رد ونبه ................يعني أكثر من منتدى لحرب تسرق فيه القصيدة بشكل واضح ويتعدى فيه على حقوق الناس ومع هذا كله القصيدة نقلوها للمنتديات الاخرى غير القبلية بهذا التحريف
ثم وجدت ان نفس الشاعر في احد منتديات عتيبة ينوه انه انسرق ويذكر ان القصيده له وهذا شي طبيعي ومن حقه لكن كون الحربي <<<وقلت حربي لانه قال انا من حرب في منتديات حرب <<<كونه يتعدى الا انه يسطو على قصيدة عتيبي ويحرفها ويفتخر بها بين ربعه ويشكرونه ويقرونه فهذا فيه انه يستغبي القراء ويستغبي العضيان لانه افتخر بشي من تاريخهم وحنا نعرف ان تاريخ حرب فيه مايكفيه لكن هذا الفعل لايفعل الا سفيه يجب ان يقوم عليه العقلاء لا انهم يسكتون عنه ويقرونه

بصراحة انا ابي ادارات المنتديات اللي حصلت فيها السرقة ينبوهون انها مسروقه ويطردون السارق ويشهرون به لا العكس لأن بصراحة السارق سفيه وغبي ولايقره على فعله الا مثله
وأنا اعرف ان في حرب عقلاء كثير لكن المشكلة انهم مايردعون سفهائهم ويمنعونهم عن الغلط يعني سنتين كاملات !! وهالسرقة تروج في النت وفي المنتديات لاحول ولاقوة الا بالله
بصراحة انه مايكفر عنها الا ان المنتديات اللي روجت للسرقة تعتذر للشاعر الاصلي ولعتيبة وتنبه انه القصيدة حصل فيها تحريف وسرقة وتطرد العضو الي روج للسرقة وتثبت هالاعتذار سنتين كاملات في الصفحة الرئيسية

[راكان]

يعلم الله انني سعيد جدا بما قرأته هنا

واشكر الاخوه سيف العضيان & والاخ اع العرف

على دماثة اخلاقهم واصالة ذاتهم ؛ ولايهون بقية الاخوه ولكل من له مداخله هنا




.




اخوكم

محمد العضياني


.