تسجيل الدخول

مشاهدة النسخة كاملة : يالربع افزعولي

ابو وايل
29-Apr-2003, 12:28 AM
اخواني الاعزاء
كتبت هذا الموضوع وانا ابحث عن موضوع قديم
اخواني اول ما سجلت في المنتدى قريت موضوع عن الشاعر خالد الكسر الله يبيح منا ومنه ........ وكانت معلومات كاملة عنه ...
وانقطاعي عن المنتدى لفترة شهرين بسباب الوظيفة اخرتني عن المشاركة في ذلك الموضوع ...
والان ابحث عنه ولم اجده ........
فمن عنده معلومات سيرة الشاعر خالد فليتفضل يكتبها لنا لانني من المعجبين بقصايده الرد والغزلية

ولكم خالص محبتي وتقديري
ابن مشيب
29-Apr-2003, 01:01 AM
ابشر اخوي هذي قصيد لة على هذا الرابط:
http://www.otaibah.net/m/showthread.php?s=&threadid=2616
ابن مشيب
29-Apr-2003, 01:03 AM
وهذة قصيدة اخرى:
http://www.otaibah.net/m/showthread.php?s=&threadid=2630
ابو وعيل
30-Apr-2003, 01:08 PM
السلام عليكم

ابشر والله ولا يهمك


نبذه عن شاعرنا

خالد بن عقاب الكسر ألمرشدي
ولد في كبشان في عالية نجد ورافق ألأمير عبدالعزيز بن مساعد أمير حائل عاش حياته فقيرا" معدما"توفي عام 1400هـفي شهر محرم وعمره 45سنه ولم يتزوج

من قصائده
يامل قلب بين ألأضلاع ماجي==موجة خفيف الريش في يوم عجه
ونة قريص مالقا له علاجي ==سم الحنش من عكف الانياب مجه
وعزاه ياقلب طواه الخلاجي==ولا بان له من غض ألأنهاد حجه
الى أن قال
أيا شراب الزنعبوط الهماجي==وأيا المطر قبل الرواعي ترجه
وعزي لمن مثلي لمثله يراجي == وعليه قفل الباب عسر مهجه
ويقول في قصيدة أخرى
ألله من قلب نهيته ولا طاع ==يلعب به الهاجوس لعب المنازيع
متحير بأمره غدى شمله أمزاع==صبر جميل ويرجع القلب ويطيع
قفى تجره خاضبت روس ألأصباع==أم الثمان الضيقات اللواميع
وقرونها من فوق ألأمتان شراع==ولا هي من السرد الطوال النعانيع
عيوا بها عني قليلين ألأسناع==أسباب ساس البغض ماهم طماميع
أدعي عليهم والدعا حذف مقلاع==ادعوا معي عسى تصيب المقاليع
أرجي عساهم للبلاوي وألأوجاع==من كل صادوف يجيهم قواميع
الله يعرضهم من الروس ألأشعاع ==ذرية من محكمات المصانيع
دخانها مثل القبيسي اليا انداع==تاخذ على اطرافهم بضع اسابيع
تلقا ألأوادم هاجمين وصراع==بس الجماجم كالزبيدي مصاليع
وله غزليه أخرى يقول فيها

كنت آخذ المرقاب عصر ومغباش ==ولا شفت به زود عن اللي لقيت أمس
الله من قلب عليه البلا جاش == عده على جمر الغضا حامسه حمس
على حبيب صار للعمر حشاش==اللي طواني طي سيم على جمس
لاسلهمت بعيونها نصف ألارماش ==تنظر بحمر خدودها كامل الخمس
انعم من الديباج وابيض من الشاش ==واحمر من التفاح وانور من الشمس
واصفى من الجوهر به اللون يهتاش ==واطرى من الياسين تجفل من اللمس
وله غيرها

الله يابرق سمر حال دونه ===ناس حدوني عن حراويه لانصاه
يامل عين كن يلعب بنونه===راموس لاح بداخل الجفن واعماه
أمس الضحى لي ماقف تعلمونه===حار القدم في ماقفي ماتعداه
اخيل براق تلاعج مزونه ===ياليت من يقطع ظما الكبد من ماه
اهاضني ورع ضواحك سنونه===در وياقوت تضمه شفاياه
تكفون ياهل الورع لاتنهرونه===خلوه ياقف لين يكمل مراعاه
الف صباح الخير قزت عيونه ===والف صباح مفلجات ثناياه
والف صباح الخير صفة قرونه===والف صباح الخير وصفه وحلياه
زملوق عشب ناعمات غصونه===من وقع سيله ماوطت به رعاياه

وله قصيده مشهوره يرد فيها على أحد الشعراء الكويتيين لاأحفظ منها سوى مقدمتها من يعرفها فلا يبخل بها علينا وهي التي يقول في مقدمتها
قم يانديبي تولم بلا تيسير ===ياعلك من ممشاك هموز بلا مرجاع


___________________


وهذي جميع مواضيعه الي بالمنتدى :

http://www.otaibah.net/m/showthread.php?s=&threadid=2630&highlight=%C7%E1%DF%D3%D1

http://www.otaibah.net/m/showthread.php?s=&threadid=2774&highlight=%C7%E1%DF%D3%D1

http://www.otaibah.net/m/showthread.php?s=&threadid=2616&highlight=%C7%E1%DF%D3%D1
ابو وايل
01-May-2003, 08:02 AM
ماقصرتو يا اخواني
ابن مشيب انا اعرف قصيدة وانت الله يهديني ويهديك استعجلت مافهمت قصدي
ما قصرت يالغالي
اخوي ابو وعيل تسلم يمينك يالغالي واللي ابيه سيرته فقط
اما قصايده يا اخوان اعرفها وعندي شريط كامل عنه ( شريط مسجل ) فيه الرد والمدح والغزل
اما قصيدته الرد على الكويت ابجيب منها قليل :
عسى طايرات الميج من قطع صغار
جيم واحد وعشرين من صنع روسية
جيم واحد وعشرين في حكمت الطيار
عليها سلاح الحرب من روس ذرية
الى اخرها وهو يهاجم المملكة بجمال عبدالناصر وعبدالحكيم عامر المصارية ولا عنده سالفة
ورد عليه خالد الله يرحمه يقول :
الا يانديبي قمت تولم بلا تيسير
لعلك على وجهك هموز بلا مرجاع
على صنة البدعة على منهج التطوير
صنعها خبير الروس تبحلبها الصناع
سفينة فضا تصلح للمشي والمطير
عليها من الهندوس كبتن طويل ذراع
لها بالسما جنحان واليا مشت جنزير
على شان ماتختل في حوزة الميقاع

الى اخر القصيدة.....
وله قصيدة يتشره فيها على امير حايل وهذي قصيدة طيبة يقول فاولها :
ياميري ياللي في جبل طي مرتكي
على منصب ن خمسين عام ن مواضبه
قضيتها بالعز والمجد والثنا
في ديرت ن حسادها عنك هايبه
ياميرنا ماقدرتنا قدر غيرنا
الله يجنبكم حوادث مصايبه

الى اخرها والقصيدة ممتازة

وتوجد قصايد خالد في محلات الشعر والمحاورة والصوت واضح
اشكركم يا اخوان على المساعدة وعزالله ماقصرتو


اخوكم ابو وايل
ابن عاصم
03-May-2003, 04:50 PM
وماقصرت يابو وايل


علي الاضافه الجميله




وبيض الله وجيهكم جميع
قف امامك عتيبي
13-Sep-2007, 10:24 PM
مشكووووووووووووووووور ولاهنت وتقبل مرورك
1
1
1
1
1
1
اخوكم: سعود بن سالم الدغيلبي