المساعد الشخصي الرقمي

مشاهدة النسخة كاملة : دنيا عجيبة بها الأمثال ممتدة


ابـن نـعـيـس
17-Jun-2006, 04:33 PM
دنيا عجيبة بها الأمثال ممتدة



الرفقه اللي تبين بموقف الشدّه=ما هيب حكي يردد ما له افعالي

والضحك وقت الرخا يبين لي حدّة =حده بوقت الشدايد واقف لحالي

والصاحب اللي يبدي حاجتك بدّة =ليا اعتلى بطيب خلك بالوفا عالي

وان جاك راع الردى فخره فعل جدّة =مالك لزوم بفعل الجد والخالي

الا ليا صار طيّب يرفعه عدّه =ترى الحسب يرفع الرجّال والمالي

والقصر من غير ساس ادنى بلا هدّه =والنخل لا مات ما ينفع له ظلالي

والطيب زرع المراجل والهوى سدّة =كالسد دون السيول الجارفه حالي

احذر من العشق لو مزحه غلب جدّه =تراه عيب الرجال يبيد الاموالي

والقلب وسط الجسد له جزره ومدّه =مثل البحر في هدوءه عندنا غالي

احذر ترى هجمته لا جات مرتدّه =كالموج لا ارتج وسط البحر زلزالي

واحذر قريبك ترى الشيطان لو ودّه =اخطر من اعداك حيث انه لك موالي

تراه مثل الكحل في راس مرودّه =زله بسيطه يسيل الدمع همالي

واحذر لسانك عن اعراض البشر ردّه =كم زلت غيرت من حال لحالي

دنيا عجيبه بها الامثال ممتدّه =والمر فيها طغى طعمه عن الحالي

والدين يغلب عليه الكفر والردّه =والنفس وزن الرام بوزنها مالي

والناس تسعى ورا الاموال مشتدّه =لو كان في مكسبه للنفس اذلالي

واللي عرض في سبيل المال لك خدّه =لا تصفعه في زمان كله اهوالي

خله لوقت العجايب يمهله مدّه =يمكن تلاقيه شيخ يعطي الغالي

والمال عز الرجل وان قدمت يدّه =والا ليا شحت الله يستر الحالي

وانا لي الله والعمر انتهى كدّه =مالي رجا غير ستر الحال يا والي

ارجي من الله عفوه وازري يشدّه =لا بدل الرب بالمنزال منزالي

وبدل وسيع البيوت لحود مسودّه=وبدل حرير السراير طين وارمالي

وجاني سؤال بسيط ناسي ردّه =وانا منول حسبته اسهل سوالي

في موقف لو عرض لك ياابحر جدّه =والله ليقلب برادك زمهر صالي

واتقول وش صار في شاطيك واتعدّه =وتشهد على اللي لي بشاطيك مدهالي

يالله ياعالم الجهر وخفا سدّه=يامستجيب الدعا تقبل لي اعمالي

وبرحمتك ترحم اللي نفسه تحدّه =على المعاصي وقلبه داله سالي

هني نفس عن اللذات منصدّه=ماهمها غير يوم الحشر لا طالي

نفس بالاعمال والطاعات معتدّه=وبرحمة الله لها الجنات مقيالي


شعر/ عفاس الذيابي

عتيبي من الخرج
17-Jun-2006, 06:01 PM
ولله ونعم يا ابن نعيس
مشكور علي نقل القصيده
وبيض لله وجه عفاس الذيابي
تحياتي

منصور بن فهيد
20-Jun-2006, 12:44 AM
صح لسانك يابن نعيس ولسان شاعرها ..
ويعطيك الف عافيه على النقل الرائع ..
وتسلم يمناك يالذيب ..
تحياتي وتقديري..

الفراهيدي
20-Jun-2006, 04:14 AM
صح لسانك وسلم بنانك


يالمبدع ويالرائع يابن نعيس


والله يعطيك العافية


وصح لسان

الشاعر/ عفـاس الذيـابـي

ابـن نـعـيـس
20-Jun-2006, 01:57 PM
عتيبي من الخرج


ماعليك زووود


مشكوووور على مرووووووورك الرائع


تحيااااااااااااااااااااااااااااااااااااتي

ابـن نـعـيـس
20-Jun-2006, 01:58 PM
النويري


صح بدنك والله يسلمك


مروووووووورك نور الصفحه يابن العم


تحيااااااااااااااااااااااااااااااااتي

ابـن نـعـيـس
20-Jun-2006, 01:58 PM
الفراهيدي


صح بدنك


مروووووووووووورك نور الصفحه يالغالي



تحيااااااااااااااااااااااااااااااااااتي

البدر2006
20-Jun-2006, 02:05 PM
صح لسانك يابن نعيس وصح لسان الذيابي

ابـن نـعـيـس
20-Jun-2006, 03:06 PM
البدر


صح بدنك


مشكووور على تواصلك


تحياااااااااااااااااااااااااااااااااتي

الأمــير
27-Jun-2006, 09:53 PM
اشكرك على هذه المشاركه الجميله


وشكــــــرا 00000






اخـــــوك
ذيـــب الحنــــابج

ابـن نـعـيـس
02-Jul-2006, 08:59 PM
ذيب الحنابج


الشكر الاول والاخير لمرووووورك الرائع



تحياااااااااااااااااااااااااااااااااااتي