محكمه [الأرشيف] - الهيـــــــــــــلا *** منتدى قبيلة عتيبة

شاعر روق

19-Mar-2006, 10:57 PM

الوليد العتيبي

19-Mar-2006, 11:03 PM

السلام عليكم ورحمة الله وبركاته

صح لسانك يا شعرنا انا في صفك

شد الحزام والخصم على الصدام

شاعر روق

19-Mar-2006, 11:07 PM

وعليكم السلام يالوليد

ولا يهمك شد حزامك بس والزم الصف لايطيح

مرزوق حمدان العتيبي

19-Mar-2006, 11:10 PM

علمو مرزوق ياالربع يحط شاكوش كبيرفالايقونات محتاجينه فالمحاكمه

ههههههههههه

حضرة الطوفان حاضر وانا عندي دواه= وان نشدته ويش ترجع يقول ارجع ورى
مار انا الليله نويت اذبحه وابحث خفاه=وان زعل يزعل ويضرب براسه في كرى

اي والله محكمه يابو سعوود
يالله انك تعين المتهم...
..
الطوفان ان كان تبغى محامي ابشر بسعدك :)

الزبده انااا في انتظار ابداع معهود
من الطرف الاول والطرف الثاني
وياليل محلاك ياللي جمعت الاثنين .
..

الطوفان

19-Mar-2006, 11:11 PM

هههههههههههههه

حضرة الطوفان جالك وهذا اللي يباه****وانت تتهمني بتهمه وانا منها برا

ياابن ثعلي هيد لاتحسب الرجال شاه**** والزعل ممنوع في البيع ولا المشترا

الطوفان

19-Mar-2006, 11:14 PM

الوليد العتيبي شكرا على مرورك
وامسك الصف وانت ساكت تحياتي

الطوفان

19-Mar-2006, 11:17 PM

مرزوق العتيبي :هلابك

واذا احتجت لمحامي اعلمك بيني وبينك

هههههههههههههههه. لاهنت

شاعر روق

19-Mar-2006, 11:19 PM

انت مدري خارج البيت والا في ذراه=مار قل لي خارج البيت والا في الذرى
الحقيقه تنحر المتهم مثل الذكاه=وانت رجلِ متهم في جميع اللي جرى

الوليد العتيبي

19-Mar-2006, 11:27 PM

شاعر روق اللعب عندك

ون كان اسالفه فيها مسك

حلوق ناد علي وانا في الخدمه

شاعر روق

19-Mar-2006, 11:30 PM

ابو محمد وش رايك تلبس وشاح هيئة الدفاع عن المتهم

حتى تثبت ادانته او براءته وهات معك منظمه حقوق الانسان
|41|

شاعر روق

19-Mar-2006, 11:34 PM

تسلم يالوليد

هذا العشم فيك وان تسان شفت الامور فيها والا فيها

سلمتك ايه وانت سنعه هههههههههههههههههههههه

الطوفان

19-Mar-2006, 11:38 PM

كان تبغى تعرف الضلع ويش اللي وراه**** خلها بصرارها للنهار القشرا

والحقيقه واضحه والقمر فاأوسط سماه**** وان دريت عن الخبر علم اللي مادرا

الطوفان

19-Mar-2006, 11:45 PM

يدافع البلا الامور صار فيها محامين ومنظمة حقوق الانسان

لاويش رايكم تحولونها لمجلس الامن الدولي |189|

شاعر روق

19-Mar-2006, 11:47 PM

ههههههههه

يدافع البلا صدز

الجبل فالشام مرساه والا فالطراه=والله اني ودي انه من جبال القرى
مادرينا مار جيب الخبر واوكي علاه=قبل لايقضب جنابك نكير ومنكرى

فايز الشدّادي

20-Mar-2006, 12:10 AM

واصلوا

وازهلوا الصف

الليل الليل

شاعر روق

20-Mar-2006, 12:13 AM

فايز

وجودك مكسب يالقرم لاعدمناك

الطوفان

20-Mar-2006, 12:24 AM

الجبل منكم قريب ترى حذفت حصاه****ثابت(ن) فاأوسط قراكم عروقه في الثرا

وانت قمت تزاحمه تحسبنك من عداه**** قمت تلصقني مع الناس ملصاق الغرا

الايداء1

20-Mar-2006, 12:26 AM

,
,
هههههههههه

الله

علاكم ياشاعر روق

ماخلصنا من محاكمة صدام

وتبانا نحاكم الطوفان ؟

تراي محامي عن الطوفان ضد الوليد

أشوفه وده يصير محامي عنك |189| |189|

الوليد العتيبي

20-Mar-2006, 12:33 AM

ابو تركي ترى امك متبا تخسرك

العن الشيطان واسترح مكانك

الطوفان

20-Mar-2006, 12:35 AM

هلا بك يابو تركي

صدقني لو جابو قضاة العالم كله مايثبتون علي شي والوثائق موجوده ومحفوظه

بس نباها محاكمه للطرفين وتكون المحكمه عادله
هههههههههههههههههه.

شاعر روق

20-Mar-2006, 12:36 AM

بس حدد موقعه شرق والا في حماه=لاتجيني بالكلام البعيد المفترى
جاب لي علمه وميزت وجهه من قفاه=شفت فيه وسوم خصمي ورديت البرى

شاعر روق

20-Mar-2006, 12:40 AM

ابو تركي

ههههههههههه

باقي محاكمة الاخ الشقيق برزان التكريتي

عليك محاكمته <<<مايقصد مرزوق ابد

وتبا تظلي مثل قضية الدجيل

متذوق الشعر

20-Mar-2006, 12:43 AM

ايه تحاكموا تحاكموا

ترانا متابعين وش نتيجة الحكم

الطوفان

20-Mar-2006, 12:48 AM

موقعه من كشب يمشي الى جبال السراه****اكبر الضلعان بالحجم والله اكبرا

كله علمه مدح ربعه ومدح اللي جناه **** ماتسمى بااسم ناس يقال ويذكرا

شاعر روق

20-Mar-2006, 12:55 AM

والبعير اللي رقا الضلع ويش انهي حلاه=ويش وسمه عجل انهج ترى ليله سرى
بس جاب الهرجه اللي تبا ترجع علاه=بين عكفان الشوارب يحفّه مزدرى

شاعر روق

20-Mar-2006, 12:58 AM

فاقد غرام

مرحبا واهلين وينك ياشيخ طول هالغيبه لاتقاطع يالقطوع

ونتيجه المحاكمه تشوفها فالبيان الختامي للجلسه

علي فلاح العضياني

20-Mar-2006, 12:58 AM

الله الله

لي جات من القاضي من تقاضي

تحياتي

شاعر روق

20-Mar-2006, 01:00 AM

هلاوين يالفالح

اسفرت وانورت بحضورك

ياغالي

اخوك

الوليد العتيبي

20-Mar-2006, 01:05 AM

شاعر روق

برزان (مرزوق)

خله عندي معي مايفر وانا ابو خالد

الطوفان

20-Mar-2006, 01:11 AM

انت غوص البحر يالان تاصل منتهاه****وان وصلت المنتهى كل شيء(ن) ينقرا

بس هات الحق في مانسبته ياهذاه**** وان جحت الحق قمنا وقطعنا العرا

شاعر روق

20-Mar-2006, 01:11 AM

هاعندكيه يابو خالد لاتخليه يفر شبر

^

^

<<<<<يقول يالله تحط حيلهم بينهم

شاعر روق

20-Mar-2006, 01:19 AM

البحر ماينشرب والسبب في ملح ماه=يوم ماودهّ جميع الحقايق تنشرى
البلا جانا من اللي بدو ضلع الرماه=واصبحوا علة نحر فالنهار الاكبرى

الايداء1

20-Mar-2006, 01:30 AM

الجبل منكم قريب ترى حذفت حصاه****ثابت(ن) فاأوسط قراكم عروقه في الثرا

وانت قمت تزاحمه تحسبنك من عداه**** قمت تلصقني مع الناس ملصاق الغرا
,
,

أفاااااااااااااا ياشاعر روق

والله يالطوفان أنه خطير ... لايكون ؟؟

تدري مادري عنه المحاكمه فأول المداولات

ويكبر القمر ويبين ... لكن الوكاااااااااد أن الرجال

حولكم ياشاعر رووووووق ,,,

شاعر روق

20-Mar-2006, 01:33 AM

ايه ماهوب بعيد

يابو تركي بس الرجال يحوص ويراوغ

وخايف يلحقعه شي من اللي خبرك

هههههههههههههههههههههههه

الطوفان

20-Mar-2006, 01:35 AM

بي حق أتقوم تظهر عتيبي من سراه**** ثم تجمعله حشودك جنود وعسكرا

والله انك لو تبا دسها تحت العباه **** مانفكك لين نركبك حق(ن) يقهرا

الايداء1

20-Mar-2006, 01:39 AM

ايه ماهوب بعيد

يابو تركي بس الرجال يحوص ويراوغ

وخايف يلحقعه شي من اللي خبرك

هههههههههههههههههههههههه
,
,
ههههههههههههههههههههه

ماعلاك ياشاعر روق

ربعن تعاونو ماذلو .. أنت من عندك وأنا من عندي

ونبا نطرح الرجال ,,,

الايداء1

20-Mar-2006, 01:41 AM

بي حق أتقوم تظهر عتيبي من سراه**** ثم تجمعله حشودك جنود وعسكرا

والله انك لو تبا دسها تحت العباه **** مانفكك لين نركبك حق(ن) يقهرا
,

هههههههههههههههه

الرجال ماعد هو بعيد

ويعلمنا ....

شاعر روق

20-Mar-2006, 01:48 AM

انته اللي مظهر(ن)نفسك وشري تباه= قلت انا مالي يابن روق فعتيبه سرى

وانت مكتوبك ترى كل رجالٍ قراه=والحقايق واضحه ماتلحفها الفرى

الايداء1

20-Mar-2006, 01:54 AM

,
,
أفاااااااااااا

ياشاعر روق الرجال

يبا الحق منك يوم حطيته مطاري

وأظهرته من عتابه ,,,

شاعر روق

20-Mar-2006, 01:59 AM

مانيب اللي حطيته هو اللي حط نفسه يوم يحدد منازله

ويجحد جميع فعولي وانت ارجع للمحاورات السابقه

هالحين الحق لي انا الرجال جاحدني فاللي سويته كله

ويقول انت ماسويت شي وانا مسوي بك ويعد فعول مطار

والمحاوره تشهد يابو تركي

هههههههههههههههههههه

الطوفان

20-Mar-2006, 02:03 AM

انت اللي جيتني معتدي فيك اللواه**** بعدها سميتني بااسم مني منطرا

والوثايق جاهزه ومحفوظه ياللجناه**** لاتلف ولاتدور الكلام مقررا

شاعر روق

20-Mar-2006, 02:15 AM

انت رجالٍ تسنويت بعلوم الرعاه=قلت انا في اهدان وهدان وينه ياترى
لا تحاول تجحد العلم من عقب الصلاه=بعد غربك زاد عن قيس حجمه وانفرى

الطوفان

20-Mar-2006, 02:19 AM

الامور تعدت القصيد يالربع:
وبناء عليه ارجعو الى أول محاوره له معي

وتحديد الديره اللي يقولها شاعر روق

اناحددت ديرة عتيبه وهي كما يلي

اناربعي منازاهم من الحره الى الصمان ****محاربة الدول مامثلها سبحان خالقها

وعتيبه منازلها من الحره الى جبال العارض والجبل اصم وجمعها صمان وهذا في اللغه يسمى التشبيه
ثانيا مطير مع احترامنا لها لم تحارب الدول ولكن عتيبه حاربت الترك وحاربت ابن رشيد وحاربت دولة الاشراف في الحجاز.
الثانيه: اتحدى شاعر روق ان يذكر بيت واحد يذكر فيه اتتي نسبت نفسي للمطران ولكن هو من نسبني اليها والاخرين بنو علىكلامه . لذلك من المرؤه في مثل هذه الحاله ان لااجعله يتمادا على اناس نسبني اليهم ظلما وبهتانا. فرددت على ابياته بما يناسبها. للاهميه جرى التنويه

تركي الحربي

20-Mar-2006, 02:21 AM

الله الله محاوره في قمة الروعه

صح لسانك ياشاعر روق وصح لسانك يالطوفان

ونعم بالطوفان وبعتيبه جميع

لكن لقب حرابة الدول ماهوب لعتيبه

تقبلوا تحياتي

شاعر روق

20-Mar-2006, 02:27 AM

لااااااااااااااااااا

يالطوفان اذا كان الامر كذلك وشفتني مخطي من المفروض انك توضح ولا تسكت وانت اللي تقول اذكرالبيرق وجرت محاوره بينك وين اللطام على مااذكر وقال لك الشي هذا وسكت ومن جورك على المطران لم توضح مع ان الايداء تساءل وانت سكت والساكت عن الحق شيطان اخرس

ملاحظه/ انا بيني وبينك قاف وانت سويتها خطبه من المفروض انك تكمل او تعتذر اذا عجزت الاكمال
او تصيغ مافي خاطرك في بيتك اذا امكنك ذلك وشكرا

شاعر روق

20-Mar-2006, 02:39 AM

هذا الرابط يشهد

ياناس فيه عتيبي يقدر يقول مثل هالكلام انا مااظن

نعم اذا كان غير عتيبي يحق له ويقابل بالمثل وهو ماقوبلت به انت
http://www.alhaila.net/m/showthread.php?t=22526

حججنا ثابته سيسانها أثبت من جبل ورقان
لكنــك لا تـهل بعبرة في الصــدر خانقـــها

قضينا منكم اللازم ونصفقها على العجمان
ندور غيركم عربـان نطبـخها ونســــلقها

زمــان فـات ذوقنــا العدو الذل والحقـران
بضربات الحسام اللي صليب الروس تفلقها

تعين في الزرايب وانظر الحره وشوف هدان
وخلك من علوم تضـــحك العالم وتشــفقها

انـا في دولتين اقصى حدودي مع حدود ايران
وبعض الناس محمية عفيف اقصـى مناطقها

انا مبغاك يوصــلك الزعل للزور والبهتــان
وانا من عزوة(ن) بلحيل هاويها وعاشقها

شاعر روق

20-Mar-2006, 02:45 AM

تركي الحربي

مرورك شرف لاخيك

والحقايق واضحه امام اعين الجميع

والكل يشاهد ومحاوراتي معه خير شاهد

تقديري لك

الطوفان

20-Mar-2006, 02:47 AM

معركة هدان هذا الكلام اللي نباه**** يوم نصر الاد روق(ن) بسيف وخنجرا

مير اشوفك تخلط العلم هذا مثل ذاه*** مابقيلك غير تبرك لحق (ن)مثمرا

شاعر روق

20-Mar-2006, 02:59 AM

خابرِ نصري وفعلي جميعه ياهذاه=ياخطيب ضيع العلم فوق المنبرى
بين وبينك رجالِ لهم مذهب وجاه=تقضي الحق وتصير الاوادم صدرا

شاعر روق

20-Mar-2006, 03:06 AM

عزيزي الطوفان تصبح على خير

الطوفان

20-Mar-2006, 03:07 AM

ايها الاخوه
كل اماذكره شاعر روق اعلاه حجته عليه وليست حجتةله
1- انا لم اذكر انني مطيري في اي بيت من الابيات (البته)
2-اناأتكلم بأسم قبيلتي بصرف النظر عن حذفي من قبل الشاعر الىقبيله اخرى
3-بعض ابياتي تخص شخص الشاعر المقابل وليست القبيله
4-المواقع المذكوره كلها لقبيلتنا وليست عليها فهدان معروف لمن النصر والحره حصلت فيها معركة العصلاء والمبرك
5- حدود ايران لاتصل اليها لامطير ولاعتيبه ولكن في الكويت عتبان ومن جميع القبائل
6-شاعر روق لم يذكر البيت التاي واخره(لكنك ماتعرف الناس ماتعرف حقيقها) وهذا توضيح لم يفهمه

اما قولك بانني سويتها خطبه انت ايضا من بداء وهذا مشاهد عند ردك على الايدا1 تركت القصيد وقمت تلقى الخطب . ولك التحيه

الطوفان

20-Mar-2006, 03:12 AM

وانت تصبح على خير

وراعي الحق لاحق يا شاعر روق وحطك لي مطيري بدون وجهه حق ولاكتاب مبين مايعدي كذا .
لك تحياتي

الطوفان

20-Mar-2006, 04:03 AM

الحاقا لماسبق ايها الاخوه هذه بعض ابيات من محاورتي مع اللطام

انا ربعي هلا الطالات دايم ترجح الميزان
وظنك يالعتيبي عارفا ربعي باساميها

وقد وضحت انني روقي ( الاد روق مرجحين الموازين)

مادام انك بليد القلب قلبك سارحا ولهان
تمرك كلمتي مـرات ماتفـهم معانيــــــها

وفي هذا أعتب على الشاعر انني أوضح له ولم يفهمني.

وهذا ايضا بيت مع مرزوق العتيبي أوضح من الشمس

انا تراني قريب منك والعرق أصيل****ولا خبرت الذيابه تاكل عضودها

وهل بعد هذا التوضيح توضيح
الشعر ليس سواليف مجالس ولكنه معنى عميق ورموز وكل شاعر هو وفهمه .

ماجد الهذلي

20-Mar-2006, 04:19 AM

الدم واااضح عليه

إنه عتيبي

اناربعي منازاهم من الحره الى الصمان ****محاربة الدول مامثلها سبحان خالقها

من هذا البيت أنا عرفته في المحاوره السابقة

محاوره رائعه

الطوفان

20-Mar-2006, 04:46 AM

الله ينور عليك ياماجد الهذلي عديت النور

ايو الله انها يعرفها كل شاعر يدقق في المعاني وشاعرنا (شاعر روق) تسرع في الهجوم على الاجاويد
وهالحين أبن عمنا يبي يركبنا الحق الله يهديه .

شاعر روق

20-Mar-2006, 01:12 PM

الله يجزاك بالخير يالطوفان محاورتك مع اللطام ما تشهد لك انت تمدح قبيله ولم تخصصها

وانا امدح عتيبه واجيب فعولها وانت تقول

قضينا منكم اللازم ونصفقها على العجمان

هذا شطر من محاورتك وانا اسالك بالله فيه عتيبي غزى عتيبي ياحبيبي وبيتك هذا ينقض كلامك

مع ان مرزوق محاورتك انت واياه كان ضدك حتى اخر المحاوره يوم استاذنته وقلت

انا تراني قريب منك والعرق أصيل****ولا خبرت الذيابه تاكل عضودها

وهذا اللي خلاني اطلبك لانك نقضت كلامك اللي معي ومع اللطام ببيتك اعلاه

اما ان لك حق فانا اقول حتى لو اني قلت انك مطيري فما فيها شي

ليه مطير ماهم عرب ولا فيهم رجال يوم تطلبني الحق فيها؟؟؟

لكن انا اعتب عليك يوم انك ماتسمي نفسك وتقول انا وانا ولا تقول انا عتيبي

وتعد مايكون ضدنا

اخيرا انا اشك في انك عتيبي الى الان

مهما قلت

والرجال اللي يعرفون يقرون كلامي وكلامك ولا يحتاج لها توضيح اللي يفهم يعرف انك ضد عتيبه في كلامك

واذا قلت اني اقصدك بعينك فانا اقول انا افتخرت بما فعلت قبيلتي وانت قلت لم تفعل ذلك وانما قضينا منكم اللازم ياعتيبه

شكرااااااااا

ذيب الحرة

20-Mar-2006, 01:33 PM

اسمحوا لي يالربع اوضح بعض النقاط

اولا انت يالطوفان محاورتك مع شاعر روق كانت كلها تعداد لمفاخر القبيلتين اقصد مطير وعتيبه وانت كنت ضده

ثانيا انت في محاورتك مع اللطام كانت مبهمه ومحاربة الدول ليست عتيبه وقلت لشاعر روق ان النجيل

مافيه الا الحصاني عندما قال انه طردك من النجيل وهذه القصه معروفه ومشهود بها لصالح الروقه

ورد عليك هو بان الحصان هي الان في الصالحيه فاخذت في الدفاع والمحاوره موجوده الا الان

ثالثاانت في محاورتك مع الرشيدي بديت بالسلام ولم ترحب ودام انك عتيبي وعميلك اجنبي مفروض

ترحب ماتسلم وهذه النقطه ضدك

رابعا جميع مايدور في المحاورات السابقه يكون محسوب عليك لالك وشاعر روق ماقصر كان خصم عنيف

وشكرا لكم جميعا

وصارم ولم يتانا

مرزوق حمدان العتيبي

20-Mar-2006, 01:37 PM

....
.

الطوفان وشاعر روق
محاوره من الوزن الثقيل سعدنا واستمتعنا
بجميع فصولها .... وهذا هو الاهم ..
صحت السنتكم ... وانتم اخوان ولا فيه داعي لم حدث بعد ذلك
فالقصد اللعب والوناسه .... ويجب ان يقف الموضوع عند هذا الحد
شكرا لكم والله يعطيكم العافيه ... وحق لنا ان نفتخر بوجود كم بيننا
...
اخوكم ومغليكم ....

الايداء1

20-Mar-2006, 03:37 PM

,
,,

,,,

صحت السنتكم يابني عمنا

فوالله أنه لفخر لنا جميعاً أن يكون

في هذا المنتدي أمثالكم من الشعار

المبدعين الذين يتحفون قسم المحاورات

الشعريه بجودة مايقومون به من محاورات

وحل رموز معانيها والفتل والنقض فهنيئاً لكم

بهذا المنتدى وهنيئاً لنا بكم وبأمثالكم ,,,,,

لكم مني كل الود ,,,

الطوفان

20-Mar-2006, 04:38 PM

الاخ مرزوق العتيبي
شكرا على ماأبديته تجاهنا من نصح ومتابعته وحسن اداء تدل على معدنك الاصيل مع انك شريكي فى المحاكمه حسب ماقدمته لائحة الادعاء ولكن ابشرك انها مرت عوافي . لك خالص تحياتي