أرسل لابن ثعلي سلام مصفا [الأرشيف] - الهيـــــــــــــلا *** منتدى قبيلة عتيبة

الطوفان

12-Mar-2006, 09:48 PM

ارسل لبن ثعلي سلام(ن) مصفا
وأشعله النيران لين يتدفا
وابكي على قبره لمنه توفا
واقرا عليه الفاتحه والتحيات

كان شاعر روق يبغى كلامي بأختصار***شبت النيران والنار من شبابها

بعد مامشـــيتها واضـــــحه مثل النــــهار*** كيف ماتحسب لذيك الامور أحسابها

الوليد العتيبي

12-Mar-2006, 09:54 PM

الطوفان

12-Mar-2006, 10:01 PM

الوليد العتيبي
،
،
حياك الله وشكرا على مرورك.

بعيـد الهقاوي

12-Mar-2006, 10:09 PM

الطوفان

12-Mar-2006, 10:17 PM

تسلم أخوي بعيد الهقاوي وماعليك زود.
،
،
الله جيبه سالم وغانم.

شاعر روق

13-Mar-2006, 12:16 AM

وارسل لك الترحيب في وسط شاشه
وارميك في نارك سوات الفراشه
ياللي عظامك صارفيها هشاشه
نقرا عليك الفاتحة والتحيات
شب نارك وابشر انّا نزيد النارنار=واختصر والطيبه حظ من هو جابها
ماأدّرق عن وجهنا غير لابست الخمار=عن وجيه اهل الوفا تدّرق في بابها

الطوفان

13-Mar-2006, 01:01 AM

أنته بديت من البدايه تخبط
وأنته ثلاث أيام وانته مربط
والله مالومك جتك صدمه ومحبط
نقرأ عليك الفاتحه والتحيات

لوتدخل واسطه فيك صدرنا القرار***وأهل مكه يالعتيبي تعرف أشعابها

يدرق القناص ويحط للصيده ستار*** منه جاتك ضربة(ن)بين(ن) مضرابها

شاعر روق

13-Mar-2006, 01:22 AM

انا كويتك كويةِ في يمينك
وان كان ما فادت كسرنا يدينك
وان كان تقدر روح واقتص دينك
واقرا عليك الفاتحة والتحيات

عقب ماخليت لك عامر ديارك دمار=ماتبا شوفي ونفسك يهون اعطابها
انت يالقناص سترك ورى حيد الجدار=والاسود اليا بدى تفرسه بانيابها

شاعر روق

13-Mar-2006, 01:26 AM

الوليد

انارت الصفحه بحضورك ياغالي

لك كل الود

شاعر روق

13-Mar-2006, 01:28 AM

بعيد الهقاوي

ماعليك زود ياغالي

وحضورك غيرياذيبان

اخوك

الطوفان

13-Mar-2006, 02:08 AM

من يكعم المقرود يبغى القراده
حتى عبدها واتخذها عباده
لوكان ذبحه مثل ذبح الجراده
نقرا عليه الفاتحه والتحيات

والله انك ماتعرف اليمين من اليسار**** رحت في غيبوبة(ن) ماتروح اسبابها

مشكلتك عيونك اللي مضيعها العوار**** مير شيل الحمل وأهل الحسوس ادرابها

شاعر روق

13-Mar-2006, 02:23 AM

ماانته بكاعمني بهرج السماجه
اللي على مثلك تطاير عجاجه
والصقر ماهمه صياح الدجاجه
يقرا عليك الفاتحه والتحيات
والله انك ماتعرف الطوال من القصار=وان عطيتك جملةِ ماعرفت اعرابها
مشكلتنا في طيورِتشرّه فالحرار=مالها منقار ويغرّها مخلابها

الطوفان

13-Mar-2006, 02:47 AM

انا عليك بكل زينه مقدم
وانته على قولتك هاذي تندم
والله يالالا الحكم لنسيل الدم
واقرأعليك الفاتحه والتحيات

ياعسـاها من نصيبـــك خفا ولا جهار****من رجال احرار تفتل عليك اشنابها

واضعين العفش والبردعه فوق الحمار**** بالعصا تنساق يالو تهز اذنابها

الايداء1

13-Mar-2006, 02:51 AM

,
,
الطوفان وشاعر روق

طاروق له قيمته الشعريه

التي يبحث عنها الشعراء فلله دركما من شاعرين ,,,

شاعر روق

13-Mar-2006, 03:10 AM

مدحت نفسك بين الاجواد يافلان
ومدّاح نفسه عند الاجود طقعان
هذا مثل معروف من ماض الازمان
واقرا عليك الفاتحه والتحيات

من نصيبي كل جزله وقسمك شي غار=روح يم االحله اللي يحوم ذبابها
والجبل باسمه جبل مايهمه راس ثار=والله اللي يستر ام الخنا بثيابها

شاعر روق

13-Mar-2006, 03:14 AM

ابو تركي

نورت الصفحه بحضورك المشرف

تقديري

الطوفان

13-Mar-2006, 03:30 AM

هذه حقيقه قلتها واتحدا
ماهمني كلمة ردي(ن) تردا
وانا كما ضلع صعيب المعدا
واقرأ عليك الفاتحه والتحيات

روح واكل المـوز كله ولحقـه الخيــار****أف من بعض العرب شينن هندابـها

مبعدين عن النجس والنجس في كل فأر**** والكواكب مادرت عن نبيح كلابها

شاعر روق

13-Mar-2006, 03:47 AM

دايم ليا هبيت لي وجه رخمه
جوني على حسي كما البل هجمة
والكل منهم ماعرف قيس حجمه
واقرا عليك الفاتحة والتحيات
وانت روّح في طريقك واكل لك راس عار=والخباره خلها لاينوشك دابها
النجس فااهل النجس والعلوم الها مسار=ليت بعضات الاوادم تفك إعيابها

الطوفان

13-Mar-2006, 04:16 AM

والله يلو الزمك وانته لحالك
لاكسر يمينك ثم لاكسر شمالك
واطرحك فوق الارض واعطيك فالك
واقرأ عليك الفاتحه والتحيات

والله اني عارف انه نهايتك الفرار*** مير لاتعرض بضاعتك ياجلابها

انت مخلوق(ن) تهبدت وعلومك كبار*** مير طحت بلاابة(ن) قطعتك أذيابها

شاعر روق

13-Mar-2006, 04:31 AM

والله لو الزمك في اسفل مسيحه
اني لا اسوّي بك سواتِ مجيحه
وانهبك واترك ملبسك في مطيحه
واقرا عليك الفاتحه والتحيات
كان في راسك صوك وانت عن هذي مجار=هالوعد يابضاعةِ ماانتفع حلابها
هرجتك من كبرها مالها قيس ومطار=مير شل حملتك بالهون ياقلابها

الطوفان

13-Mar-2006, 04:50 AM

خابرك هاوي مير ماني بهاوي
ماهو باانا راعي العلوم الدناوي
روح وتلقى واحد ينبعاوي
وقرا عليك الفاتحه والتحيات

وأن لقيتك العلم برك وربع فالخضار*** خل باقي ربعنا تفتخر بنسابها

يازمان المهزله عشرت كل العشار**** مابقي الا نكحل عيونها واهدابها

شاعر روق

13-Mar-2006, 05:08 AM

المهزله ترجع على اللي بداها
والناس نعرف جودها من رداها
ناسِ على الشينات ربي حداها
نقراعليها الفاتحه والتحيات

وان بغيت العلم روح وتمرّغ فالغبار=دام ربعك تمترغ في ارضها واترابها
مابقى الا تقبس النار في خرم الجعار=كل حجة عندنا مايغيب كتابها

الطوفان

13-Mar-2006, 05:52 AM

روح مع الرس لاتجي خط شقرا
كل العرب تنظر وتفهم وتقرا
يوم ابلشونا ناس جوعا وفقرا
نقرا عليها الفاتحه والتحيات

انت قمت تنازع الموت جاك الاحتضار****طاحت الخيمه بعد ما قطعنا اطنابـها

من يخوض البحر الاحمر تهور وانتحار***ميرخلك عبرة(ن) لأجل ماتضرابها

شاعر روق

13-Mar-2006, 01:04 PM

وانته تحب الكعكبه لك زمانين
لكن انا ابا ادخلك ضمن المساجين
عساك تلقى مقسمك بين ثنتين
واقرا عليك الفاتحه والتحيات
احمد الله خيمتي كلهاعز وعمار=وانت طاحت خيمتك والسبب منسابها
عقب قيسنا لك الزيت في راس العيار=نارنا من حافها ياكله مشهابها

أبو حاتم

13-Mar-2006, 02:03 PM

شعراء قمه وستمتعنا بمحاوره تجاوزت كل الخطوط الحمراء ...

صحت السنتكم وأوصيكم بكفارة المجلس ..

ابن سهاج

13-Mar-2006, 06:11 PM

ابكم هذا ويش

الطوفان

13-Mar-2006, 10:41 PM

شعراء قمه وستمتعنا بمحاوره تجاوزت كل الخطوط الحمراء ...

صحت السنتكم وأوصيكم بكفارة المجلس ..

نعم أخي ابن الهيلا

اللهم أغفر لي ولأخي شاعر روق كل زلة لسان والله وحده يعلم ان القلوب نظيفه ولكننا فعلا انجرفنا كثيرا
وأخذتنا العزة باالاثم ولاحول ولاقوة الابالله.

شاعر روق

13-Mar-2006, 11:09 PM

ههههههههههههههههه

اخي ابن الهيلا

الشاعر اللذي يقفعر ويخشى مواجهة الشعراء ليس بشاعر حتى وان كانت المحاوره خارجه

عن بعض الاطارات المسموح بها

والشاعر الفحل هو اللذي لايضيره شي ابدا ومهما كانت نتيجة المحاوره

وانا واخي الطوفان محاورتنا تلك و جميع ماتراه فيها لايعبر عن مافي قلوبنا وانما تبقى الموده بيننا

مهما كبر الكلام وخير شاهد على ذلك رحابة صدر اخي الطوفان

وعسى الله ان يستجيب دعاءة ويغفر لنا ماتقدم من ذنبنا وماتاخر

اخيرا شكرا لك ابن الهيلا على هذا التنويه وهذا المرور

وشكرا لك يابن سهاج على حضورك

وشكرا لك انت ايه الصديق اللدود الطوفان وتقديري لهكذا صدر

اخوكم/ شاعر روق

الطوفان

13-Mar-2006, 11:34 PM

شكرا لك انت ايضا أخي شاعر روق على رحابة صدرك .

اما وصفك لي بالصديق اللدود فهذه نضع تحتها خطين ولعلك تراجعها في المستقبل

على العموم لك مني خالص التحيه.

اخوك : الطوفان؟؟؟؟؟؟؟؟؟؟؟؟؟؟.

شاعر روق

13-Mar-2006, 11:49 PM

اخوي الطوفان

والله ان لو انك عدوي اني لا اقولها بصحيح العباره

ولكن باب المزح والمداعبه وتلطيف الجو لا اكثر ولا اقل

وحقك علي

احترامي

الطوفان

14-Mar-2006, 12:01 AM

تســــــــــــــــــــــــلم اخي شــــــــــــــــاعر روق

اريحيتك وحسن سريرتك دليلا على معدنك الاصيل .

حفظك الله

الايداء1

14-Mar-2006, 09:14 AM

,
,

لله

دركما من شاعران

يتصفان بالأخلاق الحميده التي

ترفع من قيمة الشاعر أمام الآخرين

وتفرض أحترامه على الجميع وهذا الشيء

منطبق عليكما تما ماً بما أبديتموه من تسامح

لكل منكما ... فلله دركما مرةً أخرى ..

أخوكم