المساعد الشخصي الرقمي

مشاهدة النسخة كاملة : { شمـر اليـا قلّـت الحيلـه }


وليد الزراقي
01-Mar-2006, 10:05 AM
السلام عليكم ورحمة الله وبركاته

اخواني واخواتي

هذه قصه جميله قريتها بأحد المنتديات

عن كرم شمر ..



السالفه حدثت ايام حكم الملك عبد العزيز وكانت بداية حكم الملك غير مالوفه لاهل الباديه

لانوه منع المغازي وطبق الشرع على القاتل والغازي يعتبر سارق..

يعني اللاش غدى شيخ ماتقدر تقولوه شي ان لمستوه طبق عليك الشرع سواء حد قتل او سرقه ؟

وكان فيه واحد عتيبي جاي من نجد لديار الشمال لحاله على ذلوله المهم وهو يطب على "الدويد"

وهذي هجره بالشمال عند رفحاء وكانوا نازلين عليه الصلبه ولهم شيخ يقال له "منيف"؟

ومنيف هذا من رجال الشنيفي ، أمير لينه من هالزمان..

المهم ان عتيبي تعبان من الطريق وبكرته له مده ماشربت يوم اقبل على منيف وهو يطرده ؟

لاهو اللي اكرمه ولاهو اللي خلى بكرته ترد مع النياق!

زعل العتيبي ومشى وهو يطب على "عذفا" وهذي ديرة عند سكاكا واهله هم الشمروخ

يامار هذا نزل الشمروخ من الزميل من سنجاره من شمر وشيخهم "الجبيلي"

يقولون يوم وصلت الذلول على بيت الجبيلي وهي تتسفت بالرفة من شدة العطش والتعب

وراعيه عليه، حاول راعيه يطلعه ، ويحلف عليه الجبيلي ان يتركه كما هي .

وقم يالجبيلي ويجر الراويه عنده بالرفة ، ويشق جنب الراويه علشان تشرب وهي باركة بالرفة.

وهم يكرمونه ويقدرونه..

المهم ان العتيبي يوم مشى قال هالهجينيه وهي من الهجينيات المشهورات بالشمال وعند شمر خاصه..

يقول :-





يابكرتي وان جفاك "منيـف"

.................ترديـن عذفـا علـى ليلـه

وجهك على مكرمين الضيف

..................شمـر اليـا قلّـت الحيلـه

عند "الجبيلي" يطيب الكيـف

...............وانتـي تريحيـن ياشعيلـه

عدك على بركة(ن) بالصيف

...............من مزنة(ن) زايد(ن) سيلـه

لو ندي شيخ الصلب مايخيف

....................وراه سـطـه وترزيـلـه

مار البلا اللي حكم بالسيـف

..................عقبـان نجـد تراعـي لـه


تحيتي

منصور بن فهيد
02-Mar-2006, 01:18 AM
حي الله وليد وحي ماجابه

دائما متألق في اختياراتك للمواضيع

لاهنت يالغالي وقصه وقصيده فوق مستوى الابداع

بانتظار مشاركاتك القادمة بشوق

تحياتي وتقديري

@ عاشق الهيلا @
02-Mar-2006, 02:48 AM
مشكووووووووووور ياوليد
ويعطيك العافيه

وليد الزراقي
02-Mar-2006, 03:17 AM
حي الله وليد وحي ماجابه

دائما متألق في اختياراتك للمواضيع

لاهنت يالغالي وقصه وقصيده فوق مستوى الابداع

بانتظار مشاركاتك القادمة بشوق

تحياتي وتقديري
النويري
تشكر على التواصل
تحياتي الخالصه

وليد الزراقي
02-Mar-2006, 03:21 AM
مشكووووووووووور ياوليد
ويعطيك العافيه
الشكر لك
تحياتي

فواز الشيباني
02-Mar-2006, 06:02 AM
اخي وليد الزراقي

الله يعطيك العافيه
على القصه والقصيده الجميله

وليد الزراقي
04-Mar-2006, 09:25 AM
فواز
تشكر على المرور
تحياتي

ابـن نـعـيـس
04-Mar-2006, 04:07 PM
لاهنت

وبيض الله وجهك


تحياااااااااااااااااااااااااااااااااااااتي

وليد الزراقي
08-Mar-2006, 11:20 AM
لاهنت

وبيض الله وجهك


تحياااااااااااااااااااااااااااااااااااااتي
ابن نعيس
ووجهك
تحياتي

فواز الشيباني
08-Mar-2006, 12:22 PM
وليد
بيض الله وجهك على هالرائعه
لاخلا ولاعدم يا غالي