ما له الا شاعرٍ مثل مرزوق

[انور الشيخ]

السوق بيع ومشترى مع تاجر السوق = ما له الا شاعرٍ مثل مرزوق

انتم لكم حق وعليكم ترى حقوق = ياليل هيا واسر ياليل هيا


اشعب ذلولك ترى للخيل ميدان = وان كبرت حمولها قابل جملها

حث المطايا وهات العلم يا فلان = نبغى المواقف تبين من بطلها

[مرزوق حمدان العتيبي]

ياللي طلبت الحق مالك مشاريه=
لنك طريق الحق مخطيه مخطيه
ياشاعرٍ ضاع الوزن في قوافيه=
ياليل هيا واسر ياليل هيا

حنا هل الكايده للخيل فرسان = والطايله ربعي اول من وصلها
يالحربي الله يدلك درب الاوزان = يهدم بيوت القوافي من جهلها

[انور الشيخ]

الحق بين الناس والستر ضافي = مانته براعي حق ولانته سنافي
الشعر معنى ماهوب وزن القوافي = ياليل هيا واسري ياليل هيا


يالظلع راسي ترى للحين ما لان = ياطالع اجبالها انزل سهلها

شعر المعاني ترى ماهو لعتبان= ماهي بيوتٍ على وزنك شملها

[مرزوق حمدان العتيبي]

مادام هذا فهمك اقول خاطي=
الشعر دون الوزن يطلع خراطي
هات الحقـايق مانحب الهياطي =
ياليل هيا واسر ياليل هيا

الضلع ماله وجود ان ثار بركان = لاثار بركانها ذوّب جبلها
تبغا الحقيقه بهذا الشي غلطان = حنا هل الشعر.. لاتجحد وقلها

[انور الشيخ]

الشعر يامرزوق معنى ومغنى = لكن بعض الناس ماهو بمعنى
شعرك انته هرجةٍ من دون معنى = ياليل هيا واسري ياليل هيا

سبحان رب الملا سبحان سبحان = والنفس ربك يجازيها بعملها

الوزن وزن العقل دام انت مرضان = حنا شيوخ الملا وانته خبلها

[طلال الروقي]

انور الشيخ!!!!!!!
خربت الوزن والمعنى
....

[مرزوق حمدان العتيبي]

احتر مخك مير شغّل مكيّف
انااشهد انك يالحريبي ضعيّف
تومي براسك مثل راس الخريّف
ياليل هيا واسر ياليل هيا

الشعر من غير معنى هرج بزران = ياليت هالسالفه تهرج بدلها
حنا رياجيل نعدل كل ميزان = واهل الهبل زوّد الله في هبلها

[انور الشيخ]

الصريح

هذا شعر محاوره فيه اخذ وعطاء ولايتعدى مجال المحاوره ،، وبعدين ياخوي شوف المحاورات اللي في المنتدى كم وكم يجي فيها من هذه العبارات ،، وهذا هو شعر المحاوره،،،
.

[الشمالي الغربي]

بسم الله الرحمن الرحيم


اخوتي الأعزاء بمنتدى الهيلا عامه واخص الشاعر الكبير مرزوق العتيبي

لايليق بهذا المنتدى فتح المجال للجهلاء الذين هم بوادي والشعر بوادي .. حيث لايخفى الشعراء الشعر نقض وفتل وليس بلبله وهذاء .. فالبعض لا يعرف من الشعر الا اسمه فقط لايعرف وزن ولاقافيه ولا معنى نسأل الله السلامه فأرى يااخي مرزوق والراي لكم ان لاوجود لهؤلاء بيننا ..

ولكم تحياتي

اخوكم الشمالي الغربي

[مرزوق حمدان العتيبي]

...
.
استاذي العزيز الصريح..
تو مانورت الصفحه ...
بحضورك ....
وانور الله يهديه ... تعبنا وحنا نحثه
على الاهتمام بالوزن... والصحيح انه شاعر مجتهد
ولو اهتم بهذا الشي ... اتوقع له مستقبل :)
والشعر ماينزعل منه ابدا..
ان اعجبك الشاعر واصل معه وان مااعجبك
منت مجبر تجاريه ... في اخطاءه ...
كل الود .....

[مرزوق حمدان العتيبي]

...
.

مرحبا ياشاعرنا يالشمالي الغربي ...
نحترم وجهة نظرك الصائبه ...
والاخ انور ضيف عندنا ... وماله الا التقدير...
وياليت انه يهتم بنقد الاخوان له ويأخذه بعين الاعتبار..
ويحاول ان يتتبع اخطاءه ويبحث عن تصحيحها..
...
والمحاوره المفروض انها تكون في قسم المحاولات..
وسوف انقلها الى هناك ..
..

[انور الشيخ]

انا اشهد انك ماتكب اللقافه
وانته ومثلك ماتكب الضعافه
ماغير تومي براسك يالزرافه
ياليل هيا واسري ياليل هيا

انااتعزوى وعندي سيف شامان = ياكم من روسكم عوجا عدلها

ذيب الغنم ياعرب عود على الظان = تفقدوا ياعرب ذيبٍ اكلها

[طلال الروقي]

الله يطول عمرك يامرزوق
الشاعر اللي عنده كل علم غانم حياه الله هو وشعره
والشويعر اللي ماعنده غير السب والشتم الله لايحييه
يدور له مكان ثاني يتعلم فيه

[معــ المرقاب دي]

لا تعليق مدام أبو محمد موجود

[انور الشيخ]

الله يطول عمرك يامرزوق
الشاعر اللي عنده كل علم غانم حياه الله هو وشعره
والشويعر اللي ماعنده غير السب والشتم الله لايحييه
يدور له مكان ثاني يتعلم فيه


الصريح انا ما جيت في بيتك انا جيت عند قبيلة باكملها

ما ابغى ارد عليك حشمه وتقدير لليرياجيل الي افضل منك

وفي الختام اقول

جعله بيتٍ مايذري دام انت واشكالك فيه

[انور الشيخ]

بسم الله الرحمن الرحيم


اخوتي الأعزاء بمنتدى الهيلا عامه واخص الشاعر الكبير مرزوق العتيبي

لايليق بهذا المنتدى فتح المجال للجهلاء الذين هم بوادي والشعر بوادي .. حيث لايخفى الشعراء الشعر نقض وفتل وليس بلبله وهذاء .. فالبعض لا يعرف من الشعر الا اسمه فقط لايعرف وزن ولاقافيه ولا معنى نسأل الله السلامه فأرى يااخي مرزوق والراي لكم ان لاوجود لهؤلاء بيننا ..

ولكم تحياتي

اخوكم الشمالي الغربي


الشمالي الغربي

والله ان علوم البزران والجهال بانت

انا ماجيتك في بيتك ولا اتشرف اني اجيك انا جيت عند قبيله

وعموما جزاكم الله خير ومردوده لكم

والشرهه على اللي يزيد يجيكم

[انور الشيخ]

والله شرهتي على رجال العرف من عتيبه

والان بعد كل هذا الكلام اللي جاني

اقرر انسحابي من منتداكم

[ذياب]

أخواني مع أحترامي لكم جميعاً

الحقيقه أذا جت في قالب نقد وأحتقار وتجريح لا أحد

يتقبلها أرجو منكم وأنا واحد منكم أن تخففون من لهجتكم شوي

مع ضيوفنا وغيرهم


مجرد رأي

أخوكم ذياب

[الــوآفــي]

الاخ انور

الشعر ليس بالوه يا اخي العزيز

لا يمكن ان تكون شاعر وانت مصر على انك صح والجميع خطأ

الاخوان وضحوا لك ان لديك كسر في الكثير من ابيااتك ولا زلت تصر على انك صح


عندما ينتقدك الشخص الخبير فهذا افضل لك من ان يشيد بكل الف شخص جاهل


لانك تتعلم من الاخطاء وتبتعد عنها

في المره الاولى سيلاحظ خمس ملاحظات مثلا

ثم الثانيه اقل وهكذا الى ان تختفي الاخطاااااااء

تحيااااتي للجميع

[مرزوق حمدان العتيبي]

أخواني مع أحترامي لكم جميعاً

الحقيقه أذا جت في قالب نقد وأحتقار وتجريح لا أحد

يتقبلها أرجو منكم وأنا واحد منكم أن تخففون من لهجتكم شوي

مع ضيوفنا وغيرهم


مجرد رأي

أخوكم ذياب


نحن من اشد الناس حرصاً على احترام
الضيوف وغيرهم ...
ولكن .....
يا اخي ذياب بارك الله فيك
هل التوجيه والتنبيه للاخطاء يعتبر تجريح؟
هذا مانفعله مع الاخ الحربي ...
لكنّه وللاسف لايتقبل هذا الشي
ولا يعتني به .. فماذا تريد ان نقول له ؟
..
نجامله ونتركه يستمر على اخطاءه !!!!!
تحياتي لك ..

[خلف بن مرزوق]

فماذا تريد ان نقول له ؟
..
نجامله ونتركه يستمر على اخطاءه !!!!!
تحياتي لك ..

لا والله لاتجامل يبو محمد

المجاملة والسكوت عن الخطأ يعتبر غش له

وانت ماقصرت لعبت معه و انت تدري ان ابياته مكسورة

ولو طلب غيرك يمكن ما يلعب معه

اتمنى من الاخ انور الاستفادة من هذا الدرس

واتمنى له التوفيق

[مطرح البعارين]

أنور الشيخ

عجبي!!!!!!!!

والله ماقصر معك مرزوق

جاراك في المحاورة مجاملة

ووضح لك الخلل في أبياتك المختلة وزناً

ومع هذا لست براضي!!!!!!!!!!!!!


أما أنت يامرزوق


شرهاااااااااااااااااااااان عليك

[مرزوق حمدان العتيبي]

أما أنت يامرزوق


شرهاااااااااااااااااااااان عليك

خير يامرطح البعارين ؟؟
شرهتك على راسي ... وحاضر باللي يرضيك
بس قل وشنهو العلم .... :)

[مطرح البعارين]

بس قل وشنهو العلم ....


مايحتاج شرح يامرزوق

حتى مانجرح مشاعرأحد


تحياتي

[مرزوق حمدان العتيبي]

...
طيب صار خير ؟؟؟؟؟
:)

[محمد العتيبي]

الله يبيض وجيهكم يارفاقه

انا والله ما ودي اكتب تعليقي الان بعد ما انتهى الموضوع ، ولكن ودي اعبر عن ما في داخلي من ما

قرأته من بعض الاخوه ، وارجو منكم المعذره جميعا ، واذا كلامي اللي ابقوله صحيح اتمنى منكم وضعه في

رؤوسكم واذا كلامي خاطئ فاعتبروها زلة لسان ، ولا تزعلون من اخوكم الصغير :



* الان العضو الضيف انور الشيخ طلب استاذنا الكبير : مرزوق العتيبي ، والاستاذ الكريم مرزوق ما قصّر وجاراه

وهذا وش يدل عليه يا اخوان من شخص مثل مرزوق العتيبي ، ان دل فانما يدل على تواضعه وعدم احتقاره

لاي شخص كان ، ومهما كانت عيوبه وهذا شئ طيب ملحوظ بالاخ مرزوق ، ،، فانا استغرب من بعض الاخوه

عندما يتفوهون بكلام فيه من التجريح والتنزيل من قدر الشخص المقصود فهذه والله ما عهدناها فيكم يا عتابه

يا رفاقه ، فنحن نضحك على غيرنا وصار البلا فينا ، مادام ان الاخ مرزوق وصل للشخص انور وجاراه فمرزوق

ادرى بمعرفته واسلوبه الفريد بالتعامل مع الاخرين ويعرف ايضا كيف يقنعهم ، فاتمنى وارجو منكم يا اخواني يا

اعزائي ، مراعاة شعور الغير وعدم تجريحهم في مشاعرهم لانها ليست من اوصاف الشخص المؤمن .




هذا كل ما لدي وارجو المعذره للاطاله .





مع تحيات اخوكم الصغير :






:)

[الايداء1]

,
,
سعة

صـــــدر

من أبو محمد

بـــــــــلا حــــــــــــدود ..عداه المنقود..