تنويه عن نقل خطا

[ابن زيدان]

ادارة منتدى الهيلا
السلام عليكم ورحمة الله وبركاته

لفت انتباهي تثبيت قصيدة لشاعر
عبد الله بن دعيج ابن سعدون المطيري

والتي كتبت في منتدى قصة وقصيدة وثبتت ثم اغلق الموضوع بعد
مداخلات غير لائقة والقصيدة لم تكتب كاملة ونقصانها وتحريف بعضها
ليس من حق الكاتب ويعتبر اعتداء سافر على مضمون القصيدة
وظلم لصاحبها بعد نشرها ناقصة ومحرفه .
وهذ التصرف لايرضيكم كا ادارة ولايرضينا كا اعضاء وقد غضب صاحبها لما قراها في منتداكم .
ونحن نشكر ادارة منتدى الهيلا على تحرير بعض العبارات الجارحة .
وهذه القصيدة قديمة ومناسبتها معروفه عند الجميع ,

وانا انقلها لكم من صاحبها عبد الله بن دعيج كما قالها وكتبها سابقاً وامل تصحيحيها في اصل الموضوع .
اليكم القصيدة


فكرت بالدنيا وشفت الغياره = وكل مدح ربعه وانا اقول ياخير
ربعي مطير وكل ثار بثاره = في راية الدوشان نمشي طوابير
حنا مسقية العدو من مراره = نسقية من سم الافاعي تكارير
وحنا منزحت العدو عن دياره = يزبن ديار ماتصلها المداوير
وحنا حمينا نجد يوم السعاره = من اقصى القرى للسيف طرد ومغاوير
وحنا ليا منا نوينا بغاره = تجيك دقلات السبايا دعاثير
كم زاحن العربان حزة مثاره = على طلوع الشمس مع نوضة الطير
وكم شتتو ناس وصارو دماره = عقب المعزه بين عوج الدواوير
وكم شيخ قومن طايح بالمعاره = عليه لجن البني الغنادير
وكم ذود مصلاح خذينا خياره = تفز القبايل ليا ذكر طاري مطير
نضرب على روس القبايل جهاره = نضرب عليهم دون عذر ومعاذير
عينت هندي طايح في سماره = من فعل ابن جبرين قفو مفارير
سقنا عشايرهم ودارج حواره =وكسيرته ياكبرها من مكاسير
وابن محيا ثاوي في جواره = بيوم يشيب كبارهم والمصاغير
وتركي دماغه فوق متنه قراره = ماحوله الا الحوم ورد ومصادير
ونهار ابن تنيبيك يربط هجاره = يربط بحصانه والمزاحم مصايير
وقشعان شيخ من سلايل عماره = عشاه ابن سقيان عكف المناقير
وجديع ابن وايل دفنا وجاره =عاداتنا نخلي رقاب المشاهير
و القرن يوم القاع ثور غباره =اسليم والروقه وبرقا مزابير
قالو على المطران نبغي النماره =ياكثرهم نهار جونا مناحير
صحنا عليهم صيحة نانتصاره =بدهم الافرنجي والسيوف البواتير
تثغى اومراهم مثل ثاغي جفاره =ونسوقهم سوق السواني على البير
اولاد شالح ذوقوهم عزاره = وعيال الصعيبي رجعوهم مدابير
ايام واليا الجو صافي قتاره = صفوه ربع تشبع الذيب والطير
عمارهم ما حسبوها تجاره = يرخصونها يا جا ملاقا المناعير
ونهار مشذوبه يادافع نهاره = منهو حصلها مثلها يالمفاخير
ابن رشيد اللي طوال شباره = عليه زدنا وافيات الاشابير
لعيون من يزهى ذراعه سواره = هيم البطون مزهيات الخواصير
والعاذريه كونها بالزباره = ذبحم عساكرهم وحتى الطيايير
زحنا الظفيري وانهزم من نهاره= وزحنا بني خالد وقفوا مصاخير
وتشهد لنا الرطبه وكون الزراره = بقحص الرمك ويا العيال المسافير
وفيصل بن سلطان فعله وكاره = كم نزلة مودع جنبها شعاثير
وابن شرار وحرب وش صار صاره = ومناخ المربع وش جرى للمعاثير
وعقاب بن دغداش فعله قراره = جدع لنا فاجر نهار المثاوير
شلفاه وردها بعرف وشطاره = لين بينت بين الكتوف المزابير
ولاهو غريب منه يوم اشتهاره = ربعه يهدمون الجموع الطوابير
وهذا لو اعد الفعل ما حصي مداره = افعالنا فيها العبر والتعابير
ما جارنا والله يوذي لجاره = يا فرحنا واليا اقبلن المظاهير
واليوم في حكم يعز افتخاره = حكم آل سعود مكعمين الخنازير

[ابن زيدان]

ياربع هل يعقل بعد مرور 48 ساعة ومرور 22 زائر
على موضويع تنويه عن خطا ء ما حد رد؟؟؟؟؟؟؟؟

وين الادارة ؟؟؟؟؟؟؟؟

وين المراقب العام ؟؟؟؟؟؟؟؟؟

وين المشرفون ؟؟؟؟؟؟؟؟؟؟

ماهقيتها منكم تناسون الخطاء بعد نوه عن تصحيحه

لازلت منتظر !

[((الدلبحي))]

ابن زيدان

هلا وغلا

الموضوع بلغت فيه ادارة المنتدى من ساعة نشرك له وهو قيد الدراسه والرد من قبلها

واشكرك على اهتمامك وحرصك

والقصيده ماقلنا فيها شي وهي تعبر عن راي صاحبها

ومنتدى الهيلا من اداره ومشرفين واعضاء

حريصين كل الحرص على تطور هذا المنتدى واحترام الاخرين وحقوقهم مهما كان هناك من اختلاف في وجهات النظر والمفهوم

امل الانتظار حتى ترد عليك الاداره مشكوره خلال اليومين القادمين

تحيااااااااااااااااااااتي

[فواز الشيباني]

اخي الكريم اذا تبي تصحيح القصيده ويهمك امرها عندك منتدا مطير صحح فيه مثل ماتبي هنا منتداء صقور نجد عتيبه

[قاطع طريق]

وانا رأيي من رأي الشيباني يا مشرفينا الأعزاء

///////////////

جاي مسرع يتطمر القشع ما يشوف الدرب

ثم هالحين يهز لحيته عند الاجناب

[اللواء]

الاخ العزيز ابن زيدان
ماهو الطلب الذي تريد من الاداره ان تفعله ازاء ذلك ... بارك الله فيك؟....
وهو خطأ رايته من وجهة نظرك الشخصيه وقمت با ايضاحه للعام !!
و انتهى الامر عند هذا الحد...
واحتراما لك ولقبيلة امطير نترك الموضوع كماهو..

تحياتي

[ابن زيدان]

للاسف الشديد كنت ارد على موضوعنا السابق
وعند ارسال ارد وجدته قد اغلق.

امل ان لااكون اثقلت عليكم .


فظلاً وليس امراً اقروا ردي والخيار الاول والاخير لكم .
ابن زيدان

هلا وغلا

الموضوع بلغت فيه ادارة المنتدى من ساعة نشرك له
وهو قيد الدراسه والرد من قبلها

واشكرك على اهتمامك وحرصك

والقصيده ماقلنا فيها شي وهي تعبر عن راي صاحبها

ومنتدى الهيلا من اداره ومشرفين واعضاء

حريصين كل الحرص على تطور هذا المنتدى واحترام
الاخرين وحقوقهم مهما كان هناك من اختلاف في وجهات
النظر والمفهوم

امل الانتظار حتى ترد عليك الاداره مشكوره
خلال اليومين القادمين

تحيااااااااااااااااااااتي


الاخ اخوي الفاضل الدلبحي
(المشرف العام)
والله هذ خبري فيكم وهذ املي ولن يكون الاخير
انتم رجال كبار في عقولكم وراقين في ذوقكم و
عندكم حمية وجيره .
ونحن وياكم (اهل قرية كلاً يعرف وخيه)
وانساب وجيران ولاخلت عنا الدنيا من خير
ها وشرها شي ولايمكن نغير التاريخ
ونزوة الشباب وحب ظهورهم بمظهر التحدي
والعناد لن يغيّر ما بيننا من احترام وتقدير ومحبة .
والقصيدة التي كتبت محرفه ومحذوف نصفها
لايرضيكم ولايرضي شاعرها ولايرضي مطير
وهي بالمناسبة ايام كديميس الله يسامحة
عندما هجا قبيلة مطير ومثلكم ما يلوم شاعر
مطيرفي ما قال رد على كديميس .

اخوي الفاضل واخواني القراء والمتابعون
والله اننا لانريد لنا ولكم الا الخير والفلاح
ومنتدى قبيلة مطير قد منع ما يسي الى القبائل
وبعضكم معنا في منتدى قبيلة مطير ويعرف ذلك .

اشكركم على حسن ادبكم واحترامكم وتفهمكم
لما اشرنا اليه وامل ان يزول البس على الجميع
حول قصيدة عبد الله بن دعيج ومن رائي حذفها
من منتداكم وحذف ما بعدها من قصيد الهجاء
والرائي الاول والاخير لكم وتقبلوا تقدير

اخوكم وعضو منتدى الهيلا

ابن زيـــــــــــــــدان...........!

.

[اللواء]

الاخ العزيز ابن زيدان سلمه الله كلامك جميل
ولك منا كل التقدير والاحترام وهو شعور متبادل.
ولكن احب اوضح لك وللجميع ان
القصيده التي انت تحتج عليها منزلها عضو مطيري
ومن المستحيل انه يحرف اوينقص في قصيدة ابن عمّه
هذي نقطه.
النقطه الاخرى اغلاق الموضوع تم بعد ايضاح الامر ولاداعي لتشعب الكلام في ذلك.
النقطه الثالثه الموضوع الذي تريد ان نحذفه او حذف القصايد التي كتبت فيه
موضوع له فتره طويله وقد اطلع عليه الكثير ان لم يكن الكل
ولايمكن ان نحرر شي بعد ذلك من اقوال الطرفين.

لكن من حقك علينا ونحن اخوان وجيران وبيننا النسب والحب في الله
مايجعلنا نترفع عن هذه الامور ان يلغى التثبيت .
واتمنى ان ينتهي الامر عند هذه النقطه
والســـــــــــــــــلام.

[فواز الشيباني]

اخي اللواء يكفيني ويكفي الاعضاء ردك وهو رد رجل يعرف خفياء الامور والحمد لله ان المنتداء فيه من امثالك رجال نكن لهم الاحترام والتقدير الف شكر لك على كلامك الطيب واخلاقك العاليه الف الف الف الف شكر


اخوك فواز ابن اعديس الشيباني

[بعيـد المرامع]

والقصيدة التي كتبت محرفـه ومحـذوف نصفهـا
لايرضيكم ولايرضي شاعرهـا ولايرضـي مطيـر
وهـي بالمناسبـة ايـام كديميـس الله يسامحـة
عندما هجا قبيلة مطير ومثلكـم مـا يلـوم شاعـر
مطيرفـي مــا قــال رد عـلـى كديمـيـس

هلا بن زيدان ..
اتعجب من كلامك ... ولا اعلم هل انت تجهل الامور ..او تتجاهل ..
فان كانت الاولى .. فتلك مصيبه ..وعليك قبل ايضاحك الخاطئ..ا
ان تستفسر ..اولا... ثم تنـــــوّه..

وان كانت الثانيه ...فتلك اشد واعظم ..
وعندها ..عليك بتصحيح نفسك ...قبل لاتمـــوّه ..

عموم قصيدتك انفة الذكر التي وضحت انها ناقصه ..للاسف انها كانت من شاعر ناقص ...
تهجم على عدة قبائل بلاسبب ...وعتيبه احداها ..ولم تكن قصيده ..فخر او افتخار
لما حوته من افتراء...وتجاوزات

مماحدا شعراء تلك القبائل بالرد ...وشاعر عتيبه كديميس احد هؤلاء .. وهنا لايلام كديميس
فالجزااااء من جنس العمل ...

وهنا ايضا ..نحن لانلام في توضيحنا هذا ...عندما وجدناك في ردك قلبت الحقائق راسا على عقب ... وكما قيل ...
رمتني بدائها وانسلت ...



رد عليها كديميس صالح العصيمي يقول:
ياعبيد وش حدك تفوة بتاره=قلي عسى ماشر ياشاعر مطير
ماينبغي ياعبيد قدح الشراره=بين القبايل ياردي التفاكير
مدري تكلم جد ولى عياره=ولا سمعت من اقرب الحلق تصفير
سحبك مجنون العمار بمساره=( وشلتو من الهرج المزيف قناطير )
راع العمار الي بنالة عماره=من الهرج حيثنة على غير تسعير
يعد شعرة مرجلة بطراره=( ومن هرجة التافة يوزع فواتير )
لوهو من الي يفهمون الاشاره=وعندة ملافي للكلام وتفاسير
تبي تحط الطايرة في مطاره=وتسلمة خط التقارير وتطير
لكن مرجوجاً براسة عهاره=كبير في سنة وفي عقلة صغير
ابترك المرجوج جعلة وداره=مال للكلام الي بلا عدل تاثير
حتى يرجع لسفية اعتباره=وليا رجع نعرف مكان الخوابير
اما انت كاننك تعرف المشاره=دعوتك وصلتنا وجونا المسايير
( عن لوحة الماضي رفعنا الستاره )=وركب الرشا من فوق هدف النواعير
ورد الجزاء جنس العبارة عباره=وعلم تراء مايعتبر كل تعبير
ذكرت بعض شيوخنا للأثاره=( لكن ماعندك شهادة وتقرير )
ولايبني الرجل الفهيم افتخاره=على التمني وختلاق المذاكير
ومدامتنك جيتلك بستماره=وعبيتها بس الخفاجي مع الزير
دور ( لبن جبرين ) عندك جباره=اذا وجدت لقطعت الراس تجبير
ماسرتة حقب العيون وفراره=خمة قطامي كن عينة سنا كير
ادلى علية مجرباً فالصقاره=حراً مخالبية سواة الشناكير
عدو عينك نطلبة ربع باره=ان طار والى في وطى الارض ويسير
نجيلة اقرب للغبي من زراره=حتى نطير هامة الراس تطيير
عينت ( ابو صفرة ) وكيف اختباره=فالامتحان الي جراء شرقي النير
جانا بكامل قدرتة وقتداره=يبي العشاير جلهن والاباكير
ولقى السيوف الساطية بنتضاره=بيمان ربعاً فاملاقا جزازير
كزة عتيبياً شلع عظم زاره=بمهلباً كنة ملبس بقصدير
تعودة الوركى وذيب الخضاره=على ( العويند ) حوشتة المقادير
و (بو عبيد ) الي يجيد المهاره=اليا جتوال معسكرات المسامير
فالمعركة يقدر يدير الاداره=يثني جوادة عند تال المضاهير
جاة ابلجاً يكرة عدوة مراره=اليا عدى يطرح صقور وصقاقير
وتواجة والكل جرب جماره=وطاح ( الدويش ) بوسط ذيك العثامير
انشد عنة ولا تقفة بثاره=تلقاه في واد الرشا كنة بعير
متفرشاً يمناه عقب انكساره=علية عقبان الفريدة مخامير
وذيب جبلة لياخوع اليل زاره=والطير ياكل منة والساير يسير
و ( بن شري ) فارس وعنده جساره=في نطحة الغازي لياجاكم مغير
لياشافله جمعاً تهاذب مهاره=يلكد على الكردوس والصاير يصير
لكن ضيف نابة اهل المغاره=سباعاً تقانب في خشوم الشناظير
يوماً جمعة صار فية استداره=تشاقلن جسمة وساع الحناجير
و ( فصيل ) درا انا منتوينة بداره=وحشد لنا جمعاً كبر حرة مطير
وطوق نواحي المجمعة بالنطاره=وركب على روس الجبال النواطير
وانها مشاعر جمعكم وستداره=للموقف الي بة تقدم وتاخير
وعقب المواجة صارت الانكساره=( وضاقت على المطران كل المعابير )
عقب تقدم جمعنا ونتشاره=قفو وعجتهم سوات المعاصير
والشيخ ( ابن شوفان ) تم انشطاره=عينت راسة مالقوة الحفافير
و (حسين ) قدامة و( محسن ) يساره=و ( بندر ) قمز فالغرس مثل ارنب الطير
وفيصل خذالة كرتاً وفتراره=وقفى يحث كروش مرخلها السير
والدم من جسمة يفوح بغزاره=قفى ودمان ( الدويشي ) شخاتير
وفي قصر ابن عسكر لجا وستجاره=( ومطير مع وادي الكظيمة قواطير )
حنا نقوم وكل شيخ بوقاره=ماعندنا في واجب الشيخ تقصير
ان زارنا قمنا برد الزياره=ونزيد تقديرة على الشر والخير
ومكارم الاخلاق راس التجاره=ماجودتن فينا بكل المعايير
( حنا بنجد النا مقر الصداره=ولاحدن ينازعنا عليها من الغير )
ولاجاتنا معروف ولاستعاره=الى بصولاتن تفض الشراشير
(عتبان ) فالهيجا سوات النماره=عاداتنا دحر الجموع المناحير
الياحصل يوماً تقادح شراره=خيلن مناحير وخيلن مدابير
نسد باب الراي والاستخاره=وقادو جمالن فوقهن الغنادير
من الي سحب جمعة وتم اندحاره=وقفت ركابة بالمذلة محادير
( الي سر من عقب ماشب ناره )=عقب التحدي يشعم النار وينير
( ويخفي مسيرة عن حليفة وجاره )=وختار للمسرى بطون التسارير
ورتب على درب الكسيرة خفاره=ووزع على الحراس عدة نواظير
حتى نزل بين الورعية وواره=ورتاح عقب مواصل السير بالسير
هذا السبب يعبيد فالانحداره=خل الكلام الي مزيف وتزوير
( مهوب حدرت نجعكم بختياره=جاك الكلام الي وراة التقارير )
وتراء الدويش الي رفعتو شعاره=خيالكم فالمعضلات المعاسير
غرة خوي الجنب يوم استشاره=ونوخ على داورد عرباً خواوير
عقب اضرستة الحرب وونس عواره=قام يتردد بين عذال ومشير
( ورسل لبن هندي جميل عتذاره=وبريتاً مشريتن بالدنانير )
ارسلبها المندوب قبل انهياره=لكن ماتنفع سمان المعاذير
خسر الدويش ولاربح مستشاره=وولو يسجون الضعن بالبواكير
و( شري ) خطرنا منتدب لسفاره=وصارت نتايج سفرة الشيخ تسفير
وليتك نشدت ( الملعبي ) عن بكاره=شرشوح ذودن كلبوهن مغاتير
و( الملعبي ) فالرمح مثل الصهاره=الي عمل لروس الاموات تكسير
هذا دليلن انة يعاني حراره=يحز في كبدة سوات المناشير
والشاهد ان مطير فيهم شطاره=محدن لقاها غيرهم فالمحاظير
( لياعارضو جمعاً وتم انتصاره=يلجون لقبور الرجال المشاهير )
قبر ( الصييفي ) قد طلبتو جواره=يوم ارهقوكم باللحوق المغاوير
خطرتو لقبر ( السبيعي ) خطاره=سمعتو انة يعتني بالخطاطير
يجب عليكم يالمطيري مزاره=يوم احتماكم من سيوف المناعير
على النقيرة قد بنيتو حضاره=وصلت مبانيكم لجوبة نقير
مار ( العوازم ) صيروها خباره=تقول ناسفها الدناميت تفجير
وزبنتو المسجد وراس المناره=وجمع ( العوازم ) طهر الدار تطهير
خلو لكم بين الصياهد كراره=ولي سلم منكم زبن ديرة شقير
وقولن بليا شاهد ويش كاره=يظربة الحايط ليا صار تبرير
( وانتة كلامك يفتقر للاناره=الله يلومك ياكبير الجماهير )
تقول من يزهي ذراعة سواره=لعيونها دمرتو الناس يامطير
لكن مدري وين تلك النامره=عن ( الدحملية ) يوم جينا معايير
نجرها بين الذراء والغراره=من الهودج الي كن وسطة نواوير
عفر وواشعها صفار بحماره=وباقي الموضوع اريش العين تفسير
انا بشير ولانبيلك بشاره=جتك الرسالة والمعاني معاشير
يلي تدس يديك وسط الجحاره=تراء الافاعي ياكلن العصافير
بينتلك ماقد سبق بختصاره=وصورتلك ميدان الاحداث تصوير
وذكرتلك سبعة من اهل النداره=و ( الثامن ) الي طب في داخل الحير
ولاواحدن منهم قصدت احتقاره=شوخ الجهامة محتمين المثابير
( وحنا السبب في فقدهم للاماره=فقد الحياة ومبعدات المشاوير )
خسارة ياكبرها من خساره=لياصار في رقاب المناعير تقدير
جمعن يحاربنا نضيق قصاره=فالحرب لين الصعب يركب على الضير
ونرمي لجيعان الذيابة كباره=وتبقى العباية بلا كبير ولامير
وانتة ادعرت لمادعيتة دعاره=بيا سبب يمتيح لوكان قطمير
نغزك شيطانك وغزيت شاره=وعارضتها مابين نقاد ومثير
والرامي التفاق يضبط عياره=والمرتبش يبلش لياصار تطوير

تحياتي للجميع

بعيد المرامع

[ابن زيدان]

الاخ العزيز بعيد المرامع المشرف العام

ما نقول الا ونعم في عتيبة في الماضي والحاضر
ولاعندنا اعتراض على ماذكرت وكل قبيلة اخذتها حقها
وانتهى الامر الله يعز الاسلام والمسلمين والامن
في جميع الاوطان .
اشكرك على فتح الموضوع وامل ان يبقى بدون اغلاق
ولانريد ان تقال كلمة .

اما بخصوص القصيدة فهي ليسة لنا واسم شاعرها واضح

ووالذي دعانا نكتب هذه الملاحظة نشرها محرفه
ونحن من اعضا منتداكم الاقدمون ولازلنا نحترمكم
ولم نتعرض الى اي انسان طول تواجدنا والحمدلله
فلا تسئي اظن في اخوك عضو منتدى الهيلا.

لك تقديري واحترامي

اخوك ابن زيدان

[بعيـد المرامع]

الاخ بن زيدان .. حياك الله والمنتدى منتداك ..
سواء كنت من الاعضاء الاقدمون او الجدد فالكل في محل تقدير واحترام
واعلم ياخي العزيز ان مادعاني ايضا للتعقيب هنا هو ماوجدته من الخطأ الوارد في ملاحظتكم اعلاه
وشاركت للايضاح ...ولوضع الامور في نصابها

تحياتي لك