نبذه عن فارس من فرسان نجد{عبدالله الزليليغ}

[مشاري الحبردي]

السلام عليكم ورحمة الله وبركاته


ساورد لكم نبذه عن فارس شاع صيته في نجد وفي قبيلته عتيبه والقبايل الاخرى وهي عن الفارس عبدالله الزليليغ



نسبه



هو عبدالله بن عويض بن مبارك بن قويعان بن فالح بن زايد بن متروك بن سنيان بن حبرود بن حمود بن عطيه بن مزحم بن روق



ولادته



حاله كحال غيره من الاوئل لايعلم متى كانت ولادته بالضبط ولاكن يعتقد انه ولد عام 1260




مربط خيله وابله والقابه



له مربط خيل الصويتيه ومن اسماء خيله {الختله وعبيان وغيرها كثير} وخيله اقتلعهن في المعارك

له ابل واسمها {الشعثا} وكانت تتجاوز 150 متن

القابه {راع الشعثا} و{اخو سجوا}





مما قيل فيه



1ـ قال فيه شاعر من الروقه قصيده لايحضرني منها الا بيت وهي

الهجن تبغا صبي{ن} مثل عبدالله

يورد الهجن يوم اخطت مواردها


2ـ قال فيه شاعر ذبحه الجوع وشاف بيت عبدالله وقال قصيده لايحضرني منها الا بيت وهي

ياحصاني ودني عبدالله

ياحصاني دايخنبي راسي


3ـ قالت فيه حرمه شاعره لما شافت بنات الفرسان والشيوخ يلعبن مع بعض قالت الحرمه وروني بنت

عبدالله الزليليغ ولما راتها قالت هذه الابيات

ياوضحا يامهرة جنب

نعم{ن} بابوها اليا ركب

من فوق نابية الحجب

والخيل عن حسه هرب

وصل المدينه وانقلب

وقالت ابيات اخرى وهي

اوقفت وضحا جملها

فالعدام النايفاتي

يرتكون للهوش اهلها

والجموع المرسياتي

محتم الزلابات ابوها

بالرماح المرهفاتي


4ـ جاء وقت اذهب الناس من الجوع واليا عبدالله الزليليغ مولده اباعره ميه ذبح عبدالله خمسين حوار وخلا

خمسين حوار علشان يحلبها للي يجيه وهو ملفا للرجال وقال في ابله الشعثا شاعر شمري هذه الابيات


ياشوف عيني يوم سحي زبنت

كما يزبنون المرهقين هضاب

نكيف{ن} ليا مشت قرايا{ن} ليا امرحت

يلقون فيها الهاشلين ثواب


5ـ شاف حربي من فرسان حرب نياق اله تحتك على نصيبة قبر الفارس عبدالله الزليليغ والحربي يجي

ويطردها عن قبره قال لاتحتكين علا قبره وهو ميت ياما صبحك من نهار وسراك من ليل


6ـ قال في عبدالله الزليليغ يوم عبدالله كبر سنه الفارس ضيف الله بن مدوخ بن تنيبيك لو شباب الناس

كلها يشرا كان شريته وعطيته لك ياراع الشعثا


7ـ كان ابراهيم ولد عبدالله الزليليغ يدوج على فرسه في شعيب ابونخله في حكم ابن سعود وهو ينقز

بيت حربي وكانت البيوت منول صغيره يحسب ان البيت عوشز وتطلع حرمة الحربي وتقوم تصيح ويروح

رجالها ويشكي ابراهيم عند هندي الذويبي قال هندي الخيال ولد من قال الحربي ولد عبدالله الزليليغ

قال هندي الذويبي احمدو ربكم ياحرب هذا ولد الزليليغ والله لو ماحنا في حكم ابن سعود ليذبحكم



من احديات عبدالله الزليليغ



لايحضري الا احديه واحده وهي

يامل قلب{ن} مولع{ن} بالخيل

ومولع{ن} بام الحوار

يالله ياخالق نجوم الليل

والشمس خلقت للنهار



بعض من قصصه


1ـ حضر معركه بين الحبرديه والبقوم على مران وكان عمره حين ذاك لم يتجاوز 14 عام ويوم شاف عبدالله

الزليليغ قاعد بن جرشان ذبح عيال عمه طرد عبدالله الزليليغ قاعد بن جرشان واظهره من الجموع قال

قاعد بن جرشان فكوني من الخيال ياهل الخيل وعبدالله يزرق قاعد برمح والرمح يخطي قاعد ويعود

قاعد على عبدالله بعد الرمح ويوم قاعد شاف عبدالله قال اثره ورع لاطال شبابه ويتركه


2ـ تغدى عبدالله الزليليغ عند مناحي بن نزهان وهو قد بلغ من العمر 85ومعه خيله ويوم خلص من الغداء

قالت حرمة مناحي الاخوان قدمك ويبون يذبحونك ياخو سجوا قال عبدالله للحرمه افتحي الباب ويقوم

عبدالله ويركب اكبر خيله ويقوم يحدا يقول

ظهورهن زبون وابطونهن خزون

يعض الحصا من له عليه طلابه

وهو يتوطى الاخوان بخيله ويكسرهم ويروح ويوم توطاهم وخلص قال الي يبا يذبحني انت يافلان ولاانت

يافلان وراح وتركهم


3ـ سرقة من عبدالله الزليليغ ناقه وارسل عياله يقصون جرتها وعياله هم رجس وضيف الله واليا الناقه

عند السبعان ويقومون رجس وضيف الله وياخذون ناقه خلفه ويقلعون بيوت السبعان ويعودون لابوهم

والسبعان كانو انسباء الشريف ويرسلون للشريف يقولون الزليليغ اخذ ناقتنا وقلع بيوتنا رد كرامتنا

يالشريف ويروح الشريف وعبيده لعبدالله الزليليغ قال الشريف يالزليليغ رد ناقة السبعان قال الزليليغ

الناقه ماهي راجعه قال الشريف والله لترجع غصب عنك قال الزليليغ انا اخو سجوا وهو يضرب الشريف

بالمشعاب ويذبح عبيده وياخذ اسلحتهم ويقول حدايه مشهوره وهو اول من قالها وهي

شريف مانعرف شريف

مانعرف الا ربنا

ويروح الشريف لجار عبدالله الزليليغ وجار عبدالله هو الفارس نايف بن صايل المزيني الخراصي

قال الشريف يانايف الزليليغ زلغني وزلغك قال نايف الزليليغ ماهو من جماعتي كانها عند خراصي ابجيبها

اما الزليليغ ماحد يقدره لانا ولا انت الا ربه الي خلقه ويعود الشريف ماحصله شي


4ـ سرقة من عبدالله الزليليغ ناقه وقص جرتها واليا هي على ابن جبرين قال ابن جبرين الناقه راحت

للمدينه وسمع عبدالله الزليليغ كلام الناس الي عند ابن جبرين وشك عبدالله الزليليغ ان الناقه سارقها

ابن جبرين ويقوم عبدالله الزليليغ ويوطي على شلفاه ويقوم يحدا يقول

فطرن شيب الجواجي

حبهن بالقلب لاجي

ماتجيبهن المناجي

ماتجي الا باعتلاجي


قال ابن جبرين اقل مامنك يالزليليغ وناقتك والله لتجيك والحين تغد عندنا واليا تغديت اخذ الناقه


5ـ راح هذال ابن فهيد يطلب الامان من ابن رشيد عشان يرعى في وادي الرمه واخذ عشرين فرس

واهداها على ابن رشيد ووافق ابن رشيد وعطا ابن فهيد وربعه الشيابين ومن معه من عتيبه الامان لين

ينتهي الربيع ويوم عود ابن فهيد من ابن رشيد واليا ولده جهز والعميدي كاسبين اباعر ابن طواله ويزعل

هذال ابن فهيد ويطرد ولده جهز هو والعميدي ويقعد ثلاث ايام مايكلم احد ويجي عبدالله الزليليغ قال

علامك ياخو هملا زعلان ابن رشيد معلاه من الشمامره والحين ماعندك الا ترد اباعر ابن طواله وتعطيه

خيل قال ابن فهيد ماني برايح الا انت معي يالزليليغ قال عبدالله اباعري ماعندها راعي وخيلي ماعندها

احد قال ابن فهيد احط عند اباعرك رجال يرعاها واحط عند خيلك حشاش للخيل قال عبدالله الزليليغ بناخذ

متروك ابن محياء وشليويح العطاوي ويروحون لبن رشيد ويردون اباعر ابن طواله ويقوم هذال ابن فهيد

قال والله يوم وخذت الابل وانا عندك في حايل قال ابن فهيد عرفنا الصدق منك ياخو هملا



بعض من المعارك التي شارك فيها




1شارك في معركة طلال ونشبة الشلفا في يده من دم الرجال وفروث الخيل ولاطلعو الشلفا الا بالماء

الحار


2ـ شارك مع الزملوقي الشيباني وكسب 40 ناقه واقتلع فرستين


3ـ شارك مع متروك ابن محياء وكسب 35 ناقه واقتلع فرس


4 شارك في معركة غول بين الحبرديه وابن رشيد وقتل واحد من ال رشيد واقتلع فرسه

5ـ شارك مع جموع الشريف هو على فرس وابنه ضيف الله على فرس وكسبو ثلاث ذيدان ووزعهن عبدالله

الزليليغ على ذوي عطيه


6ـ غزى مع ابو خشيم والشغار وكسب 110 من الابل



وفاته


توفي يم الميسريه بين ابانات في حكم ابن سعود وكان عمره يوم مات 115


ومات على قبره من الشعثا ثلاثين متن



حرر/ماجد الزليليغ

[ولدعساف]

الله يرحمه ويغفرله وأنعم وأكرم بالاد حبرود