الفايدي روح جاي :)

[خالد الفوزان]

يامرحبا عند قومٍ ضيفهم مايهان =عزوة عتيبة سلوم الطيب ترقالها
تعال يالفايدي واصهل صهيل الحصان= خل المثايل تدور الصبح بجزالها

[الفايدي]

دام البقاء والقبايل كل ابوهم خوان = ياعزوت(ن) طيبها من طيب مدهالها

ان كان تبقى إنتخاوى من مكان إلمكان = خطوتك لاتنثني وتصير خيالها

[خالد الفوزان]

خوّة عتيبة عليها من حزامي ضمان =اقولها وانوي الطرقة علي فالها
الملعبة ياعميلي ماعليها بيان =راحت رجالٍ تفك العقد وحبالها

[الفايدي]

ياخالد الناس ماتبقى طويل اللسان = تبقى رجال(ن) تشوق العين بفعالها

يامكبر الفرق بين السيف والخيزران =والبنت في عينها مااحسن من عيالها

[خالد الفوزان]

تبغي الصراحة عليك الله ودوك الامان=ماودي اكحل عيون الرمد واشوالها
انا بغيتك تعين ولالقيتك عوان=كنك كما اللي يزيد الحمل بأثقالها

[الفايدي]

ماني بمجبور احدرها بسد الطمان = الروح روحي وانا داري بمنزالها

الدله الي تبهرها من الزعفران = ماكيفت راسي المطنوخ فنجالها

[خالد الفوزان]

ماهي كذا ياعميلي تدخل الامتحان = والا المعاني وسيع العرف يبرالها
انا هجوسي مع الشعار ترطن رطان = امجودٍ ساس مخرجها ومدخالها

[الفايدي]

ياخالد الناس قالو في هذاك الزمان = الطيبه طيبه من حض من قالها

الرطن خله لسيف الدين محمود خان= انت بدوي غترتك في حكمت عقالها

[خالد الفوزان]

لا والله الا خسرت ولاكسبت الرهان = ياصاحبي حلحل المعني وتصحالها
والخاتمة يشهد الله والمعاني سمان = اسلم وسلم علي الجهنان ورجالها

[الفايدي]

ياصل السلام يابوخلود وصح لسانك

تشرفت واستفدت باللعب معك ولناء لقاء اخر انشاالله
وبيض الله وجهك

[خالد الفوزان]

ووجهك ابيض يالفايدي والشرف لي ..وان شالله الجايات اكثر

[نواف نايف العتيبي]

يامكبر الفرق بين السيف والخيزران =والبنت في عينها مااحسن من عيالها

والخاتمة يشهد الله والمعاني سمان =اسلم وسلم علي الجهنان ورجالهـا

خالد الفوزان , الفايدي

صحت الألسن

[خالد الزيد المكودر]

صحت السنتكم

ما قصرتوا