قصيده في ذوي عطيه

[راعي العصلا,,ابن مــــدرع]

السلام عليكم ورحمة الله وبركاته

هذي قصيده : للشاعر /مشعل العطاوي في قبيلة ذوي عطيه

اترككم مع القصيده ..


عسا السحاب اللي مزونه مهالليل=يسقى من الشبرم يالين القصابه
ضرب برديه فوق روس الاقاذيل=يشبه لرشاش توماتك عقابه
يذرف على العبله من الصبح لليل=يطنخ خباريها ويركي سحابه
لين الدعيكه قام يطفحبها السيل=يهدر وياخذ فالاخير اقتلابه
دار ن هواها يبعد الهم والويل=وابرز معالمها حبر والغرابه
حم الذرا فيها تعيف المحاويل=حتيش لو سفوات يذري ترابه
ديرة هل الابل فالسنين المهاويل=ماجتهم بشيك ن حفظ في كتابه
الا بشلف ن زادهن الرياجيل=وسيف ن يجب الراس قوة نصابه
ذوي عطيه شاربين الفناجيل=رمز الشجاعه في قبيلة عتابه
قوم على طرح المجوخ مغاليل=الجوخ تطرحها نهار الضبابه
على ظهور محملات المفاتيل=كم بيت شيخ اشلعن طنب بابه
من وقعة العصلا وجيل بعد جيل=تاريخهم ماحد ن بجاهل حسابه
لا جرها قشعان مافيه تاجيل=يشبعبها طير ن يحوم جنابه
فالعرفجيه ماش كذبه وتاويل=منها الذويبي مابقا لو زهابه
وعلى الدفينه يوم بقما زرافيل=سبع عقدا كل ن يوجه ركابه
معيض بن دحمان مع روجة الخيل=من شتوي بن عيون حصل ذهابه
وبخيت عند التوم جاله مفاعيل=فكه عقب قنان كشر بنابه
واهداء الحصان اللي تفل المجاديل=والفعل هذا ماله ايا مشابه
والبلط يوم الشول ينكفه بحيل=لحقو خراريص تشد العصابه
بالمارتي اكفاه صهدان مانيل=وام الحوير بشروها تنهابه
وبن مهلج شيخ شلوا المشاكيل=هندي ولد شايد برمحه رمابه
وفي مجلس بن فهيد مع دنة الهيل=فنجال درع مطر فاجر سرابه
مودع لقاح الخيل ترم المحاميل=جاه السلات وذاق سم الحرابه
والمجمعه تشهد نهار المحاصيل=فيه الدويش اودعه فاجر باصابه
خلته مايمش الليال المقابيل=باسباب اخو سكرا قضاها عيابه
هذاه موجز ماسردنا التفاصيل=عن عزوة ن تشبه لضلع اللهابه
اسم العطاوي سمعته فاقت سهيل=وكل ن شليويح العطاوي درابه


المذكورين فالقصيده

* وقعة العصلا وهي وقعه بين مطير وسليم من جهه والروقه من جهه وقادها القائد خضير بن قسام واطلق عليه راع العصلا ومن سلالته الشاعر المشهور بندر بن سرور بن مدرع العطاوي

* قشعان هو الامير قشعان بن عميره

* شتوي بن عيون هو العقيد شتوي بن منير بن عيون من الفراهده ومن اشجع فرسان ذوي عطيه
قتل معيض بن دحمان البقمي في معركة الدفينه على ذوي عطيه بقايدة بن جرشان بالقوم وقيادة بخيت العطاوي بذوي عطيه وهم الخراريص والمهادله والفراهده فقط ,

*هندي بن شايد هو الفارس هندي بن شايد بن مدرع من القساسمه قتل بن مهلج من امراء الشلاوا

*درع مطير الفارس تراحيب بن بصيص قتله فاجر السلات العطاوي بعد ماشرب فنجاله

* قطان البقمي من الدهمه طرحه بخيت العطاوي بعد محاولته لقتل التوم من الحفاه واخذ حصانه واهداه لساره الوازعيه

البلط هو امير قبيلة الدياحين اخذ ابل الخراريص واستردوها قبل ان تشرق الشمس وقتله منير بن صهدان من الخراريص وبشر الحوار اللي كان يحن على جرة امه سلمان اللواص من الخررايص

* الدويش هو فيصل الدويش اصابه العقيد فاجر بن شليويح العطاوي بعد ان شرب فنجاله وعاش عمره متاثرا الاصابه

العرفجيه معركه لذوي عطيه سلبو امير حرب الذويبي ولم يبقا له شي من حلاله فقد اخذو الصادره والمغبه والوارده في تلك الغزوه

[الكرمان]

والف نعم في ذوي عطيه وفعولهم اشهر من نار على علم والله يعطيك العافيه ع النقل الرئع

[راعي العصلا,,ابن مــــدرع]

والف نعم في ذوي عطيه وفعولهم اشهر من نار على علم والله يعطيك العافيه ع النقل الرئع



ماعليك زود طال عمرك ولاهنت ,