ياسلامي سلام ٍ غصب مدري غصيبة نواف العازمي رحمه الله وملفي المورقي [الأرشيف] - الهيـــــــــــــلا *** منتدى قبيلة عتيبة

مشاهدة النسخة كاملة : ياسلامي سلام ٍ غصب مدري غصيبة نواف العازمي رحمه الله وملفي المورقي

قاسي العتيبي

14-Apr-2012, 04:29 AM

هذه المحاورة من حفلة في دولة الكويت بحضور الشعراء

مطلق الثبيتي
ملفي المورقي
مبروك ابو ناب
نواف العازمي

وكان نواف العازمي ضايق من مطلق الثبيتي لأن مطلق رفض اللعب مع نواف
وللمعلومية كان نواف في بداياته
وهو هنا يلعب مع ملفي والخطاب موجه لمطلق

نواف العازمي
ياسلامي سلام (ن) غصب مدري غصيبة // والحقيقة لأجل رجـّال تحشم رجالي
راعي الرأي الأعوج مايمثل عتيبة // حسبي الله على الدنيا وسود الليالي

ملفي المورقي
مرحبا والسلام اللي كذا وش تبي به // كان ريحت نفسك فوق حمر الزوالي
إن هرجنا مصيبة وإن سكتنا مصيبة // وأنت بيـّن وراك علوم ياهملالي

نواف العازمي
قبل لا أكلمك وش بك ضمنت الغليبة // ليه لاشفتنا مناك يصلاك صالي
ياعتيبة عليكم هالسوالف معيبة // والهبايب تهب ولا تهز الجبالي

ملفي المورقي
لاتطب البلد مامعك ماتشتري به // لين حتى تحوش جنيه وألا ريالي
وأبك حنا موردت الرماح العطيبة // وأنت يالعازمي خلك بقرن الشمالي

نواف العازمي
القبيلة يجيها واحد (ن) تبتلي به // مثل ملفي ليا ميل عليه العقالي
ماظلمت الرجال ولي معزه وهيبة // وأنت فعلك تطق المكرفون وتلالي

ملفي المورقي
ملفي المورقي شاعر وألا أنت بطليبه // كان ركب الرشاء من فوق حدب المحالي
أنت يالعازمي جاء فيك شكة وريبة // لاتحرم حرام ولا تحلل حلالي

نواف العازمي
أنت شاعر خزامه ينقله من سبيبه // مانخليك تذن كل ما أذن بلالي
العلوم البعيدة ساع جاتك قريبة // مير روحي على ماقيل وألا تعالي

ملفي المورقي
راعي البندق اللي مايصيب الضريبة // ودي إنه يروح بعيد ماله ومالي
أنت مجروح مير الجرح جاله طبيبه // بين الأقصى ومن بين الرفيق الموالي

ابو عاتق

14-Apr-2012, 07:41 AM

مطلق شخصيته نادره وهيبته قويه

والله يرحمهم جميع ويطول في عمر أبو وافي

وشكرا لك ياقاسي ع النقل الموفق

ثابت الادله

14-Apr-2012, 02:22 PM

ملفي المورقي
مرحبا والسلام اللي كذا وش تبي به // كان ريحت نفسك فوق حمر الزوالي

بيت قمه ورد وافي من ابووافي

اختيار موفق تشكر عليه

محمد بن سمار الحنان

14-Apr-2012, 02:46 PM

قاسي العتيبي

14-Apr-2012, 03:20 PM

نواف بدا فالميادين عام 1988 والمحاوره هاذي عام 1993 وليست فالبدايات كما تفضلت ومطلق الله يرحمه لايري شاعريه في نواف وانا مؤيد لمطلق الله يرحمه ولسنا ببعيد عن هوشة نواف وحبيب في حفل اللواء محمد العفاسي والمتسبب فيها نواف الله يرحمه

بالنسبة لبداية نواف بالتحديد لا أعلم عنها ولكنه في ذلك الوقت يعتبر في بداياته حيث أنه لم يشتهر إلا في عام 1418هـ
بالنسبة لمطلق الثبيتي قد رفض اللعب مع عدة شعراء ومنهم

عبدالله العير وقدلعب مستور مع العير يوم العير يقول أنا الليلة المعطى وأنا الليلة المحروم

عبدالله بن شايق وقد لعب معه صياف يوم بن شايق يقول ألا يافكرتي يانكرتي فالثعلب الحواص

هل العير وبن شايق ليسوا شعراء ؟؟؟؟

محمد بن سمار الحنان

14-Apr-2012, 03:53 PM

لا ياقاسي ماهذا القصد القصد طال عمرك الشاعريه اما امتناع مطلق الله يرحمه عن العير وابن شايق انا مؤيد له لانهم يدخلون في امور لايفضلها وليست الشاعريه فهم شعار

العاقل1

14-Apr-2012, 06:58 PM

الاخ الحنان اذا كنت لاترى شاعريه بنواف العازمي الله يرحمه
فانت ضلمت نفسك ولكن قل انه لاينال اعجابك
والدليل على شاعرية نواف شهدله كبار الشعراء وهو في بداياته
ومنهم الرياحي و صياف رحمهم الله ومستور العصيمي وابومشعاب وغيرهم

قاسي العتيبي

14-Apr-2012, 07:38 PM

محمد بن سمار الحنان ممكن تقرأ هذه المحاورة بين فيصل الرياحي ونواف العازمي رحمهم الله
وهي المحاورة التي شهد فيها الرياحي لنواف اللي تقول أنت ماهو شاعر

نواف العازمي..
مرحبا بلي حضر بالنيابه عن حبيب .... من هجوسن كلمت الحق قام وقالها
يالرياحي بعد جينا ودرجك النصيب ..العلوم الوافيه في صدور ارجالها

فيصل الرياحي..
والبقاء بك عدما تشرق الشمس وتغيب ..والرجال الي لهم روس حالي حالها
اجتمعنا والتقينا ولافينا غريب ...... وسعوا ميدانها حددوا منزالها

نواف العازمي ..
بارك الله في رجالن تزيدالطيب طيب ...اذكر الي يجزي الناس حسب اعمالها
المنازل عاليه مابهاشكن وريب .... والحبال ان عقدوها يجي حلالها

فيصل الرياحي
العلوم الهاهدف والجروح الها طبيب ...والبنوك مقيدن قرشها وريالها
شايفن بعض العرب مروحن له ريح ذيب ...والذيابه كيف حالك وكيف احوالها

نواف العازمي....
العلوم الها هدف والنظر ماهوقريب ...ما يميز ليلة العيد غير هلالها
انت تضحك لاكن الذيب في وسط القليب ...والذيابه يختلف لونها واشكالها

فيصل الرياحي...
ياحليل البندق الي مراميها تصيب ...ربحت من جابها ربحت من جالها
اعتبرها لك شهاده ولا فالصدق عيب ...مير خلك عم ليلى وانا رجالها

نواف العازمي...
انت بد الأنبياء ماذكرت الا شعيب ...والبقيه ما لقى حملتن يشتالها
يتعب المسلم ويشهد له الرب الرقيب ...وانت خذ مع حسنتك مثلها وامثالها

فيصل الرياحي ...
اصلح النيه وتلقابها حظ ونصيب ...دوبنا نسمع با أذاعة سبأ وارسالها
جعل عمرك عمر نوح وعسى راسك يشيب ...مير سير بالجزيره وعدجبالها

نواف العازمي....
يالرياحي ما يجيد الادب غير الاديب ...والبروق الي تكاشف عليك خيالها
ان حضرنا قرب الحوض واشرب يا شريب ...كلمت الشيبان جت في قلوب اعيالها

فيصل الرياحي .....
مرحبا بالبرق والسيل والوقت الخصيب ...اقنعوا بالعافيه والعبو موالها
زانت زهور الخزامى وفاحت ريح طيب ...مير معها نبت ثاني ماهيب لحالها

نواف العازمي ...
انت لولا شبت النار ما قلنا شبيب ...وان حضر شباب يجلس شبيب بجالها
كانها صعبه ترى ما على ربك صعيب ...انت قدم دلتة الهيل مع فنجالها

فيصل الرياحي....
كل ما ناديت جساس ناداني كليب ...وانتهت حرب البسوس وعرفت ابطالها
ما تزين الزبده الا ليا خض الحليب ...عشت يا نواف بين الرحى واثفالها

نواف العازمي...
كفت الميزان تخلص طليبن من طليب ...ما يحس بلقمة السم غير اكالها
الرياحي با أسفل الضلع في بطن الشعيب ...ما درت به سربت القوم لين اومى لها

فيصل الرياحي...
العلوم مصلحة وش تودي وش تجيب ...حولتلك فوق راسك قبل ترقى لها
بكره الجمعه وتسمع ويش يقول الخطيب ...يا لعلك تحفظ الخطبه اللي قالها

نواف العازمي ...
لا تجاهد مع يهودن علامتها الصليب ...ان لقيت الروس مالك ومال اذيالها

و سلامتكم

خافي الضمير

14-Apr-2012, 08:32 PM

شكرا لنقلك
ولكن الابيات ناقصة

http://www.youtube.com/watch?v=6ldNgE7Qo-o

عزام العصيمي

14-Apr-2012, 09:29 PM

نواف العازمي شاعر مايبي شهادة احد الله يرحمة

لا تجرنا الحميا ننكر شاعريته عشان مطلق الله يرحمه مالعب معه

محمد بن سمار الحنان

14-Apr-2012, 10:01 PM

انا اتكلم عن سبب امتناع الثبيتي واضح كلامي

نبض الكلام

16-Apr-2012, 06:19 AM

رحمة الله على الشاعر نواف العازمي

والله يطول بعمر ملفي

مشكور اخي الكريم على هذا القاف الرائع