## ادخل وعطنا اجمل قصيدة سمعتها ##

[الوجيه]

السلام عليكم ورحمة الله وبركاته

مسيتم بالخير جميع

كيف حالكم يا عيال العم انشاء الله انكم طيبين ومن الله قريبين

موضوع طرا في بالي وقلت خلني اشاركم فيه هاليوم

هو ان كل واحد (ن) يدخل في هذا الموضوع

يعطينا أجمل قصيدة مرت علاه

وبكذا نجمع لنا كم قصائد جميلة في هذا الموضوع

وبالتوفيق انشاء الله

وقصيدتي الي اعجبتني انشاء الله جايه فالطريق :)

ودمتم لنا ذخر وفخر


أخوكم

الوجيه

[عطر الأثير]

السلام عليكم ورحمة الله وبركاته . . .
في البداية اوجه كل الشكر لأعضاء المنتدى المتميزين . .وتقبلوااا مني هذه المشاركه البسيطه
هذه القصيدة لشاعر خالد الذيابي. . .
للطيبة هيبة وللعز تيجان ,,
وللشعر رواد وللقول مضمون
والادمي قبل الشعر قلب ولسان ,,
مايرفعه شعره معا من يغنون
ما قيل إبه رجل تمرجل بقيفان ,,
حتى ولو يشهره ينقال ما لون
لوالقصيد يغير أحوال الانسان ,,
ما كان بالشعار صاحي ومجنون
ولو الرجولة بالقوافي والأوزان ,,
كان العذارا للرجولة ينالون
سبحان رب معتلي فوق سبحان ,,
قد قال بأن الاغلبية يهيمون
ملا رحمه الرب لاشك خسران ,,
( هذا الصحيح وقولوا اللي تقولون )
يارب تجعل لي عن النار مزبان ,,
يامخرج من ظلمة البحر ذا النون
هذا ونور الصبح للان ما بان ,,
وأصبحت ويا الليل عاشق ومفتون
الليل في عتمة ظلامه ليا حان ,,
سجة فكر للي من الوقت مشحون
أرتاح عن صخب المدينة والاشجان ,,
وانادم النجمات عن كل مكنون
وأشيل جزل القاف وأجر الالحان ,,
وأقطف ثمر ما لاق من كل موزون
على مدار الفكر في كل الالوان ,,
أطلقت لي فكر من العام مسجون
( حنا جبلنا للصعيبات عتبان ) ,,
رجالنا يسوا من القوم مليون
لاعلى الشموخ إلنا مهابة وعنوان ,,
بالسيف سطرناة من خلقت الكون
قبيلة في فعلها يفخر الزان ,,
تشهد بها العدوان وبليس ملعون
عتبان ناصل في هوازن وعدنان ,,
وحنا خوال المصطفى خير مأمون
برعى الخطر في شف حلوات الالبان ,,
تأمن بأسامينا وحنا لها عون
يانجد ياكم طاح بك روس شجعان ,,
اللي بصكات الحرايب يهلون
ياكثر ما ضم الثرا فيك شيخان ,,
وكم راس قرم في صحاريك مدفون
خلي عشا للسبع والذيب سرحان ,,
مضافهم بأفعالنا كل دنــــــدون
يا نجد ما جيناك للدار ضيفان ,,
ولا تزعمنا باتوات وفــــــــنـــون
جيناك بسيوف تعزوى بفرسان ,,
اللي على حبك للارواح يهدون
قبايل تسكنك ماهــــم بــرديـــان ,,
لكنهم بالمعركة مـــن ينــاحــون
تنزحوا من عقــب روغــات الاذهـــان ,,
من فعل هنــدي للارقـــاب مسنــون
ورفرف علم عتاب في كل الاركان ,,
وزاحت قبايل نجد عن نجد بضعـــون
ما سمــوا الهيــــلا تمازيح وإحســـان ,,
ألا بفعل يجعل الخصـــم مطـــــعــــــون
فعايل يشهــد بهــــا الانس والجــــان ,,
وعيب على هرج بــــلا فعل مقـــــــرون
ويشهــــد بهـا نجد المسمـى والاوطــان ,,
وأهل البصاير بالتواريــــــخ يقــــــرون
هذا الصحيح محكحـــك بكل ميـــــزان ,,
وهرج بليـــــا ثبــــت لا طعـــم لا لـــون
وتبقى القبايل شامخه دون نقصــــــــان ,,
ومدحى لربعي ما ينقص مـــن الشـــــون
أبفتخر وأنثر مــــن القــــول ريحـــــان ,,
ومن لامني يعيـــش ويمـــــوت مغبـــون
مانـــي نـــديم لكـــل غـــاوي وجبـــــان ,,
اللي علاقتهــــم كمـــا سيـــر مدهــــــون
علاقة مــــــــا تنتـــوثق بســـيســـــان ,,
تصبـح كمــا جمــر علـــى راس غليون
أهل الرخـــا لـــو تعتلــى كـــل ميــــدان ,,
غسلتهم عن طرقتي غســـــل صابــون
أنـــا نديــــمــي لــلــوازم كحــيــــــــلان ,,
راس ما يقبل منـــزل الــذل والهـــــون
في لازمة أسوق لــه غـــال الاثمــــــــان ,,
وفي لازمي يصبح لي حصون وحصون
له بالغلا في داخل الصــــــدر صيــــــوان ,,
وأنا أدري إني داخل القلب مصيون
قريــب وألا بعـــيد فالامــــــر سيــــــــان ,,
ما عنــه تصــديد ولا عنـــه مرهـــون
ياليــــل في داجيــــك للشعــــر مسكــــان ,,
حيث الهدو في عالمـــك دوم مسكـــون
أرعـــــاك لوحــة تنتظـــر رســـم فنـــــان ,,
وأرسم على خدك هواجيس وشجـــون
وألبســك مـــن فــاخــر الشــعــر تيجـــــان ,,
فيهـا مـن الهوجــــاس للفكر مضمـــون


خالــــــص تحياتـــــــــي
عطر الأثيــر

[أبو مرحبا]

الوجيه

لاهنت طال عمرك على الموضوع

اما القصيدة :
فهي قصيدة الشاعر/ بديوي الوقداني رحمه الله


ايامنا والليالي كـم نعاتبها *** شبنا وشابت وعفنا بعض الاحوالي

[الطاحوس]

الوجيه

موضوع رائع ومجهود طيب

اما بالنسبه لي مافيه قصيده محدده

لكن كثييييييره القصائد الجميله


وهذي قصيدي بديوي الوقداني اللي ذكرها قحص


..............




ايامـنـا والليـالـي كــم نعاتبـهـا
شبنا وشابت وعفنا بعـض الاحوالـي
تاعـد مواعيـد والجاهـل مكذبـهـا
واللي عرف حدها مـن همهـا سالـي
ان اقبلـت يـوم ماتصفـي مشاربهـا
تقفي وتقبل وما دامـت علـى حالـي
فـي كـل يـوم توريـنـا كبايبـهـا
واليوم الاول تراه احسن مـن التالـي
ايـام فـي غلبهـا وايــام نغلبـهـا
وايـام فيهـا سـوى والدهـر ميالـي
جربت الايـام ومثلـي مـن يجربهـا
تجريب عاقـل وذاق المـر والحالـي
نضحك مع النـاس والدنيـا نلاعبهـا
نمشي مع الفي طـوع حيـث مامالـي
كـم مـن علـوم وكـم اداب نكسبهـا
والشعـر مـازون مثقـال بمثقـالـي
اعرف حروف الهجا بالرمز واكتبهـا
عاقل ومجنون حاوي كـل الاشكالـي
لكـن حظـي ردي والـروح متعبهـا
مافادني حسـن تأديبـي مـع أمثالـي
ان جيت ابي حاجـة عـزت مطالبهـا
العفو ما واحد في النـاس يـا والـي
قـوم ليـا جيتهـا رفـت شواربـهـا
بالضحك وقلوبها فيهـا الـردى كالـي
وقوم ليـا جيتهـا صكـت حواجبهـا
وابدت لي البغض في مقفاي واقبالـي
ما كني الا اسمـوي حـال مغضبهـا
والكل فـي عشرتـه ماكـر ودجالـي
يا حيـف تخفىامـور كنـت حاسبهـا
والاهل واصحابنـا والـدون والعالـي
والروح وش عذرها في ترك واجبهـا
راح الحسب والنسب في جمع الاموالي
نفسي تبى العز والحاجـات تغصبهـا
ترمـي بهـا بيـن اجاويـد وانذالـي
المـال يحيـي رجـال لاحيـاة بهـا
كالسيل يحيي الهشيـم الدمـدم البالـي
عفت المنازل وروحـي يـوم اجنبهـا
منها غنيمة وعنهـا البعـد اولـى لـي
لاخير في ديرة يشقـى العزيـز بهـا
يسشي مع الناس فـي هـم واذلالـي
دار بهـا الخـوف دوم مـا يغيبـهـا
والجوع فيها ومعها بعـض الاحوالـي
جوعـى سراحينهـا شبعـى ثعاليبهـا
الكلـب والهـر يقـدم كـل ريبالـي
عز الفتى راس مالـه مـن مكاسبهـا
يا مرتضي الهون لا عـز ولا مالـي
دللت بالروح ليـن ارخصـت جانبهـا
وان عتيبـي عريـب الجـد والخالـي
قوم تـدوس الافاعـي مـع عقاربهـا
ولهـا عزايـم تهـد الشامـخ العالـي
خل المنـازل غـراب البيـن يندبهـا
يبكـي عليهـا بدمـع العيـن هطالـي
لاتعمـر الـدار والقـلات تخربـهـا
بيع الردي بالخسـارة واشتـر الغالـي
ماضاقت الارض وانسـدت مذاهبهـا
فيها السعـة والمراجـل والتهفلالـي
دار بدار وجيـران بجيـران نقاربهـا
وارض بارض واطـلال بـا طلالـي
والناس اجانيب ليـن انـك تصاحبهـا
تكـون منهـم كمـا قالـوا بالامثالـي
الارض لله نمشـي فــي مناكبـهـا
والله قــدر لـنـا ارزاق واجـالـي
حـث المطايـا وشرقهـا وغربـهـا
واقطع بهـا كـل فـج دارس خالـي
واطعن نحـور الفيافـي فـي ترايبهـا
وابعد عن الهم تمسـي خالـي البالـي
مـن فـوق عمليـة تقطـع براكبـهـا
فدافـد البـيـد درهــام وزرفـالـي
تبعـدك عـن دار قـوم ودار تقربهـا
واختـر لنفسـك وللمنـزال منزالـي
لو مـت فـي ديـرة قفـرا جوانبهـا
فيها لوطي السبـاع الغبـس مدهالـي
اخيـر مـن ديـرة يجفـاك صاحبهـا
كـم ذا الجفـا والتجافـي والتعلالـي
دوس المخاطر ولا تخشـى عواقبهـا
تسعى على الرزق ماحـت للاشبالـي
والشمس في برجها والغيـم يحجبهـا
قفي وتقبل لها فـي العـرش مجدالـي
رب السمـاوات يامحصـي كواكبهـا
يا مجري السفن في لجـات الاهوالـي
ضاقت بنـا الارض واشتبـت لهايبهـا
والغيـث محبـوس يـارزاق ياوالـي
يالله مـن مـزنـة هـبـت هبايبـهـا
رعادها بات له فـي البحـر زلزالـي
ريح العوالـي مـن المنشـا تجاذبهـا
جذب الدلي من جبا مطويـة الجالـي
ديمومـة سبلـت والاخـت ذوايبـهـا
وانهل منهـا غزيـر الوبـل همالـي
تسقي ديـار شديـد الوقـت حاربهـا
ما عاد فيها لبعـض النـاس منزالـي
يـا جاهـل اسمـع تماثيـل مرتبـهـا
فيها معانـي جميـع القيـل والقالـي
مثـل المحابيـب زادت فـي قوالبهـا
في صرفها زايدة عن قـرش وريالـي
يـارب توبـه وروحــي لاتعذبـهـا
يـوم القيامـة اذا ماضاقـت اعمالـي
وازكي صلاتي على المختار واوهبهـا
شفيعنـا يـوم حشـر فيـه الاهوالـي

[بن مكرز المقاطي]

مشكور أخوي على هالمشاركة الطيبة ولكن هناك قصائد عدة من أروع القصائد لشعراء عتيبة الغنيين عن التعريف وبذلك تحتار .
ولكن أنا أخترت لكم هالقصيدة للشاعر عايض بن عوض الذيابي

يــا رجــل عــن درب المقفين كـفــي
مــا ضـاقـت الـدنـيـا تـراهـا وسـيعـه
لا تـلـحـقـيـن الـلـي مـصـيـره مـقـفي
خـــلـيـه فــي مـسـعـاه يـقـلـع قـليعـه
و يانفس جوزي و استريحي وعفي
خـلـيـك يـالـنـفـس الـعـزيـزه رفـيعـه
الـبـعـد عـن بـعـض المخاليق شـفـي
ومــن بـاعــنـا لـو كـان غـالي نبيعه
أنــا رفـيـقـي مــن يـوقــف بـصـفــي
يـقـضـي اللزوم ولا يـعـرف القطيعـه
وبـصـفـي الرجل عـن اللزوم متخفي
ومـن يـتـرك الـواجـب قـلـيـل نفـيعـه
الـلـي بـعـيـد عـن الـوفـا مـا يــوفــي
يـصـعـب عـليـه الطيب مـا يستطيعـه
الــرجـل بـيـن والـتـجـارب تــكــفــي
يـكـفـيـك منطوقه وتـعـرف طـلـيعـه
أمــا كـفــوا وألا لـقـيـتــه مــصـفــي
جـسـم عـلـى هـيـكـل سـراب بـقيـعـه

[أسعدي الزلفي]

هذي قصيده اعجبتني .. واتمنى ان تنال اعجابكم ..
والحقيقه ما يحضرني قايلها ..

موضوع رائع يا الوجيه .. وننتظر البقيه


والله ما اشوف اضيَق على راعي الطيب = مـن مجلـس اللـي يبتنيـه ويخونـه
اللـي ورى بيبانـه الشـك والـريـب = واهل الردى مثل السلَـق فـي ركونـه
حتى ايش لو راعيـه لحيـه واشانيـب = " جزمـه " ورى بابـه وثنتيـن دونـه
يـا الطيبيـن الطِيـب عالـي مراقيـب = تتعـب قـدم راقيـه نظـرة عيـونـه
ماهـوب جهـل وهـدّةٍ بالمشاعـيـب = أخـلاق دِيـن وقـوّ بـاس وليـونـه
والرزق ما اخلفـه اختـلاف الأساليـب = كنـزٍ ملايـكـة العـزيـز يحمـونـه
والعبد يسعـى فـي نصيـب ومكاتيـب = والنـاس فالثنتـيـن مــا ينفعـونـه
يا الآدمي وش لـك ببعـض المطاليـب = تطلـب بشـر.. رب البشـر يطلبونـه
مولاك مـا ولّـى النصيـب المناصيـب = واللـوح حـرفٍ فيـه مـا يخلفـونـه
شف من يحوش الشاة ..والشاة للذيـب = وشف من زرع واسقى وخابت ظنونـه
يـا الآدمـي مـا فالمكاتيـب ألاعيـب = النفـس نزّهّـا ومنهـجـك صـونـه
دام البيـاض أكبـر عـداه المغاريـب = العـز اكيـد اكبـر عـداه المهـونـه
واكبـر كلافـه للنجيـب المواجـيـب = واخطر سلاح النـذل ضحكـة سنونـه
والدَّين قضّـاي اللـوازم مهـو عيـب = العيـب سـبّ مـدوّره فـي حتـونـه
وثلاثـة اربـاع الهنـاديـب اكـاذيـب = نـاسٍ يحَفظـون الحكـي ويحَكـونـه
لا يخلفك مـن يحفـظ الناقصـه غيـب = نصيحـة اصحابـك تـراهـا معـونـه
والنصـح ماهـو مسكـةٍ بالتلابـيـب = الناس نـوش الهـوش مـا يقبلونـه
ون عنّـدوا منتـب طبيـب الأصاويـب = لا تحـرم العالـم مـن اللـي يبـونـه
جنّب ويبدي لك على الطِيـب أصاحيـب = سـوق الغـلا لابـد يبـدي زبـونـه