محمد الربيقي وسفر الدغيلبي محاورة "العيد الرابع"

[أحمد المويعزي]

السلام عليكم..
مساء الخير..

وكل عام وانتم بخير..


من محاورة حفل اجتماع قبيلة الصلاح من حرب في قرية "النبقيه"بالقصيم

الموال كتابي وبالفيديو


محمد الربيقي:

عند ربع"ن"لهم بالطيب صوله وجوله
كل علم"ن"يشرفنا مقاله نقوله
والدروب مخبوره والجمال معقوله
مايروس النجوم الا سهيل اليماني

الا ياسفر سو العلاقه مع المطران=ترى الوضع يستوجب علاقات سريه
يقولون في وقت"ن"مضى كان ياماكان=تلين الجبال من النجوم السماويه

سفر الدغيلبي:

عيدكم ياهل النبقيه سنين عايد
نعم ياعزوة الصلاح وقت الشدايد
طيبين الفعول وكاسبين الفوايد
مايروس النجوم الا سهيل اليماني

انا والمطيري بالدير كلنا جيران=علاقاتنا بشهود وحدود شرعيه
سلامات يامحمد ورى خاطرك زعلان=انا ما اخبر اخلاق الشبابي تجاريه

محمد الربيقي:

لاتقول الامور مدبره ومحكومه
السوالف لها شده ورده وقومه
مير ابنشد سفر تال السنه عن علومه
مايروس النجوم الا سهيل اليماني

الا ياعتيبي ماش شعله بلا دخان=وانا شايف الاوضاع ماهي طبيعيه
ترى يضحك الشبان مايزعل الشيبان=ولافيه راحه دام الاوضاع مقفيه

سفر الدغيلبي:

الامور محكومه وانت خلك مريح
لاتصيح على روس العرب لاتصيح
اثر عندك بلا وانا احسب انك صحيح
مايروس النجوم الا سهيل اليماني

تبى تشتكيني روح دور حقوق انسان=واذا صدقو لك هات عسكر ودوريه
بعد ما امتلى بطنك من الخوخ والرمان=تبي لك مطار"ن"عالمي بالشماسيه

محمد الربيقي:

من يقود البعير شعيل ولا يسوقه
كل واحد يفكر في نتايج طروقه
وانت واقف تلفت بين برقى وروقه
مايروس النجوم الا سهيل اليماني

تناظر ببن سلمي وتضحك لابن عتقان=وتنصب بثوبك والصناعه محليه
ترى كلها دعوى وطنيه رفيعه شان=مطار الشماسيه مطار البجاديه

سفر الدغيلبي:

كان ولياه للمعروف والطيب ناكر
سفرو حظرة ابن عبيد من صبح باكر
وازهلو كرسي الرحله وقص التذاكر
مايروس النجوم الا سهيل اليماني

محمد يفرقنا وحنا نعيش اخوان=تشيع وانا ما اخبر في حرب شيعيه
انا اخبرك هاك الوقت شاوي وراعي ضان=وش يعرف الشاوي حياة الرفاهيه

محمد الربيقي:

لاتسوون ياحظرة عتيبه سوايا
لو نفتش قضاياكم ياكثر القضايا
تقلبون الصحيح وتتهمون البرايا
مايروس النجوم الا سهيل اليماني

ترانا على سنة محمد نسل عدنان=ولو من كلامي يزعلون الحراميه
وانا أعرفك ابن برقى مثل طير ابن برمان=ما سنعت قوم ولا تسميت برعيه

سفر الدغيلبي:

القضايا تشرف والفعايل تجمل
يوم بعض العرب ينوي وهو ما يصمل
حطبه ما يكمل والجمر مايكمل
مايروس النجوم الا سهيل اليماني

ياحربي ياوجه الخير لاتقرب العتبان=تراهم ذرى"ن"لك كان هبت شماليه


http://www.youtube.com/watch?v=PrrtiPABmJQ

[محمد الذيابـــي]

,,

طاروق رائع جداً

لكن ماهي اسباب عدم حضور محمد الربيقي لمناطق الحجاز..


,,,,,

[مهجرس]

,,

طاروق رائع جداً

لكن ماهي اسباب عدم حضور محمد الربيقي لمناطق الحجاز..


,,,,,

هلابك يالذيابي
اسباب عدم حضور الربيقي بالحجاز تعود لأرتباطه بعمله حيث كان يعمل بالسلك العسكري و فرصته نادره جداً.

اما الآن اعتقد انه تفرغ بعدما تم تعيينه معلماً بمنطقة الرياض ... و خلال الصيفيه الماضية أحياء الربيقي
اكثر من ست 6 محاورات بالمدينة المنورة و محافظة جـــــــدهـ فقط . و انتظروه الصيفية القادمة بالحجاز

[عايض مثقاب الزراقي]

محاورة فتل ونقض

لا هنت يالغالي على النقل

[برنس العتيبي]

الف شكر ع النقل وبجد محاوره بين عمالقه وانا اعتبرها سوبرستار بكل شي محاوره ناريه واخراج لها جيد كذالك الصفوف باين انهم فنانين بس الربيقي شاعر خطير والايهون ابو سعد

[الحافي 1]

الحقيقه الصفوف حقين دبكه هل الحفله بسوريه
المحاوره دون نتايج شعريه انما مجدال بدون معنى

[مهجرس]

الحقيقه الصفوف حقين دبكه هل الحفله بسوريه
المحاوره دون نتايج شعريه انما مجدال بدون معنى


اترك الاستهزاء بالرجال يالحافي

و لاتشبه الرجال و فن من الفنون بالسعودية بدبكات سوريا اللي انت تبخصها

[الحافي 1]

اترك الاستهزاء بالرجال يالحافي

و لاتشبه الرجال و فن من الفنون بالسعودية بدبكات سوريا اللي انت تبخصها

يا خي شوفهم وحكم ولاداعي لزعل

[برنس العتيبي]

الحقيقه الصفوف حقين دبكه هل الحفله بسوريه
المحاوره دون نتايج شعريه انما مجدال بدون معنى

صراحه ردك غريب من انت حتى تقيم الشاعر الكبير العملاق سفر الدغيلبي اذا المحاوره دون نتايج شعريه ماقول غير الله يهديك والحربي يعتبر نجم وكثير شفت محاورت له قويه يعني بالعربي مافيه غيره وغير راشد السحيمي بس انا ابهديك التوقيع لانه يركب عليك وع شاكلتك

[غريب الزمن]

إخواني لا تأخذكمـ العصبيـــه لأي شاعر
إلــى المهاترات..

صحت ألسنة الشعراء

نفس المحاورهـ عموماً ناجحه ناجحــــــــــه..

والمــوال هــذا بين الربيقي وأبو سعـــــــــــد
مبتداهـ على بينـــه وأخرهـ ذهب إلى منحى أخــــــــــــــر..

أخي أحمد تُشكر على جهودكـ

ولكن لا زلت أقــــــــــــــــول وعن حال الكثيرين ممن يرون تصويركـ



هناكـ ملاحظــه((وغيركـ معلمـ))

من فنيات التصوير بالفيديو وخصوصاً بالجوال
اسكــات من حوووووووولكـ ((صوتهمـ طاغي على صوت من تسجل))
بعد التسجيــــــل سولفوا واعذرني على هذه الكلمه..

ملاحظــه تقبلها

ولكـ الشكر

[مهجرس]

يا خي شوفهم وحكم ولاداعي لزعل

اشوف انها صفوف رائعة و حفلة اروع و شعراء ماعليهم كلام

و الصفوف حقيقة اعجبتني بقوووووووووووووووووة
و من افضل الصوف بالقصيم و الرياض

[أحمد المويعزي]

محمد الذيابي:

أعطاك الاجابه مهجرس

شكرا لكـ على المرور ولاهنت يالغالي


مهجرس:

شكرا لكـ على الاجابه الكافيه والوافيه
ولاهنت على مرورك


عايض الزراقي:

شكرا لكـ يالغالي على المرور

برنس العتيبي:

شكرا لكـ يالغالي على المرور
وجهة نظر نحترمها


الحافي1:

سوريا الآن بمشاكل وعسى الله ينصرهم على الطاغيه ولا أعتقد يجتمع قتل ودبكه..
أما المحاوره وجهة نظر ونحترمها..

شكرا لكـ على المرور يالغالي

غريب الزمن:

العفو يابعدي مازينت الا الواجب..

أما التصوير:
من أصعب الاشياء أقول لأي أحد اسكت لأني ما أعرفهم فلذلك من الصعب اسكاتهم..
أما اللي معي يمشون على قانون رياضي ^_^

شكرا لكـ من القلب على المرور وعلى النصيحه يالغالي..